Utshovঅধ্যায় 330
330.1
শ্রীভগবানুবাচ
সূর্যাচন্দ্রমসৌ শশ্বত্কেশৈর্মে অংশুসংজ্ঞিতৈঃ
বোধয়ংস্তাপয়ংশ্চৈব জগদুত্তিষ্ঠতঃ পৃথক্
330.2
বোধনাত্তাপনাচ্চৈব জগতো হর্ষণং ভবেৎ
অগ্নীষোমকৃতৈরেভিঃ কর্মভিঃ পাণ্ডুনন্দন
হৃষীকেশোঽহমীশানো বরদো লোকভাবনঃ
330.3
ইডোপহূতয়োগেন হরে ভাগং ক্রতুষ্বহম্
বর্ণশ্চ মে হরিশ্রেষ্ঠস্তস্মাদ্ধরিরহং স্মৃতঃ
330.4
ধাম সারো হি লোকানামৃতং চৈব বিচারিতম্
ঋতধামা ততো বিপ্রৈঃ সত্যশ্চাহং প্রকীর্তিতঃ
330.5
নষ্টাং চ ধরণীং পূর্বমবিন্দং বৈ গুহাগতাম্
গোবিন্দ ইতি মাং দেবা বাগ্ভিঃ সমভিতুষ্টুবুঃ
330.6
শিপিবিষ্টেতি চাখ্যায়াং হীনরোমা চ যো ভবেৎ
তেনাবিষ্টং হি যত্কিংচিচ্ছিপিবিষ্টং হি তত্স্মৃতম্
330.7
যাস্কো মামৃষিরব্যগ্রো নৈকয়জ্ঞেষু গীতবান্
শিপিবিষ্ট ইতি হ্যস্মাদ্গুহ্যনামধরো হ্যহম্
330.8
স্তুত্বা মাং শিপিবিষ্টেতি যাস্কো ঋষিরুদারধীঃ
মত্প্রসাদাদধো নষ্টং নিরুক্তমভিজগ্মিবান্
330.9
ন হি জাতো ন জায়েঽহং ন জনিষ্যে কদাচন
ক্ষেত্রজ্ঞঃ সর্বভূতানাং তস্মাদহমজঃ স্মৃতঃ
330.10
নোক্তপূর্বং ময়া ক্ষুদ্রমশ্লীলং বা কদাচন
ঋতা ব্রহ্মসুতা সা মে সত্যা দেবী সরস্বতী
330.11
সচ্চাসচ্চৈব কৌন্তেয় ময়াবেশিতমাত্মনি
পৌষ্করে ব্রহ্মসদনে সত্যং মামৃষয়ো বিদুঃ
330.12
সত্ত্বান্ন চ্যুতপূর্বোঽহং সত্ত্বং বৈ বিদ্ধি মত্কৃতম্
জন্মনীহাভবত্সত্ত্বং পৌর্বিকং মে ধনংজয়
330.13
নিরাশীঃকর্মসংয়ুক্তং সাত্বতং মাং প্রকল্পয়
সাত্বতজ্ঞানদৃষ্টোঽহং সাত্বতঃ সাত্বতাং পতিঃ
330.14
কৃষামি মেদিনীং পার্থ ভূত্বা কার্ষ্ণায়সো মহান্
কৃষ্ণো বর্ণশ্চ মে যস্মাত্তস্মাত্কৃষ্ণোঽহমর্জুন
330.15
ময়া সংশ্লেষিতা ভূমিরদ্ভির্ব্যোম চ বায়ুনা
বায়ুশ্চ তেজসা সার্ধং বৈকুণ্ঠত্বং ততো মম
330.16
নির্বাণং পরমং সৌখ্যং ধর্মোঽসৌ পর উচ্যতে
তস্মান্ন চ্যুতপূর্বোঽহমচ্যুতস্তেন কর্মণা
330.17
পৃথিবীনভসী চোভে বিশ্রুতে বিশ্বলৌকিকে
তয়োঃ সংধারণার্থং হি মামধোক্ষজমঞ্জসা
330.18
নিরুক্তং বেদবিদুষো যে চ শব্দার্থচিন্তকাঃ
তে মাং গায়ন্তি প্রাগ্বংশে অধোক্ষজ ইতি স্থিতিঃ
330.19
শব্দ একমতৈরেষ ব্যাহৃতঃ পরমর্ষিভিঃ
নান্যো হ্যধোক্ষজো লোকে ঋতে নারায়ণং প্রভুম্
330.20
ঘৃতং মমার্চিষো লোকে জন্তূনাং প্রাণধারণম্
ঘৃতার্চিরহমব্যগ্রৈর্বেদজ্ঞৈঃ পরিকীর্তিতঃ
330.21
ত্রয়ো হি ধাতবঃ খ্যাতাঃ কর্মজা ইতি চ স্মৃতাঃ
পিত্তং শ্লেষ্মা চ বায়ুশ্চ এষ সংঘাত উচ্যতে
330.22
এতৈশ্চ ধার্যতে জন্তুরেতৈঃ ক্ষীণৈশ্চ ক্ষীয়তে
আয়ুর্বেদবিদস্তস্মাত্ত্রিধাতুং মাং প্রচক্ষতে
330.23
বৃষো হি ভগবান্ধর্মঃ খ্যাতো লোকেষু ভারত
নৈঘণ্টুকপদাখ্যাতং বিদ্ধি মাং বৃষমুত্তমম্
330.24
কপির্বরাহঃ শ্রেষ্ঠশ্চ ধর্মশ্চ বৃষ উচ্যতে
তস্মাদ্বৃষাকপিং প্রাহ কশ্যপো মাং প্রজাপতিঃ
330.25
ন চাদিং ন মধ্যং তথা নৈব চান্তং; কদাচিদ্বিদন্তে সুরাশ্চাসুরাশ্চ
অনাদ্যো হ্যমধ্যস্তথা চাপ্যনন্তঃ; প্রগীতোঽহমীশো বিভুর্লোকসাক্ষী
330.26
শুচীনি শ্রবণীয়ানি শৃণোমীহ ধনংজয়
ন চ পাপানি গৃহ্ণামি ততোঽহং বৈ শুচিশ্রবাঃ
330.27
একশৃঙ্গঃ পুরা ভূত্বা বরাহো দিব্যদর্শনঃ
ইমামুদ্ধৃতবান্ভূমিমেকশৃঙ্গস্ততো হ্যহম্
330.28
তথৈবাসং ত্রিককুদো বারাহং রূপমাস্থিতঃ
ত্রিককুত্তেন বিখ্যাতঃ শরীরস্য তু মাপনাৎ
330.29
বিরিঞ্চ ইতি যঃ প্রোক্তঃ কপিলজ্ঞানচিন্তকৈঃ
স প্রজাপতিরেবাহং চেতনাত্সর্বলোককৃৎ
330.30
বিদ্যাসহায়বন্তং মামাদিত্যস্থং সনাতনম্
কপিলং প্রাহুরাচার্যাঃ সাংখ্যা নিশ্চিতনিশ্চয়াঃ
330.31
হিরণ্যগর্ভো দ্যুতিমানেষ যশ্ছন্দসি স্তুতঃ
যোগৈঃ সংপূজ্যতে নিত্যং স এবাহং বিভুঃ স্মৃতঃ
330.32
একবিংশতিশাখং চ ঋগ্বেদং মাং প্রচক্ষতে
সহস্রশাখং যত্সাম যে বৈ বেদবিদো জনাঃ
গায়ন্ত্যারণ্যকে বিপ্রা মদ্ভক্তাস্তেঽপি দুর্লভাঃ
330.33
ষট্পঞ্চাশতমষ্টৌ চ সপ্তত্রিংশতমিত্যুত
যস্মিঞ্শাখা যজুর্বেদে সোঽহমাধ্বর্যবে স্মৃতঃ
330.34
পঞ্চকল্পমথর্বাণং কৃত্যাভিঃ পরিবৃংহিতম্
কল্পয়ন্তি হি মাং বিপ্রা অথর্বাণবিদস্তথা
330.35
শাখাভেদাশ্চ যে কেচিদ্যাশ্চ শাখাসু গীতয়ঃ
স্বরবর্ণসমুচ্চারাঃ সর্বাংস্তান্বিদ্ধি মত্কৃতান্
330.36
যত্তদ্ধয়শিরঃ পার্থ সমুদেতি বরপ্রদম্
সোঽহমেবোত্তরে ভাগে ক্রমাক্ষরবিভাগবিৎ
330.37
রামাদেশিতমার্গেণ মত্প্রসাদান্মহাত্মনা
পাঞ্চালেন ক্রমঃ প্রাপ্তস্তস্মাদ্ভূতাত্সনাতনাৎ
বাভ্রব্যগোত্রঃ স বভৌ প্রথমঃ ক্রমপারগঃ
330.38
নারায়ণাদ্বরং লব্ধ্বা প্রাপ্য যোগমনুত্তমম্
ক্রমং প্রণীয় শিক্ষাং চ প্রণয়িত্বা স গালবঃ
330.39
কণ্ডরীকোঽথ রাজা চ ব্রহ্মদত্তঃ প্রতাপবান্
জাতীমরণজং দুঃখং স্মৃত্বা স্মৃত্বা পুনঃ পুনঃ
সপ্তজাতিষু মুখ্যত্বাদ্যোগানাং সংপদং গতঃ
330.40
পুরাহমাত্মজঃ পার্থ প্রথিতঃ কারণান্তরে
ধর্মস্য কুরুশার্দূল ততোঽহং ধর্মজঃ স্মৃতঃ
330.41
নরনারায়ণৌ পূর্বং তপস্তেপতুরব্যয়ম্
ধর্ময়ানং সমারূঢৌ পর্বতে গন্ধমাদনে
330.42
তত্কালসময়ং চৈব দক্ষয়জ্ঞো বভূব হ
ন চৈবাকল্পয়দ্ভাগং দক্ষো রুদ্রস্য ভারত
330.43
ততো দধীচিবচনাদ্দক্ষয়জ্ঞমপাহরৎ
সসর্জ শূলং ক্রোধেন প্রজ্বলন্তং মুহুর্মুহুঃ
330.44
তচ্ছূলং ভস্মসাত্কৃত্বা দক্ষয়জ্ঞং সবিস্তরম্
আবয়োঃ সহসাগচ্ছদ্বদর্যাশ্রমমন্তিকাৎ
বেগেন মহতা পার্থ পতন্নারায়ণোরসি
330.45
ততঃ স্বতেজসাবিষ্টাঃ কেশা নারায়ণস্য হ
বভূবুর্মুঞ্জবর্ণাস্তু ততোঽহং মুঞ্জকেশবান্
330.46
তচ্চ শূলং বিনির্ধূতং হুংকারেণ মহাত্মনা
জগাম শংকরকরং নারায়ণসমাহতম্
330.47
অথ রুদ্র উপাধাবত্তাবৃষী তপসান্বিতৌ
তত এনং সমুদ্ধূতং কণ্ঠে জগ্রাহ পাণিনা
নারায়ণঃ স বিশ্বাত্মা তেনাস্য শিতিকণ্ঠতা
330.48
অথ রুদ্রবিঘাতার্থমিষীকাং জগৃহে নরঃ
মন্ত্রৈশ্চ সংয়ুয়োজাশু সোঽভবত্পরশুর্মহান্
330.49
ক্ষিপ্তশ্চ সহসা রুদ্রে খণ্ডনং প্রাপ্তবাংস্তদা
ততোঽহং খণ্ডপরশুঃ স্মৃতঃ পরশুখণ্ডনাৎ
330.50
অর্জুন উবাচ
অস্মিন্যুদ্ধে তু বার্ষ্ণেয় ত্রৈলোক্যমথনে তদা
জয়ং কঃ প্রাপ্তবাংস্তত্র শংসৈতন্মে জনার্দন
330.51
শ্রীভগবানুবাচ
তয়োঃ সংলগ্নয়োর্যুদ্ধে রুদ্রনারায়ণাত্মনোঃ
উদ্বিগ্নাঃ সহসা কৃত্স্না লোকাঃ সর্বেঽভবংস্তদা
330.52
নাগৃহ্ণাত্পাবকঃ শুভ্রং মখেষু সুহুতং হবিঃ
বেদা ন প্রতিভান্তি স্ম ঋষীণাং ভাবিতাত্মনাম্
330.53
দেবান্রজস্তমশ্চৈব সমাবিবিশতুস্তদা
বসুধা সংচকম্পেঽথ নভশ্চ বিপফাল হ
330.54
নিষ্প্রভাণি চ তেজাংসি ব্রহ্মা চৈবাসনাচ্চ্যুতঃ
অগাচ্ছোষং সমুদ্রশ্চ হিমবাংশ্চ ব্যশীর্যত
330.55
তস্মিন্নেবং সমুত্পন্নে নিমিত্তে পাণ্ডুনন্দন
ব্রহ্মা বৃতো দেবগণৈরৃষিভিশ্চ মহাত্মভিঃ
আজগামাশু তং দেশং যত্র যুদ্ধমবর্তত
330.56
সাঞ্জলিপ্রগ্রহো ভূত্বা চতুর্বক্ত্রো নিরুক্তগঃ
উবাচ বচনং রুদ্রং লোকানামস্তু বৈ শিবম্
ন্যস্যায়ুধানি বিশ্বেশ জগতো হিতকাম্যয়া
330.57
যদক্ষরমথাব্যক্তমীশং লোকস্য ভাবনম্
কূটস্থং কর্তৃনির্দ্বংদ্বমকর্তেতি চ যং বিদুঃ
330.58
ব্যক্তিভাবগতস্যাস্য একা মূর্তিরিয়ং শিবা
নরো নারায়ণশ্চৈব জাতৌ ধর্মকুলোদ্বহৌ
330.59
তপসা মহতা যুক্তৌ দেবশ্রেষ্ঠৌ মহাব্রতৌ
অহং প্রসাদজস্তস্য কস্মিংশ্চিত্কারণান্তরে
ত্বং চৈব ক্রোধজস্তাত পূর্বসর্গে সনাতনঃ
330.60
ময়া চ সার্ধং বরদং বিবুধৈশ্চ মহর্ষিভিঃ
প্রসাদয়াশু লোকানাং শান্তির্ভবতু মাচিরম্
330.61
ব্রহ্মণা ত্বেবমুক্তস্তু রুদ্রঃ ক্রোধাগ্নিমুত্সৃজন্
প্রসাদয়ামাস ততো দেবং নারায়ণং প্রভুম্
শরণং চ জগামাদ্যং বরেণ্যং বরদং হরিম্
330.62
ততোঽথ বরদো দেবো জিতক্রোধো জিতেন্দ্রিয়ঃ
প্রীতিমানভবত্তত্র রুদ্রেণ সহ সংগতঃ
330.63
ঋষিভির্ব্রহ্মণা চৈব বিবুধৈশ্চ সুপূজিতঃ
উবাচ দেবমীশানমীশঃ স জগতো হরিঃ
330.64
যস্ত্বাং বেত্তি স মাং বেত্তি যস্ত্বামনু স মামনু
নাবয়োরন্তরং কিংচিন্মা তে ভূদ্বুদ্ধিরন্যথা
330.65
অদ্য প্রভৃতি শ্রীবত্সঃ শূলাঙ্কোঽয়ং ভবত্বয়ম্
মম পাণ্যঙ্কিতশ্চাপি শ্রীকণ্ঠস্ত্বং ভবিষ্যসি
330.66
এবং লক্ষণমুত্পাদ্য পরস্পরকৃতং তদা
সখ্যং চৈবাতুলং কৃত্বা রুদ্রেণ সহিতাবৃষী
তপস্তেপতুরব্যগ্রৌ বিসৃজ্য ত্রিদিবৌকসঃ
330.67
এষ তে কথিতঃ পার্থ নারায়ণজয়ো মৃধে
নামানি চৈব গুহ্যানি নিরুক্তানি চ ভারত
ঋষিভিঃ কথিতানীহ যানি সংকীর্তিতানি তে
330.68
এবং বহুবিধৈ রূপৈশ্চরামীহ বসুংধরাম্
ব্রহ্মলোকং চ কৌন্তেয় গোলোকং চ সনাতনম্
ময়া ত্বং রক্ষিতো যুদ্ধে মহান্তং প্রাপ্তবাঞ্জয়ম্
330.69
যস্তু তে সোঽগ্রতো যাতি যুদ্ধে সংপ্রত্যুপস্থিতে
তং বিদ্ধি রুদ্রং কৌন্তেয় দেবদেবং কপর্দিনম্
330.70
কালঃ স এব কথিতঃ ক্রোধজেতি ময়া তব
নিহতাংস্তেন বৈ পূর্বং হতবানসি বৈ রিপূন্
330.71
অপ্রমেয়প্রভাবং তং দেবদেবমুমাপতিম্
নমস্ব দেবং প্রয়তো বিশ্বেশং হরমব্যয়ম্