Utshovঅধ্যায় 329
329.1
অর্জুন উবাচ
অগ্নীষোমৌ কথং পূর্বমেকয়োনী প্রবর্তিতৌ
এষ মে সংশয়ো জাতস্তং ছিন্ধি মধুসূদন
329.2
শ্রীভগবানুবাচ
হন্ত তে বর্তয়িষ্যামি পুরাণং পাণ্ডুনন্দন
আত্মতেজোদ্ভবং পার্থ শৃণুষ্বৈকমনা মম
329.3
সংপ্রক্ষালনকালেঽতিক্রান্তে চতুর্থে যুগসহস্রান্তে
অব্যক্তে সর্বভূতপ্রলয়ে স্থাবরজঙ্গমে
জ্যোতির্ধরণিবায়ুরহিতেঽন্ধে তমসি জলৈকার্ণবে লোকে
তম ইত্যেবাভিভূতেঽসংজ্ঞকেঽদ্বিতীয়ে প্রতিষ্ঠিতে
নৈব রাত্র্যাং ন দিবসে ন সতি নাসতি ন ব্যক্তে নাব্যক্তে ব্যবস্থিতে
এতস্যামবস্থায়াং নারায়ণগুণাশ্রয়াদক্ষয়াদজরাদনিন্দ্রিয়াদগ্রাহ্যাদসংভবাত্সত্যাদহিংস্রাল্ললামাদ্বিবিধপ্রবৃত্তিবিশেষাৎ
অক্ষয়াদজরামরাদমূর্তিতঃ সর্বব্যাপিনঃ সর্বকর্তুঃ শাশ্বতাত্তমসঃ পুরুষঃ প্রাদুর্ভূতো হরিরব্যয়ঃ
329.4
নিদর্শনমপি হ্যত্র ভবতি
নাসীদহো ন রাত্রিরাসীৎ
ন সদাসীন্নাসদাসীৎ
তম এব পুরস্তাদভবদ্বিশ্বরূপম্
সা বিশ্বস্য জননীত্যেবমস্যার্থোঽনুভাষ্যতে
329.5
তস্যেদানীং তমঃসংভবস্য পুরুষস্য পদ্ময়োনের্ব্রহ্মণঃ প্রাদুর্ভাবে স পুরুষঃ প্রজাঃ সিসৃক্ষমাণো নেত্রাভ্যামগ্নীষোমৌ সসর্জ
ততো ভূতসর্গে প্রবৃত্তে প্রজাক্রমবশাদ্ব্রহ্মক্ষত্রমুপাতিষ্ঠৎ
যঃ সোমস্তদ্ব্রহ্ম যদ্ব্রহ্ম তে ব্রাহ্মণাঃ
যোঽগ্নিস্তত্ক্ষত্রং ক্ষত্রাদ্ব্রহ্ম বলবত্তরম্
কস্মাদিতি লোকপ্রত্যক্ষগুণমেতত্তদ্যথা
ব্রাহ্মণেভ্যঃ পরং ভূতং নোত্পন্নপূর্বম্
দীপ্যমানেঽগ্নৌ জুহোতীতি কৃত্বা ব্রবীমি
ভূতসর্গঃ কৃতো ব্রহ্মণা ভূতানি চ প্রতিষ্ঠাপ্য ত্রৈলোক্যং ধার্যত ইতি
329.6
মন্ত্রবাদোঽপি হি ভবতি
ত্বমগ্নে যজ্ঞানাং হোতা বিশ্বেষাম্
হিতো দেবেভির্মানুষে জনে ইতি
নিদর্শনং চাত্র ভবতি
বিশ্বেষামগ্নে যজ্ঞানাং হোতেতি
হিতো দেবৈর্মানুষৈর্জগত ইতি
অগ্নির্হি যজ্ঞানাং হোতা কর্তা
স চাগ্নির্ব্রহ্ম
329.7
ন হ্যৃতে মন্ত্রাদ্ধবনমস্তি
ন বিনা পুরুষং তপঃ সংভবতি
হবির্মন্ত্রাণাং সংপূজা বিদ্যতে দেবমনুষ্যাণামনেন ত্বং হোতেতি নিয়ুক্তঃ
যে চ মানুষা হোত্রাধিকারাস্তে চ
ব্রাহ্মণস্য হি যাজনং বিধীয়তে ন ক্ষত্রবৈশ্যয়োর্দ্বিজাত্যোঃ
তস্মাদ্ব্রাহ্মণা হ্যগ্নিভূতা যজ্ঞানুদ্বহন্তি
যজ্ঞা দেবাংস্তর্পয়ন্তি দেবাঃ পৃথিবীং ভাবয়ন্তি
329.8
শতপথে হি ব্রাহ্মণং ভবতি
অগ্নৌ সমিদ্ধে স জুহোতি যো বিদ্বান্ব্রাহ্মণমুখে দানাহুতিং জুহোতি
এবমপ্যগ্নিভূতা ব্রাহ্মণা বিদ্বাংসোঽগ্নিং ভাবয়ন্তি
অগ্নির্বিষ্ণুঃ সর্বভূতান্যনুপ্রবিশ্য প্রাণান্ধারয়তি
অপি চাত্র সনত্কুমারগীতাঃ শ্লোকা ভবন্তি
329.9
বিশ্বং ব্রহ্মাসৃজত্পূর্বং সর্বাদির্নিরবস্করম্
ব্রহ্মঘোষৈর্দিবং তিষ্ঠন্ত্যমরা ব্রহ্ময়োনয়ঃ
329.10
ব্রাহ্মণানাং মতির্বাক্যং কর্ম শ্রদ্ধা তপাংসি চ
ধারয়ন্তি মহীং দ্যাং চ শৈত্যাদ্বার্যমৃতং যথা
329.11
নাস্তি সত্যাত্পরো ধর্মো নাস্তি মাতৃসমো গুরুঃ
ব্রাহ্মণেভ্যঃ পরং নাস্তি প্রেত্য চেহ চ ভূতয়ে
329.12
নৈষামুক্ষা বর্ধতে নোত বাহা; ন গর্গরো মথ্যতে সংপ্রদানে
অপধ্বস্তা দস্যুভূতা ভবন্তি; যেষাং রাষ্ট্রে ব্রাহ্মণা বৃত্তিহীনাঃ
329.13
বেদপুরাণেতিহাসপ্রামাণ্যান্নারায়ণমুখোদ্গতাঃ সর্বাত্মানঃ সর্বকর্তারঃ সর্বভাবনাশ্চ ব্রাহ্মণাঃ
বাক্সমকালং হি তস্য দেবস্য বরপ্রদস্য ব্রাহ্মণাঃ প্রথমং প্রাদুর্ভূতা ব্রাহ্মণেভ্যশ্চ শেষা বর্ণাঃ প্রাদুর্ভূতাঃ
ইত্থং চ সুরাসুরবিশিষ্টা ব্রাহ্মণা যদা ময়া ব্রহ্মভূতেন পুরা স্বয়মেবোত্পাদিতাঃ সুরাসুরমহর্ষয়ো ভূতবিশেষাঃ স্থাপিতা নিগৃহীতাশ্চ
329.14
অহল্যাধর্ষণনিমিত্তং হি গৌতমাদ্ধরিশ্মশ্রুতামিন্দ্রঃ প্রাপ্তঃ
কৌশিকনিমিত্তং চেন্দ্রো মুষ্কবিয়োগং মেষবৃষণত্বং চাবাপ
অশ্বিনোর্গ্রহপ্রতিষেধোদ্যতবজ্রস্য পুরংদরস্য চ্যবনেন স্তম্ভিতো বাহুঃ
ক্রতুবধপ্রাপ্তমন্যুনা চ দক্ষেণ ভূয়স্তপসা চাত্মানং সংয়োজ্য নেত্রাকৃতিরন্যা ললাটে রুদ্রস্যোত্পাদিতা
329.15
ত্রিপুরবধার্থং দীক্ষামভ্যুপগতস্য রুদ্রস্যোশনসা শিরসো জটা উত্কৃত্য প্রয়ুক্তাঃ
ততঃ প্রাদুর্ভূতা ভুজগাঃ
তৈরস্য ভুজগৈঃ পীড্যমানঃ কণ্ঠো নীলতামুপনীতঃ
পূর্বে চ মন্বন্তরে স্বায়ংভুবে নারায়ণহস্তবন্ধগ্রহণান্নীলকণ্ঠত্বমেব বা
329.16
অমৃতোত্পাদনে পুরশ্চরণতামুপগতস্যাঙ্গিরসো বৃহস্পতেরুপস্পৃশতো ন প্রসাদং গতবত্যঃ কিলাপঃ
অথ বৃহস্পতিরপাং চুক্রোধ
যস্মান্মমোপস্পৃশতঃ কলুষীভূতা ন প্রসাদমুপগতাস্তস্মাদদ্যপ্রভৃতি ঝষমকরমত্স্যকচ্ছপজন্তুসংকীর্ণাঃ কলুষীভবতেতি
তদাপ্রভৃত্যাপো যাদোভিঃ সংকীর্ণাঃ সংবৃত্তাঃ
329.17
বিশ্বরূপো বৈ ত্বাষ্ট্রঃ পুরোহিতো দেবানামাসীত্স্বস্রীয়োঽসুরাণাম্
স প্রত্যক্ষং দেবেভ্যো ভাগমদদত্পরোক্ষমসুরেভ্যঃ
329.18
অথ হিরণ্যকশিপুং পুরস্কৃত্য বিশ্বরূপমাতরং স্বসারমসুরা বরময়াচন্ত
হে স্বসরয়ং তে পুত্রস্ত্বাষ্ট্রো বিশ্বরূপস্ত্রিশিরা দেবানাং পুরোহিতঃ প্রত্যক্ষং দেবেভ্যো ভাগমদদত্পরোক্ষমস্মাকম্
ততো দেবা বর্ধন্তে বয়ং ক্ষীয়ামঃ
তদেনং ত্বং বারয়িতুমর্হসি তথা যথাস্মান্ভজেদিতি
329.19
অথ বিশ্বরূপং নন্দনবনমুপগতং মাতোবাচ
পুত্র কিং পরপক্ষবর্ধনস্ত্বং মাতুলপক্ষং নাশয়সি
নার্হস্যেবং কর্তুমিতি
স বিশ্বরূপো মাতুর্বাক্যমনতিক্রমণীয়মিতি মত্বা সংপূজ্য হিরণ্যকশিপুমগাৎ
329.20
হৈরণ্যগর্ভাচ্চ বসিষ্ঠাদ্ধিরণ্যকশিপুঃ শাপং প্রাপ্তবান্
যস্মাত্ত্বয়ান্যো বৃতো হোতা তস্মাদসমাপ্তয়জ্ঞস্ত্বমপূর্বাত্সত্ত্বজাতাদ্বধং প্রাপ্স্যসীতি
তচ্ছাপদানাদ্ধিরণ্যকশিপুঃ প্রাপ্তবান্বধম্
329.21
বিশ্বরূপো মাতৃপক্ষবর্ধনোঽত্যর্থং তপস্যভবৎ
তস্য ব্রতভঙ্গার্থমিন্দ্রো বহ্বীঃ শ্রীমত্যোঽপ্সরসো নিয়ুয়োজ
তাশ্চ দৃষ্ট্বা মনঃ ক্ষুভিতং তস্যাভবত্তাসু চাপ্সরঃসু নচিরাদেব সক্তোঽভবৎ
সক্তং চৈনং জ্ঞাত্বাপ্সরস ঊচুর্গচ্ছামহে বয়ং যথাগতমিতি
329.22
তাস্ত্বাষ্ট্র উবাচ
ক্ব গমিষ্যথ আস্যতাং তাবন্ময়া সহ শ্রেয়ো ভবিষ্যতীতি
তাস্তমব্রুবন্
বয়ং দেবস্ত্রিয়োঽপ্সরস ইন্দ্রং বরদং পুরা প্রভবিষ্ণুং বৃণীমহ ইতি
329.23
অথ তা বিশ্বরূপোঽব্রবীদদ্যৈব সেন্দ্রা দেবা ন ভবিষ্যন্তীতি
ততো মন্ত্রাঞ্জজাপ
তৈর্মন্ত্রৈঃ প্রাবর্ধত ত্রিশিরাঃ
একেনাস্যেন সর্বলোকেষু দ্বিজৈঃ ক্রিয়াবদ্ভির্যজ্ঞেষু সুহুতং সোমং পপাবেকেনাপ একেন সেন্দ্রান্দেবান্
অথেন্দ্রস্তং বিবর্ধমানং সোমপানাপ্যায়িতসর্বগাত্রং দৃষ্ট্বা চিন্তামাপেদে
329.24
দেবাশ্চ তে সহেন্দ্রেণ ব্রহ্মাণমভিজগ্মুরূচুশ্চ
বিশ্বরূপেণ সর্বয়জ্ঞেষু সুহুতঃ সোমঃ পীয়তে
বয়মভাগাঃ সংবৃত্তাঃ
অসুরপক্ষো বর্ধতে বয়ং ক্ষীয়ামঃ
তদর্হসি নো বিধাতুং শ্রেয়ো যদনন্তরমিতি
329.25
তান্ব্রহ্মোবাচ ঋষির্ভার্গবস্তপস্তপ্যতে দধীচঃ
স যাচ্যতাং বরং যথা কলেবরং জহ্যাৎ
তস্যাস্থিভির্বজ্রং ক্রিয়তামিতি
329.26
দেবাস্তত্রাগচ্ছন্যত্র দধীচো ভগবানৃষিস্তপস্তেপে
সেন্দ্রা দেবাস্তমভিগম্যোচুর্ভগবংস্তপসঃ কুশলমবিঘ্নং চেতি
তান্দধীচ উবাচ স্বাগতং ভবদ্ভ্যঃ কিং ক্রিয়তাম্
যদ্বক্ষ্যথ তত্করিষ্যামীতি
তে তমব্রুবঞ্শরীরপরিত্যাগং লোকহিতার্থং ভগবান্কর্তুমর্হতীতি
অথ দধীচস্তথৈবাবিমনাঃ সুখদুঃখসমো মহায়োগী আত্মানং সমাধায় শরীরপরিত্যাগং চকার
329.27
তস্য পরমাত্মন্যবসৃতে তান্যস্থীনি ধাতা সংগৃহ্য বজ্রমকরোৎ
তেন বজ্রেণাভেদ্যেনাপ্রধৃষ্যেণ ব্রহ্মাস্থিসংভূতেন বিষ্ণুপ্রবিষ্টেনেন্দ্রো বিশ্বরূপং জঘান
শিরসাং চাস্য ছেদনমকরোৎ
তস্মাদনন্তরং বিশ্বরূপগাত্রমথনসংভবং ত্বষ্ট্রোত্পাদিতমেবারিং বৃত্রমিন্দ্রো জঘান
329.28
তস্যাং দ্বৈধীভূতায়াং ব্রহ্মবধ্যায়াং ভয়াদিন্দ্রো দেবরাজ্যং পরিত্যজ্য অপ্সু সংভবাং শীতলাং মানসসরোগতাং নলিনীং প্রপেদে
তত্র চৈশ্বর্যয়োগাদণুমাত্রো ভূত্বা বিসগ্রন্থিং প্রবিবেশ
329.29
অথ ব্রহ্মবধ্যাভয়প্রনষ্টে ত্রৈলোক্যনাথে শচীপতৌ জগদনীশ্বরং বভূব
দেবান্রজস্তমশ্চাবিবেশ
মন্ত্রা ন প্রাবর্তন্ত মহর্ষীণাম্
রক্ষাংসি প্রাদুরভবন্
ব্রহ্ম চোত্সাদনং জগাম
অনিন্দ্রাশ্চাবলা লোকাঃ সুপ্রধৃষ্যা বভূবুঃ
329.30
অথ দেবা ঋষয়শ্চায়ুষঃ পুত্রং নহুষং নাম দেবরাজত্বেঽভিষিষিচুঃ
নহুষঃ পঞ্চভিঃ শতৈর্জ্যোতিষাং ললাটে জ্বলদ্ভিঃ সর্বতেজোহরৈস্ত্রিবিষ্টপং পালয়াং বভূব
অথ লোকাঃ প্রকৃতিমাপেদিরে স্বস্থাশ্চ বভূবুঃ
329.31
অথোবাচ নহুষঃ
সর্বং মাং শক্রোপভুক্তমুপস্থিতমৃতে শচীমিতি
স এবমুক্ত্বা শচীসমীপমগমদুবাচ চৈনাম্
সুভগেঽহমিন্দ্রো দেবানাং ভজস্ব মামিতি
তং শচী প্রত্যুবাচ
প্রকৃত্যা ত্বং ধর্মবত্সলঃ সোমবংশোদ্ভবশ্চ
নার্হসি পরপত্নীধর্ষণং কর্তুমিতি
329.32
তামথোবাচ নহুষঃ
ঐন্দ্রং পদমধ্যাস্যতে ময়া
অহমিন্দ্রস্য রাজ্যরত্নহরো নাত্রাধর্মঃ কশ্চিত্ত্বমিন্দ্রভুক্তেতি
সা তমুবাচ
অস্তি মম কিংচিদ্ব্রতমপর্যবসিতম্
তস্যাবভৃথে ত্বামুপগমিষ্যামি কৈশ্চিদেবাহোভিরিতি
স শচ্যৈবমভিহিতো নহুষো জগাম
329.33
অথ শচী দুঃখশোকার্তা ভর্তৃদর্শনলালসা নহুষভয়গৃহীতা বৃহস্পতিমুপাগচ্ছৎ
স চ তামভিগতাং দৃষ্ট্বৈব ধ্যানং প্রবিশ্য ভর্তৃকার্যতত্পরাং জ্ঞাত্বা বৃহস্পতিরুবাচ
অনেনৈব ব্রতেন তপসা চান্বিতা দেবীং বরদামুপশ্রুতিমাহ্বয়
সা তবেন্দ্রং দর্শয়িষ্যতীতি
329.34
সাথ মহানিয়মমাস্থিতা দেবীং বরদামুপশ্রুতিং মন্ত্রৈরাহ্বয়ৎ
সোপশ্রুতিঃ শচীসমীপমগাৎ
উবাচ চৈনামিয়মস্মি ত্বয়োপহূতোপস্থিতা
কিং তে প্রিয়ং করবাণীতি
তাং মূর্ধ্না প্রণম্যোবাচ শচী ভগবত্যর্হসি মে ভর্তারং দর্শয়িতুং ত্বং সত্যা মতা চেতি
সৈনাং মানসং সরোঽনয়ৎ
তত্রেন্দ্রং বিসগ্রন্থিগতমদর্শয়ৎ
329.35
তামিন্দ্রঃ পত্নীং কৃশাং গ্লানাং চ দৃষ্ট্বা চিন্তয়াং বভূব
অহো মম মহদ্দুঃখমিদমদ্যোপগতম্
নষ্টং হি মামিয়মন্বিষ্যোপাগমদ্দুঃখার্তেতি
তামিন্দ্র উবাচ কথং বর্তয়সীতি
সা তমুবাচ
নহুষো মামাহ্বয়তি
কালশ্চাস্য ময়া কৃত ইতি
329.36
তামিন্দ্র উবাচ
গচ্ছ
নহুষস্ত্বয়া বাচ্যোঽপূর্বেণ মামৃষিয়ুক্তেন যানেন ত্বমধিরূঢ উদ্বহস্ব
ইন্দ্রস্য হি মহান্তি বাহনানি মনসঃ প্রিয়াণ্যধিরূঢানি ময়া
ত্বমন্যেনোপয়াতুমর্হসীতি
সৈবমুক্তা হৃষ্টা জগাম
ইন্দ্রোঽপি বিসগ্রন্থিমেবাবিবেশ ভূয়ঃ
329.37
অথেন্দ্রাণীমভ্যাগতাং দৃষ্ট্বোবাচ নহুষঃ পূর্ণঃ স কাল ইতি
তং শচ্যব্রবীচ্ছক্রেণ যথোক্তম্
স মহর্ষিয়ুক্তং বাহনমধিরূঢঃ শচীসমীপমুপাগচ্ছৎ
329.38
অথ মৈত্রাবরুণিঃ কুম্ভয়োনিরগস্ত্যো মহর্ষীন্বিক্রিয়মাণাংস্তান্নহুষেণাপশ্যৎ
পদ্ভ্যাং চ তেনাস্পৃশ্যত
ততঃ স নহুষমব্রবীদকার্যপ্রবৃত্ত পাপ পতস্ব মহীম্
সর্পো ভব যাবদ্ভূমির্গিরয়শ্চ তিষ্ঠেয়ুস্তাবদিতি
স মহর্ষিবাক্যসমকালমেব তস্মাদ্যানাদবাপতৎ
329.39
অথানিন্দ্রং পুনস্ত্রৈলোক্যমভবৎ
ততো দেবা ঋষয়শ্চ ভগবন্তং বিষ্ণুং শরণমিন্দ্রার্থেঽভিজগ্মুঃ
ঊচুশ্চৈনং ভগবন্নিন্দ্রং ব্রহ্মবধ্যাভিভূতং ত্রাতুমর্হসীতি
ততঃ স বরদস্তানব্রবীদশ্বমেধং যজ্ঞং বৈষ্ণবং শক্রোঽভিয়জতু
ততঃ স্বং স্থানং প্রাপ্স্যতীতি
329.40
ততো দেবা ঋষয়শ্চেন্দ্রং নাপশ্যন্যদা তদা শচীমূচুর্গচ্ছ সুভগে ইন্দ্রমানয়স্বেতি
সা পুনস্তত্সরঃ সমভ্যগচ্ছৎ
ইন্দ্রশ্চ তস্মাত্সরসঃ সমুত্থায় বৃহস্পতিমভিজগাম
বৃহস্পতিশ্চাশ্বমেধং মহাক্রতুং শক্রায়াহরৎ
ততঃ কৃষ্ণসারঙ্গং মেধ্যমশ্বমুত্সৃজ্য বাহনং তমেব কৃত্বা ইন্দ্রং মরুত্পতিং বৃহস্পতিঃ স্বস্থানং প্রাপয়ামাস
329.41
ততঃ স দেবরাড্দেবৈরৃষিভিঃ স্তূয়মানস্ত্রিবিষ্টপস্থো নিষ্কল্মষো বভূব
ব্রহ্মবধ্যাং চতুর্ষু স্থানেষু বনিতাগ্নিবনস্পতিগোষু ব্যভজৎ
এবমিন্দ্রো ব্রহ্মতেজঃপ্রভাবোপবৃংহিতঃ শত্রুবধং কৃত্বা স্বস্থানং প্রাপিতঃ
329.42
আকাশগঙ্গাগতশ্চ পুরা ভরদ্বাজো মহর্ষিরুপাস্পৃশংস্ত্রীন্ক্রমান্ক্রমতা বিষ্ণুনাভ্যাসাদিতঃ
স ভরদ্বাজেন সসলিলেন পাণিনোরসি তাডিতঃ সলক্ষণোরস্কঃ সংবৃত্তঃ
329.43
ভৃগুণা মহর্ষিণা শপ্তোঽগ্নিঃ সর্বভক্ষত্বমুপনীতঃ
329.44
অদিতির্বৈ দেবানামন্নমপচদেতদ্ভুক্ত্বাসুরান্হনিষ্যন্তীতি
তত্র বুধো ব্রতচর্যাসমাপ্তাবাগচ্ছৎ
অদিতিং চাবোচদ্ভিক্ষাং দেহীতি
তত্র দেবৈঃ পূর্বমেতত্প্রাশ্যং নান্যেনেত্যদিতির্ভিক্ষাং নাদাৎ
অথ ভিক্ষাপ্রত্যাখ্যানরুষিতেন বুধেন ব্রহ্মভূতেন বিবস্বতো দ্বিতীয়ে জন্মন্যণ্ডসংজ্ঞিতস্যাণ্ডং মারিতমদিত্যাঃ
স মার্তণ্ডো বিবস্বানভবচ্ছ্রাদ্ধদেবঃ
329.45
দক্ষস্য বৈ দুহিতরঃ ষষ্টিরাসন্
তাভ্যঃ কশ্যপায় ত্রয়োদশ প্রাদাদ্দশ ধর্মায় দশ মনবে সপ্তবিংশতিমিন্দবে
তাসু তুল্যাসু নক্ষত্রাখ্যাং গতাসু সোমো রোহিণ্যামভ্যধিকাং প্রীতিমকরোৎ
ততস্তাঃ শেষাঃ পত্ন্য ঈর্ষ্যাবত্যঃ পিতুঃ সমীপং গত্বেমমর্থং শশংসুঃ
ভগবন্নস্মাসু তুল্যপ্রভাবাসু সোমো রোহিণীমধিকং ভজতীতি
সোঽব্রবীদ্যক্ষ্মৈনমাবেক্ষ্যতীতি
329.46
দক্ষশাপাত্সোমং রাজানং যক্ষ্মাবিবেশ
স যক্ষ্মণাবিষ্টো দক্ষমগমৎ
দক্ষশ্চৈনমব্রবীন্ন সমং বর্তস ইতি
তত্রর্ষয়ঃ সোমমব্রুবন্ক্ষীয়সে যক্ষ্মণা
পশ্চিমস্যাং দিশি সমুদ্রে হিরণ্যসরস্তীর্থম্
তত্র গত্বাত্মানমভিষেচয়স্বেতি
অথাগচ্ছত্সোমস্তত্র হিরণ্যসরস্তীর্থম্
গত্বা চাত্মনঃ স্নপনমকরোৎ
স্নাত্বা চাত্মানং পাপ্মনো মোক্ষয়ামাস
তত্র চাবভাসিতস্তীর্থে যদা সোমস্তদাপ্রভৃতি তীর্থং তত্প্রভাসমিতি নাম্না খ্যাতং বভূব
তচ্ছাপাদদ্যাপি ক্ষীয়তে সোমোঽমাবাস্যান্তরস্থঃ
পৌর্ণমাসীমাত্রেঽধিষ্ঠিতো মেঘলেখাপ্রতিচ্ছন্নং বপুর্দর্শয়তি
মেঘসদৃশং বর্ণমগমত্তদস্য শশলক্ষ্ম বিমলমভবৎ
329.47
স্থূলশিরা মহর্ষির্মেরোঃ প্রাগুত্তরে দিগ্ভাগে তপস্তেপে
তস্য তপস্তপ্যমানস্য সর্বগন্ধবহঃ শুচির্বায়ুর্বিবায়মানঃ শরীরমস্পৃশৎ
স তপসা তাপিতশরীরঃ কৃশো বায়ুনোপবীজ্যমানো হৃদয়পরিতোষমগমৎ
তত্র তস্যানিলব্যজনকৃতপরিতোষস্য সদ্যো বনস্পতয়ঃ পুষ্পশোভাং ন দর্শিতবন্ত ইতি স এতাঞ্শশাপ ন সর্বকালং পুষ্পবন্তো ভবিষ্যথেতি
329.48
নারায়ণো লোকহিতার্থং বডবামুখো নাম মহর্ষিঃ পুরাভবৎ
তস্য মেরৌ তপস্তপ্যতঃ সমুদ্র আহূতো নাগতঃ
তেনামর্ষিতেনাত্মগাত্রোষ্মণা সমুদ্রঃ স্তিমিতজলঃ কৃতঃ
স্বেদপ্রস্যন্দনসদৃশশ্চাস্য লবণভাবো জনিতঃ
উক্তশ্চাপেয়ো ভবিষ্যসি
এতচ্চ তে তোয়ং বডবামুখসংজ্ঞিতেন পীয়মানং মধুরং ভবিষ্যতি
তদেতদদ্যাপি বডবামুখসংজ্ঞিতেনানুবর্তিনা তোয়ং সামুদ্রং পীয়তে
329.49
হিমবতো গিরের্দুহিতরমুমাং রুদ্রশ্চকমে
ভৃগুরপি চ মহর্ষির্হিমবন্তমাগম্যাব্রবীত্কন্যামুমাং মে দেহীতি
তমব্রবীদ্ধিমবানভিলষিতো বরো রুদ্র ইতি
তমব্রবীদ্ভৃগুর্যস্মাত্ত্বয়াহং কন্যাবরণকৃতভাবঃ প্রত্যাখ্যাতস্তস্মান্ন রত্নানাং ভবান্ভাজনং ভবিষ্যতীতি
অদ্যপ্রভৃত্যেতদবস্থিতমৃষিবচনম্
329.50
তদেবংবিধং মাহাত্ম্যং ব্রাহ্মণানাম্
ক্ষত্রমপি শাশ্বতীমব্যয়াং পৃথিবীং পত্নীমভিগম্য বুভুজে
তদেতদ্ব্রহ্মাগ্নীষোমীয়ম্
তেন জগদ্ধার্যতে