Utshovঅধ্যায় 335
335.1
জনমেজয় উবাচ
শ্রুতং ভগবতস্তস্য মাহাত্ম্যং পরমাত্মনঃ
জন্ম ধর্মগৃহে চৈব নরনারায়ণাত্মকম্
মহাবরাহসৃষ্টা চ পিণ্ডোত্পত্তিঃ পুরাতনী
335.2
প্রবৃত্তৌ চ নিবৃত্তৌ চ যো যথা পরিকল্পিতঃ
স তথা নঃ শ্রুতো ব্রহ্মন্কথ্যমানস্ত্বয়ানঘ
335.3
যচ্চ তত্কথিতং পূর্বং ত্বয়া হয়শিরো মহৎ
হব্যকব্যভুজো বিষ্ণোরুদক্পূর্বে মহোদধৌ
তচ্চ দৃষ্টং ভগবতা ব্রহ্মণা পরমেষ্ঠিনা
335.4
কিং তদুত্পাদিতং পূর্বং হরিণা লোকধারিণা
রূপং প্রভাবমহতামপূর্বং ধীমতাং বর
335.5
দৃষ্ট্বা হি বিবুধশ্রেষ্ঠমপূর্বমমিতৌজসম্
তদশ্বশিরসং পুণ্যং ব্রহ্মা কিমকরোন্মুনে
335.6
এতন্নঃ সংশয়ং ব্রহ্মন্পুরাণজ্ঞানসংভবম্
কথয়স্বোত্তমমতে মহাপুরুষনির্মিতম্
পাবিতাঃ স্ম ত্বয়া ব্রহ্মন্পুণ্যাং কথয়তা কথাম্
335.7
বৈশংপায়ন উবাচ
কথয়িষ্যামি তে সর্বং পুরাণং বেদসংমিতম্
জগৌ যদ্ভগবান্ব্যাসো রাজ্ঞো ধর্মসুতস্য বৈ
335.8
শ্রুত্বাশ্বশিরসো মূর্তিং দেবস্য হরিমেধসঃ
উত্পন্নসংশয়ো রাজা তমেব সমচোদয়ৎ
335.9
যুধিষ্ঠির উবাচ
যত্তদ্দর্শিতবান্ব্রহ্মা দেবং হয়শিরোধরম্
কিমর্থং তত্সমভবদ্বপুর্দেবোপকল্পিতম্
335.10
ব্যাস উবাচ
যত্কিংচিদিহ লোকে বৈ দেহবদ্ধং বিশাং পতে
সর্বং পঞ্চভিরাবিষ্টং ভূতৈরীশ্বরবুদ্ধিজৈঃ
335.11
ঈশ্বরো হি জগত্স্রষ্টা প্রভুর্নারায়ণো বিরাট্
ভূতান্তরাত্মা বরদঃ সগুণো নির্গুণোঽপি চ
ভূতপ্রলয়মব্যক্তং শৃণুষ্ব নৃপসত্তম
335.12
ধরণ্যামথ লীনায়ামপ্সু চৈকার্ণবে পুরা
জ্যোতির্ভূতে জলে চাপি লীনে জ্যোতিষি চানিলে
335.13
বায়ৌ চাকাশসংলীনে আকাশে চ মনোনুগে
ব্যক্তে মনসি সংলীনে ব্যক্তে চাব্যক্ততাং গতে
335.14
অব্যক্তে পুরুষং যাতে পুংসি সর্বগতেঽপি চ
তম এবাভবত্সর্বং ন প্রাজ্ঞায়ত কিংচন
335.15
তমসো ব্রহ্ম সংভূতং তমোমূলমৃতাত্মকম্
তদ্বিশ্বভাবসংজ্ঞান্তং পৌরুষীং তনুমাস্থিতম্
335.16
সোঽনিরুদ্ধ ইতি প্রোক্তস্তত্প্রধানং প্রচক্ষতে
তদব্যক্তমিতি জ্ঞেয়ং ত্রিগুণং নৃপসত্তম
335.17
বিদ্যাসহায়বান্দেবো বিষ্বক্সেনো হরিঃ প্রভুঃ
অপ্স্বেব শয়নং চক্রে নিদ্রায়োগমুপাগতঃ
জগতশ্চিন্তয়ন্সৃষ্টিং চিত্রাং বহুগুণোদ্ভবাম্
335.18
তস্য চিন্তয়তঃ সৃষ্টিং মহানাত্মগুণঃ স্মৃতঃ
অহংকারস্ততো জাতো ব্রহ্মা শুভচতুর্মুখঃ
হিরণ্যগর্ভো ভগবান্সর্বলোকপিতামহঃ
335.19
পদ্মেঽনিরুদ্ধাত্সংভূতস্তদা পদ্মনিভেক্ষণঃ
সহস্রপত্রে দ্যুতিমানুপবিষ্টঃ সনাতনঃ
335.20
দদৃশেঽদ্ভুতসংকাশে লোকানাপোময়ান্প্রভুঃ
সত্ত্বস্থঃ পরমেষ্ঠী স ততো ভূতগণান্সৃজৎ
335.21
পূর্বমেব চ পদ্মস্য পত্রে সূর্যাংশুসপ্রভে
নারায়ণকৃতৌ বিন্দূ অপামাস্তাং গুণোত্তরৌ
335.22
তাবপশ্যত্স ভগবাননাদিনিধনোঽচ্যুতঃ
একস্তত্রাভবদ্বিন্দুর্মধ্বাভো রুচিরপ্রভঃ
335.23
স তামসো মধুর্জাতস্তদা নারায়ণাজ্ঞয়া
কঠিনস্ত্বপরো বিন্দুঃ কৈটভো রাজসস্তু সঃ
335.24
তাবভ্যধাবতাং শ্রেষ্ঠৌ তমোরজগুণান্বিতৌ
বলবন্তৌ গদাহস্তৌ পদ্মনালানুসারিণৌ
335.25
দদৃশাতেঽরবিন্দস্থং ব্রহ্মাণমমিতপ্রভম্
সৃজন্তং প্রথমং বেদাংশ্চতুরশ্চারুবিগ্রহান্
335.26
ততো বিগ্রহবন্তৌ তৌ বেদান্দৃষ্ট্বাসুরোত্তমৌ
সহসা জগৃহতুর্বেদান্ব্রহ্মণঃ পশ্যতস্তদা
335.27
অথ তৌ দানবশ্রেষ্ঠৌ বেদান্গৃহ্য সনাতনান্
রসাং বিবিশতুস্তূর্ণমুদক্পূর্বে মহোদধৌ
335.28
ততো হৃতেষু বেদেষু ব্রহ্মা কশ্মলমাবিশৎ
ততো বচনমীশানং প্রাহ বেদৈর্বিনাকৃতঃ
335.29
বেদা মে পরমং চক্ষুর্বেদা মে পরমং বলম্
বেদা মে পরমং ধাম বেদা মে ব্রহ্ম চোত্তমম্
335.30
মম বেদা হৃতাঃ সর্বে দানবাভ্যাং বলাদিতঃ
অন্ধকারা হি মে লোকা জাতা বেদৈর্বিনাকৃতাঃ
বেদানৃতে হি কিং কুর্যাং লোকান্বৈ স্রষ্টুমুদ্যতঃ
335.31
অহো বত মহদ্দুঃখং বেদনাশনজং মম
প্রাপ্তং দুনোতি হৃদয়ং তীব্রশোকায় রন্ধয়ন্
335.32
কো হি শোকার্ণবে মগ্নং মামিতোঽদ্য সমুদ্ধরেৎ
বেদাংস্তানানয়েন্নষ্টান্কস্য চাহং প্রিয়ো ভবে
335.33
ইত্যেবং ভাষমাণস্য ব্রহ্মণো নৃপসত্তম
হরেঃ স্তোত্রার্থমুদ্ভূতা বুদ্ধির্বুদ্ধিমতাং বর
ততো জগৌ পরং জপ্যং সাঞ্জলিপ্রগ্রহঃ প্রভুঃ
335.34
নমস্তে ব্রহ্মহৃদয় নমস্তে মম পূর্বজ
লোকাদ্য ভুবনশ্রেষ্ঠ সাংখ্যয়োগনিধে বিভো
335.35
ব্যক্তাব্যক্তকরাচিন্ত্য ক্ষেমং পন্থানমাস্থিত
বিশ্বভুক্সর্বভূতানামন্তরাত্মন্নয়োনিজ
335.36
অহং প্রসাদজস্তুভ্যং লোকধাম্নে স্বয়ংভুবে
ত্বত্তো মে মানসং জন্ম প্রথমং দ্বিজপূজিতম্
335.37
চাক্ষুষং বৈ দ্বিতীয়ং মে জন্ম চাসীত্পুরাতনম্
ত্বত্প্রসাদাচ্চ মে জন্ম তৃতীয়ং বাচিকং মহৎ
335.38
ত্বত্তঃ শ্রবণজং চাপি চতুর্থং জন্ম মে বিভো
নাসিক্যং চাপি মে জন্ম ত্বত্তঃ পঞ্চমমুচ্যতে
335.39
অণ্ডজং চাপি মে জন্ম ত্বত্তঃ ষষ্ঠং বিনির্মিতম্
ইদং চ সপ্তমং জন্ম পদ্মজং মেঽমিতপ্রভ
335.40
সর্গে সর্গে হ্যহং পুত্রস্তব ত্রিগুণবর্জিতঃ
প্রথিতঃ পুণ্ডরীকাক্ষ প্রধানগুণকল্পিতঃ
335.41
ত্বমীশ্বরস্বভাবশ্চ স্বয়ংভূঃ পুরুষোত্তমঃ
ত্বয়া বিনির্মিতোঽহং বৈ বেদচক্ষুর্বয়োতিগঃ
335.42
তে মে বেদা হৃতাশ্চক্ষুরন্ধো জাতোঽস্মি জাগৃহি
দদস্ব চক্ষুষী মহ্যং প্রিয়োঽহং তে প্রিয়োঽসি মে
335.43
এবং স্তুতঃ স ভগবান্পুরুষঃ সর্বতোমুখঃ
জহৌ নিদ্রামথ তদা বেদকার্যার্থমুদ্যতঃ
ঐশ্বরেণ প্রয়োগেণ দ্বিতীয়াং তনুমাস্থিতঃ
335.44
সুনাসিকেন কায়েন ভূত্বা চন্দ্রপ্রভস্তদা
কৃত্বা হয়শিরঃ শুভ্রং বেদানামালয়ং প্রভুঃ
335.45
তস্য মূর্ধা সমভবদ্দ্যৌঃ সনক্ষত্রতারকা
কেশাশ্চাস্যাভবন্দীর্ঘা রবেরংশুসমপ্রভাঃ
335.46
কর্ণাবাকাশপাতালে ললাটং ভূতধারিণী
গঙ্গা সরস্বতী পুণ্যা ভ্রুবাবাস্তাং মহানদী
335.47
চক্ষুষী সোমসূর্যৌ তে নাসা সংধ্যা পুনঃ স্মৃতা
ওংকারস্ত্বথ সংস্কারো বিদ্যুজ্জিহ্বা চ নির্মিতা
335.48
দন্তাশ্চ পিতরো রাজন্সোমপা ইতি বিশ্রুতাঃ
গোলোকো ব্রহ্মলোকশ্চ ওষ্ঠাবাস্তাং মহাত্মনঃ
গ্রীবা চাস্যাভবদ্রাজন্কালরাত্রির্গুণোত্তরা
335.49
এতদ্ধয়শিরঃ কৃত্বা নানামূর্তিভিরাবৃতম্
অন্তর্দধে স বিশ্বেশো বিবেশ চ রসাং প্রভুঃ
335.50
রসাং পুনঃ প্রবিষ্টশ্চ যোগং পরমমাস্থিতঃ
শৈক্ষং স্বরং সমাস্থায় ওমিতি প্রাসৃজত্স্বরম্
335.51
স স্বরঃ সানুনাদী চ সর্বগঃ স্নিগ্ধ এব চ
বভূবান্তর্মহীভূতঃ সর্বভূতগুণোদিতঃ
335.52
ততস্তাবসুরৌ কৃত্বা বেদান্সময়বন্ধনান্
রসাতলে বিনিক্ষিপ্য যতঃ শব্দস্ততো দ্রুতৌ
335.53
এতস্মিন্নন্তরে রাজন্দেবো হয়শিরোধরঃ
জগ্রাহ বেদানখিলান্রসাতলগতান্হরিঃ
প্রাদাচ্চ ব্রহ্মণে ভূয়স্ততঃ স্বাং প্রকৃতিং গতঃ
335.54
স্থাপয়িত্বা হয়শির উদক্পূর্বে মহোদধৌ
বেদানামালয়শ্চাপি বভূবাশ্বশিরাস্ততঃ
335.55
অথ কিংচিদপশ্যন্তৌ দানবৌ মধুকৈটভৌ
পুনরাজগ্মতুস্তত্র বেগিতৌ পশ্যতাং চ তৌ
যত্র বেদা বিনিক্ষিপ্তাস্তত্স্থানং শূন্যমেব চ
335.56
তত উত্তমমাস্থায় বেগং বলবতাং বরৌ
পুনরুত্তস্থতুঃ শীঘ্রং রসানামালয়াত্তদা
দদৃশাতে চ পুরুষং তমেবাদিকরং প্রভুম্
335.57
শ্বেতং চন্দ্রবিশুদ্ধাভমনিরুদ্ধতনৌ স্থিতম্
ভূয়োঽপ্যমিতবিক্রান্তং নিদ্রায়োগমুপাগতম্
335.58
আত্মপ্রমাণরচিতে অপামুপরি কল্পিতে
শয়নে নাগভোগাঢ্যে জ্বালামালাসমাবৃতে
335.59
নিষ্কল্মষেণ সত্ত্বেন সংপন্নং রুচিরপ্রভম্
তং দৃষ্ট্বা দানবেন্দ্রৌ তৌ মহাহাসমমুঞ্চতাম্
335.60
ঊচতুশ্চ সমাবিষ্টৌ রজসা তমসা চ তৌ
অয়ং স পুরুষঃ শ্বেতঃ শেতে নিদ্রামুপাগতঃ
335.61
অনেন নূনং বেদানাং কৃতমাহরণং রসাৎ
কস্যৈষ কো নু খল্বেষ কিং চ স্বপিতি ভোগবান্
335.62
ইত্যুচ্চারিতবাক্যৌ তৌ বোধয়ামাসতুর্হরিম্
যুদ্ধার্থিনৌ তু বিজ্ঞায় বিবুদ্ধঃ পুরুষোত্তমঃ
335.63
নিরীক্ষ্য চাসুরেন্দ্রৌ তৌ ততো যুদ্ধে মনো দধে
অথ যুদ্ধং সমভবত্তয়োর্নারায়ণস্য চ
335.64
রজস্তমোবিষ্টতনূ তাবুভৌ মধুকৈটভৌ
ব্রহ্মণোপচিতিং কুর্বঞ্জঘান মধুসূদনঃ
335.65
ততস্তয়োর্বধেনাশু বেদাপহরণেন চ
শোকাপনয়নং চক্রে ব্রহ্মণঃ পুরুষোত্তমঃ
335.66
ততঃ পরিবৃতো ব্রহ্মা হতারির্বেদসত্কৃতঃ
নির্মমে স তদা লোকান্কৃত্স্নান্স্থাবরজঙ্গমান্
335.67
দত্ত্বা পিতামহায়াগ্র্যাং বুদ্ধিং লোকবিসর্গিকীম্
তত্রৈবান্তর্দধে দেবো যত এবাগতো হরিঃ
335.68
তৌ দানবৌ হরির্হত্বা কৃত্বা হয়শিরস্তনুম্
পুনঃ প্রবৃত্তিধর্মার্থং তামেব বিদধে তনুম্
335.69
এবমেষ মহাভাগো বভূবাশ্বশিরা হরিঃ
পৌরাণমেতদাখ্যাতং রূপং বরদমৈশ্বরম্
335.70
যো হ্যেতদ্ব্রাহ্মণো নিত্যং শৃণুয়াদ্ধারয়েত বা
ন তস্যাধ্যয়নং নাশমুপগচ্ছেত্কদাচন
335.71
আরাধ্য তপসোগ্রেণ দেবং হয়শিরোধরম্
পাঞ্চালেন ক্রমঃ প্রাপ্তো রামেণ পথি দেশিতে
335.72
এতদ্ধয়শিরো রাজন্নাখ্যানং তব কীর্তিতম্
পুরাণং বেদসমিতং যন্মাং ত্বং পরিপৃচ্ছসি
335.73
যাং যামিচ্ছেত্তনুং দেবঃ কর্তুং কার্যবিধৌ ক্বচিৎ
তাং তাং কুর্যাদ্বিকুর্বাণঃ স্বয়মাত্মানমাত্মনা
335.74
এষ বেদনিধিঃ শ্রীমানেষ বৈ তপসো নিধিঃ
এষ যোগশ্চ সাংখ্যং চ ব্রহ্ম চাগ্র্যং হরির্বিভুঃ
335.75
নারায়ণপরা বেদা যজ্ঞা নারায়ণাত্মকাঃ
তপো নারায়ণপরং নারায়ণপরা গতিঃ
335.76
নারায়ণপরং সত্যমৃতং নারায়ণাত্মকম্
নারায়ণপরো ধর্মঃ পুনরাবৃত্তিদুর্লভঃ
335.77
প্রবৃত্তিলক্ষণশ্চৈব ধর্মো নারায়ণাত্মকঃ
নারায়ণাত্মকো গন্ধো ভূমৌ শ্রেষ্ঠতমঃ স্মৃতঃ
335.78
অপাং চৈব গুণো রাজন্রসো নারায়ণাত্মকঃ
জ্যোতিষাং চ গুণো রূপং স্মৃতং নারায়ণাত্মকম্
335.79
নারায়ণাত্মকশ্চাপি স্পর্শো বায়ুগুণঃ স্মৃতঃ
নারায়ণাত্মকশ্চাপি শব্দ আকাশসংভবঃ
335.80
মনশ্চাপি ততো ভূতমব্যক্তগুণলক্ষণম্
নারায়ণপরঃ কালো জ্যোতিষাময়নং চ যৎ
335.81
নারায়ণপরা কীর্তিঃ শ্রীশ্চ লক্ষ্মীশ্চ দেবতাঃ
নারায়ণপরং সাংখ্যং যোগো নারায়ণাত্মকঃ
335.82
কারণং পুরুষো যেষাং প্রধানং চাপি কারণম্
স্বভাবশ্চৈব কর্মাণি দৈবং যেষাং চ কারণম্
335.83
পঞ্চকারণসংখ্যাতো নিষ্ঠা সর্বত্র বৈ হরিঃ
তত্ত্বং জিজ্ঞাসমানানাং হেতুভিঃ সর্বতোমুখৈঃ
335.84
তত্ত্বমেকো মহায়োগী হরির্নারায়ণঃ প্রভুঃ
সব্রহ্মকানাং লোকানামৃষীণাং চ মহাত্মনাম্
335.85
সাংখ্যানাং যোগিনাং চাপি যতীনামাত্মবেদিনাম্
মনীষিতং বিজানাতি কেশবো ন তু তস্য তে
335.86
যে কেচিত্সর্বলোকেষু দৈবং পিত্র্যং চ কুর্বতে
দানানি চ প্রয়চ্ছন্তি তপ্যন্তি চ তপো মহৎ
335.87
সর্বেষামাশ্রয়ো বিষ্ণুরৈশ্বরং বিধিমাস্থিতঃ
সর্বভূতকৃতাবাসো বাসুদেবেতি চোচ্যতে
335.88
অয়ং হি নিত্যঃ পরমো মহর্ষি;র্মহাবিভূতির্গুণবান্নির্গুণাখ্যঃ
গুণৈশ্চ সংয়োগমুপৈতি শীঘ্রং; কালো যথর্তাবৃতুসংপ্রয়ুক্তঃ
335.89
নৈবাস্য বিন্দন্তি গতিং মহাত্মনো; ন চাগতিং কশ্চিদিহানুপশ্যতি
জ্ঞানাত্মকাঃ সংয়মিনো মহর্ষয়ঃ; পশ্যন্তি নিত্যং পুরুষং গুণাধিকম্