অধ্যায় 334

334.1

বৈশংপায়ন উবাচ
শ্রুত্বৈতন্নারদো বাক্যং নরনারায়ণেরিতম্
অত্যন্তভক্তিমান্দেবে একান্তিত্বমুপেয়িবান্

প্রোষ্য বর্ষসহস্রং তু নরনারায়ণাশ্রমে
শ্রুত্বা ভগবদাখ্যানং দৃষ্ট্বা চ হরিমব্যয়ম্
হিমবন্তং জগামাশু যত্রাস্য স্বক আশ্রমঃ

তাবপি খ্যাততপসৌ নরনারায়ণাবৃষী
তস্মিন্নেবাশ্রমে রম্যে তেপতুস্তপ উত্তমম্

ত্বমপ্যমিতবিক্রান্তঃ পাণ্ডবানাং কুলোদ্বহঃ
পাবিতাত্মাদ্য সংবৃত্তঃ শ্রুত্বেমামাদিতঃ কথাম্

নৈব তস্য পরো লোকো নায়ং পার্থিবসত্তম
কর্মণা মনসা বাচা যো দ্বিষ্যাদ্বিষ্ণুমব্যয়ম্

মজ্জন্তি পিতরস্তস্য নরকে শাশ্বতীঃ সমাঃ
যো দ্বিষ্যাদ্বিবুধশ্রেষ্ঠং দেবং নারায়ণং হরিম্

কথং নাম ভবেদ্দ্বেষ্য আত্মা লোকস্য কস্যচিৎ
আত্মা হি পুরুষব্যাঘ্র জ্ঞেয়ো বিষ্ণুরিতি স্থিতিঃ

য এষ গুরুরস্মাকমৃষির্গন্ধবতীসুতঃ
তেনৈতত্কথিতং তাত মাহাত্ম্যং পরমাত্মনঃ
তস্মাচ্ছ্রুতং ময়া চেদং কথিতং চ তবানঘ

কৃষ্ণদ্বৈপায়নং ব্যাসং বিদ্ধি নারায়ণং প্রভুম্
কো হ্যন্যঃ পুরুষব্যাঘ্র মহাভারতকৃদ্ভবেৎ
ধর্মান্নানাবিধাংশ্চৈব কো ব্রূয়াত্তমৃতে প্রভুম্

বর্ততাং তে মহায়জ্ঞো যথা সংকল্পিতস্ত্বয়া
সংকল্পিতাশ্বমেধস্ত্বং শ্রুতধর্মশ্চ তত্ত্বতঃ

এতত্তু মহদাখ্যানং শ্রুত্বা পারিক্ষিতো নৃপঃ
ততো যজ্ঞসমাপ্ত্যর্থং ক্রিয়াঃ সর্বাঃ সমারভৎ

নারায়ণীয়মাখ্যানমেতত্তে কথিতং ময়া
নারদেন পুরা রাজন্গুরবে মে নিবেদিতম্
ঋষীণাং পাণ্ডবানাং চ শৃণ্বতোঃ কৃষ্ণভীষ্ময়োঃ

স হি পরমগুরুর্ভুবনপতি;র্ধরণিধরঃ শমনিয়মনিধিঃ
শ্রুতিবিনয়নিধির্দ্বিজপরমহিত;স্তব ভবতু গতির্হরিরমরহিতঃ

তপসাং নিধিঃ সুমহতাং মহতো; যশসশ্চ ভাজনমরিষ্টকহা
একান্তিনাং শরণদোঽভয়দো; গতিদোঽস্তু বঃ স মখভাগহরঃ

ত্রিগুণাতিগশ্চতুষ্পঞ্চধরঃ; পূর্তেষ্টয়োশ্চ ফলভাগহরঃ
বিদধাতি নিত্যমজিতোঽতিবলো; গতিমাত্মগাং সুকৃতিনামৃষিণাম্

তং লোকসাক্ষিণমজং পুরুষং; রবিবর্ণমীশ্বরগতিং বহুশঃ
প্রণমধ্বমেকমতয়ো যতয়ঃ; সলিলোদ্ভবোঽপি তমৃষিং প্রণতঃ

স হি লোকয়োনিরমৃতস্য পদং; সূক্ষ্মং পুরাণমচলং পরমম্
তত্সাংখ্যয়োগিভিরুদারধৃতং; বুদ্ধ্যা যতাত্মভির্বিদিতং সততম্