Utshovঅধ্যায় 333
333.1
বৈশংপায়ন উবাচ
কস্যচিত্ত্বথ কালস্য নারদঃ পরমেষ্ঠিজঃ
দৈবং কৃত্বা যথান্যায়ং পিত্র্যং চক্রে ততঃ পরম্
333.2
ততস্তং বচনং প্রাহ জ্যেষ্ঠো ধর্মাত্মজঃ প্রভুঃ
ক ইজ্যতে দ্বিজশ্রেষ্ঠ দৈবে পিত্র্যে চ কল্পিতে
333.3
ত্বয়া মতিমতাং শ্রেষ্ঠ তন্মে শংস যথাগমম্
কিমেতত্ক্রিয়তে কর্ম ফলং চাস্য কিমিষ্যতে
333.4
নারদ উবাচ
ত্বয়ৈতত্কথিতং পূর্বং দৈবং কর্তব্যমিত্যপি
দৈবতং চ পরো যজ্ঞঃ পরমাত্মা সনাতনঃ
333.5
ততস্তদ্ভাবিতো নিত্যং যজে বৈকুণ্ঠমব্যয়ম্
তস্মাচ্চ প্রসৃতঃ পূর্বং ব্রহ্মা লোকপিতামহঃ
333.6
মম বৈ পিতরং প্রীতঃ পরমেষ্ঠ্যপ্যজীজনৎ
অহং সংকল্পজস্তস্য পুত্রঃ প্রথমকল্পিতঃ
333.7
যজাম্যহং পিতৄন্সাধো নারায়ণবিধৌ কৃতে
এবং স এব ভগবান্পিতা মাতা পিতামহঃ
ইজ্যতে পিতৃয়জ্ঞেষু ময়া নিত্যং জগত্পতিঃ
333.8
শ্রুতিশ্চাপ্যপরা দেব পুত্রান্হি পিতরোঽয়জন্
বেদশ্রুতিঃ প্রণষ্টা চ পুনরধ্যাপিতা সুতৈঃ
ততস্তে মন্ত্রদাঃ পুত্রাঃ পিতৃত্বমুপপেদিরে
333.9
নূনং পুরৈতদ্বিদিতং যুবয়োর্ভাবিতাত্মনোঃ
পুত্রাশ্চ পিতরশ্চৈব পরস্পরমপূজয়ন্
333.10
ত্রীন্পিণ্ডান্ন্যস্য বৈ পৃথ্ব্যাং পূর্বং দত্ত্বা কুশানিতি
কথং তু পিণ্ডসংজ্ঞাং তে পিতরো লেভিরে পুরা
333.11
নরনারায়ণাবূচতুঃ
ইমাং হি ধরণীং পূর্বং নষ্টাং সাগরমেখলাম্
গোবিন্দ উজ্জহারাশু বারাহং রূপমাশ্রিতঃ
333.12
স্থাপয়িত্বা তু ধরণীং স্বে স্থানে পুরুষোত্তমঃ
জলকর্দমলিপ্তাঙ্গো লোককার্যার্থমুদ্যতঃ
333.13
প্রাপ্তে চাহ্নিককালে স মধ্যংদিনগতে রবৌ
দংষ্ট্রাবিলগ্নান্মৃত্পিণ্ডান্বিধূয় সহসা প্রভুঃ
স্থাপয়ামাস বৈ পৃথ্ব্যাং কুশানাস্তীর্য নারদ
333.14
স তেষ্বাত্মানমুদ্দিশ্য পিত্র্যং চক্রে যথাবিধি
সংকল্পয়িত্বা ত্রীন্পিণ্ডান্স্বেনৈব বিধিনা প্রভুঃ
333.15
আত্মগাত্রোষ্মসংভূতৈঃ স্নেহগর্ভৈস্তিলৈরপি
প্রোক্ষ্যাপবর্গং দেবেশঃ প্রাঙ্মুখঃ কৃতবান্স্বয়ম্
333.16
মর্যাদাস্থাপনার্থং চ ততো বচনমুক্তবান্
অহং হি পিতরঃ স্রষ্টুমুদ্যতো লোককৃত্স্বয়ম্
333.17
তস্য চিন্তয়তঃ সদ্যঃ পিতৃকার্যবিধিং পরম্
দংষ্ট্রাভ্যাং প্রবিনির্ধূতা মমৈতে দক্ষিণাং দিশম্
আশ্রিতা ধরণীং পিণ্ডাস্তস্মাত্পিতর এব তে
333.18
ত্রয়ো মূর্তিবিহীনা বৈ পিণ্ডমূর্তিধরাস্ত্বিমে
ভবন্তু পিতরো লোকে ময়া সৃষ্টাঃ সনাতনাঃ
333.19
পিতা পিতামহশ্চৈব তথৈব প্রপিতামহঃ
অহমেবাত্র বিজ্ঞেয়স্ত্রিষু পিণ্ডেষু সংস্থিতঃ
333.20
নাস্তি মত্তোঽধিকঃ কশ্চিত্কো বাভ্যর্চ্যো ময়া স্বয়ম্
কো বা মম পিতা লোকে অহমেব পিতামহঃ
333.21
পিতামহপিতা চৈব অহমেবাত্র কারণম্
ইত্যেবমুক্ত্বা বচনং দেবদেবো বৃষাকপিঃ
333.22
বরাহপর্বতে বিপ্র দত্ত্বা পিণ্ডান্সবিস্তরান্
আত্মানং পূজয়িত্বৈব তত্রৈবাদর্শনং গতঃ
333.23
এতদর্থং শুভমতে পিতরঃ পিণ্ডসংজ্ঞিতাঃ
লভন্তে সততং পূজাং বৃষাকপিবচো যথা
333.24
যে যজন্তি পিতৄন্দেবান্গুরূংশ্চৈবাতিথীংস্তথা
গাশ্চৈব দ্বিজমুখ্যাংশ্চ পৃথিবীং মাতরং তথা
কর্মণা মনসা বাচা বিষ্ণুমেব যজন্তি তে
333.25
অন্তর্গতঃ স ভগবান্সর্বসত্ত্বশরীরগঃ
সমঃ সর্বেষু ভূতেষু ঈশ্বরঃ সুখদুঃখয়োঃ
মহান্মহাত্মা সর্বাত্মা নারায়ণ ইতি শ্রুতঃ