অধ্যায় 332

332.1

নরনারায়ণাবূচতুঃ
ধন্যোঽস্যনুগৃহীতোঽসি যত্তে দৃষ্টঃ স্বয়ং প্রভুঃ
ন হি তং দৃষ্টবান্কশ্চিত্পদ্ময়োনিরপি স্বয়ম্

332.2

অব্যক্তয়োনির্ভগবান্দুর্দর্শঃ পুরুষোত্তমঃ
নারদৈতদ্ধি তে সত্যং বচনং সমুদাহৃতম্

332.3

নাস্য ভক্তৈঃ প্রিয়তরো লোকে কশ্চন বিদ্যতে
ততঃ স্বয়ং দর্শিতবান্স্বমাত্মানং দ্বিজোত্তম

332.4

তপো হি তপ্যতস্তস্য যত্স্থানং পরমাত্মনঃ
ন তত্সংপ্রাপ্নুতে কশ্চিদৃতে হ্যাবাং দ্বিজোত্তম

332.5

যা হি সূর্যসহস্রস্য সমস্তস্য ভবেদ্দ্যুতিঃ
স্থানস্য সা ভবেত্তস্য স্বয়ং তেন বিরাজতা

332.6

তস্মাদুত্তিষ্ঠতে বিপ্র দেবাদ্বিশ্বভুবঃ পতেঃ
ক্ষমা ক্ষমাবতাং শ্রেষ্ঠ যয়া ভূমিস্তু যুজ্যতে

332.7

তস্মাচ্চোত্তিষ্ঠতে দেবাত্সর্বভূতহিতো রসঃ
আপো যেন হি যুজ্যন্তে দ্রবত্বং প্রাপ্নুবন্তি চ

332.8

তস্মাদেব সমুদ্ভূতং তেজো রূপগুণাত্মকম্
যেন স্ম যুজ্যতে সূর্যস্ততো লোকান্বিরাজতে

332.9

তস্মাদ্দেবাত্সমুদ্ভূতঃ স্পর্শস্তু পুরুষোত্তমাৎ
যেন স্ম যুজ্যতে বায়ুস্ততো লোকান্বিবাত্যসৌ

332.10

তস্মাচ্চোত্তিষ্ঠতে শব্দঃ সর্বলোকেশ্বরাত্প্রভোঃ
আকাশং যুজ্যতে যেন ততস্তিষ্ঠত্যসংবৃতম্

332.11

তস্মাচ্চোত্তিষ্ঠতে দেবাত্সর্বভূতগতং মনঃ
চন্দ্রমা যেন সংয়ুক্তঃ প্রকাশগুণধারণঃ

332.12

ষড্ভূতোত্পাদকং নাম তত্স্থানং বেদসংজ্ঞিতম্
বিদ্যাসহায়ো যত্রাস্তে ভগবান্হব্যকব্যভুক্

332.13

যে হি নিষ্কল্মষা লোকে পুণ্যপাপবিবর্জিতাঃ
তেষাং বৈ ক্ষেমমধ্বানং গচ্ছতাং দ্বিজসত্তম
সর্বলোকতমোহন্তা আদিত্যো দ্বারমুচ্যতে

332.14

আদিত্যদগ্ধসর্বাঙ্গা অদৃশ্যাঃ কেনচিত্ক্বচিৎ
পরমাণুভূতা ভূত্বা তু তং দেবং প্রবিশন্ত্যুত

332.15

তস্মাদপি বিনির্মুক্তা অনিরুদ্ধতনৌ স্থিতাঃ
মনোভূতাস্ততো ভূয়ঃ প্রদ্যুম্নং প্রবিশন্ত্যুত

332.16

প্রদ্যুম্নাচ্চাপি নির্মুক্তা জীবং সংকর্ষণং তথা
বিশন্তি বিপ্রপ্রবরাঃ সাংখ্যা ভাগবতৈঃ সহ

332.17

ততস্ত্রৈগুণ্যহীনাস্তে পরমাত্মানমঞ্জসা
প্রবিশন্তি দ্বিজশ্রেষ্ঠ ক্ষেত্রজ্ঞং নির্গুণাত্মকম্
সর্বাবাসং বাসুদেবং ক্ষেত্রজ্ঞং বিদ্ধি তত্ত্বতঃ

332.18

সমাহিতমনস্কাশ্চ নিয়তাঃ সংয়তেন্দ্রিয়াঃ
একান্তভাবোপগতা বাসুদেবং বিশন্তি তে

332.19

আবামপি চ ধর্মস্য গৃহে জাতৌ দ্বিজোত্তম
রম্যাং বিশালামাশ্রিত্য তপ উগ্রং সমাস্থিতৌ

332.20

যে তু তস্যৈব দেবস্য প্রাদুর্ভাবাঃ সুরপ্রিয়াঃ
ভবিষ্যন্তি ত্রিলোকস্থাস্তেষাং স্বস্তীত্যতো দ্বিজ

332.21

বিধিনা স্বেন যুক্তাভ্যাং যথাপূর্বং দ্বিজোত্তম
আস্থিতাভ্যাং সর্বকৃচ্ছ্রং ব্রতং সম্যক্তদুত্তমম্

332.22

আবাভ্যামপি দৃষ্টস্ত্বং শ্বেতদ্বীপে তপোধন
সমাগতো ভগবতা সংজল্পং কৃতবান্যথা

332.23

সর্বং হি নৌ সংবিদিতং ত্রৈলোক্যে সচরাচরে
যদ্ভবিষ্যতি বৃত্তং বা বর্ততে বা শুভাশুভম্

332.24

বৈশংপায়ন উবাচ
এতচ্ছ্রুত্বা তয়োর্বাক্যং তপস্যুগ্রেঽভ্যবর্তত
নারদঃ প্রাঞ্জলির্ভূত্বা নারায়ণপরায়ণঃ

332.25

জজাপ বিধিবন্মন্ত্রান্নারায়ণগতান্বহূন্
দিব্যং বর্ষসহস্রং হি নরনারায়ণাশ্রমে

332.26

অবসত্স মহাতেজা নারদো ভগবানৃষিঃ
তমেবাভ্যর্চয়ন্দেবং নরনারায়ণৌ চ তৌ

Contains text from DharmicData, made available under the Open Database License (ODbL). Simple meanings are written by AI and can contain mistakes.