UtshovChapter 326
326.1
भीष्म उवाच
एवं स्तुतः स भगवान्गुह्यैस्तथ्यैश्च नामभिः
तं मुनिं दर्शयामास नारदं विश्वरूपधृक्
Bhishma uvacha
Evam stutah sa bhagavanguhyaistathyaishcha namabhih
Tam munim darshayamasa naradam vishvarupadhrik
326.2
किंचिच्चन्द्रविशुद्धात्मा किंचिच्चन्द्राद्विशेषवान्
कृशानुवर्णः किंचिच्च किंचिद्धिष्ण्याकृतिः प्रभुः
Kinchichchandravishuddhatma kinchichchandradvisheshavan
Krishanuvarnah kinchichcha kinchiddhishnyakritih prabhuh
326.3
शुकपत्रवर्णः किंचिच्च किंचित्स्फटिकसप्रभः
नीलाञ्जनचयप्रख्यो जातरूपप्रभः क्वचित्
Shukapatravarnah kinchichcha kinchitsphatikasaprabhah
Nilanjanachayaprakhyo jatarupaprabhah kvachit
326.4
प्रवालाङ्कुरवर्णश्च श्वेतवर्णः क्वचिद्बभौ
क्वचित्सुवर्णवर्णाभो वैडूर्यसदृशः क्वचित्
Pravalankuravarnashcha shvetavarnah kvachidbabhau
Kvachitsuvarnavarnabho vaiduryasadrishah kvachit
326.5
नीलवैडूर्यसदृश इन्द्रनीलनिभः क्वचित्
मयूरग्रीववर्णाभो मुक्ताहारनिभः क्वचित्
Nilavaiduryasadrisha indranilanibhah kvachit
Mayuragrivavarnabho muktaharanibhah kvachit
326.6
एतान्वर्णान्बहुविधान्रूपे बिभ्रत्सनातनः
सहस्रनयनः श्रीमाञ्शतशीर्षः सहस्रपात्
Etanvarnanbahuvidhanrupe bibhratsanatanah
Sahasranayanah shrimanshatashirshah sahasrapat
326.7
सहस्रोदरबाहुश्च अव्यक्त इति च क्वचित्
ओंकारमुद्गिरन्वक्त्रात्सावित्रीं च तदन्वयाम्
Sahasrodarabahushcha avyakta iti cha kvachit
Onkaramudgiranvaktratsavitrim cha tadanvayam
326.8
शेषेभ्यश्चैव वक्त्रेभ्यश्चतुर्वेदोद्गतं वसु
आरण्यकं जगौ देवो हरिर्नारायणो वशी
Sheshebhyashchaiva vaktrebhyashchaturvedodgatam vasu
Aranyakam jagau devo harirnarayano vashi
326.9
वेदीं कमण्डलुं दर्भान्मणिरूपानथोपलान्
अजिनं दण्डकाष्ठं च ज्वलितं च हुताशनम्
धारयामास देवेशो हस्तैर्यज्ञपतिस्तदा
Vedim kamandalum darbhanmanirupanathopalan
Ajinam dandakashtham cha jvalitam cha hutashanam
Dharayamasa devesho hastairyagyapatistada
326.10
तं प्रसन्नं प्रसन्नात्मा नारदो द्विजसत्तमः
वाग्यतः प्रयतो भूत्वा ववन्दे परमेश्वरम्
तमुवाच नतं मूर्ध्ना देवानामादिरव्ययः
Tam prasannam prasannatma narado dvijasattamah
Vagyatah prayato bhutva vavande parameshvaram
Tamuvacha natam murdhna devanamadiravyayah
326.11
एकतश्च द्वितश्चैव त्रितश्चैव महर्षयः
इमं देशमनुप्राप्ता मम दर्शनलालसाः
Ekatashcha dvitashchaiva tritashchaiva maharshayah
Imam deshamanuprapta mama darshanalalasah
326.12
न च मां ते ददृशिरे न च द्रक्ष्यति कश्चन
ऋते ह्येकान्तिकश्रेष्ठात्त्वं चैवैकान्तिको मतः
Na cha mam te dadrishire na cha drakshyati kashchana
Rite hyekantikashreshthattvam chaivaikantiko matah
326.13
ममैतास्तनवः श्रेष्ठा जाता धर्मगृहे द्विज
तास्त्वं भजस्व सततं साधयस्व यथागतम्
Mamaitastanavah shreshtha jata dharmagrihe dvija
Tastvam bhajasva satatam sadhayasva yathagatam
326.14
वृणीष्व च वरं विप्र मत्तस्त्वं यमिहेच्छसि
प्रसन्नोऽहं तवाद्येह विश्वमूर्तिरिहाव्ययः
Vrinishva cha varam vipra mattastvam yamihechchhasi
Prasannoham tavadyeha vishvamurtirihavyayah
326.15
नारद उवाच
अद्य मे तपसो देव यमस्य नियमस्य च
सद्यः फलमवाप्तं वै दृष्टो यद्भगवान्मया
Narada uvacha
Adya me tapaso deva yamasya niyamasya cha
Sadyah phalamavaptam vai drishto yadbhagavanmaya
326.16
वर एष ममात्यन्तं दृष्टस्त्वं यत्सनातनः
भगवान्विश्वदृक्सिंहः सर्वमूर्तिर्महाप्रभुः
Vara esha mamatyantam drishtastvam yatsanatanah
Bhagavanvishvadriksinhah sarvamurtirmahaprabhuh
326.17
भीष्म उवाच
एवं संदर्शयित्वा तु नारदं परमेष्ठिजम्
उवाच वचनं भूयो गच्छ नारद माचिरम्
Bhishma uvacha
Evam sandarshayitva tu naradam parameshthijam
Uvacha vachanam bhuyo gachchha narada machiram
326.18
इमे ह्यनिन्द्रियाहारा मद्भक्ताश्चन्द्रवर्चसः
एकाग्राश्चिन्तयेयुर्मां नैषां विघ्नो भवेदिति
Ime hyanindriyahara madbhaktashchandravarchasah
Ekagrashchintayeyurmam naisham vighno bhavediti
326.19
सिद्धाश्चैते महाभागाः पुरा ह्येकान्तिनोऽभवन्
तमोरजोविनिर्मुक्ता मां प्रवेक्ष्यन्त्यसंशयम्
Siddhashchaite mahabhagah pura hyekantinobhavan
Tamorajovinirmukta mam pravekshyantyasanshayam
326.20
न दृश्यश्चक्षुषा योऽसौ न स्पृश्यः स्पर्शनेन च
न घ्रेयश्चैव गन्धेन रसेन च विवर्जितः
Na drishyashchakshusha yosau na sprishyah sparshanena cha
Na ghreyashchaiva gandhena rasena cha vivarjitah
326.21
सत्त्वं रजस्तमश्चैव न गुणास्तं भजन्ति वै
यश्च सर्वगतः साक्षी लोकस्यात्मेति कथ्यते
Sattvam rajastamashchaiva na gunastam bhajanti vai
Yashcha sarvagatah sakshi lokasyatmeti kathyate
326.22
भूतग्रामशरीरेषु नश्यत्सु न विनश्यति
अजो नित्यः शाश्वतश्च निर्गुणो निष्कलस्तथा
Bhutagramasharireshu nashyatsu na vinashyati
Ajo nityah shashvatashcha nirguno nishkalastatha
326.23
द्विर्द्वादशेभ्यस्तत्त्वेभ्यः ख्यातो यः पञ्चविंशकः
पुरुषो निष्क्रियश्चैव ज्ञानदृश्यश्च कथ्यते
Dvirdvadashebhyastattvebhyah khyato yah panchavinshakah
Purusho nishkriyashchaiva gyanadrishyashcha kathyate
326.24
यं प्रविश्य भवन्तीह मुक्ता वै द्विजसत्तम
स वासुदेवो विज्ञेयः परमात्मा सनातनः
Yam pravishya bhavantiha mukta vai dvijasattama
Sa vasudevo vigyeyah paramatma sanatanah
326.25
पश्य देवस्य माहात्म्यं महिमानं च नारद
शुभाशुभैः कर्मभिर्यो न लिप्यति कदाचन
Pashya devasya mahatmyam mahimanam cha narada
Shubhashubhaih karmabhiryo na lipyati kadachana
326.26
सत्त्वं रजस्तमश्चैव गुणानेतान्प्रचक्षते
एते सर्वशरीरेषु तिष्ठन्ति विचरन्ति च
Sattvam rajastamashchaiva gunanetanprachakshate
Ete sarvasharireshu tishthanti vicharanti cha
326.27
एतान्गुणांस्तु क्षेत्रज्ञो भुङ्क्ते नैभिः स भुज्यते
निर्गुणो गुणभुक्चैव गुणस्रष्टा गुणाधिकः
Etangunanstu kshetragyo bhunkte naibhih sa bhujyate
Nirguno gunabhukchaiva gunasrashta gunadhikah
326.28
जगत्प्रतिष्ठा देवर्षे पृथिव्यप्सु प्रलीयते
ज्योतिष्यापः प्रलीयन्ते ज्योतिर्वायौ प्रलीयते
Jagatpratishtha devarshe prithivyapsu praliyate
Jyotishyapah praliyante jyotirvayau praliyate
326.29
खे वायुः प्रलयं याति मनस्याकाशमेव च
मनो हि परमं भूतं तदव्यक्ते प्रलीयते
Khe vayuh pralayam yati manasyakashameva cha
Mano hi paramam bhutam tadavyakte praliyate
326.30
अव्यक्तं पुरुषे ब्रह्मन्निष्क्रिये संप्रलीयते
नास्ति तस्मात्परतरं पुरुषाद्वै सनातनात्
Avyaktam purushe brahmannishkriye sampraliyate
Nasti tasmatparataram purushadvai sanatanat
326.31
नित्यं हि नास्ति जगति भूतं स्थावरजङ्गमम्
ऋते तमेकं पुरुषं वासुदेवं सनातनम्
सर्वभूतात्मभूतो हि वासुदेवो महाबलः
Nityam hi nasti jagati bhutam sthavarajangamam
Rite tamekam purusham vasudevam sanatanam
Sarvabhutatmabhuto hi vasudevo mahabalah
326.32
पृथिवी वायुराकाशमापो ज्योतिश्च पञ्चमम्
ते समेता महात्मानः शरीरमिति संज्ञितम्
Prithivi vayurakashamapo jyotishcha panchamam
Te sameta mahatmanah shariramiti sangyitam
326.33
तदाविशति यो ब्रह्मन्नदृश्यो लघुविक्रमः
उत्पन्न एव भवति शरीरं चेष्टयन्प्रभुः
Tadavishati yo brahmannadrishyo laghuvikramah
Utpanna eva bhavati shariram cheshtayanprabhuh
326.34
न विना धातुसंघातं शरीरं भवति क्वचित्
न च जीवं विना ब्रह्मन्धातवश्चेष्टयन्त्युत
Na vina dhatusanghatam shariram bhavati kvachit
Na cha jivam vina brahmandhatavashcheshtayantyuta
326.35
स जीवः परिसंख्यातः शेषः संकर्षणः प्रभुः
तस्मात्सनत्कुमारत्वं यो लभेत स्वकर्मणा
Sa jivah parisankhyatah sheshah sankarshanah prabhuh
Tasmatsanatkumaratvam yo labheta svakarmana
326.36
यस्मिंश्च सर्वभूतानि प्रलयं यान्ति संक्षये
स मनः सर्वभूतानां प्रद्युम्नः परिपठ्यते
Yasminshcha sarvabhutani pralayam yanti sankshaye
Sa manah sarvabhutanam pradyumnah paripathyate
326.37
तस्मात्प्रसूतो यः कर्ता कार्यं कारणमेव च
यस्मात्सर्वं प्रभवति जगत्स्थावरजङ्गमम्
सोऽनिरुद्धः स ईशानो व्यक्तिः सा सर्वकर्मसु
Tasmatprasuto yah karta karyam karanameva cha
Yasmatsarvam prabhavati jagatsthavarajangamam
Soniruddhah sa ishano vyaktih sa sarvakarmasu
326.38
यो वासुदेवो भगवान्क्षेत्रज्ञो निर्गुणात्मकः
ज्ञेयः स एव भगवाञ्जीवः संकर्षणः प्रभुः
Yo vasudevo bhagavankshetragyo nirgunatmakah
Gyeyah sa eva bhagavanjivah sankarshanah prabhuh
326.39
संकर्षणाच्च प्रद्युम्नो मनोभूतः स उच्यते
प्रद्युम्नाद्योऽनिरुद्धस्तु सोऽहंकारो महेश्वरः
Sankarshanachcha pradyumno manobhutah sa uchyate
Pradyumnadyoniruddhastu sohankaro maheshvarah
326.40
मत्तः सर्वं संभवति जगत्स्थावरजङ्गमम्
अक्षरं च क्षरं चैव सच्चासच्चैव नारद
Mattah sarvam sambhavati jagatsthavarajangamam
Aksharam cha ksharam chaiva sachchasachchaiva narada
326.41
मां प्रविश्य भवन्तीह मुक्ता भक्तास्तु ये मम
अहं हि पुरुषो ज्ञेयो निष्क्रियः पञ्चविंशकः
Mam pravishya bhavantiha mukta bhaktastu ye mama
Aham hi purusho gyeyo nishkriyah panchavinshakah
326.42
निर्गुणो निष्कलश्चैव निर्द्वंद्वो निष्परिग्रहः
एतत्त्वया न विज्ञेयं रूपवानिति दृश्यते
इच्छन्मुहूर्तान्नश्येयमीशोऽहं जगतो गुरुः
Nirguno nishkalashchaiva nirdvandvo nishparigrahah
Etattvaya na vigyeyam rupavaniti drishyate
Ichchhanmuhurtannashyeyamishoham jagato guruh
326.43
माया ह्येषा मया सृष्टा यन्मां पश्यसि नारद
सर्वभूतगुणैर्युक्तं नैवं त्वं ज्ञातुमर्हसि
मयैतत्कथितं सम्यक्तव मूर्तिचतुष्टयम्
Maya hyesha maya srishta yanmam pashyasi narada
Sarvabhutagunairyuktam naivam tvam gyatumarhasi
Mayaitatkathitam samyaktava murtichatushtayam
326.44
सिद्धा ह्येते महाभागा नरा ह्येकान्तिनोऽभवन्
तमोरजोभ्यां निर्मुक्ताः प्रवेक्ष्यन्ति च मां मुने
Siddha hyete mahabhaga nara hyekantinobhavan
Tamorajobhyam nirmuktah pravekshyanti cha mam mune
326.45
अहं कर्ता च कार्यं च कारणं चापि नारद
अहं हि जीवसंज्ञो वै मयि जीवः समाहितः
मैवं ते बुद्धिरत्राभूद्दृष्टो जीवो मयेति च
Aham karta cha karyam cha karanam chapi narada
Aham hi jivasangyo vai mayi jivah samahitah
Maivam te buddhiratrabhuddrishto jivo mayeti cha
326.46
अहं सर्वत्रगो ब्रह्मन्भूतग्रामान्तरात्मकः
भूतग्रामशरीरेषु नश्यत्सु न नशाम्यहम्
Aham sarvatrago brahmanbhutagramantaratmakah
Bhutagramasharireshu nashyatsu na nashamyaham
326.47
हिरण्यगर्भो लोकादिश्चतुर्वक्त्रो निरुक्तगः
ब्रह्मा सनातनो देवो मम बह्वर्थचिन्तकः
Hiranyagarbho lokadishchaturvaktro niruktagah
Brahma sanatano devo mama bahvarthachintakah
326.48
पश्यैकादश मे रुद्रान्दक्षिणं पार्श्वमास्थितान्
द्वादशैव तथादित्यान्वामं पार्श्वं समास्थितान्
Pashyaikadasha me rudrandakshinam parshvamasthitan
Dvadashaiva tathadityanvamam parshvam samasthitan
326.49
अग्रतश्चैव मे पश्य वसूनष्टौ सुरोत्तमान्
नासत्यं चैव दस्रं च भिषजौ पश्य पृष्ठतः
Agratashchaiva me pashya vasunashtau surottaman
Nasatyam chaiva dasram cha bhishajau pashya prishthatah
326.50
सर्वान्प्रजापतीन्पश्य पश्य सप्त ऋषीनपि
वेदान्यज्ञांश्च शतशः पश्यामृतमथौषधीः
Sarvanprajapatinpashya pashya sapta rishinapi
Vedanyagyanshcha shatashah pashyamritamathaushadhih
326.51
तपांसि नियमांश्चैव यमानपि पृथग्विधान्
तथाष्टगुणमैश्वर्यमेकस्थं पश्य मूर्तिमत्
Tapansi niyamanshchaiva yamanapi prithagvidhan
Tathashtagunamaishvaryamekastham pashya murtimat
326.52
श्रियं लक्ष्मीं च कीर्तिं च पृथिवीं च ककुद्मिनीम्
वेदानां मातरं पश्य मत्स्थां देवीं सरस्वतीम्
Shriyam lakshmim cha kirtim cha prithivim cha kakudminim
Vedanam mataram pashya matstham devim sarasvatim
326.53
ध्रुवं च ज्योतिषां श्रेष्ठं पश्य नारद खेचरम्
अम्भोधरान्समुद्रांश्च सरांसि सरितस्तथा
Dhruvam cha jyotisham shreshtham pashya narada khecharam
Ambhodharansamudranshcha saransi saritastatha
326.54
मूर्तिमन्तः पितृगणांश्चतुरः पश्य सत्तम
त्रींश्चैवेमान्गुणान्पश्य मत्स्थान्मूर्तिविवर्जितान्
Murtimantah pitrigananshchaturah pashya sattama
Trinshchaivemangunanpashya matsthanmurtivivarjitan
326.55
देवकार्यादपि मुने पितृकार्यं विशिष्यते
देवानां च पितॄणां च पिता ह्येकोऽहमादितः
Devakaryadapi mune pitrikaryam vishishyate
Devanam cha pitrinam cha pita hyekohamaditah
326.56
अहं हयशिरो भूत्वा समुद्रे पश्चिमोत्तरे
पिबामि सुहुतं हव्यं कव्यं च श्रद्धयान्वितम्
Aham hayashiro bhutva samudre pashchimottare
Pibami suhutam havyam kavyam cha shraddhayanvitam
326.57
मया सृष्टः पुरा ब्रह्मा मद्यज्ञमयजत्स्वयम्
ततस्तस्मै वरान्प्रीतो ददावहमनुत्तमान्
Maya srishtah pura brahma madyagyamayajatsvayam
Tatastasmai varanprito dadavahamanuttaman
326.58
मत्पुत्रत्वं च कल्पादौ लोकाध्यक्षत्वमेव च
अहंकारकृतं चैव नाम पर्यायवाचकम्
Matputratvam cha kalpadau lokadhyakshatvameva cha
Ahankarakritam chaiva nama paryayavachakam
326.59
त्वया कृतां च मर्यादां नातिक्राम्यति कश्चन
त्वं चैव वरदो ब्रह्मन्वरेप्सूनां भविष्यसि
Tvaya kritam cha maryadam natikramyati kashchana
Tvam chaiva varado brahmanvarepsunam bhavishyasi
326.60
सुरासुरगणानां च ऋषीणां च तपोधन
पितॄणां च महाभाग सततं संशितव्रत
विविधानां च भूतानां त्वमुपास्यो भविष्यसि
Surasuragananam cha rishinam cha tapodhana
Pitrinam cha mahabhaga satatam sanshitavrata
Vividhanam cha bhutanam tvamupasyo bhavishyasi
326.61
प्रादुर्भावगतश्चाहं सुरकार्येषु नित्यदा
अनुशास्यस्त्वया ब्रह्मन्नियोज्यश्च सुतो यथा
Pradurbhavagatashchaham surakaryeshu nityada
Anushasyastvaya brahmanniyojyashcha suto yatha
326.62
एतांश्चान्यांश्च रुचिरान्ब्रह्मणेऽमिततेजसे
अहं दत्त्वा वरान्प्रीतो निवृत्तिपरमोऽभवम्
Etanshchanyanshcha ruchiranbrahmanemitatejase
Aham dattva varanprito nivrittiparamobhavam
326.63
निर्वाणं सर्वधर्माणां निवृत्तिः परमा स्मृता
तस्मान्निवृत्तिमापन्नश्चरेत्सर्वाङ्गनिर्वृतः
Nirvanam sarvadharmanam nivrittih parama smrita
Tasmannivrittimapannashcharetsarvanganirvritah
326.64
विद्यासहायवन्तं मामादित्यस्थं सनातनम्
कपिलं प्राहुराचार्याः सांख्यनिश्चितनिश्चयाः
Vidyasahayavantam mamadityastham sanatanam
Kapilam prahuracharyah sankhyanishchitanishchayah
326.65
हिरण्यगर्भो भगवानेष छन्दसि सुष्टुतः
सोऽहं योगगतिर्ब्रह्मन्योगशास्त्रेषु शब्दितः
Hiranyagarbho bhagavanesha chhandasi sushtutah
Soham yogagatirbrahmanyogashastreshu shabditah
326.66
एषोऽहं व्यक्तिमागम्य तिष्ठामि दिवि शाश्वतः
ततो युगसहस्रान्ते संहरिष्ये जगत्पुनः
कृत्वात्मस्थानि भूतानि स्थावराणि चराणि च
Eshoham vyaktimagamya tishthami divi shashvatah
Tato yugasahasrante sanharishye jagatpunah
Kritvatmasthani bhutani sthavarani charani cha
326.67
एकाकी विद्यया सार्धं विहरिष्ये द्विजोत्तम
ततो भूयो जगत्सर्वं करिष्यामीह विद्यया
Ekaki vidyaya sardham viharishye dvijottama
Tato bhuyo jagatsarvam karishyamiha vidyaya
326.68
अस्मन्मूर्तिश्चतुर्थी या सासृजच्छेषमव्ययम्
स हि संकर्षणः प्रोक्तः प्रद्युम्नं सोऽप्यजीजनत्
Asmanmurtishchaturthi ya sasrijachchheshamavyayam
Sa hi sankarshanah proktah pradyumnam sopyajijanat
326.69
प्रद्युम्नादनिरुद्धोऽहं सर्गो मम पुनः पुनः
अनिरुद्धात्तथा ब्रह्मा तत्रादिकमलोद्भवः
Pradyumnadaniruddhoham sargo mama punah punah
Aniruddhattatha brahma tatradikamalodbhavah
326.70
ब्रह्मणः सर्वभूतानि चराणि स्थावराणि च
एतां सृष्टिं विजानीहि कल्पादिषु पुनः पुनः
Brahmanah sarvabhutani charani sthavarani cha
Etam srishtim vijanihi kalpadishu punah punah
326.71
यथा सूर्यस्य गगनादुदयास्तमयाविह
नष्टौ पुनर्बलात्काल आनयत्यमितद्युतिः
तथा बलादहं पृथ्वीं सर्वभूतहिताय वै
Yatha suryasya gaganadudayastamayaviha
Nashtau punarbalatkala anayatyamitadyutih
Tatha baladaham prithvim sarvabhutahitaya vai
326.72
सत्त्वैराक्रान्तसर्वाङ्गां नष्टां सागरमेखलाम्
आनयिष्यामि स्वं स्थानं वाराहं रूपमास्थितः
Sattvairakrantasarvangam nashtam sagaramekhalam
Anayishyami svam sthanam varaham rupamasthitah
326.73
हिरण्याक्षं हनिष्यामि दैतेयं बलगर्वितम्
नारसिंहं वपुः कृत्वा हिरण्यकशिपुं पुनः
सुरकार्ये हनिष्यामि यज्ञघ्नं दितिनन्दनम्
Hiranyaksham hanishyami daiteyam balagarvitam
Narasinham vapuh kritva hiranyakashipum punah
Surakarye hanishyami yagyaghnam ditinandanam
326.74
विरोचनस्य बलवान्बलिः पुत्रो महासुरः
भविष्यति स शक्रं च स्वराज्याच्च्यावयिष्यति
Virochanasya balavanbalih putro mahasurah
Bhavishyati sa shakram cha svarajyachchyavayishyati
326.75
त्रैलोक्येऽपहृते तेन विमुखे च शचीपतौ
अदित्यां द्वादशः पुत्रः संभविष्यामि कश्यपात्
Trailokyepahrite tena vimukhe cha shachipatau
Adityam dvadashah putrah sambhavishyami kashyapat
326.76
ततो राज्यं प्रदास्यामि शक्रायामिततेजसे
देवताः स्थापयिष्यामि स्वेषु स्थानेषु नारद
बलिं चैव करिष्यामि पातालतलवासिनम्
Tato rajyam pradasyami shakrayamitatejase
Devatah sthapayishyami sveshu sthaneshu narada
Balim chaiva karishyami patalatalavasinam
326.77
त्रेतायुगे भविष्यामि रामो भृगुकुलोद्वहः
क्षत्रं चोत्सादयिष्यामि समृद्धबलवाहनम्
Tretayuge bhavishyami ramo bhrigukulodvahah
Kshatram chotsadayishyami samriddhabalavahanam
326.78
संधौ तु समनुप्राप्ते त्रेतायां द्वापरस्य च
रामो दाशरथिर्भूत्वा भविष्यामि जगत्पतिः
Sandhau tu samanuprapte tretayam dvaparasya cha
Ramo dasharathirbhutva bhavishyami jagatpatih
326.79
त्रितोपघाताद्वैरूप्यमेकतोऽथ द्वितस्तथा
प्राप्स्यतो वानरत्वं हि प्रजापतिसुतावृषी
Tritopaghatadvairupyamekatotha dvitastatha
Prapsyato vanaratvam hi prajapatisutavrishi
326.80
तयोर्ये त्वन्वये जाता भविष्यन्ति वनौकसः
ते सहाया भविष्यन्ति सुरकार्ये मम द्विज
Tayorye tvanvaye jata bhavishyanti vanaukasah
Te sahaya bhavishyanti surakarye mama dvija
326.81
ततो रक्षःपतिं घोरं पुलस्त्यकुलपांसनम्
हनिष्ये रावणं संख्ये सगणं लोककण्टकम्
Tato rakshahpatim ghoram pulastyakulapansanam
Hanishye ravanam sankhye saganam lokakantakam
326.82
द्वापरस्य कलेश्चैव संधौ पर्यवसानिके
प्रादुर्भावः कंसहेतोर्मथुरायां भविष्यति
Dvaparasya kaleshchaiva sandhau paryavasanike
Pradurbhavah kansahetormathurayam bhavishyati
326.83
तत्राहं दानवान्हत्वा सुबहून्देवकण्टकान्
कुशस्थलीं करिष्यामि निवासं द्वारकां पुरीम्
Tatraham danavanhatva subahundevakantakan
Kushasthalim karishyami nivasam dvarakam purim
326.84
वसानस्तत्र वै पुर्यामदितेर्विप्रियंकरम्
हनिष्ये नरकं भौमं मुरं पीठं च दानवम्
Vasanastatra vai puryamaditervipriyankaram
Hanishye narakam bhaumam muram pitham cha danavam
326.85
प्राग्ज्योतिषपुरं रम्यं नानाधनसमन्वितम्
कुशस्थलीं नयिष्यामि हत्वा वै दानवोत्तमान्
Pragjyotishapuram ramyam nanadhanasamanvitam
Kushasthalim nayishyami hatva vai danavottaman
326.86
शंकरं च महासेनं बाणप्रियहितैषिणम्
पराजेष्याम्यथोद्युक्तौ देवलोकनमस्कृतौ
Shankaram cha mahasenam banapriyahitaishinam
Parajeshyamyathodyuktau devalokanamaskritau
326.87
ततः सुतं बलेर्जित्वा बाणं बाहुसहस्रिणम्
विनाशयिष्यामि ततः सर्वान्सौभनिवासिनः
Tatah sutam balerjitva banam bahusahasrinam
Vinashayishyami tatah sarvansaubhanivasinah
326.88
यः कालयवनः ख्यातो गर्गतेजोभिसंवृतः
भविष्यति वधस्तस्य मत्त एव द्विजोत्तम
Yah kalayavanah khyato gargatejobhisanvritah
Bhavishyati vadhastasya matta eva dvijottama
326.89
जरासंधश्च बलवान्सर्वराजविरोधकः
भविष्यत्यसुरः स्फीतो भूमिपालो गिरिव्रजे
मम बुद्धिपरिस्पन्दाद्वधस्तस्य भविष्यति
Jarasandhashcha balavansarvarajavirodhakah
Bhavishyatyasurah sphito bhumipalo girivraje
Mama buddhiparispandadvadhastasya bhavishyati
326.90
समागतेषु बलिषु पृथिव्यां सर्वराजसु
वासविः सुसहायो वै मम ह्येको भविष्यति
Samagateshu balishu prithivyam sarvarajasu
Vasavih susahayo vai mama hyeko bhavishyati
326.91
एवं लोका वदिष्यन्ति नरनारायणावृषी
उद्युक्तौ दहतः क्षत्रं लोककार्यार्थमीश्वरौ
Evam loka vadishyanti naranarayanavrishi
Udyuktau dahatah kshatram lokakaryarthamishvarau
326.92
कृत्वा भारावतरणं वसुधाया यथेप्सितम्
सर्वसात्वतमुख्यानां द्वारकायाश्च सत्तम
करिष्ये प्रलयं घोरमात्मज्ञातिविनाशनम्
Kritva bharavataranam vasudhaya yathepsitam
Sarvasatvatamukhyanam dvarakayashcha sattama
Karishye pralayam ghoramatmagyativinashanam
326.93
कर्माण्यपरिमेयानि चतुर्मूर्तिधरो ह्यहम्
कृत्वा लोकान्गमिष्यामि स्वानहं ब्रह्मसत्कृतान्
Karmanyaparimeyani chaturmurtidharo hyaham
Kritva lokangamishyami svanaham brahmasatkritan
326.94
हंसो हयशिराश्चैव प्रादुर्भावा द्विजोत्तम
यदा वेदश्रुतिर्नष्टा मया प्रत्याहृता तदा
सवेदाः सश्रुतीकाश्च कृताः पूर्वं कृते युगे
Hanso hayashirashchaiva pradurbhava dvijottama
Yada vedashrutirnashta maya pratyahrita tada
Savedah sashrutikashcha kritah purvam krite yuge
326.95
अतिक्रान्ताः पुराणेषु श्रुतास्ते यदि वा क्वचित्
अतिक्रान्ताश्च बहवः प्रादुर्भावा ममोत्तमाः
लोककार्याणि कृत्वा च पुनः स्वां प्रकृतिं गताः
Atikrantah puraneshu shrutaste yadi va kvachit
Atikrantashcha bahavah pradurbhava mamottamah
Lokakaryani kritva cha punah svam prakritim gatah
326.96
न ह्येतद्ब्रह्मणा प्राप्तमीदृशं मम दर्शनम्
यत्त्वया प्राप्तमद्येह एकान्तगतबुद्धिना
Na hyetadbrahmana praptamidrisham mama darshanam
Yattvaya praptamadyeha ekantagatabuddhina
326.97
एतत्ते सर्वमाख्यातं ब्रह्मन्भक्तिमतो मया
पुराणं च भविष्यं च सरहस्यं च सत्तम
Etatte sarvamakhyatam brahmanbhaktimato maya
Puranam cha bhavishyam cha sarahasyam cha sattama
326.98
एवं स भगवान्देवो विश्वमूर्तिधरोऽव्ययः
एतावदुक्त्वा वचनं तत्रैवान्तरधीयत
Evam sa bhagavandevo vishvamurtidharovyayah
Etavaduktva vachanam tatraivantaradhiyata
326.99
नारदोऽपि महातेजाः प्राप्यानुग्रहमीप्सितम्
नरनारायणौ द्रष्टुं प्राद्रवद्बदराश्रमम्
Naradopi mahatejah prapyanugrahamipsitam
Naranarayanau drashtum pradravadbadarashramam
326.100
इदं महोपनिषदं चतुर्वेदसमन्वितम्
सांख्ययोगकृतं तेन पञ्चरात्रानुशब्दितम्
Idam mahopanishadam chaturvedasamanvitam
Sankhyayogakritam tena pancharatranushabditam
326.101
नारायणमुखोद्गीतं नारदोऽश्रावयत्पुनः
ब्रह्मणः सदने तात यथा दृष्टं यथा श्रुतम्
Narayanamukhodgitam naradoshravayatpunah
Brahmanah sadane tata yatha drishtam yatha shrutam
326.102
युधिष्ठिर उवाच
एतदाश्चर्यभूतं हि माहात्म्यं तस्य धीमतः
किं ब्रह्मा न विजानीते यतः शुश्राव नारदात्
Yudhishthira uvacha
Etadashcharyabhutam hi mahatmyam tasya dhimatah
Kim brahma na vijanite yatah shushrava naradat
326.103
पितामहो हि भगवांस्तस्माद्देवादनन्तरः
कथं स न विजानीयात्प्रभावममितौजसः
Pitamaho hi bhagavanstasmaddevadanantarah
Katham sa na vijaniyatprabhavamamitaujasah
326.104
भीष्म उवाच
महाकल्पसहस्राणि महाकल्पशतानि च
समतीतानि राजेन्द्र सर्गाश्च प्रलयाश्च ह
Bhishma uvacha
Mahakalpasahasrani mahakalpashatani cha
Samatitani rajendra sargashcha pralayashcha ha
326.105
सर्गस्यादौ स्मृतो ब्रह्मा प्रजासर्गकरः प्रभुः
जानाति देवप्रवरं भूयश्चातोऽधिकं नृप
परमात्मानमीशानमात्मनः प्रभवं तथा
Sargasyadau smrito brahma prajasargakarah prabhuh
Janati devapravaram bhuyashchatodhikam nripa
Paramatmanamishanamatmanah prabhavam tatha
326.106
ये त्वन्ये ब्रह्मसदने सिद्धसंघाः समागताः
तेभ्यस्तच्छ्रावयामास पुराणं वेदसंमितम्
Ye tvanye brahmasadane siddhasanghah samagatah
Tebhyastachchhravayamasa puranam vedasammitam
326.107
तेषां सकाशात्सूर्यश्च श्रुत्वा वै भावितात्मनाम्
आत्मानुगामिनां ब्रह्म श्रावयामास भारत
Tesham sakashatsuryashcha shrutva vai bhavitatmanam
Atmanugaminam brahma shravayamasa bharata
326.108
षट्षष्टिर्हि सहस्राणि ऋषीणां भावितात्मनाम्
सूर्यस्य तपतो लोकान्निर्मिता ये पुरःसराः
तेषामकथयत्सूर्यः सर्वेषां भावितात्मनाम्
Shatshashtirhi sahasrani rishinam bhavitatmanam
Suryasya tapato lokannirmita ye purahsarah
Teshamakathayatsuryah sarvesham bhavitatmanam
326.109
सूर्यानुगामिभिस्तात ऋषिभिस्तैर्महात्मभिः
मेरौ समागता देवाः श्राविताश्चेदमुत्तमम्
Suryanugamibhistata rishibhistairmahatmabhih
Merau samagata devah shravitashchedamuttamam
326.110
देवानां तु सकाशाद्वै ततः श्रुत्वासितो द्विजः
श्रावयामास राजेन्द्र पितॄणां मुनिसत्तमः
Devanam tu sakashadvai tatah shrutvasito dvijah
Shravayamasa rajendra pitrinam munisattamah
326.111
मम चापि पिता तात कथयामास शंतनुः
ततो मयैतच्छ्रुत्वा च कीर्तितं तव भारत
Mama chapi pita tata kathayamasa shantanuh
Tato mayaitachchhrutva cha kirtitam tava bharata
326.112
सुरैर्वा मुनिभिर्वापि पुराणं यैरिदं श्रुतम्
सर्वे ते परमात्मानं पूजयन्ति पुनः पुनः
Surairva munibhirvapi puranam yairidam shrutam
Sarve te paramatmanam pujayanti punah punah
326.113
इदमाख्यानमार्षेयं पारंपर्यागतं नृप
नावासुदेवभक्ताय त्वया देयं कथंचन
Idamakhyanamarsheyam paramparyagatam nripa
Navasudevabhaktaya tvaya deyam kathanchana
326.114
मत्तोऽन्यानि च ते राजन्नुपाख्यानशतानि वै
यानि श्रुतानि धर्म्याणि तेषां सारोऽयमुद्धृतः
Mattonyani cha te rajannupakhyanashatani vai
Yani shrutani dharmyani tesham saroyamuddhritah
326.115
सुरासुरैर्यथा राजन्निर्मथ्यामृतमुद्धृतम्
एवमेतत्पुरा विप्रैः कथामृतमिहोद्धृतम्
Surasurairyatha rajannirmathyamritamuddhritam
Evametatpura vipraih kathamritamihoddhritam
326.116
यश्चेदं पठते नित्यं यश्चेदं शृणुयान्नरः
एकान्तभावोपगत एकान्ते सुसमाहितः
Yashchedam pathate nityam yashchedam shrinuyannarah
Ekantabhavopagata ekante susamahitah
326.117
प्राप्य श्वेतं महाद्वीपं भूत्वा चन्द्रप्रभो नरः
स सहस्रार्चिषं देवं प्रविशेन्नात्र संशयः
Prapya shvetam mahadvipam bhutva chandraprabho narah
Sa sahasrarchisham devam pravishennatra sanshayah
326.118
मुच्येदार्तस्तथा रोगाच्छ्रुत्वेमामादितः कथाम्
जिज्ञासुर्लभते कामान्भक्तो भक्तगतिं व्रजेत्
Muchyedartastatha rogachchhrutvemamaditah katham
Jigyasurlabhate kamanbhakto bhaktagatim vrajet
326.119
त्वयापि सततं राजन्नभ्यर्च्यः पुरुषोत्तमः
स हि माता पिता चैव कृत्स्नस्य जगतो गुरुः
Tvayapi satatam rajannabhyarchyah purushottamah
Sa hi mata pita chaiva kritsnasya jagato guruh
326.120
ब्रह्मण्यदेवो भगवान्प्रीयतां ते सनातनः
युधिष्ठिर महाबाहो महाबाहुर्जनार्दनः
Brahmanyadevo bhagavanpriyatam te sanatanah
Yudhishthira mahabaho mahabahurjanardanah
326.121
वैशंपायन उवाच
श्रुत्वैतदाख्यानवरं धर्मराड्जनमेजय
भ्रातरश्चास्य ते सर्वे नारायणपराभवन्
Vaishampayana uvacha
Shrutvaitadakhyanavaram dharmaradjanamejaya
Bhratarashchasya te sarve narayanaparabhavan
326.122
जितं भगवता तेन पुरुषेणेति भारत
नित्यं जप्यपरा भूत्वा सरस्वतीमुदीरयन्
Jitam bhagavata tena purusheneti bharata
Nityam japyapara bhutva sarasvatimudirayan
326.123
यो ह्यस्माकं गुरुः श्रेष्ठः कृष्णद्वैपायनो मुनिः
स जगौ परमं जप्यं नारायणमुदीरयन्
Yo hyasmakam guruh shreshthah krishnadvaipayano munih
Sa jagau paramam japyam narayanamudirayan
326.124
गत्वान्तरिक्षात्सततं क्षीरोदममृताशयम्
पूजयित्वा च देवेशं पुनरायात्स्वमाश्रमम्
Gatvantarikshatsatatam kshirodamamritashayam
Pujayitva cha devesham punarayatsvamashramam