Utshovঅধ্যায় 326
326.1
ভীষ্ম উবাচ
এবং স্তুতঃ স ভগবান্গুহ্যৈস্তথ্যৈশ্চ নামভিঃ
তং মুনিং দর্শয়ামাস নারদং বিশ্বরূপধৃক্
326.2
কিংচিচ্চন্দ্রবিশুদ্ধাত্মা কিংচিচ্চন্দ্রাদ্বিশেষবান্
কৃশানুবর্ণঃ কিংচিচ্চ কিংচিদ্ধিষ্ণ্যাকৃতিঃ প্রভুঃ
326.3
শুকপত্রবর্ণঃ কিংচিচ্চ কিংচিত্স্ফটিকসপ্রভঃ
নীলাঞ্জনচয়প্রখ্যো জাতরূপপ্রভঃ ক্বচিৎ
326.4
প্রবালাঙ্কুরবর্ণশ্চ শ্বেতবর্ণঃ ক্বচিদ্বভৌ
ক্বচিত্সুবর্ণবর্ণাভো বৈডূর্যসদৃশঃ ক্বচিৎ
326.5
নীলবৈডূর্যসদৃশ ইন্দ্রনীলনিভঃ ক্বচিৎ
ময়ূরগ্রীববর্ণাভো মুক্তাহারনিভঃ ক্বচিৎ
326.6
এতান্বর্ণান্বহুবিধান্রূপে বিভ্রত্সনাতনঃ
সহস্রনয়নঃ শ্রীমাঞ্শতশীর্ষঃ সহস্রপাৎ
326.7
সহস্রোদরবাহুশ্চ অব্যক্ত ইতি চ ক্বচিৎ
ওংকারমুদ্গিরন্বক্ত্রাত্সাবিত্রীং চ তদন্বয়াম্
326.8
শেষেভ্যশ্চৈব বক্ত্রেভ্যশ্চতুর্বেদোদ্গতং বসু
আরণ্যকং জগৌ দেবো হরির্নারায়ণো বশী
326.9
বেদীং কমণ্ডলুং দর্ভান্মণিরূপানথোপলান্
অজিনং দণ্ডকাষ্ঠং চ জ্বলিতং চ হুতাশনম্
ধারয়ামাস দেবেশো হস্তৈর্যজ্ঞপতিস্তদা
326.10
তং প্রসন্নং প্রসন্নাত্মা নারদো দ্বিজসত্তমঃ
বাগ্যতঃ প্রয়তো ভূত্বা ববন্দে পরমেশ্বরম্
তমুবাচ নতং মূর্ধ্না দেবানামাদিরব্যয়ঃ
326.11
একতশ্চ দ্বিতশ্চৈব ত্রিতশ্চৈব মহর্ষয়ঃ
ইমং দেশমনুপ্রাপ্তা মম দর্শনলালসাঃ
326.12
ন চ মাং তে দদৃশিরে ন চ দ্রক্ষ্যতি কশ্চন
ঋতে হ্যেকান্তিকশ্রেষ্ঠাত্ত্বং চৈবৈকান্তিকো মতঃ
326.13
মমৈতাস্তনবঃ শ্রেষ্ঠা জাতা ধর্মগৃহে দ্বিজ
তাস্ত্বং ভজস্ব সততং সাধয়স্ব যথাগতম্
326.14
বৃণীষ্ব চ বরং বিপ্র মত্তস্ত্বং যমিহেচ্ছসি
প্রসন্নোঽহং তবাদ্যেহ বিশ্বমূর্তিরিহাব্যয়ঃ
326.15
নারদ উবাচ
অদ্য মে তপসো দেব যমস্য নিয়মস্য চ
সদ্যঃ ফলমবাপ্তং বৈ দৃষ্টো যদ্ভগবান্ময়া
326.16
বর এষ মমাত্যন্তং দৃষ্টস্ত্বং যত্সনাতনঃ
ভগবান্বিশ্বদৃক্সিংহঃ সর্বমূর্তির্মহাপ্রভুঃ
326.17
ভীষ্ম উবাচ
এবং সংদর্শয়িত্বা তু নারদং পরমেষ্ঠিজম্
উবাচ বচনং ভূয়ো গচ্ছ নারদ মাচিরম্
326.18
ইমে হ্যনিন্দ্রিয়াহারা মদ্ভক্তাশ্চন্দ্রবর্চসঃ
একাগ্রাশ্চিন্তয়েয়ুর্মাং নৈষাং বিঘ্নো ভবেদিতি
326.19
সিদ্ধাশ্চৈতে মহাভাগাঃ পুরা হ্যেকান্তিনোঽভবন্
তমোরজোবিনির্মুক্তা মাং প্রবেক্ষ্যন্ত্যসংশয়ম্
326.20
ন দৃশ্যশ্চক্ষুষা যোঽসৌ ন স্পৃশ্যঃ স্পর্শনেন চ
ন ঘ্রেয়শ্চৈব গন্ধেন রসেন চ বিবর্জিতঃ
326.21
সত্ত্বং রজস্তমশ্চৈব ন গুণাস্তং ভজন্তি বৈ
যশ্চ সর্বগতঃ সাক্ষী লোকস্যাত্মেতি কথ্যতে
326.22
ভূতগ্রামশরীরেষু নশ্যত্সু ন বিনশ্যতি
অজো নিত্যঃ শাশ্বতশ্চ নির্গুণো নিষ্কলস্তথা
326.23
দ্বির্দ্বাদশেভ্যস্তত্ত্বেভ্যঃ খ্যাতো যঃ পঞ্চবিংশকঃ
পুরুষো নিষ্ক্রিয়শ্চৈব জ্ঞানদৃশ্যশ্চ কথ্যতে
326.24
যং প্রবিশ্য ভবন্তীহ মুক্তা বৈ দ্বিজসত্তম
স বাসুদেবো বিজ্ঞেয়ঃ পরমাত্মা সনাতনঃ
326.25
পশ্য দেবস্য মাহাত্ম্যং মহিমানং চ নারদ
শুভাশুভৈঃ কর্মভির্যো ন লিপ্যতি কদাচন
326.26
সত্ত্বং রজস্তমশ্চৈব গুণানেতান্প্রচক্ষতে
এতে সর্বশরীরেষু তিষ্ঠন্তি বিচরন্তি চ
326.27
এতান্গুণাংস্তু ক্ষেত্রজ্ঞো ভুঙ্ক্তে নৈভিঃ স ভুজ্যতে
নির্গুণো গুণভুক্চৈব গুণস্রষ্টা গুণাধিকঃ
326.28
জগত্প্রতিষ্ঠা দেবর্ষে পৃথিব্যপ্সু প্রলীয়তে
জ্যোতিষ্যাপঃ প্রলীয়ন্তে জ্যোতির্বায়ৌ প্রলীয়তে
326.29
খে বায়ুঃ প্রলয়ং যাতি মনস্যাকাশমেব চ
মনো হি পরমং ভূতং তদব্যক্তে প্রলীয়তে
326.30
অব্যক্তং পুরুষে ব্রহ্মন্নিষ্ক্রিয়ে সংপ্রলীয়তে
নাস্তি তস্মাত্পরতরং পুরুষাদ্বৈ সনাতনাৎ
326.31
নিত্যং হি নাস্তি জগতি ভূতং স্থাবরজঙ্গমম্
ঋতে তমেকং পুরুষং বাসুদেবং সনাতনম্
সর্বভূতাত্মভূতো হি বাসুদেবো মহাবলঃ
326.32
পৃথিবী বায়ুরাকাশমাপো জ্যোতিশ্চ পঞ্চমম্
তে সমেতা মহাত্মানঃ শরীরমিতি সংজ্ঞিতম্
326.33
তদাবিশতি যো ব্রহ্মন্নদৃশ্যো লঘুবিক্রমঃ
উত্পন্ন এব ভবতি শরীরং চেষ্টয়ন্প্রভুঃ
326.34
ন বিনা ধাতুসংঘাতং শরীরং ভবতি ক্বচিৎ
ন চ জীবং বিনা ব্রহ্মন্ধাতবশ্চেষ্টয়ন্ত্যুত
326.35
স জীবঃ পরিসংখ্যাতঃ শেষঃ সংকর্ষণঃ প্রভুঃ
তস্মাত্সনত্কুমারত্বং যো লভেত স্বকর্মণা
326.36
যস্মিংশ্চ সর্বভূতানি প্রলয়ং যান্তি সংক্ষয়ে
স মনঃ সর্বভূতানাং প্রদ্যুম্নঃ পরিপঠ্যতে
326.37
তস্মাত্প্রসূতো যঃ কর্তা কার্যং কারণমেব চ
যস্মাত্সর্বং প্রভবতি জগত্স্থাবরজঙ্গমম্
সোঽনিরুদ্ধঃ স ঈশানো ব্যক্তিঃ সা সর্বকর্মসু
326.38
যো বাসুদেবো ভগবান্ক্ষেত্রজ্ঞো নির্গুণাত্মকঃ
জ্ঞেয়ঃ স এব ভগবাঞ্জীবঃ সংকর্ষণঃ প্রভুঃ
326.39
সংকর্ষণাচ্চ প্রদ্যুম্নো মনোভূতঃ স উচ্যতে
প্রদ্যুম্নাদ্যোঽনিরুদ্ধস্তু সোঽহংকারো মহেশ্বরঃ
326.40
মত্তঃ সর্বং সংভবতি জগত্স্থাবরজঙ্গমম্
অক্ষরং চ ক্ষরং চৈব সচ্চাসচ্চৈব নারদ
326.41
মাং প্রবিশ্য ভবন্তীহ মুক্তা ভক্তাস্তু যে মম
অহং হি পুরুষো জ্ঞেয়ো নিষ্ক্রিয়ঃ পঞ্চবিংশকঃ
326.42
নির্গুণো নিষ্কলশ্চৈব নির্দ্বংদ্বো নিষ্পরিগ্রহঃ
এতত্ত্বয়া ন বিজ্ঞেয়ং রূপবানিতি দৃশ্যতে
ইচ্ছন্মুহূর্তান্নশ্যেয়মীশোঽহং জগতো গুরুঃ
326.43
মায়া হ্যেষা ময়া সৃষ্টা যন্মাং পশ্যসি নারদ
সর্বভূতগুণৈর্যুক্তং নৈবং ত্বং জ্ঞাতুমর্হসি
ময়ৈতত্কথিতং সম্যক্তব মূর্তিচতুষ্টয়ম্
326.44
সিদ্ধা হ্যেতে মহাভাগা নরা হ্যেকান্তিনোঽভবন্
তমোরজোভ্যাং নির্মুক্তাঃ প্রবেক্ষ্যন্তি চ মাং মুনে
326.45
অহং কর্তা চ কার্যং চ কারণং চাপি নারদ
অহং হি জীবসংজ্ঞো বৈ ময়ি জীবঃ সমাহিতঃ
মৈবং তে বুদ্ধিরত্রাভূদ্দৃষ্টো জীবো ময়েতি চ
326.46
অহং সর্বত্রগো ব্রহ্মন্ভূতগ্রামান্তরাত্মকঃ
ভূতগ্রামশরীরেষু নশ্যত্সু ন নশাম্যহম্
326.47
হিরণ্যগর্ভো লোকাদিশ্চতুর্বক্ত্রো নিরুক্তগঃ
ব্রহ্মা সনাতনো দেবো মম বহ্বর্থচিন্তকঃ
326.48
পশ্যৈকাদশ মে রুদ্রান্দক্ষিণং পার্শ্বমাস্থিতান্
দ্বাদশৈব তথাদিত্যান্বামং পার্শ্বং সমাস্থিতান্
326.49
অগ্রতশ্চৈব মে পশ্য বসূনষ্টৌ সুরোত্তমান্
নাসত্যং চৈব দস্রং চ ভিষজৌ পশ্য পৃষ্ঠতঃ
326.50
সর্বান্প্রজাপতীন্পশ্য পশ্য সপ্ত ঋষীনপি
বেদান্যজ্ঞাংশ্চ শতশঃ পশ্যামৃতমথৌষধীঃ
326.51
তপাংসি নিয়মাংশ্চৈব যমানপি পৃথগ্বিধান্
তথাষ্টগুণমৈশ্বর্যমেকস্থং পশ্য মূর্তিমৎ
326.52
শ্রিয়ং লক্ষ্মীং চ কীর্তিং চ পৃথিবীং চ ককুদ্মিনীম্
বেদানাং মাতরং পশ্য মত্স্থাং দেবীং সরস্বতীম্
326.53
ধ্রুবং চ জ্যোতিষাং শ্রেষ্ঠং পশ্য নারদ খেচরম্
অম্ভোধরান্সমুদ্রাংশ্চ সরাংসি সরিতস্তথা
326.54
মূর্তিমন্তঃ পিতৃগণাংশ্চতুরঃ পশ্য সত্তম
ত্রীংশ্চৈবেমান্গুণান্পশ্য মত্স্থান্মূর্তিবিবর্জিতান্
326.55
দেবকার্যাদপি মুনে পিতৃকার্যং বিশিষ্যতে
দেবানাং চ পিতৄণাং চ পিতা হ্যেকোঽহমাদিতঃ
326.56
অহং হয়শিরো ভূত্বা সমুদ্রে পশ্চিমোত্তরে
পিবামি সুহুতং হব্যং কব্যং চ শ্রদ্ধয়ান্বিতম্
326.57
ময়া সৃষ্টঃ পুরা ব্রহ্মা মদ্যজ্ঞময়জত্স্বয়ম্
ততস্তস্মৈ বরান্প্রীতো দদাবহমনুত্তমান্
326.58
মত্পুত্রত্বং চ কল্পাদৌ লোকাধ্যক্ষত্বমেব চ
অহংকারকৃতং চৈব নাম পর্যায়বাচকম্
326.59
ত্বয়া কৃতাং চ মর্যাদাং নাতিক্রাম্যতি কশ্চন
ত্বং চৈব বরদো ব্রহ্মন্বরেপ্সূনাং ভবিষ্যসি
326.60
সুরাসুরগণানাং চ ঋষীণাং চ তপোধন
পিতৄণাং চ মহাভাগ সততং সংশিতব্রত
বিবিধানাং চ ভূতানাং ত্বমুপাস্যো ভবিষ্যসি
326.61
প্রাদুর্ভাবগতশ্চাহং সুরকার্যেষু নিত্যদা
অনুশাস্যস্ত্বয়া ব্রহ্মন্নিয়োজ্যশ্চ সুতো যথা
326.62
এতাংশ্চান্যাংশ্চ রুচিরান্ব্রহ্মণেঽমিততেজসে
অহং দত্ত্বা বরান্প্রীতো নিবৃত্তিপরমোঽভবম্
326.63
নির্বাণং সর্বধর্মাণাং নিবৃত্তিঃ পরমা স্মৃতা
তস্মান্নিবৃত্তিমাপন্নশ্চরেত্সর্বাঙ্গনির্বৃতঃ
326.64
বিদ্যাসহায়বন্তং মামাদিত্যস্থং সনাতনম্
কপিলং প্রাহুরাচার্যাঃ সাংখ্যনিশ্চিতনিশ্চয়াঃ
326.65
হিরণ্যগর্ভো ভগবানেষ ছন্দসি সুষ্টুতঃ
সোঽহং যোগগতির্ব্রহ্মন্যোগশাস্ত্রেষু শব্দিতঃ
326.66
এষোঽহং ব্যক্তিমাগম্য তিষ্ঠামি দিবি শাশ্বতঃ
ততো যুগসহস্রান্তে সংহরিষ্যে জগত্পুনঃ
কৃত্বাত্মস্থানি ভূতানি স্থাবরাণি চরাণি চ
326.67
একাকী বিদ্যয়া সার্ধং বিহরিষ্যে দ্বিজোত্তম
ততো ভূয়ো জগত্সর্বং করিষ্যামীহ বিদ্যয়া
326.68
অস্মন্মূর্তিশ্চতুর্থী যা সাসৃজচ্ছেষমব্যয়ম্
স হি সংকর্ষণঃ প্রোক্তঃ প্রদ্যুম্নং সোঽপ্যজীজনৎ
326.69
প্রদ্যুম্নাদনিরুদ্ধোঽহং সর্গো মম পুনঃ পুনঃ
অনিরুদ্ধাত্তথা ব্রহ্মা তত্রাদিকমলোদ্ভবঃ
326.70
ব্রহ্মণঃ সর্বভূতানি চরাণি স্থাবরাণি চ
এতাং সৃষ্টিং বিজানীহি কল্পাদিষু পুনঃ পুনঃ
326.71
যথা সূর্যস্য গগনাদুদয়াস্তময়াবিহ
নষ্টৌ পুনর্বলাত্কাল আনয়ত্যমিতদ্যুতিঃ
তথা বলাদহং পৃথ্বীং সর্বভূতহিতায় বৈ
326.72
সত্ত্বৈরাক্রান্তসর্বাঙ্গাং নষ্টাং সাগরমেখলাম্
আনয়িষ্যামি স্বং স্থানং বারাহং রূপমাস্থিতঃ
326.73
হিরণ্যাক্ষং হনিষ্যামি দৈতেয়ং বলগর্বিতম্
নারসিংহং বপুঃ কৃত্বা হিরণ্যকশিপুং পুনঃ
সুরকার্যে হনিষ্যামি যজ্ঞঘ্নং দিতিনন্দনম্
326.74
বিরোচনস্য বলবান্বলিঃ পুত্রো মহাসুরঃ
ভবিষ্যতি স শক্রং চ স্বরাজ্যাচ্চ্যাবয়িষ্যতি
326.75
ত্রৈলোক্যেঽপহৃতে তেন বিমুখে চ শচীপতৌ
অদিত্যাং দ্বাদশঃ পুত্রঃ সংভবিষ্যামি কশ্যপাৎ
326.76
ততো রাজ্যং প্রদাস্যামি শক্রায়ামিততেজসে
দেবতাঃ স্থাপয়িষ্যামি স্বেষু স্থানেষু নারদ
বলিং চৈব করিষ্যামি পাতালতলবাসিনম্
326.77
ত্রেতায়ুগে ভবিষ্যামি রামো ভৃগুকুলোদ্বহঃ
ক্ষত্রং চোত্সাদয়িষ্যামি সমৃদ্ধবলবাহনম্
326.78
সংধৌ তু সমনুপ্রাপ্তে ত্রেতায়াং দ্বাপরস্য চ
রামো দাশরথির্ভূত্বা ভবিষ্যামি জগত্পতিঃ
326.79
ত্রিতোপঘাতাদ্বৈরূপ্যমেকতোঽথ দ্বিতস্তথা
প্রাপ্স্যতো বানরত্বং হি প্রজাপতিসুতাবৃষী
326.80
তয়োর্যে ত্বন্বয়ে জাতা ভবিষ্যন্তি বনৌকসঃ
তে সহায়া ভবিষ্যন্তি সুরকার্যে মম দ্বিজ
326.81
ততো রক্ষঃপতিং ঘোরং পুলস্ত্যকুলপাংসনম্
হনিষ্যে রাবণং সংখ্যে সগণং লোককণ্টকম্
326.82
দ্বাপরস্য কলেশ্চৈব সংধৌ পর্যবসানিকে
প্রাদুর্ভাবঃ কংসহেতোর্মথুরায়াং ভবিষ্যতি
326.83
তত্রাহং দানবান্হত্বা সুবহূন্দেবকণ্টকান্
কুশস্থলীং করিষ্যামি নিবাসং দ্বারকাং পুরীম্
326.84
বসানস্তত্র বৈ পুর্যামদিতের্বিপ্রিয়ংকরম্
হনিষ্যে নরকং ভৌমং মুরং পীঠং চ দানবম্
326.85
প্রাগ্জ্যোতিষপুরং রম্যং নানাধনসমন্বিতম্
কুশস্থলীং নয়িষ্যামি হত্বা বৈ দানবোত্তমান্
326.86
শংকরং চ মহাসেনং বাণপ্রিয়হিতৈষিণম্
পরাজেষ্যাম্যথোদ্যুক্তৌ দেবলোকনমস্কৃতৌ
326.87
ততঃ সুতং বলের্জিত্বা বাণং বাহুসহস্রিণম্
বিনাশয়িষ্যামি ততঃ সর্বান্সৌভনিবাসিনঃ
326.88
যঃ কালয়বনঃ খ্যাতো গর্গতেজোভিসংবৃতঃ
ভবিষ্যতি বধস্তস্য মত্ত এব দ্বিজোত্তম
326.89
জরাসংধশ্চ বলবান্সর্বরাজবিরোধকঃ
ভবিষ্যত্যসুরঃ স্ফীতো ভূমিপালো গিরিব্রজে
মম বুদ্ধিপরিস্পন্দাদ্বধস্তস্য ভবিষ্যতি
326.90
সমাগতেষু বলিষু পৃথিব্যাং সর্বরাজসু
বাসবিঃ সুসহায়ো বৈ মম হ্যেকো ভবিষ্যতি
326.91
এবং লোকা বদিষ্যন্তি নরনারায়ণাবৃষী
উদ্যুক্তৌ দহতঃ ক্ষত্রং লোককার্যার্থমীশ্বরৌ
326.92
কৃত্বা ভারাবতরণং বসুধায়া যথেপ্সিতম্
সর্বসাত্বতমুখ্যানাং দ্বারকায়াশ্চ সত্তম
করিষ্যে প্রলয়ং ঘোরমাত্মজ্ঞাতিবিনাশনম্
326.93
কর্মাণ্যপরিমেয়ানি চতুর্মূর্তিধরো হ্যহম্
কৃত্বা লোকান্গমিষ্যামি স্বানহং ব্রহ্মসত্কৃতান্
326.94
হংসো হয়শিরাশ্চৈব প্রাদুর্ভাবা দ্বিজোত্তম
যদা বেদশ্রুতির্নষ্টা ময়া প্রত্যাহৃতা তদা
সবেদাঃ সশ্রুতীকাশ্চ কৃতাঃ পূর্বং কৃতে যুগে
326.95
অতিক্রান্তাঃ পুরাণেষু শ্রুতাস্তে যদি বা ক্বচিৎ
অতিক্রান্তাশ্চ বহবঃ প্রাদুর্ভাবা মমোত্তমাঃ
লোককার্যাণি কৃত্বা চ পুনঃ স্বাং প্রকৃতিং গতাঃ
326.96
ন হ্যেতদ্ব্রহ্মণা প্রাপ্তমীদৃশং মম দর্শনম্
যত্ত্বয়া প্রাপ্তমদ্যেহ একান্তগতবুদ্ধিনা
326.97
এতত্তে সর্বমাখ্যাতং ব্রহ্মন্ভক্তিমতো ময়া
পুরাণং চ ভবিষ্যং চ সরহস্যং চ সত্তম
326.98
এবং স ভগবান্দেবো বিশ্বমূর্তিধরোঽব্যয়ঃ
এতাবদুক্ত্বা বচনং তত্রৈবান্তরধীয়ত
326.99
নারদোঽপি মহাতেজাঃ প্রাপ্যানুগ্রহমীপ্সিতম্
নরনারায়ণৌ দ্রষ্টুং প্রাদ্রবদ্বদরাশ্রমম্
326.100
ইদং মহোপনিষদং চতুর্বেদসমন্বিতম্
সাংখ্যয়োগকৃতং তেন পঞ্চরাত্রানুশব্দিতম্
326.101
নারায়ণমুখোদ্গীতং নারদোঽশ্রাবয়ত্পুনঃ
ব্রহ্মণঃ সদনে তাত যথা দৃষ্টং যথা শ্রুতম্
326.102
যুধিষ্ঠির উবাচ
এতদাশ্চর্যভূতং হি মাহাত্ম্যং তস্য ধীমতঃ
কিং ব্রহ্মা ন বিজানীতে যতঃ শুশ্রাব নারদাৎ
326.103
পিতামহো হি ভগবাংস্তস্মাদ্দেবাদনন্তরঃ
কথং স ন বিজানীয়াত্প্রভাবমমিতৌজসঃ
326.104
ভীষ্ম উবাচ
মহাকল্পসহস্রাণি মহাকল্পশতানি চ
সমতীতানি রাজেন্দ্র সর্গাশ্চ প্রলয়াশ্চ হ
326.105
সর্গস্যাদৌ স্মৃতো ব্রহ্মা প্রজাসর্গকরঃ প্রভুঃ
জানাতি দেবপ্রবরং ভূয়শ্চাতোঽধিকং নৃপ
পরমাত্মানমীশানমাত্মনঃ প্রভবং তথা
326.106
যে ত্বন্যে ব্রহ্মসদনে সিদ্ধসংঘাঃ সমাগতাঃ
তেভ্যস্তচ্ছ্রাবয়ামাস পুরাণং বেদসংমিতম্
326.107
তেষাং সকাশাত্সূর্যশ্চ শ্রুত্বা বৈ ভাবিতাত্মনাম্
আত্মানুগামিনাং ব্রহ্ম শ্রাবয়ামাস ভারত
326.108
ষট্ষষ্টির্হি সহস্রাণি ঋষীণাং ভাবিতাত্মনাম্
সূর্যস্য তপতো লোকান্নির্মিতা যে পুরঃসরাঃ
তেষামকথয়ত্সূর্যঃ সর্বেষাং ভাবিতাত্মনাম্
326.109
সূর্যানুগামিভিস্তাত ঋষিভিস্তৈর্মহাত্মভিঃ
মেরৌ সমাগতা দেবাঃ শ্রাবিতাশ্চেদমুত্তমম্
326.110
দেবানাং তু সকাশাদ্বৈ ততঃ শ্রুত্বাসিতো দ্বিজঃ
শ্রাবয়ামাস রাজেন্দ্র পিতৄণাং মুনিসত্তমঃ
326.111
মম চাপি পিতা তাত কথয়ামাস শংতনুঃ
ততো ময়ৈতচ্ছ্রুত্বা চ কীর্তিতং তব ভারত
326.112
সুরৈর্বা মুনিভির্বাপি পুরাণং যৈরিদং শ্রুতম্
সর্বে তে পরমাত্মানং পূজয়ন্তি পুনঃ পুনঃ
326.113
ইদমাখ্যানমার্ষেয়ং পারংপর্যাগতং নৃপ
নাবাসুদেবভক্তায় ত্বয়া দেয়ং কথংচন
326.114
মত্তোঽন্যানি চ তে রাজন্নুপাখ্যানশতানি বৈ
যানি শ্রুতানি ধর্ম্যাণি তেষাং সারোঽয়মুদ্ধৃতঃ
326.115
সুরাসুরৈর্যথা রাজন্নির্মথ্যামৃতমুদ্ধৃতম্
এবমেতত্পুরা বিপ্রৈঃ কথামৃতমিহোদ্ধৃতম্
326.116
যশ্চেদং পঠতে নিত্যং যশ্চেদং শৃণুয়ান্নরঃ
একান্তভাবোপগত একান্তে সুসমাহিতঃ
326.117
প্রাপ্য শ্বেতং মহাদ্বীপং ভূত্বা চন্দ্রপ্রভো নরঃ
স সহস্রার্চিষং দেবং প্রবিশেন্নাত্র সংশয়ঃ
326.118
মুচ্যেদার্তস্তথা রোগাচ্ছ্রুত্বেমামাদিতঃ কথাম্
জিজ্ঞাসুর্লভতে কামান্ভক্তো ভক্তগতিং ব্রজেৎ
326.119
ত্বয়াপি সততং রাজন্নভ্যর্চ্যঃ পুরুষোত্তমঃ
স হি মাতা পিতা চৈব কৃত্স্নস্য জগতো গুরুঃ
326.120
ব্রহ্মণ্যদেবো ভগবান্প্রীয়তাং তে সনাতনঃ
যুধিষ্ঠির মহাবাহো মহাবাহুর্জনার্দনঃ
326.121
বৈশংপায়ন উবাচ
শ্রুত্বৈতদাখ্যানবরং ধর্মরাড্জনমেজয়
ভ্রাতরশ্চাস্য তে সর্বে নারায়ণপরাভবন্
326.122
জিতং ভগবতা তেন পুরুষেণেতি ভারত
নিত্যং জপ্যপরা ভূত্বা সরস্বতীমুদীরয়ন্
326.123
যো হ্যস্মাকং গুরুঃ শ্রেষ্ঠঃ কৃষ্ণদ্বৈপায়নো মুনিঃ
স জগৌ পরমং জপ্যং নারায়ণমুদীরয়ন্
326.124
গত্বান্তরিক্ষাত্সততং ক্ষীরোদমমৃতাশয়ম্
পূজয়িত্বা চ দেবেশং পুনরায়াত্স্বমাশ্রমম্