Utshovঅধ্যায় 331
331.1
জনমেজয় উবাচ
ব্রহ্মন্সুমহদাখ্যানং ভবতা পরিকীর্তিতম্
যচ্ছ্রুত্বা মুনয়ঃ সর্বে বিস্ময়ং পরমং গতাঃ
331.2
ইদং শতসহস্রাদ্ধি ভারতাখ্যানবিস্তরাৎ
আমথ্য মতিমন্থেন জ্ঞানোদধিমনুত্তমম্
331.3
নবনীতং যথা দধ্নো মলয়াচ্চন্দনং যথা
আরণ্যকং চ বেদেভ্য ওষধিভ্যোঽমৃতং যথা
331.4
সমুদ্ধৃতমিদং ব্রহ্মন্কথামৃতমনুত্তমম্
তপোনিধে ত্বয়োক্তং হি নারায়ণকথাশ্রয়ম্
331.5
স হীশো ভগবান্দেবঃ সর্বভূতাত্মভাবনঃ
অহো নারায়ণং তেজো দুর্দর্শং দ্বিজসত্তম
331.6
যত্রাবিশন্তি কল্পান্তে সর্বে ব্রহ্মাদয়ঃ সুরাঃ
ঋষয়শ্চ সগন্ধর্বা যচ্চ কিংচিচ্চরাচরম্
ন ততোঽস্তি পরং মন্যে পাবনং দিবি চেহ চ
331.7
সর্বাশ্রমাভিগমনং সর্বতীর্থাবগাহনম্
ন তথা ফলদং চাপি নারায়ণকথা যথা
331.8
সর্বথা পাবিতাঃ স্মেহ শ্রুত্বেমামাদিতঃ কথাম্
হরের্বিশ্বেশ্বরস্যেহ সর্বপাপপ্রণাশনীম্
331.9
ন চিত্রং কৃতবাংস্তত্র যদার্যো মে ধনংজয়ঃ
বাসুদেবসহায়ো যঃ প্রাপ্তবাঞ্জয়মুত্তমম্
331.10
ন চাস্য কিংচিদপ্রাপ্যং মন্যে লোকেষ্বপি ত্রিষু
ত্রৈলোক্যনাথো বিষ্ণুঃ স যস্যাসীত্সাহ্যকৃত্সখা
331.11
ধন্যাশ্চ সর্ব এবাসন্ব্রহ্মংস্তে মম পূর্বকাঃ
হিতায় শ্রেয়সে চৈব যেষামাসীজ্জনার্দনঃ
331.12
তপসাপি ন দৃশ্যো হি ভগবাঁল্লোকপূজিতঃ
যং দৃষ্টবন্তস্তে সাক্ষাচ্ছ্রীবত্সাঙ্কবিভূষণম্
331.13
তেভ্যো ধন্যতরশ্চৈব নারদঃ পরমেষ্ঠিজঃ
ন চাল্পতেজসমৃষিং বেদ্মি নারদমব্যয়ম্
শ্বেতদ্বীপং সমাসাদ্য যেন দৃষ্টঃ স্বয়ং হরিঃ
331.14
দেবপ্রসাদানুগতং ব্যক্তং তত্তস্য দর্শনম্
যদ্দৃষ্টবাংস্তদা দেবমনিরুদ্ধতনৌ স্থিতম্
331.15
বদরীমাশ্রমং যত্তু নারদঃ প্রাদ্রবত্পুনঃ
নরনারায়ণৌ দ্রষ্টুং কিং নু তত্কারণং মুনে
331.16
শ্বেতদ্বীপান্নিবৃত্তশ্চ নারদঃ পরমেষ্ঠিজঃ
বদরীমাশ্রমং প্রাপ্য সমাগম্য চ তাবৃষী
331.17
কিয়ন্তং কালমবসত্কাঃ কথাঃ পৃষ্টবাংশ্চ সঃ
শ্বেতদ্বীপাদুপাবৃত্তে তস্মিন্বা সুমহাত্মনি
331.18
কিমব্রূতাং মহাত্মানৌ নরনারায়ণাবৃষী
তদেতন্মে যথাতত্ত্বং সর্বমাখ্যাতুমর্হসি
331.19
বৈশংপায়ন উবাচ
নমো ভগবতে তস্মৈ ব্যাসায়ামিততেজসে
যস্য প্রসাদাদ্বক্ষ্যামি নারায়ণকথামিমাম্
331.20
প্রাপ্য শ্বেতং মহাদ্বীপং দৃষ্ট্বা চ হরিমব্যয়ম্
নিবৃত্তো নারদো রাজংস্তরসা মেরুমাগমৎ
হৃদয়েনোদ্বহন্ভারং যদুক্তং পরমাত্মনা
331.21
পশ্চাদস্যাভবদ্রাজন্নাত্মনঃ সাধ্বসং মহৎ
যদ্গত্বা দূরমধ্বানং ক্ষেমী পুনরিহাগতঃ
331.22
ততো মেরোঃ প্রচক্রাম পর্বতং গন্ধমাদনম্
নিপপাত চ খাত্তূর্ণং বিশালাং বদরীমনু
331.23
ততঃ স দদৃশে দেবৌ পুরাণাবৃষিসত্তমৌ
তপশ্চরন্তৌ সুমহদাত্মনিষ্ঠৌ মহাব্রতৌ
331.24
তেজসাভ্যধিকৌ সূর্যাত্সর্বলোকবিরোচনাৎ
শ্রীবত্সলক্ষণৌ পূজ্যৌ জটামণ্ডলধারিণৌ
331.25
জালপাদভুজৌ তৌ তু পাদয়োশ্চক্রলক্ষণৌ
ব্যূঢোরস্কৌ দীর্ঘভুজৌ তথা মুষ্কচতুষ্কিণৌ
331.26
ষষ্টিদন্তাবষ্টদংষ্ট্রৌ মেঘৌঘসদৃশস্বনৌ
স্বাস্যৌ পৃথুললাটৌ চ সুহনূ সুভ্রুনাসিকৌ
331.27
আতপত্রেণ সদৃশে শিরসী দেবয়োস্তয়োঃ
এবং লক্ষণসংপন্নৌ মহাপুরুষসংজ্ঞিতৌ
331.28
তৌ দৃষ্ট্বা নারদো হৃষ্টস্তাভ্যাং চ প্রতিপূজিতঃ
স্বাগতেনাভিভাষ্যাথ পৃষ্টশ্চানাময়ং তদা
331.29
বভূবান্তর্গতমতির্নিরীক্ষ্য পুরুষোত্তমৌ
সদোগতাস্তত্র যে বৈ সর্বভূতনমস্কৃতাঃ
331.30
শ্বেতদ্বীপে ময়া দৃষ্টাস্তাদৃশাবৃষিসত্তমৌ
ইতি সংচিন্ত্য মনসা কৃত্বা চাভিপ্রদক্ষিণম্
উপোপবিবিশে তত্র পীঠে কুশময়ে শুভে
331.31
ততস্তৌ তপসাং বাসৌ যশসাং তেজসামপি
ঋষী শমদমোপেতৌ কৃত্বা পূর্বাহ্ণিকং বিধিম্
331.32
পশ্চান্নারদমব্যগ্রৌ পাদ্যার্ঘ্যাভ্যাং প্রপূজ্য চ
পীঠয়োশ্চোপবিষ্টৌ তৌ কৃতাতিথ্যাহ্নিকৌ নৃপ
331.33
তেষু তত্রোপবিষ্টেষু স দেশোঽভিব্যরাজত
আজ্যাহুতিমহাজ্বালৈর্যজ্ঞবাটোঽগ্নিভির্যথা
331.34
অথ নারায়ণস্তত্র নারদং বাক্যমব্রবীৎ
সুখোপবিষ্টং বিশ্রান্তং কৃতাতিথ্যং সুখস্থিতম্
331.35
অপীদানীং স ভগবান্পরমাত্মা সনাতনঃ
শ্বেতদ্বীপে ত্বয়া দৃষ্ট আবয়োঃ প্রকৃতিঃ পরা
331.36
নারদ উবাচ
দৃষ্টো মে পুরুষঃ শ্রীমান্বিশ্বরূপধরোঽব্যয়ঃ
সর্বে হি লোকাস্তত্রস্থাস্তথা দেবাঃ সহর্ষিভিঃ
অদ্যাপি চৈনং পশ্যামি যুবাং পশ্যন্সনাতনৌ
331.37
যৈর্লক্ষণৈরুপেতঃ স হরিরব্যক্তরূপধৃক্
তৈর্লক্ষণৈরুপেতৌ হি ব্যক্তরূপধরৌ যুবাম্
331.38
দৃষ্টৌ ময়া যুবাং তত্র তস্য দেবস্য পার্শ্বতঃ
ইহ চৈবাগতোঽস্ম্যদ্য বিসৃষ্টঃ পরমাত্মনা
331.39
কো হি নাম ভবেত্তস্য তেজসা যশসা শ্রিয়া
সদৃশস্ত্রিষু লোকেষু ঋতে ধর্মাত্মজৌ যুবাম্
331.40
তেন মে কথিতং পূর্বং নাম ক্ষেত্রজ্ঞসংজ্ঞিতম্
প্রাদুর্ভাবাশ্চ কথিতা ভবিষ্যন্তি হি যে যথা
331.41
তত্র যে পুরুষাঃ শ্বেতাঃ পঞ্চেন্দ্রিয়বিবর্জিতাঃ
প্রতিবুদ্ধাশ্চ তে সর্বে ভক্তাশ্চ পুরুষোত্তমম্
331.42
তেঽর্চয়ন্তি সদা দেবং তৈঃ সার্ধং রমতে চ সঃ
প্রিয়ভক্তো হি ভগবান্পরমাত্মা দ্বিজপ্রিয়ঃ
331.43
রমতে সোঽর্চ্যমানো হি সদা ভাগবতপ্রিয়ঃ
বিশ্বভুক্সর্বগো দেবো বান্ধবো ভক্তবত্সলঃ
স কর্তা কারণং চৈব কার্যং চাতিবলদ্যুতিঃ
331.44
তপসা যোজ্য সোঽঽত্মানং শ্বেতদ্বীপাত্পরং হি যৎ
তেজ ইত্যভিবিখ্যাতং স্বয়ংভাসাবভাসিতম্
331.45
শান্তিঃ সা ত্রিষু লোকেষু সিদ্ধানাং ভাবিতাত্মনাম্
এতয়া শুভয়া বুদ্ধ্যা নৈষ্ঠিকং ব্রতমাস্থিতঃ
331.46
ন তত্র সূর্যস্তপতি ন সোমোঽভিবিরাজতে
ন বায়ুর্বাতি দেবেশে তপশ্চরতি দুশ্চরম্
331.47
বেদীমষ্টতলোত্সেধাং ভূমাবাস্থায় বিশ্বভুক্
একপাদস্থিতো দেব ঊর্ধ্ববাহুরুদঙ্মুখঃ
সাঙ্গানাবর্তয়ন্বেদাংস্তপস্তেপে সুদুশ্চরম্
331.48
যদ্ব্রহ্মা ঋষয়শ্চৈব স্বয়ং পশুপতিশ্চ যৎ
শেষাশ্চ বিবুধশ্রেষ্ঠা দৈত্যদানবরাক্ষসাঃ
331.49
নাগাঃ সুপর্ণা গন্ধর্বাঃ সিদ্ধা রাজর্ষয়শ্চ যে
হব্যং কব্যং চ সততং বিধিপূর্বং প্রয়ুঞ্জতে
কৃত্স্নং তত্তস্য দেবস্য চরণাবুপতিষ্ঠতি
331.50
যাঃ ক্রিয়াঃ সংপ্রয়ুক্তাস্তু একান্তগতবুদ্ধিভিঃ
তাঃ সর্বাঃ শিরসা দেবঃ প্রতিগৃহ্ণাতি বৈ স্বয়ম্
331.51
ন তস্যান্যঃ প্রিয়তরঃ প্রতিবুদ্ধৈর্মহাত্মভিঃ
বিদ্যতে ত্রিষু লোকেষু ততোঽস্ম্যৈকান্তিকং গতঃ
ইহ চৈবাগতস্তেন বিসৃষ্টঃ পরমাত্মনা
331.52
এবং মে ভগবান্দেবঃ স্বয়মাখ্যাতবান্হরিঃ
আসিষ্যে তত্পরো ভূত্বা যুবাভ্যাং সহ নিত্যশঃ