UtshovChapter 327
327.1
जनमेजय उवाच
कथं स भगवान्देवो यज्ञेष्वग्रहरः प्रभुः
यज्ञधारी च सततं वेदवेदाङ्गवित्तथा
Janamejaya uvacha
Katham sa bhagavandevo yagyeshvagraharah prabhuh
Yagyadhari cha satatam vedavedangavittatha
327.2
निवृत्तं चास्थितो धर्मं क्षेमी भागवतप्रियः
प्रवृत्तिधर्मान्विदधे स एव भगवान्प्रभुः
Nivrittam chasthito dharmam kshemi bhagavatapriyah
Pravrittidharmanvidadhe sa eva bhagavanprabhuh
327.3
कथं प्रवृत्तिधर्मेषु भागार्हा देवताः कृताः
कथं निवृत्तिधर्माश्च कृता व्यावृत्तबुद्धयः
Katham pravrittidharmeshu bhagarha devatah kritah
Katham nivrittidharmashcha krita vyavrittabuddhayah
327.4
एतं नः संशयं विप्र छिन्धि गुह्यं सनातनम्
त्वया नारायणकथा श्रुता वै धर्मसंहिता
Etam nah sanshayam vipra chhindhi guhyam sanatanam
Tvaya narayanakatha shruta vai dharmasanhita
327.5
इमे सब्रह्मका लोकाः ससुरासुरमानवाः
क्रियास्वभ्युदयोक्तासु सक्ता दृश्यन्ति सर्वशः
मोक्षश्चोक्तस्त्वया ब्रह्मन्निर्वाणं परमं सुखम्
Ime sabrahmaka lokah sasurasuramanavah
Kriyasvabhyudayoktasu sakta drishyanti sarvashah
Mokshashchoktastvaya brahmannirvanam paramam sukham
327.6
ये च मुक्ता भवन्तीह पुण्यपापविवर्जिताः
ते सहस्रार्चिषं देवं प्रविशन्तीति शुश्रुमः
Ye cha mukta bhavantiha punyapapavivarjitah
Te sahasrarchisham devam pravishantiti shushrumah
327.7
अहो हि दुरनुष्ठेयो मोक्षधर्मः सनातनः
यं हित्वा देवताः सर्वा हव्यकव्यभुजोऽभवन्
Aho hi duranushtheyo mokshadharmah sanatanah
Yam hitva devatah sarva havyakavyabhujobhavan
327.8
किं नु ब्रह्मा च रुद्रश्च शक्रश्च बलभित्प्रभुः
सूर्यस्ताराधिपो वायुरग्निर्वरुण एव च
आकाशं जगती चैव ये च शेषा दिवौकसः
Kim nu brahma cha rudrashcha shakrashcha balabhitprabhuh
Suryastaradhipo vayuragnirvaruna eva cha
Akasham jagati chaiva ye cha shesha divaukasah
327.9
प्रलयं न विजानन्ति आत्मनः परिनिर्मितम्
ततस्ते नास्थिता मार्गं ध्रुवमक्षयमव्ययम्
Pralayam na vijananti atmanah parinirmitam
Tataste nasthita margam dhruvamakshayamavyayam
327.10
स्मृत्वा कालपरीमाणं प्रवृत्तिं ये समास्थिताः
दोषः कालपरीमाणे महानेष क्रियावताम्
Smritva kalaparimanam pravrittim ye samasthitah
Doshah kalaparimane mahanesha kriyavatam
327.11
एतन्मे संशयं विप्र हृदि शल्यमिवार्पितम्
छिन्धीतिहासकथनात्परं कौतूहलं हि मे
Etanme sanshayam vipra hridi shalyamivarpitam
Chhindhitihasakathanatparam kautuhalam hi me
327.12
कथं भागहराः प्रोक्ता देवताः क्रतुषु द्विज
किमर्थं चाध्वरे ब्रह्मन्निज्यन्ते त्रिदिवौकसः
Katham bhagaharah prokta devatah kratushu dvija
Kimartham chadhvare brahmannijyante tridivaukasah
327.13
ये च भागं प्रगृह्णन्ति यज्ञेषु द्विजसत्तम
ते यजन्तो महायज्ञैः कस्य भागं ददन्ति वै
Ye cha bhagam pragrihnanti yagyeshu dvijasattama
Te yajanto mahayagyaih kasya bhagam dadanti vai
327.14
वैशंपायन उवाच
अहो गूढतमः प्रश्नस्त्वया पृष्टो जनेश्वर
नातप्ततपसा ह्येष नावेदविदुषा तथा
नापुराणविदा चापि शक्यो व्याहर्तुमञ्जसा
Vaishampayana uvacha
Aho gudhatamah prashnastvaya prishto janeshvara
Nataptatapasa hyesha navedavidusha tatha
Napuranavida chapi shakyo vyahartumanjasa
327.15
हन्त ते कथयिष्यामि यन्मे पृष्टः पुरा गुरुः
कृष्णद्वैपायनो व्यासो वेदव्यासो महानृषिः
Hanta te kathayishyami yanme prishtah pura guruh
Krishnadvaipayano vyaso vedavyaso mahanrishih
327.16
सुमन्तुर्जैमिनिश्चैव पैलश्च सुदृढव्रतः
अहं चतुर्थः शिष्यो वै पञ्चमश्च शुकः स्मृतः
Sumanturjaiminishchaiva pailashcha sudridhavratah
Aham chaturthah shishyo vai panchamashcha shukah smritah
327.17
एतान्समागतान्सर्वान्पञ्च शिष्यान्दमान्वितान्
शौचाचारसमायुक्ताञ्जितक्रोधाञ्जितेन्द्रियान्
Etansamagatansarvanpancha shishyandamanvitan
Shauchacharasamayuktanjitakrodhanjitendriyan
327.18
वेदानध्यापयामास महाभारतपञ्चमान्
मेरौ गिरिवरे रम्ये सिद्धचारणसेविते
Vedanadhyapayamasa mahabharatapanchaman
Merau girivare ramye siddhacharanasevite
327.19
तेषामभ्यस्यतां वेदान्कदाचित्संशयोऽभवत्
एष वै यस्त्वया पृष्टस्तेन तेषां प्रकीर्तितः
ततः श्रुतो मया चापि तवाख्येयोऽद्य भारत
Teshamabhyasyatam vedankadachitsanshayobhavat
Esha vai yastvaya prishtastena tesham prakirtitah
Tatah shruto maya chapi tavakhyeyodya bharata
327.20
शिष्याणां वचनं श्रुत्वा सर्वाज्ञानतमोनुदः
पराशरसुतः श्रीमान्व्यासो वाक्यमुवाच ह
Shishyanam vachanam shrutva sarvagyanatamonudah
Parasharasutah shrimanvyaso vakyamuvacha ha
327.21
मया हि सुमहत्तप्तं तपः परमदारुणम्
भूतं भव्यं भविष्यच्च जानीयामिति सत्तमाः
Maya hi sumahattaptam tapah paramadarunam
Bhutam bhavyam bhavishyachcha janiyamiti sattamah
327.22
तस्य मे तप्ततपसो निगृहीतेन्द्रियस्य च
नारायणप्रसादेन क्षीरोदस्यानुकूलतः
Tasya me taptatapaso nigrihitendriyasya cha
Narayanaprasadena kshirodasyanukulatah
327.23
त्रैकालिकमिदं ज्ञानं प्रादुर्भूतं यथेप्सितम्
तच्छृणुध्वं यथाज्ञानं वक्ष्ये संशयमुत्तमम्
यथा वृत्तं हि कल्पादौ दृष्टं मे ज्ञानचक्षुषा
Traikalikamidam gyanam pradurbhutam yathepsitam
Tachchhrinudhvam yathagyanam vakshye sanshayamuttamam
Yatha vrittam hi kalpadau drishtam me gyanachakshusha
327.24
परमात्मेति यं प्राहुः सांख्ययोगविदो जनाः
महापुरुषसंज्ञां स लभते स्वेन कर्मणा
Paramatmeti yam prahuh sankhyayogavido janah
Mahapurushasangyam sa labhate svena karmana
327.25
तस्मात्प्रसूतमव्यक्तं प्रधानं तद्विदुर्बुधाः
अव्यक्ताद्व्यक्तमुत्पन्नं लोकसृष्ट्यर्थमीश्वरात्
Tasmatprasutamavyaktam pradhanam tadvidurbudhah
Avyaktadvyaktamutpannam lokasrishtyarthamishvarat
327.26
अनिरुद्धो हि लोकेषु महानात्मेति कथ्यते
योऽसौ व्यक्तत्वमापन्नो निर्ममे च पितामहम्
सोऽहंकार इति प्रोक्तः सर्वतेजोमयो हि सः
Aniruddho hi lokeshu mahanatmeti kathyate
Yosau vyaktatvamapanno nirmame cha pitamaham
Sohankara iti proktah sarvatejomayo hi sah
327.27
पृथिवी वायुराकाशमापो ज्योतिश्च पञ्चमम्
अहंकारप्रसूतानि महाभूतानि भारत
Prithivi vayurakashamapo jyotishcha panchamam
Ahankaraprasutani mahabhutani bharata
327.28
महाभूतानि सृष्ट्वाथ तद्गुणान्निर्ममे पुनः
भूतेभ्यश्चैव निष्पन्ना मूर्तिमन्तोऽष्ट ताञ्शृणु
Mahabhutani srishtvatha tadgunannirmame punah
Bhutebhyashchaiva nishpanna murtimantoshta tanshrinu
327.29
मरीचिरङ्गिराश्चात्रिः पुलस्त्यः पुलहः क्रतुः
वसिष्ठश्च महात्मा वै मनुः स्वायंभुवस्तथा
ज्ञेयाः प्रकृतयोऽष्टौ ता यासु लोकाः प्रतिष्ठिताः
Marichirangirashchatrih pulastyah pulahah kratuh
Vasishthashcha mahatma vai manuh svayambhuvastatha
Gyeyah prakritayoshtau ta yasu lokah pratishthitah
327.30
वेदान्वेदाङ्गसंयुक्तान्यज्ञान्यज्ञाङ्गसंयुतान्
निर्ममे लोकसिद्ध्यर्थं ब्रह्मा लोकपितामहः
अष्टाभ्यः प्रकृतिभ्यश्च जातं विश्वमिदं जगत्
Vedanvedangasanyuktanyagyanyagyangasanyutan
Nirmame lokasiddhyartham brahma lokapitamahah
Ashtabhyah prakritibhyashcha jatam vishvamidam jagat
327.31
रुद्रो रोषात्मको जातो दशान्यान्सोऽसृजत्स्वयम्
एकादशैते रुद्रास्तु विकाराः पुरुषाः स्मृताः
Rudro roshatmako jato dashanyansosrijatsvayam
Ekadashaite rudrastu vikarah purushah smritah
327.32
ते रुद्राः प्रकृतिश्चैव सर्वे चैव सुरर्षयः
उत्पन्ना लोकसिद्ध्यर्थं ब्रह्माणं समुपस्थिताः
Te rudrah prakritishchaiva sarve chaiva surarshayah
Utpanna lokasiddhyartham brahmanam samupasthitah
327.33
वयं हि सृष्टा भगवंस्त्वया वै प्रभविष्णुना
येन यस्मिन्नधीकारे वर्तितव्यं पितामह
Vayam hi srishta bhagavanstvaya vai prabhavishnuna
Yena yasminnadhikare vartitavyam pitamaha
327.34
योऽसौ त्वया विनिर्दिष्टो अधिकारोऽर्थचिन्तकः
परिपाल्यः कथं तेन सोऽधिकारोऽधिकारिणा
Yosau tvaya vinirdishto adhikarorthachintakah
Paripalyah katham tena sodhikarodhikarina
327.35
प्रदिशस्व बलं तस्य योऽधिकारार्थचिन्तकः
एवमुक्तो महादेवो देवांस्तानिदमब्रवीत्
Pradishasva balam tasya yodhikararthachintakah
Evamukto mahadevo devanstanidamabravit
327.36
साध्वहं ज्ञापितो देवा युष्माभिर्भद्रमस्तु वः
ममाप्येषा समुत्पन्ना चिन्ता या भवतां मता
Sadhvaham gyapito deva yushmabhirbhadramastu vah
Mamapyesha samutpanna chinta ya bhavatam mata
327.37
लोकतन्त्रस्य कृत्स्नस्य कथं कार्यः परिग्रहः
कथं बलक्षयो न स्याद्युष्माकं ह्यात्मनश्च मे
Lokatantrasya kritsnasya katham karyah parigrahah
Katham balakshayo na syadyushmakam hyatmanashcha me
327.38
इतः सर्वेऽपि गच्छामः शरणं लोकसाक्षिणम्
महापुरुषमव्यक्तं स नो वक्ष्यति यद्धितम्
Itah sarvepi gachchhamah sharanam lokasakshinam
Mahapurushamavyaktam sa no vakshyati yaddhitam
327.39
ततस्ते ब्रह्मणा सार्धमृषयो विबुधास्तथा
क्षीरोदस्योत्तरं कूलं जग्मुर्लोकहितार्थिनः
Tataste brahmana sardhamrishayo vibudhastatha
Kshirodasyottaram kulam jagmurlokahitarthinah
327.40
ते तपः समुपातिष्ठन्ब्रह्मोक्तं वेदकल्पितम्
स महानियमो नाम तपश्चर्या सुदारुणा
Te tapah samupatishthanbrahmoktam vedakalpitam
Sa mahaniyamo nama tapashcharya sudaruna
327.41
ऊर्ध्वं दृष्टिर्बाहवश्च एकाग्रं च मनोऽभवत्
एकपादस्थिताः सम्यक्काष्ठभूताः समाहिताः
Urdhvam drishtirbahavashcha ekagram cha manobhavat
Ekapadasthitah samyakkashthabhutah samahitah
327.42
दिव्यं वर्षसहस्रं ते तपस्तप्त्वा तदुत्तमम्
शुश्रुवुर्मधुरां वाणीं वेदवेदाङ्गभूषिताम्
Divyam varshasahasram te tapastaptva taduttamam
Shushruvurmadhuram vanim vedavedangabhushitam
327.43
भो भोः सब्रह्मका देवा ऋषयश्च तपोधनाः
स्वागतेनार्च्य वः सर्वाञ्श्रावये वाक्यमुत्तमम्
Bho bhoh sabrahmaka deva rishayashcha tapodhanah
Svagatenarchya vah sarvanshravaye vakyamuttamam
327.44
विज्ञातं वो मया कार्यं तच्च लोकहितं महत्
प्रवृत्तियुक्तं कर्तव्यं युष्मत्प्राणोपबृंहणम्
Vigyatam vo maya karyam tachcha lokahitam mahat
Pravrittiyuktam kartavyam yushmatpranopabrinhanam
327.45
सुतप्तं वस्तपो देवा ममाराधनकाम्यया
भोक्ष्यथास्य महासत्त्वास्तपसः फलमुत्तमम्
Sutaptam vastapo deva mamaradhanakamyaya
Bhokshyathasya mahasattvastapasah phalamuttamam
327.46
एष ब्रह्मा लोकगुरुः सर्वलोकपितामहः
यूयं च विबुधश्रेष्ठा मां यजध्वं समाहिताः
Esha brahma lokaguruh sarvalokapitamahah
Yuyam cha vibudhashreshtha mam yajadhvam samahitah
327.47
सर्वे भागान्कल्पयध्वं यज्ञेषु मम नित्यशः
तथा श्रेयो विधास्यामि यथाधीकारमीश्वराः
Sarve bhagankalpayadhvam yagyeshu mama nityashah
Tatha shreyo vidhasyami yathadhikaramishvarah
327.48
श्रुत्वैतद्देवदेवस्य वाक्यं हृष्टतनूरुहाः
ततस्ते विबुधाः सर्वे ब्रह्मा ते च महर्षयः
Shrutvaitaddevadevasya vakyam hrishtatanuruhah
Tataste vibudhah sarve brahma te cha maharshayah
327.49
वेददृष्टेन विधिना वैष्णवं क्रतुमाहरन्
तस्मिन्सत्रे तदा ब्रह्मा स्वयं भागमकल्पयत्
देवा देवर्षयश्चैव सर्वे भागानकल्पयन्
Vedadrishtena vidhina vaishnavam kratumaharan
Tasminsatre tada brahma svayam bhagamakalpayat
Deva devarshayashchaiva sarve bhaganakalpayan
327.50
ते कार्तयुगधर्माणो भागाः परमसत्कृताः
प्रापुरादित्यवर्णं तं पुरुषं तमसः परम्
बृहन्तं सर्वगं देवमीशानं वरदं प्रभुम्
Te kartayugadharmano bhagah paramasatkritah
Prapuradityavarnam tam purusham tamasah param
Brihantam sarvagam devamishanam varadam prabhum
327.51
ततोऽथ वरदो देवस्तान्सर्वानमरान्स्थितान्
अशरीरो बभाषेदं वाक्यं खस्थो महेश्वरः
Tatotha varado devastansarvanamaransthitan
Ashariro babhashedam vakyam khastho maheshvarah
327.52
येन यः कल्पितो भागः स तथा समुपागतः
प्रीतोऽहं प्रदिशाम्यद्य फलमावृत्तिलक्षणम्
Yena yah kalpito bhagah sa tatha samupagatah
Pritoham pradishamyadya phalamavrittilakshanam
327.53
एतद्वो लक्षणं देवा मत्प्रसादसमुद्भवम्
यूयं यज्ञैरिज्यमानाः समाप्तवरदक्षिणैः
युगे युगे भविष्यध्वं प्रवृत्तिफलभोगिनः
Etadvo lakshanam deva matprasadasamudbhavam
Yuyam yagyairijyamanah samaptavaradakshinaih
Yuge yuge bhavishyadhvam pravrittiphalabhoginah
327.54
यज्ञैर्ये चापि यक्ष्यन्ति सर्वलोकेषु वै सुराः
कल्पयिष्यन्ति वो भागांस्ते नरा वेदकल्पितान्
Yagyairye chapi yakshyanti sarvalokeshu vai surah
Kalpayishyanti vo bhaganste nara vedakalpitan
327.55
यो मे यथा कल्पितवान्भागमस्मिन्महाक्रतौ
स तथा यज्ञभागार्हो वेदसूत्रे मया कृतः
Yo me yatha kalpitavanbhagamasminmahakratau
Sa tatha yagyabhagarho vedasutre maya kritah
327.56
यूयं लोकान्धारयध्वं यज्ञभागफलोदिताः
सर्वार्थचिन्तका लोके यथाधीकारनिर्मिताः
Yuyam lokandharayadhvam yagyabhagaphaloditah
Sarvarthachintaka loke yathadhikaranirmitah
327.57
याः क्रियाः प्रचरिष्यन्ति प्रवृत्तिफलसत्कृताः
ताभिराप्यायितबला लोकान्वै धारयिष्यथ
Yah kriyah pracharishyanti pravrittiphalasatkritah
Tabhirapyayitabala lokanvai dharayishyatha
327.58
यूयं हि भाविता लोके सर्वयज्ञेषु मानवैः
मां ततो भावयिष्यध्वमेषा वो भावना मम
Yuyam hi bhavita loke sarvayagyeshu manavaih
Mam tato bhavayishyadhvamesha vo bhavana mama
327.59
इत्यर्थं निर्मिता वेदा यज्ञाश्चौषधिभिः सह
एभिः सम्यक्प्रयुक्तैर्हि प्रीयन्ते देवताः क्षितौ
Ityartham nirmita veda yagyashchaushadhibhih saha
Ebhih samyakprayuktairhi priyante devatah kshitau
327.60
निर्माणमेतद्युष्माकं प्रवृत्तिगुणकल्पितम्
मया कृतं सुरश्रेष्ठा यावत्कल्पक्षयादिति
चिन्तयध्वं लोकहितं यथाधीकारमीश्वराः
Nirmanametadyushmakam pravrittigunakalpitam
Maya kritam surashreshtha yavatkalpakshayaditi
Chintayadhvam lokahitam yathadhikaramishvarah
327.61
मरीचिरङ्गिराश्चात्रिः पुलस्त्यः पुलहः क्रतुः
वसिष्ठ इति सप्तैते मानसा निर्मिता हि वै
Marichirangirashchatrih pulastyah pulahah kratuh
Vasishtha iti saptaite manasa nirmita hi vai
327.62
एते वेदविदो मुख्या वेदाचार्याश्च कल्पिताः
प्रवृत्तिधर्मिणश्चैव प्राजापत्येन कल्पिताः
Ete vedavido mukhya vedacharyashcha kalpitah
Pravrittidharminashchaiva prajapatyena kalpitah
327.63
अयं क्रियावतां पन्था व्यक्तीभूतः सनातनः
अनिरुद्ध इति प्रोक्तो लोकसर्गकरः प्रभुः
Ayam kriyavatam pantha vyaktibhutah sanatanah
Aniruddha iti prokto lokasargakarah prabhuh
327.64
सनः सनत्सुजातश्च सनकः ससनन्दनः
सनत्कुमारः कपिलः सप्तमश्च सनातनः
Sanah sanatsujatashcha sanakah sasanandanah
Sanatkumarah kapilah saptamashcha sanatanah
327.65
सप्तैते मानसाः प्रोक्ता ऋषयो ब्रह्मणः सुताः
स्वयमागतविज्ञाना निवृत्तं धर्ममास्थिताः
Saptaite manasah prokta rishayo brahmanah sutah
Svayamagatavigyana nivrittam dharmamasthitah
327.66
एते योगविदो मुख्याः सांख्यधर्मविदस्तथा
आचार्या मोक्षशास्त्रे च मोक्षधर्मप्रवर्तकाः
Ete yogavido mukhyah sankhyadharmavidastatha
Acharya mokshashastre cha mokshadharmapravartakah
327.67
यतोऽहं प्रसृतः पूर्वमव्यक्तात्त्रिगुणो महान्
तस्मात्परतरो योऽसौ क्षेत्रज्ञ इति कल्पितः
सोऽहं क्रियावतां पन्थाः पुनरावृत्तिदुर्लभः
Yatoham prasritah purvamavyaktattriguno mahan
Tasmatparataro yosau kshetragya iti kalpitah
Soham kriyavatam panthah punaravrittidurlabhah
327.68
यो यथा निर्मितो जन्तुर्यस्मिन्यस्मिंश्च कर्मणि
प्रवृत्तौ वा निवृत्तौ वा तत्फलं सोऽश्नुतेऽवशः
Yo yatha nirmito janturyasminyasminshcha karmani
Pravrittau va nivrittau va tatphalam soshnutevashah
327.69
एष लोकगुरुर्ब्रह्मा जगदादिकरः प्रभुः
एष माता पिता चैव युष्माकं च पितामहः
मयानुशिष्टो भविता सर्वभूतवरप्रदः
Esha lokagururbrahma jagadadikarah prabhuh
Esha mata pita chaiva yushmakam cha pitamahah
Mayanushishto bhavita sarvabhutavarapradah
327.70
अस्य चैवानुजो रुद्रो ललाटाद्यः समुत्थितः
ब्रह्मानुशिष्टो भविता सर्वत्रसवरप्रदः
Asya chaivanujo rudro lalatadyah samutthitah
Brahmanushishto bhavita sarvatrasavarapradah
327.71
गच्छध्वं स्वानधीकारांश्चिन्तयध्वं यथाविधि
प्रवर्तन्तां क्रियाः सर्वाः सर्वलोकेषु माचिरम्
Gachchhadhvam svanadhikaranshchintayadhvam yathavidhi
Pravartantam kriyah sarvah sarvalokeshu machiram
327.72
प्रदृश्यन्तां च कर्माणि प्राणिनां गतयस्तथा
परिनिर्मितकालानि आयूंषि च सुरोत्तमाः
Pradrishyantam cha karmani praninam gatayastatha
Parinirmitakalani ayunshi cha surottamah
327.73
इदं कृतयुगं नाम कालः श्रेष्ठः प्रवर्तते
अहिंस्या यज्ञपशवो युगेऽस्मिन्नैतदन्यथा
चतुष्पात्सकलो धर्मो भविष्यत्यत्र वै सुराः
Idam kritayugam nama kalah shreshthah pravartate
Ahinsya yagyapashavo yugesminnaitadanyatha
Chatushpatsakalo dharmo bhavishyatyatra vai surah
327.74
ततस्त्रेतायुगं नाम त्रयी यत्र भविष्यति
प्रोक्षिता यत्र पशवो वधं प्राप्स्यन्ति वै मखे
तत्र पादचतुर्थो वै धर्मस्य न भविष्यति
Tatastretayugam nama trayi yatra bhavishyati
Prokshita yatra pashavo vadham prapsyanti vai makhe
Tatra padachaturtho vai dharmasya na bhavishyati
327.75
ततो वै द्वापरं नाम मिश्रः कालो भविष्यति
द्विपादहीनो धर्मश्च युगे तस्मिन्भविष्यति
Tato vai dvaparam nama mishrah kalo bhavishyati
Dvipadahino dharmashcha yuge tasminbhavishyati
327.76
ततस्तिष्येऽथ संप्राप्ते युगे कलिपुरस्कृते
एकपादस्थितो धर्मो यत्र तत्र भविष्यति
Tatastishyetha samprapte yuge kalipuraskrite
Ekapadasthito dharmo yatra tatra bhavishyati
327.77
देवा ऊचुः
एकपादस्थिते धर्मे यत्रक्वचनगामिनि
कथं कर्तव्यमस्माभिर्भगवंस्तद्वदस्व नः
Deva uchuh
Ekapadasthite dharme yatrakvachanagamini
Katham kartavyamasmabhirbhagavanstadvadasva nah
327.78
श्रीभगवानुवाच
यत्र वेदाश्च यज्ञाश्च तपः सत्यं दमस्तथा
अहिंसाधर्मसंयुक्ताः प्रचरेयुः सुरोत्तमाः
स वै देशः सेवितव्यो मा वोऽधर्मः पदा स्पृशेत्
Shribhagavanuvacha
Yatra vedashcha yagyashcha tapah satyam damastatha
Ahinsadharmasanyuktah prachareyuh surottamah
Sa vai deshah sevitavyo ma vodharmah pada sprishet
327.79
व्यास उवाच
तेऽनुशिष्टा भगवता देवाः सर्षिगणास्तथा
नमस्कृत्वा भगवते जग्मुर्देशान्यथेप्सितान्
Vyasa uvacha
Tenushishta bhagavata devah sarshiganastatha
Namaskritva bhagavate jagmurdeshanyathepsitan
327.80
गतेषु त्रिदिवौकःसु ब्रह्मैकः पर्यवस्थितः
दिदृक्षुर्भगवन्तं तमनिरुद्धतनौ स्थितम्
Gateshu tridivaukahsu brahmaikah paryavasthitah
Didrikshurbhagavantam tamaniruddhatanau sthitam
327.81
तं देवो दर्शयामास कृत्वा हयशिरो महत्
साङ्गानावर्तयन्वेदान्कमण्डलुगणित्रधृक्
Tam devo darshayamasa kritva hayashiro mahat
Sanganavartayanvedankamandaluganitradhrik
327.82
ततोऽश्वशिरसं दृष्ट्वा तं देवममितौजसम्
लोककर्ता प्रभुर्ब्रह्मा लोकानां हितकाम्यया
Tatoshvashirasam drishtva tam devamamitaujasam
Lokakarta prabhurbrahma lokanam hitakamyaya
327.83
मूर्ध्ना प्रणम्य वरदं तस्थौ प्राञ्जलिरग्रतः
स परिष्वज्य देवेन वचनं श्रावितस्तदा
Murdhna pranamya varadam tasthau pranjaliragratah
Sa parishvajya devena vachanam shravitastada
327.84
लोककार्यगतीः सर्वास्त्वं चिन्तय यथाविधि
धाता त्वं सर्वभूतानां त्वं प्रभुर्जगतो गुरुः
त्वय्यावेशितभारोऽहं धृतिं प्राप्स्याम्यथाञ्जसा
Lokakaryagatih sarvastvam chintaya yathavidhi
Dhata tvam sarvabhutanam tvam prabhurjagato guruh
Tvayyaveshitabharoham dhritim prapsyamyathanjasa
327.85
यदा च सुरकार्यं ते अविषह्यं भविष्यति
प्रादुर्भावं गमिष्यामि तदात्मज्ञानदेशिकः
Yada cha surakaryam te avishahyam bhavishyati
Pradurbhavam gamishyami tadatmagyanadeshikah
327.86
एवमुक्त्वा हयशिरास्तत्रैवान्तरधीयत
तेनानुशिष्टो ब्रह्मापि स्वं लोकमचिराद्गतः
Evamuktva hayashirastatraivantaradhiyata
Tenanushishto brahmapi svam lokamachiradgatah
327.87
एवमेष महाभागः पद्मनाभः सनातनः
यज्ञेष्वग्रहरः प्रोक्तो यज्ञधारी च नित्यदा
Evamesha mahabhagah padmanabhah sanatanah
Yagyeshvagraharah prokto yagyadhari cha nityada
327.88
निवृत्तिं चास्थितो धर्मं गतिमक्षयधर्मिणाम्
प्रवृत्तिधर्मान्विदधे कृत्वा लोकस्य चित्रताम्
Nivrittim chasthito dharmam gatimakshayadharminam
Pravrittidharmanvidadhe kritva lokasya chitratam
327.89
स आदिः स मध्यः स चान्तः प्रजानां; स धाता स धेयः स कर्ता स कार्यम्
युगान्ते स सुप्तः सुसंक्षिप्य लोका;न्युगादौ प्रबुद्धो जगद्ध्युत्ससर्ज
Sa adih sa madhyah sa chantah prajanam; sa dhata sa dheyah sa karta sa karyam
Yugante sa suptah susankshipya loka;nyugadau prabuddho jagaddhyutsasarja
327.90
तस्मै नमध्वं देवाय निर्गुणाय गुणात्मने
अजाय विश्वरूपाय धाम्ने सर्वदिवौकसाम्
Tasmai namadhvam devaya nirgunaya gunatmane
Ajaya vishvarupaya dhamne sarvadivaukasam
327.91
महाभूताधिपतये रुद्राणां पतये तथा
आदित्यपतये चैव वसूनां पतये तथा
Mahabhutadhipataye rudranam pataye tatha
Adityapataye chaiva vasunam pataye tatha
327.92
अश्विभ्यां पतये चैव मरुतां पतये तथा
वेदयज्ञाधिपतये वेदाङ्गपतयेऽपि च
Ashvibhyam pataye chaiva marutam pataye tatha
Vedayagyadhipataye vedangapatayepi cha
327.93
समुद्रवासिने नित्यं हरये मुञ्जकेशिने
शान्तये सर्वभूतानां मोक्षधर्मानुभाषिणे
Samudravasine nityam haraye munjakeshine
Shantaye sarvabhutanam mokshadharmanubhashine
327.94
तपसां तेजसां चैव पतये यशसोऽपि च
वाचश्च पतये नित्यं सरितां पतये तथा
Tapasam tejasam chaiva pataye yashasopi cha
Vachashcha pataye nityam saritam pataye tatha
327.95
कपर्दिने वराहाय एकशृङ्गाय धीमते
विवस्वतेऽश्वशिरसे चतुर्मूर्तिधृते सदा
Kapardine varahaya ekashringaya dhimate
Vivasvateshvashirase chaturmurtidhrite sada
327.96
गुह्याय ज्ञानदृश्याय अक्षराय क्षराय च
एष देवः संचरति सर्वत्रगतिरव्ययः
Guhyaya gyanadrishyaya aksharaya ksharaya cha
Esha devah sancharati sarvatragatiravyayah
327.97
एवमेतत्पुरा दृष्टं मया वै ज्ञानचक्षुषा
कथितं तच्च वः सर्वं मया पृष्टेन तत्त्वतः
Evametatpura drishtam maya vai gyanachakshusha
Kathitam tachcha vah sarvam maya prishtena tattvatah
327.98
क्रियतां मद्वचः शिष्याः सेव्यतां हरिरीश्वरः
गीयतां वेदशब्दैश्च पूज्यतां च यथाविधि
Kriyatam madvachah shishyah sevyatam haririshvarah
Giyatam vedashabdaishcha pujyatam cha yathavidhi
327.99
वैशंपायन उवाच
इत्युक्तास्तु वयं तेन वेदव्यासेन धीमता
सर्वे शिष्याः सुतश्चास्य शुकः परमधर्मवित्
Vaishampayana uvacha
Ityuktastu vayam tena vedavyasena dhimata
Sarve shishyah sutashchasya shukah paramadharmavit
327.100
स चास्माकमुपाध्यायः सहास्माभिर्विशां पते
चतुर्वेदोद्गताभिश्च ऋग्भिस्तमभितुष्टुवे
Sa chasmakamupadhyayah sahasmabhirvisham pate
Chaturvedodgatabhishcha rigbhistamabhitushtuve
327.101
एतत्ते सर्वमाख्यातं यन्मां त्वं परिपृच्छसि
एवं मेऽकथयद्राजन्पुरा द्वैपायनो गुरुः
Etatte sarvamakhyatam yanmam tvam pariprichchhasi
Evam mekathayadrajanpura dvaipayano guruh
327.102
यश्चेदं शृणुयान्नित्यं यश्चेदं परिकीर्तयेत्
नमो भगवते कृत्वा समाहितमना नरः
Yashchedam shrinuyannityam yashchedam parikirtayet
Namo bhagavate kritva samahitamana narah
327.103
भवत्यरोगो द्युतिमान्बलरूपसमन्वितः
आतुरो मुच्यते रोगाद्बद्धो मुच्येत बन्धनात्
Bhavatyarogo dyutimanbalarupasamanvitah
Aturo muchyate rogadbaddho muchyeta bandhanat
327.104
कामकामी लभेत्कामं दीर्घमायुरवाप्नुयात्
ब्राह्मणः सर्ववेदी स्यात्क्षत्रियो विजयी भवेत्
वैश्यो विपुललाभः स्याच्छूद्रः सुखमवाप्नुयात्
Kamakami labhetkamam dirghamayuravapnuyat
Brahmanah sarvavedi syatkshatriyo vijayi bhavet
Vaishyo vipulalabhah syachchhudrah sukhamavapnuyat
327.105
अपुत्रो लभते पुत्रं कन्या चैवेप्सितं पतिम्
लग्नगर्भा विमुच्येत गर्भिणी जनयेत्सुतम्
वन्ध्या प्रसवमाप्नोति पुत्रपौत्रसमृद्धिमत्
Aputro labhate putram kanya chaivepsitam patim
Lagnagarbha vimuchyeta garbhini janayetsutam
Vandhya prasavamapnoti putrapautrasamriddhimat
327.106
क्षेमेण गच्छेदध्वानमिदं यः पठते पथि
यो यं कामं कामयते स तमाप्नोति च ध्रुवम्
Kshemena gachchhedadhvanamidam yah pathate pathi
Yo yam kamam kamayate sa tamapnoti cha dhruvam
327.107
इदं महर्षेर्वचनं विनिश्चितं; महात्मनः पुरुषवरस्य कीर्तनम्
समागमं चर्षिदिवौकसामिमं; निशम्य भक्ताः सुसुखं लभन्ते
Idam maharshervachanam vinishchitam; mahatmanah purushavarasya kirtanam
Samagamam charshidivaukasamimam; nishamya bhaktah susukham labhante