Utshovঅধ্যায় 327
327.1
জনমেজয় উবাচ
কথং স ভগবান্দেবো যজ্ঞেষ্বগ্রহরঃ প্রভুঃ
যজ্ঞধারী চ সততং বেদবেদাঙ্গবিত্তথা
327.2
নিবৃত্তং চাস্থিতো ধর্মং ক্ষেমী ভাগবতপ্রিয়ঃ
প্রবৃত্তিধর্মান্বিদধে স এব ভগবান্প্রভুঃ
327.3
কথং প্রবৃত্তিধর্মেষু ভাগার্হা দেবতাঃ কৃতাঃ
কথং নিবৃত্তিধর্মাশ্চ কৃতা ব্যাবৃত্তবুদ্ধয়ঃ
327.4
এতং নঃ সংশয়ং বিপ্র ছিন্ধি গুহ্যং সনাতনম্
ত্বয়া নারায়ণকথা শ্রুতা বৈ ধর্মসংহিতা
327.5
ইমে সব্রহ্মকা লোকাঃ সসুরাসুরমানবাঃ
ক্রিয়াস্বভ্যুদয়োক্তাসু সক্তা দৃশ্যন্তি সর্বশঃ
মোক্ষশ্চোক্তস্ত্বয়া ব্রহ্মন্নির্বাণং পরমং সুখম্
327.6
যে চ মুক্তা ভবন্তীহ পুণ্যপাপবিবর্জিতাঃ
তে সহস্রার্চিষং দেবং প্রবিশন্তীতি শুশ্রুমঃ
327.7
অহো হি দুরনুষ্ঠেয়ো মোক্ষধর্মঃ সনাতনঃ
যং হিত্বা দেবতাঃ সর্বা হব্যকব্যভুজোঽভবন্
327.8
কিং নু ব্রহ্মা চ রুদ্রশ্চ শক্রশ্চ বলভিত্প্রভুঃ
সূর্যস্তারাধিপো বায়ুরগ্নির্বরুণ এব চ
আকাশং জগতী চৈব যে চ শেষা দিবৌকসঃ
327.9
প্রলয়ং ন বিজানন্তি আত্মনঃ পরিনির্মিতম্
ততস্তে নাস্থিতা মার্গং ধ্রুবমক্ষয়মব্যয়ম্
327.10
স্মৃত্বা কালপরীমাণং প্রবৃত্তিং যে সমাস্থিতাঃ
দোষঃ কালপরীমাণে মহানেষ ক্রিয়াবতাম্
327.11
এতন্মে সংশয়ং বিপ্র হৃদি শল্যমিবার্পিতম্
ছিন্ধীতিহাসকথনাত্পরং কৌতূহলং হি মে
327.12
কথং ভাগহরাঃ প্রোক্তা দেবতাঃ ক্রতুষু দ্বিজ
কিমর্থং চাধ্বরে ব্রহ্মন্নিজ্যন্তে ত্রিদিবৌকসঃ
327.13
যে চ ভাগং প্রগৃহ্ণন্তি যজ্ঞেষু দ্বিজসত্তম
তে যজন্তো মহায়জ্ঞৈঃ কস্য ভাগং দদন্তি বৈ
327.14
বৈশংপায়ন উবাচ
অহো গূঢতমঃ প্রশ্নস্ত্বয়া পৃষ্টো জনেশ্বর
নাতপ্ততপসা হ্যেষ নাবেদবিদুষা তথা
নাপুরাণবিদা চাপি শক্যো ব্যাহর্তুমঞ্জসা
327.15
হন্ত তে কথয়িষ্যামি যন্মে পৃষ্টঃ পুরা গুরুঃ
কৃষ্ণদ্বৈপায়নো ব্যাসো বেদব্যাসো মহানৃষিঃ
327.16
সুমন্তুর্জৈমিনিশ্চৈব পৈলশ্চ সুদৃঢব্রতঃ
অহং চতুর্থঃ শিষ্যো বৈ পঞ্চমশ্চ শুকঃ স্মৃতঃ
327.17
এতান্সমাগতান্সর্বান্পঞ্চ শিষ্যান্দমান্বিতান্
শৌচাচারসমায়ুক্তাঞ্জিতক্রোধাঞ্জিতেন্দ্রিয়ান্
327.18
বেদানধ্যাপয়ামাস মহাভারতপঞ্চমান্
মেরৌ গিরিবরে রম্যে সিদ্ধচারণসেবিতে
327.19
তেষামভ্যস্যতাং বেদান্কদাচিত্সংশয়োঽভবৎ
এষ বৈ যস্ত্বয়া পৃষ্টস্তেন তেষাং প্রকীর্তিতঃ
ততঃ শ্রুতো ময়া চাপি তবাখ্যেয়োঽদ্য ভারত
327.20
শিষ্যাণাং বচনং শ্রুত্বা সর্বাজ্ঞানতমোনুদঃ
পরাশরসুতঃ শ্রীমান্ব্যাসো বাক্যমুবাচ হ
327.21
ময়া হি সুমহত্তপ্তং তপঃ পরমদারুণম্
ভূতং ভব্যং ভবিষ্যচ্চ জানীয়ামিতি সত্তমাঃ
327.22
তস্য মে তপ্ততপসো নিগৃহীতেন্দ্রিয়স্য চ
নারায়ণপ্রসাদেন ক্ষীরোদস্যানুকূলতঃ
327.23
ত্রৈকালিকমিদং জ্ঞানং প্রাদুর্ভূতং যথেপ্সিতম্
তচ্ছৃণুধ্বং যথাজ্ঞানং বক্ষ্যে সংশয়মুত্তমম্
যথা বৃত্তং হি কল্পাদৌ দৃষ্টং মে জ্ঞানচক্ষুষা
327.24
পরমাত্মেতি যং প্রাহুঃ সাংখ্যয়োগবিদো জনাঃ
মহাপুরুষসংজ্ঞাং স লভতে স্বেন কর্মণা
327.25
তস্মাত্প্রসূতমব্যক্তং প্রধানং তদ্বিদুর্বুধাঃ
অব্যক্তাদ্ব্যক্তমুত্পন্নং লোকসৃষ্ট্যর্থমীশ্বরাৎ
327.26
অনিরুদ্ধো হি লোকেষু মহানাত্মেতি কথ্যতে
যোঽসৌ ব্যক্তত্বমাপন্নো নির্মমে চ পিতামহম্
সোঽহংকার ইতি প্রোক্তঃ সর্বতেজোময়ো হি সঃ
327.27
পৃথিবী বায়ুরাকাশমাপো জ্যোতিশ্চ পঞ্চমম্
অহংকারপ্রসূতানি মহাভূতানি ভারত
327.28
মহাভূতানি সৃষ্ট্বাথ তদ্গুণান্নির্মমে পুনঃ
ভূতেভ্যশ্চৈব নিষ্পন্না মূর্তিমন্তোঽষ্ট তাঞ্শৃণু
327.29
মরীচিরঙ্গিরাশ্চাত্রিঃ পুলস্ত্যঃ পুলহঃ ক্রতুঃ
বসিষ্ঠশ্চ মহাত্মা বৈ মনুঃ স্বায়ংভুবস্তথা
জ্ঞেয়াঃ প্রকৃতয়োঽষ্টৌ তা যাসু লোকাঃ প্রতিষ্ঠিতাঃ
327.30
বেদান্বেদাঙ্গসংয়ুক্তান্যজ্ঞান্যজ্ঞাঙ্গসংয়ুতান্
নির্মমে লোকসিদ্ধ্যর্থং ব্রহ্মা লোকপিতামহঃ
অষ্টাভ্যঃ প্রকৃতিভ্যশ্চ জাতং বিশ্বমিদং জগৎ
327.31
রুদ্রো রোষাত্মকো জাতো দশান্যান্সোঽসৃজত্স্বয়ম্
একাদশৈতে রুদ্রাস্তু বিকারাঃ পুরুষাঃ স্মৃতাঃ
327.32
তে রুদ্রাঃ প্রকৃতিশ্চৈব সর্বে চৈব সুরর্ষয়ঃ
উত্পন্না লোকসিদ্ধ্যর্থং ব্রহ্মাণং সমুপস্থিতাঃ
327.33
বয়ং হি সৃষ্টা ভগবংস্ত্বয়া বৈ প্রভবিষ্ণুনা
যেন যস্মিন্নধীকারে বর্তিতব্যং পিতামহ
327.34
যোঽসৌ ত্বয়া বিনির্দিষ্টো অধিকারোঽর্থচিন্তকঃ
পরিপাল্যঃ কথং তেন সোঽধিকারোঽধিকারিণা
327.35
প্রদিশস্ব বলং তস্য যোঽধিকারার্থচিন্তকঃ
এবমুক্তো মহাদেবো দেবাংস্তানিদমব্রবীৎ
327.36
সাধ্বহং জ্ঞাপিতো দেবা যুষ্মাভির্ভদ্রমস্তু বঃ
মমাপ্যেষা সমুত্পন্না চিন্তা যা ভবতাং মতা
327.37
লোকতন্ত্রস্য কৃত্স্নস্য কথং কার্যঃ পরিগ্রহঃ
কথং বলক্ষয়ো ন স্যাদ্যুষ্মাকং হ্যাত্মনশ্চ মে
327.38
ইতঃ সর্বেঽপি গচ্ছামঃ শরণং লোকসাক্ষিণম্
মহাপুরুষমব্যক্তং স নো বক্ষ্যতি যদ্ধিতম্
327.39
ততস্তে ব্রহ্মণা সার্ধমৃষয়ো বিবুধাস্তথা
ক্ষীরোদস্যোত্তরং কূলং জগ্মুর্লোকহিতার্থিনঃ
327.40
তে তপঃ সমুপাতিষ্ঠন্ব্রহ্মোক্তং বেদকল্পিতম্
স মহানিয়মো নাম তপশ্চর্যা সুদারুণা
327.41
ঊর্ধ্বং দৃষ্টির্বাহবশ্চ একাগ্রং চ মনোঽভবৎ
একপাদস্থিতাঃ সম্যক্কাষ্ঠভূতাঃ সমাহিতাঃ
327.42
দিব্যং বর্ষসহস্রং তে তপস্তপ্ত্বা তদুত্তমম্
শুশ্রুবুর্মধুরাং বাণীং বেদবেদাঙ্গভূষিতাম্
327.43
ভো ভোঃ সব্রহ্মকা দেবা ঋষয়শ্চ তপোধনাঃ
স্বাগতেনার্চ্য বঃ সর্বাঞ্শ্রাবয়ে বাক্যমুত্তমম্
327.44
বিজ্ঞাতং বো ময়া কার্যং তচ্চ লোকহিতং মহৎ
প্রবৃত্তিয়ুক্তং কর্তব্যং যুষ্মত্প্রাণোপবৃংহণম্
327.45
সুতপ্তং বস্তপো দেবা মমারাধনকাম্যয়া
ভোক্ষ্যথাস্য মহাসত্ত্বাস্তপসঃ ফলমুত্তমম্
327.46
এষ ব্রহ্মা লোকগুরুঃ সর্বলোকপিতামহঃ
যূয়ং চ বিবুধশ্রেষ্ঠা মাং যজধ্বং সমাহিতাঃ
327.47
সর্বে ভাগান্কল্পয়ধ্বং যজ্ঞেষু মম নিত্যশঃ
তথা শ্রেয়ো বিধাস্যামি যথাধীকারমীশ্বরাঃ
327.48
শ্রুত্বৈতদ্দেবদেবস্য বাক্যং হৃষ্টতনূরুহাঃ
ততস্তে বিবুধাঃ সর্বে ব্রহ্মা তে চ মহর্ষয়ঃ
327.49
বেদদৃষ্টেন বিধিনা বৈষ্ণবং ক্রতুমাহরন্
তস্মিন্সত্রে তদা ব্রহ্মা স্বয়ং ভাগমকল্পয়ৎ
দেবা দেবর্ষয়শ্চৈব সর্বে ভাগানকল্পয়ন্
327.50
তে কার্তয়ুগধর্মাণো ভাগাঃ পরমসত্কৃতাঃ
প্রাপুরাদিত্যবর্ণং তং পুরুষং তমসঃ পরম্
বৃহন্তং সর্বগং দেবমীশানং বরদং প্রভুম্
327.51
ততোঽথ বরদো দেবস্তান্সর্বানমরান্স্থিতান্
অশরীরো বভাষেদং বাক্যং খস্থো মহেশ্বরঃ
327.52
যেন যঃ কল্পিতো ভাগঃ স তথা সমুপাগতঃ
প্রীতোঽহং প্রদিশাম্যদ্য ফলমাবৃত্তিলক্ষণম্
327.53
এতদ্বো লক্ষণং দেবা মত্প্রসাদসমুদ্ভবম্
যূয়ং যজ্ঞৈরিজ্যমানাঃ সমাপ্তবরদক্ষিণৈঃ
যুগে যুগে ভবিষ্যধ্বং প্রবৃত্তিফলভোগিনঃ
327.54
যজ্ঞৈর্যে চাপি যক্ষ্যন্তি সর্বলোকেষু বৈ সুরাঃ
কল্পয়িষ্যন্তি বো ভাগাংস্তে নরা বেদকল্পিতান্
327.55
যো মে যথা কল্পিতবান্ভাগমস্মিন্মহাক্রতৌ
স তথা যজ্ঞভাগার্হো বেদসূত্রে ময়া কৃতঃ
327.56
যূয়ং লোকান্ধারয়ধ্বং যজ্ঞভাগফলোদিতাঃ
সর্বার্থচিন্তকা লোকে যথাধীকারনির্মিতাঃ
327.57
যাঃ ক্রিয়াঃ প্রচরিষ্যন্তি প্রবৃত্তিফলসত্কৃতাঃ
তাভিরাপ্যায়িতবলা লোকান্বৈ ধারয়িষ্যথ
327.58
যূয়ং হি ভাবিতা লোকে সর্বয়জ্ঞেষু মানবৈঃ
মাং ততো ভাবয়িষ্যধ্বমেষা বো ভাবনা মম
327.59
ইত্যর্থং নির্মিতা বেদা যজ্ঞাশ্চৌষধিভিঃ সহ
এভিঃ সম্যক্প্রয়ুক্তৈর্হি প্রীয়ন্তে দেবতাঃ ক্ষিতৌ
327.60
নির্মাণমেতদ্যুষ্মাকং প্রবৃত্তিগুণকল্পিতম্
ময়া কৃতং সুরশ্রেষ্ঠা যাবত্কল্পক্ষয়াদিতি
চিন্তয়ধ্বং লোকহিতং যথাধীকারমীশ্বরাঃ
327.61
মরীচিরঙ্গিরাশ্চাত্রিঃ পুলস্ত্যঃ পুলহঃ ক্রতুঃ
বসিষ্ঠ ইতি সপ্তৈতে মানসা নির্মিতা হি বৈ
327.62
এতে বেদবিদো মুখ্যা বেদাচার্যাশ্চ কল্পিতাঃ
প্রবৃত্তিধর্মিণশ্চৈব প্রাজাপত্যেন কল্পিতাঃ
327.63
অয়ং ক্রিয়াবতাং পন্থা ব্যক্তীভূতঃ সনাতনঃ
অনিরুদ্ধ ইতি প্রোক্তো লোকসর্গকরঃ প্রভুঃ
327.64
সনঃ সনত্সুজাতশ্চ সনকঃ সসনন্দনঃ
সনত্কুমারঃ কপিলঃ সপ্তমশ্চ সনাতনঃ
327.65
সপ্তৈতে মানসাঃ প্রোক্তা ঋষয়ো ব্রহ্মণঃ সুতাঃ
স্বয়মাগতবিজ্ঞানা নিবৃত্তং ধর্মমাস্থিতাঃ
327.66
এতে যোগবিদো মুখ্যাঃ সাংখ্যধর্মবিদস্তথা
আচার্যা মোক্ষশাস্ত্রে চ মোক্ষধর্মপ্রবর্তকাঃ
327.67
যতোঽহং প্রসৃতঃ পূর্বমব্যক্তাত্ত্রিগুণো মহান্
তস্মাত্পরতরো যোঽসৌ ক্ষেত্রজ্ঞ ইতি কল্পিতঃ
সোঽহং ক্রিয়াবতাং পন্থাঃ পুনরাবৃত্তিদুর্লভঃ
327.68
যো যথা নির্মিতো জন্তুর্যস্মিন্যস্মিংশ্চ কর্মণি
প্রবৃত্তৌ বা নিবৃত্তৌ বা তত্ফলং সোঽশ্নুতেঽবশঃ
327.69
এষ লোকগুরুর্ব্রহ্মা জগদাদিকরঃ প্রভুঃ
এষ মাতা পিতা চৈব যুষ্মাকং চ পিতামহঃ
ময়ানুশিষ্টো ভবিতা সর্বভূতবরপ্রদঃ
327.70
অস্য চৈবানুজো রুদ্রো ললাটাদ্যঃ সমুত্থিতঃ
ব্রহ্মানুশিষ্টো ভবিতা সর্বত্রসবরপ্রদঃ
327.71
গচ্ছধ্বং স্বানধীকারাংশ্চিন্তয়ধ্বং যথাবিধি
প্রবর্তন্তাং ক্রিয়াঃ সর্বাঃ সর্বলোকেষু মাচিরম্
327.72
প্রদৃশ্যন্তাং চ কর্মাণি প্রাণিনাং গতয়স্তথা
পরিনির্মিতকালানি আয়ূংষি চ সুরোত্তমাঃ
327.73
ইদং কৃতয়ুগং নাম কালঃ শ্রেষ্ঠঃ প্রবর্ততে
অহিংস্যা যজ্ঞপশবো যুগেঽস্মিন্নৈতদন্যথা
চতুষ্পাত্সকলো ধর্মো ভবিষ্যত্যত্র বৈ সুরাঃ
327.74
ততস্ত্রেতায়ুগং নাম ত্রয়ী যত্র ভবিষ্যতি
প্রোক্ষিতা যত্র পশবো বধং প্রাপ্স্যন্তি বৈ মখে
তত্র পাদচতুর্থো বৈ ধর্মস্য ন ভবিষ্যতি
327.75
ততো বৈ দ্বাপরং নাম মিশ্রঃ কালো ভবিষ্যতি
দ্বিপাদহীনো ধর্মশ্চ যুগে তস্মিন্ভবিষ্যতি
327.76
ততস্তিষ্যেঽথ সংপ্রাপ্তে যুগে কলিপুরস্কৃতে
একপাদস্থিতো ধর্মো যত্র তত্র ভবিষ্যতি
327.77
দেবা ঊচুঃ
একপাদস্থিতে ধর্মে যত্রক্বচনগামিনি
কথং কর্তব্যমস্মাভির্ভগবংস্তদ্বদস্ব নঃ
327.78
শ্রীভগবানুবাচ
যত্র বেদাশ্চ যজ্ঞাশ্চ তপঃ সত্যং দমস্তথা
অহিংসাধর্মসংয়ুক্তাঃ প্রচরেয়ুঃ সুরোত্তমাঃ
স বৈ দেশঃ সেবিতব্যো মা বোঽধর্মঃ পদা স্পৃশেৎ
327.79
ব্যাস উবাচ
তেঽনুশিষ্টা ভগবতা দেবাঃ সর্ষিগণাস্তথা
নমস্কৃত্বা ভগবতে জগ্মুর্দেশান্যথেপ্সিতান্
327.80
গতেষু ত্রিদিবৌকঃসু ব্রহ্মৈকঃ পর্যবস্থিতঃ
দিদৃক্ষুর্ভগবন্তং তমনিরুদ্ধতনৌ স্থিতম্
327.81
তং দেবো দর্শয়ামাস কৃত্বা হয়শিরো মহৎ
সাঙ্গানাবর্তয়ন্বেদান্কমণ্ডলুগণিত্রধৃক্
327.82
ততোঽশ্বশিরসং দৃষ্ট্বা তং দেবমমিতৌজসম্
লোককর্তা প্রভুর্ব্রহ্মা লোকানাং হিতকাম্যয়া
327.83
মূর্ধ্না প্রণম্য বরদং তস্থৌ প্রাঞ্জলিরগ্রতঃ
স পরিষ্বজ্য দেবেন বচনং শ্রাবিতস্তদা
327.84
লোককার্যগতীঃ সর্বাস্ত্বং চিন্তয় যথাবিধি
ধাতা ত্বং সর্বভূতানাং ত্বং প্রভুর্জগতো গুরুঃ
ত্বয্যাবেশিতভারোঽহং ধৃতিং প্রাপ্স্যাম্যথাঞ্জসা
327.85
যদা চ সুরকার্যং তে অবিষহ্যং ভবিষ্যতি
প্রাদুর্ভাবং গমিষ্যামি তদাত্মজ্ঞানদেশিকঃ
327.86
এবমুক্ত্বা হয়শিরাস্তত্রৈবান্তরধীয়ত
তেনানুশিষ্টো ব্রহ্মাপি স্বং লোকমচিরাদ্গতঃ
327.87
এবমেষ মহাভাগঃ পদ্মনাভঃ সনাতনঃ
যজ্ঞেষ্বগ্রহরঃ প্রোক্তো যজ্ঞধারী চ নিত্যদা
327.88
নিবৃত্তিং চাস্থিতো ধর্মং গতিমক্ষয়ধর্মিণাম্
প্রবৃত্তিধর্মান্বিদধে কৃত্বা লোকস্য চিত্রতাম্
327.89
স আদিঃ স মধ্যঃ স চান্তঃ প্রজানাং; স ধাতা স ধেয়ঃ স কর্তা স কার্যম্
যুগান্তে স সুপ্তঃ সুসংক্ষিপ্য লোকা;ন্যুগাদৌ প্রবুদ্ধো জগদ্ধ্যুত্সসর্জ
327.90
তস্মৈ নমধ্বং দেবায় নির্গুণায় গুণাত্মনে
অজায় বিশ্বরূপায় ধাম্নে সর্বদিবৌকসাম্
327.91
মহাভূতাধিপতয়ে রুদ্রাণাং পতয়ে তথা
আদিত্যপতয়ে চৈব বসূনাং পতয়ে তথা
327.92
অশ্বিভ্যাং পতয়ে চৈব মরুতাং পতয়ে তথা
বেদয়জ্ঞাধিপতয়ে বেদাঙ্গপতয়েঽপি চ
327.93
সমুদ্রবাসিনে নিত্যং হরয়ে মুঞ্জকেশিনে
শান্তয়ে সর্বভূতানাং মোক্ষধর্মানুভাষিণে
327.94
তপসাং তেজসাং চৈব পতয়ে যশসোঽপি চ
বাচশ্চ পতয়ে নিত্যং সরিতাং পতয়ে তথা
327.95
কপর্দিনে বরাহায় একশৃঙ্গায় ধীমতে
বিবস্বতেঽশ্বশিরসে চতুর্মূর্তিধৃতে সদা
327.96
গুহ্যায় জ্ঞানদৃশ্যায় অক্ষরায় ক্ষরায় চ
এষ দেবঃ সংচরতি সর্বত্রগতিরব্যয়ঃ
327.97
এবমেতত্পুরা দৃষ্টং ময়া বৈ জ্ঞানচক্ষুষা
কথিতং তচ্চ বঃ সর্বং ময়া পৃষ্টেন তত্ত্বতঃ
327.98
ক্রিয়তাং মদ্বচঃ শিষ্যাঃ সেব্যতাং হরিরীশ্বরঃ
গীয়তাং বেদশব্দৈশ্চ পূজ্যতাং চ যথাবিধি
327.99
বৈশংপায়ন উবাচ
ইত্যুক্তাস্তু বয়ং তেন বেদব্যাসেন ধীমতা
সর্বে শিষ্যাঃ সুতশ্চাস্য শুকঃ পরমধর্মবিৎ
327.100
স চাস্মাকমুপাধ্যায়ঃ সহাস্মাভির্বিশাং পতে
চতুর্বেদোদ্গতাভিশ্চ ঋগ্ভিস্তমভিতুষ্টুবে
327.101
এতত্তে সর্বমাখ্যাতং যন্মাং ত্বং পরিপৃচ্ছসি
এবং মেঽকথয়দ্রাজন্পুরা দ্বৈপায়নো গুরুঃ
327.102
যশ্চেদং শৃণুয়ান্নিত্যং যশ্চেদং পরিকীর্তয়েৎ
নমো ভগবতে কৃত্বা সমাহিতমনা নরঃ
327.103
ভবত্যরোগো দ্যুতিমান্বলরূপসমন্বিতঃ
আতুরো মুচ্যতে রোগাদ্বদ্ধো মুচ্যেত বন্ধনাৎ
327.104
কামকামী লভেত্কামং দীর্ঘমায়ুরবাপ্নুয়াৎ
ব্রাহ্মণঃ সর্ববেদী স্যাত্ক্ষত্রিয়ো বিজয়ী ভবেৎ
বৈশ্যো বিপুললাভঃ স্যাচ্ছূদ্রঃ সুখমবাপ্নুয়াৎ
327.105
অপুত্রো লভতে পুত্রং কন্যা চৈবেপ্সিতং পতিম্
লগ্নগর্ভা বিমুচ্যেত গর্ভিণী জনয়েত্সুতম্
বন্ধ্যা প্রসবমাপ্নোতি পুত্রপৌত্রসমৃদ্ধিমৎ
327.106
ক্ষেমেণ গচ্ছেদধ্বানমিদং যঃ পঠতে পথি
যো যং কামং কাময়তে স তমাপ্নোতি চ ধ্রুবম্
327.107
ইদং মহর্ষের্বচনং বিনিশ্চিতং; মহাত্মনঃ পুরুষবরস্য কীর্তনম্
সমাগমং চর্ষিদিবৌকসামিমং; নিশম্য ভক্তাঃ সুসুখং লভন্তে