Utshovঅধ্যায় 328
328.1
জনমেজয় উবাচ
অস্তৌষীদ্যৈরিমং ব্যাসঃ সশিষ্যো মধুসূদনম্
নামভির্বিবিধৈরেষাং নিরুক্তং ভগবন্মম
328.2
বক্তুমর্হসি শুশ্রূষোঃ প্রজাপতিপতের্হরেঃ
শ্রুত্বা ভবেয়ং যত্পূতঃ শরচ্চন্দ্র ইবামলঃ
328.3
বৈশংপায়ন উবাচ
শৃণু রাজন্যথাচষ্ট ফল্গুনস্য হরির্বিভুঃ
প্রসন্নাত্মাত্মনো নাম্নাং নিরুক্তং গুণকর্মজম্
328.4
নামভিঃ কীর্তিতৈস্তস্য কেশবস্য মহাত্মনঃ
পৃষ্টবান্কেশবং রাজন্ফল্গুনঃ পরবীরহা
328.5
অর্জুন উবাচ
ভগবন্ভূতভব্যেশ সর্বভূতসৃগব্যয়
লোকধাম জগন্নাথ লোকানামভয়প্রদ
328.6
যানি নামানি তে দেব কীর্তিতানি মহর্ষিভিঃ
বেদেষু সপুরাণেষু যানি গুহ্যানি কর্মভিঃ
328.7
তেষাং নিরুক্তং ত্বত্তোঽহং শ্রোতুমিচ্ছামি কেশব
ন হ্যন্যো বর্তয়েন্নাম্নাং নিরুক্তং ত্বামৃতে প্রভো
328.8
শ্রীভগবানুবাচ
ঋগ্বেদে সয়জুর্বেদে তথৈবাথর্বসামসু
পুরাণে সোপনিষদে তথৈব জ্যোতিষেঽর্জুন
328.9
সাংখ্যে চ যোগশাস্ত্রে চ আয়ুর্বেদে তথৈব চ
বহূনি মম নামানি কীর্তিতানি মহর্ষিভিঃ
328.10
গৌণানি তত্র নামানি কর্মজানি চ কানিচিৎ
নিরুক্তং কর্মজানাং চ শৃণুষ্ব প্রয়তোঽনঘ
কথ্যমানং ময়া তাত ত্বং হি মেঽর্ধং স্মৃতঃ পুরা
328.11
নমোঽতিয়শসে তস্মৈ দেহিনাং পরমাত্মনে
নারায়ণায় বিশ্বায় নির্গুণায় গুণাত্মনে
328.12
যস্য প্রসাদজো ব্রহ্মা রুদ্রশ্চ ক্রোধসংভবঃ
যোঽসৌ যোনির্হি সর্বস্য স্থাবরস্য চরস্য চ
328.13
অষ্টাদশগুণং যত্তত্সত্ত্বং সত্ত্ববতাং বর
প্রকৃতিঃ সা পরা মহ্যং রোদসী যোগধারিণী
ঋতা সত্যামরাজয্যা লোকানামাত্মসংজ্ঞিতা
328.14
তস্মাত্সর্বাঃ প্রবর্তন্তে সর্গপ্রলয়বিক্রিয়াঃ
ততো যজ্ঞশ্চ যষ্টা চ পুরাণঃ পুরুষো বিরাট্
অনিরুদ্ধ ইতি প্রোক্তো লোকানাং প্রভবাপ্যয়ঃ
328.15
ব্রাহ্মে রাত্রিক্ষয়ে প্রাপ্তে তস্য হ্যমিততেজসঃ
প্রসাদাত্প্রাদুরভবত্পদ্মং পদ্মনিভেক্ষণ
তত্র ব্রহ্মা সমভবত্স তস্যৈব প্রসাদজঃ
328.16
অহ্নঃ ক্ষয়ে ললাটাচ্চ সুতো দেবস্য বৈ তথা
ক্রোধাবিষ্টস্য সংজজ্ঞে রুদ্রঃ সংহারকারকঃ
328.17
এতৌ দ্বৌ বিবুধশ্রেষ্ঠৌ প্রসাদক্রোধজৌ স্মৃতৌ
তদাদেশিতপন্থানৌ সৃষ্টিসংহারকারকৌ
নিমিত্তমাত্রং তাবত্র সর্বপ্রাণিবরপ্রদৌ
328.18
কপর্দী জটিলো মুণ্ডঃ শ্মশানগৃহসেবকঃ
উগ্রব্রতধরো রুদ্রো যোগী ত্রিপুরদারুণঃ
328.19
দক্ষক্রতুহরশ্চৈব ভগনেত্রহরস্তথা
নারায়ণাত্মকো জ্ঞেয়ঃ পাণ্ডবেয় যুগে যুগে
328.20
তস্মিন্হি পূজ্যমানে বৈ দেবদেবে মহেশ্বরে
সংপূজিতো ভবেত্পার্থ দেবো নারায়ণঃ প্রভুঃ
328.21
অহমাত্মা হি লোকানাং বিশ্বানাং পাণ্ডুনন্দন
তস্মাদাত্মানমেবাগ্রে রুদ্রং সংপূজয়াম্যহম্
328.22
যদ্যহং নার্চয়েয়ং বৈ ঈশানং বরদং শিবম্
আত্মানং নার্চয়েত্কশ্চিদিতি মে ভাবিতং মনঃ
ময়া প্রমাণং হি কৃতং লোকঃ সমনুবর্ততে
328.23
প্রমাণানি হি পূজ্যানি ততস্তং পূজয়াম্যহম্
যস্তং বেত্তি স মাং বেত্তি যোঽনু তং স হি মামনু
328.24
রুদ্রো নারায়ণশ্চৈব সত্ত্বমেকং দ্বিধাকৃতম্
লোকে চরতি কৌন্তেয় ব্যক্তিস্থং সর্বকর্মসু
328.25
ন হি মে কেনচিদ্দেয়ো বরঃ পাণ্ডবনন্দন
ইতি সংচিন্ত্য মনসা পুরাণং বিশ্বমীশ্বরম্
পুত্রার্থমারাধিতবানাত্মানমহমাত্মনা
328.26
ন হি বিষ্ণুঃ প্রণমতি কস্মৈচিদ্বিবুধায় তু
ঋত আত্মানমেবেতি ততো রুদ্রং ভজাম্যহম্
328.27
সব্রহ্মকাঃ সরুদ্রাশ্চ সেন্দ্রা দেবাঃ সহর্ষিভিঃ
অর্চয়ন্তি সুরশ্রেষ্ঠং দেবং নারায়ণং হরিম্
328.28
ভবিষ্যতাং বর্ততাং চ ভূতানাং চৈব ভারত
সর্বেষামগ্রণীর্বিষ্ণুঃ সেব্যঃ পূজ্যশ্চ নিত্যশঃ
328.29
নমস্ব হব্যদং বিষ্ণুং তথা শরণদং নম
বরদং নমস্ব কৌন্তেয় হব্যকব্যভুজং নম
328.30
চতুর্বিধা মম জনা ভক্তা এবং হি তে শ্রুতম্
তেষামেকান্তিনঃ শ্রেষ্ঠাস্তে চৈবানন্যদেবতাঃ
অহমেব গতিস্তেষাং নিরাশীঃকর্মকারিণাম্
328.31
যে চ শিষ্টাস্ত্রয়ো ভক্তাঃ ফলকামা হি তে মতাঃ
সর্বে চ্যবনধর্মাণঃ প্রতিবুদ্ধস্তু শ্রেষ্ঠভাক্
328.32
ব্রহ্মাণং শিতিকণ্ঠং চ যাশ্চান্যা দেবতাঃ স্মৃতাঃ
প্রবুদ্ধবর্যাঃ সেবন্তে মামেবৈষ্যন্তি যত্পরম্
ভক্তং প্রতি বিশেষস্তে এষ পার্থানুকীর্তিতঃ
328.33
ত্বং চৈবাহং চ কৌন্তেয় নরনারায়ণৌ স্মৃতৌ
ভারাবতরণার্থং হি প্রবিষ্টৌ মানুষীং তনুম্
328.34
জানাম্যধ্যাত্ময়োগাংশ্চ যোঽহং যস্মাচ্চ ভারত
নিবৃত্তিলক্ষণো ধর্মস্তথাভ্যুদয়িকোঽপি চ
328.35
নরাণাময়নং খ্যাতমহমেকঃ সনাতনঃ
আপো নারা ইতি প্রোক্তা আপো বৈ নরসূনবঃ
অয়নং মম তত্পূর্বমতো নারায়ণো হ্যহম্
328.36
ছাদয়ামি জগদ্বিশ্বং ভূত্বা সূর্য ইবাংশুভিঃ
সর্বভূতাধিবাসশ্চ বাসুদেবস্ততো হ্যহম্
328.37
গতিশ্চ সর্বভূতানাং প্রজানাং চাপি ভারত
ব্যাপ্তা মে রোদসী পার্থ কান্তিশ্চাভ্যধিকা মম
328.38
অধিভূতানি চান্তেঽহং তদিচ্ছংশ্চাস্মি ভারত
ক্রমণাচ্চাপ্যহং পার্থ বিষ্ণুরিত্যভিসংজ্ঞিতঃ
328.39
দমাত্সিদ্ধিং পরীপ্সন্তো মাং জনাঃ কাময়ন্তি হি
দিবং চোর্বীং চ মধ্যং চ তস্মাদ্দামোদরো হ্যহম্
328.40
পৃশ্নিরিত্যুচ্যতে চান্নং বেদা আপোঽমৃতং তথা
মমৈতানি সদা গর্ভে পৃশ্নিগর্ভস্ততো হ্যহম্
328.41
ঋষয়ঃ প্রাহুরেবং মাং ত্রিতকূপাভিপাতিতম্
পৃশ্নিগর্ভ ত্রিতং পাহীত্যেকতদ্বিতপাতিতম্
328.42
ততঃ স ব্রহ্মণঃ পুত্র আদ্যো ঋষিবরস্ত্রিতঃ
উত্ততারোদপানাদ্বৈ পৃশ্নিগর্ভানুকীর্তনাৎ
328.43
সূর্যস্য তপতো লোকানগ্নেঃ সোমস্য চাপ্যুত
অংশবো যে প্রকাশন্তে মম তে কেশসংজ্ঞিতাঃ
সর্বজ্ঞাঃ কেশবং তস্মান্মামাহুর্দ্বিজসত্তমাঃ
328.44
স্বপত্ন্যামাহিতো গর্ভ উতথ্যেন মহাত্মনা
উতথ্যেঽন্তর্হিতে চৈব কদাচিদ্দেবমায়য়া
বৃহস্পতিরথাবিন্দত্তাং পত্নীং তস্য ভারত
328.45
ততো বৈ তমৃষিশ্রেষ্ঠং মৈথুনোপগতং তথা
উবাচ গর্ভঃ কৌন্তেয় পঞ্চভূতসমন্বিতঃ
328.46
পূর্বাগতোঽহং বরদ নার্হস্যম্বাং প্রবাধিতুম্
এতদ্বৃহস্পতিঃ শ্রুত্বা চুক্রোধ চ শশাপ চ
328.47
মৈথুনোপগতো যস্মাত্ত্বয়াহং বিনিবারিতঃ
তস্মাদন্ধো জাস্যসি ত্বং মচ্ছাপান্নাত্র সংশয়ঃ
328.48
স শাপাদৃষিমুখ্যস্য দীর্ঘং তম উপেয়িবান্
স হি দীর্ঘতমা নাম নাম্না হ্যাসীদৃষিঃ পুরা
328.49
বেদানবাপ্য চতুরঃ সাঙ্গোপাঙ্গান্সনাতনান্
প্রয়োজয়ামাস তদা নাম গুহ্যমিদং মম
328.50
আনুপূর্ব্যেণ বিধিনা কেশবেতি পুনঃ পুনঃ
স চক্ষুষ্মান্সমভবদ্গৌতমশ্চাভবত্পুনঃ
328.51
এবং হি বরদং নাম কেশবেতি মমার্জুন
দেবানামথ সর্বেষামৃষীণাং চ মহাত্মনাম্
328.52
অগ্নিঃ সোমেন সংয়ুক্ত একয়োনি মুখং কৃতম্
অগ্নীষোমাত্মকং তস্মাজ্জগত্কৃত্স্নং চরাচরম্
328.53
অপি হি পুরাণে ভবতি
একয়োন্যাত্মকাবগ্নীষোমৌ
দেবাশ্চাগ্নিমুখা ইতি
একয়োনিত্বাচ্চ পরস্পরং মহয়ন্তো লোকান্ধারয়ত ইতি