Utshovঅধ্যায় 336
336.1
জনমেজয় উবাচ
অহো হ্যেকান্তিনঃ সর্বান্প্রীণাতি ভগবান্হরিঃ
বিধিপ্রয়ুক্তাং পূজাং চ গৃহ্ণাতি ভগবান্স্বয়ম্
336.2
যে তু দগ্ধেন্ধনা লোকে পুণ্যপাপবিবর্জিতাঃ
তেষাং ত্বয়াভিনির্দিষ্টা পারংপর্যাগতা গতিঃ
336.3
চতুর্থ্যাং চৈব তে গত্যাং গচ্ছন্তি পুরুষোত্তমম্
একান্তিনস্তু পুরুষা গচ্ছন্তি পরমং পদম্
336.4
নূনমেকান্তধর্মোঽয়ং শ্রেষ্ঠো নারায়ণপ্রিয়ঃ
অগত্বা গতয়স্তিস্রো যদ্গচ্ছন্ত্যব্যয়ং হরিম্
336.5
সহোপনিষদান্বেদান্যে বিপ্রাঃ সম্যগাস্থিতাঃ
পঠন্তি বিধিমাস্থায় যে চাপি যতিধর্মিণঃ
336.6
তেভ্যো বিশিষ্টাং জানামি গতিমেকান্তিনাং নৃণাম্
কেনৈষ ধর্মঃ কথিতো দেবেন ঋষিণাপি বা
336.7
একান্তিনাং চ কা চর্যা কদা চোত্পাদিতা বিভো
এতন্মে সংশয়ং ছিন্ধি পরং কৌতূহলং হি মে
336.8
বৈশংপায়ন উবাচ
সমুপোঢেষ্বনীকেষু কুরুপাণ্ডবয়োর্মৃধে
অর্জুনে বিমনস্কে চ গীতা ভগবতা স্বয়ম্
336.9
আগতিশ্চ গতিশ্চৈব পূর্বং তে কথিতা ময়া
গহনো হ্যেষ ধর্মো বৈ দুর্বিজ্ঞেয়োঽকৃতাত্মভিঃ
336.10
সংমিতঃ সামবেদেন পুরৈবাদিয়ুগে কৃতঃ
ধার্যতে স্বয়মীশেন রাজন্নারায়ণেন হ
336.11
এতমর্থং মহারাজ পৃষ্টঃ পার্থেন নারদঃ
ঋষিমধ্যে মহাভাগঃ শৃণ্বতোঃ কৃষ্ণভীষ্ময়োঃ
336.12
গুরুণা চ মমাপ্যেষ কথিতো নৃপসত্তম
যথা তু কথিতস্তত্র নারদেন তথা শৃণু
336.13
যদাসীন্মানসং জন্ম নারায়ণমুখোদ্গতম্
ব্রহ্মণঃ পৃথিবীপাল তদা নারায়ণঃ স্বয়ম্
তেন ধর্মেণ কৃতবান্দৈবং পিত্র্যং চ ভারত
336.14
ফেনপা ঋষয়শ্চৈব তং ধর্মং প্রতিপেদিরে
বৈখানসাঃ ফেনপেভ্যো ধর্মমেতং প্রপেদিরে
বৈখানসেভ্যঃ সোমস্তু ততঃ সোঽন্তর্দধে পুনঃ
336.15
যদাসীচ্চাক্ষুষং জন্ম দ্বিতীয়ং ব্রহ্মণো নৃপ
তদা পিতামহাত্সোমাদেতং ধর্মমজানত
নারায়ণাত্মকং রাজন্রুদ্রায় প্রদদৌ চ সঃ
336.16
ততো যোগস্থিতো রুদ্রঃ পুরা কৃতয়ুগে নৃপ
বালখিল্যানৃষীন্সর্বান্ধর্মমেতমপাঠয়ৎ
অন্তর্দধে ততো ভূয়স্তস্য দেবস্য মায়য়া
336.17
তৃতীয়ং ব্রহ্মণো জন্ম যদাসীদ্বাচিকং মহৎ
তত্রৈষ ধর্মঃ সংভূতঃ স্বয়ং নারায়ণান্নৃপ
336.18
সুপর্ণো নাম তমৃষিঃ প্রাপ্তবান্পুরুষোত্তমাৎ
তপসা বৈ সুতপ্তেন দমেন নিয়মেন চ
336.19
ত্রিঃ পরিক্রান্তবানেতত্সুপর্ণো ধর্মমুত্তমম্
যস্মাত্তস্মাদ্ব্রতং হ্যেতত্ত্রিসৌপর্ণমিহোচ্যতে
336.20
ঋগ্বেদপাঠপঠিতং ব্রতমেতদ্ধি দুশ্চরম্
সুপর্ণাচ্চাপ্যধিগতো ধর্ম এষ সনাতনঃ
336.21
বায়ুনা দ্বিপদাং শ্রেষ্ঠ প্রথিতো জগদায়ুষা
বায়োঃ সকাশাত্প্রাপ্তশ্চ ঋষিভির্বিঘসাশিভিঃ
336.22
তেভ্যো মহোদধিশ্চৈনং প্রাপ্তবান্ধর্মমুত্তমম্
ততঃ সোঽন্তর্দধে ভূয়ো নারায়ণসমাহিতঃ
336.23
যদা ভূয়ঃ শ্রবণজা সৃষ্টিরাসীন্মহাত্মনঃ
ব্রহ্মণঃ পুরুষব্যাঘ্র তত্র কীর্তয়তঃ শৃণু
336.24
জগত্স্রষ্টুমনা দেবো হরির্নারায়ণঃ স্বয়ম্
চিন্তয়ামাস পুরুষং জগত্সর্গকরং প্রভুঃ
336.25
অথ চিন্তয়তস্তস্য কর্ণাভ্যাং পুরুষঃ সৃতঃ
প্রজাসর্গকরো ব্রহ্মা তমুবাচ জগত্পতিঃ
336.26
সৃজ প্রজাঃ পুত্র সর্বা মুখতঃ পাদতস্তথা
শ্রেয়স্তব বিধাস্যামি বলং তেজশ্চ সুব্রত
336.27
ধর্মং চ মত্তো গৃহ্ণীষ্ব সাত্বতং নাম নামতঃ
তেন সর্বং কৃতয়ুগং স্থাপয়স্ব যথাবিধি
336.28
ততো ব্রহ্মা নমশ্চক্রে দেবায় হরিমেধসে
ধর্মং চাগ্র্যং স জগ্রাহ সরহস্যং সসংগ্রহম্
আরণ্যকেন সহিতং নারায়ণমুখোদ্গতম্
336.29
উপদিশ্য ততো ধর্মং ব্রহ্মণেঽমিততেজসে
তং কার্তয়ুগধর্মাণং নিরাশীঃকর্মসংজ্ঞিতম্
জগাম তমসঃ পারং যত্রাব্যক্তং ব্যবস্থিতম্
336.30
ততোঽথ বরদো দেবো ব্রহ্মলোকপিতামহঃ
অসৃজত্স তদা লোকান্কৃত্স্নান্স্থাবরজঙ্গমান্
336.31
ততঃ প্রাবর্তত তদা আদৌ কৃতয়ুগং শুভম্
ততো হি সাত্বতো ধর্মো ব্যাপ্য লোকানবস্থিতঃ
336.32
তেনৈবাদ্যেন ধর্মেণ ব্রহ্মা লোকবিসর্গকৃৎ
পূজয়ামাস দেবেশং হরিং নারায়ণং প্রভুম্
336.33
ধর্মপ্রতিষ্ঠাহেতোশ্চ মনুং স্বারোচিষং ততঃ
অধ্যাপয়ামাস তদা লোকানাং হিতকাম্যয়া
336.34
ততঃ স্বারোচিষঃ পুত্রং স্বয়ং শঙ্খপদং নৃপ
অধ্যাপয়ত্পুরাব্যগ্রঃ সর্বলোকপতির্বিভুঃ
336.35
ততঃ শঙ্খপদশ্চাপি পুত্রমাত্মজমৌরসম্
দিশাপালং সুধর্মাণমধ্যাপয়ত ভারত
ততঃ সোঽন্তর্দধে ভূয়ঃ প্রাপ্তে ত্রেতায়ুগে পুনঃ
336.36
নাসিক্যজন্মনি পুরা ব্রহ্মণঃ পার্থিবোত্তম
ধর্মমেতং স্বয়ং দেবো হরির্নারায়ণঃ প্রভুঃ
উজ্জগারারবিন্দাক্ষো ব্রহ্মণঃ পশ্যতস্তদা
336.37
সনত্কুমারো ভগবাংস্ততঃ প্রাধীতবান্নৃপ
সনত্কুমারাদপি চ বীরণো বৈ প্রজাপতিঃ
কৃতাদৌ কুরুশার্দূল ধর্মমেতমধীতবান্
336.38
বীরণশ্চাপ্যধীত্যৈনং রৌচ্যায় মনবে দদৌ
রৌচ্যঃ পুত্রায় শুদ্ধায় সুব্রতায় সুমেধসে
336.39
কুক্ষিনাম্নেঽথ প্রদদৌ দিশাং পালায় ধর্মিণে
ততঃ সোঽন্তর্দধে ভূয়ো নারায়ণমুখোদ্গতঃ
336.40
অণ্ডজে জন্মনি পুনর্ব্রহ্মণে হরিয়োনয়ে
এষ ধর্মঃ সমুদ্ভূতো নারায়ণমুখাত্পুনঃ
336.41
গৃহীতো ব্রহ্মণা রাজন্প্রয়ুক্তশ্চ যথাবিধি
অধ্যাপিতাশ্চ মুনয়ো নাম্না বর্হিষদো নৃপ
336.42
বর্হিষদ্ভ্যশ্চ সংক্রান্তঃ সামবেদান্তগং দ্বিজম্
জ্যেষ্ঠং নাম্নাভিবিখ্যাতং জ্যেষ্ঠসামব্রতো হরিঃ
336.43
জ্যেষ্ঠাচ্চাপ্যনুসংক্রান্তো রাজানমবিকম্পনম্
অন্তর্দধে ততো রাজন্নেষ ধর্মঃ প্রভোর্হরেঃ
336.44
যদিদং সপ্তমং জন্ম পদ্মজং ব্রহ্মণো নৃপ
তত্রৈষ ধর্মঃ কথিতঃ স্বয়ং নারায়ণেন হি
336.45
পিতামহায় শুদ্ধায় যুগাদৌ লোকধারিণে
পিতামহশ্চ দক্ষায় ধর্মমেতং পুরা দদৌ
336.46
ততো জ্যেষ্ঠে তু দৌহিত্রে প্রাদাদ্দক্ষো নৃপোত্তম
আদিত্যে সবিতুর্জ্যেষ্ঠে বিবস্বাঞ্জগৃহে ততঃ
336.47
ত্রেতায়ুগাদৌ চ পুনর্বিবস্বান্মনবে দদৌ
মনুশ্চ লোকভূত্যর্থং সুতায়েক্ষ্বাকবে দদৌ
336.48
ইক্ষ্বাকুণা চ কথিতো ব্যাপ্য লোকানবস্থিতঃ
গমিষ্যতি ক্ষয়ান্তে চ পুনর্নারায়ণং নৃপ
336.49
ব্রতিনাং চাপি যো ধর্মঃ স তে পূর্বং নৃপোত্তম
কথিতো হরিগীতাসু সমাসবিধিকল্পিতঃ
336.50
নারদেন তু সংপ্রাপ্তঃ সরহস্যঃ সসংগ্রহঃ
এষ ধর্মো জগন্নাথাত্সাক্ষান্নারায়ণান্নৃপ
336.51
এবমেষ মহান্ধর্ম আদ্যো রাজন্সনাতনঃ
দুর্বিজ্ঞেয়ো দুষ্করশ্চ সাত্বতৈর্ধার্যতে সদা
336.52
ধর্মজ্ঞানেন চৈতেন সুপ্রয়ুক্তেন কর্মণা
অহিংসাধর্ময়ুক্তেন প্রীয়তে হরিরীশ্বরঃ
336.53
একব্যূহবিভাগো বা ক্বচিদ্দ্বিব্যূহসংজ্ঞিতঃ
ত্রিব্যূহশ্চাপি সংখ্যাতশ্চতুর্ব্যূহশ্চ দৃশ্যতে
336.54
হরিরেব হি ক্ষেত্রজ্ঞো নির্মমো নিষ্কলস্তথা
জীবশ্চ সর্বভূতেষু পঞ্চভূতগুণাতিগঃ
336.55
মনশ্চ প্রথিতং রাজন্পঞ্চেন্দ্রিয়সমীরণম্
এষ লোকনিধির্ধীমানেষ লোকবিসর্গকৃৎ
336.56
অকর্তা চৈব কর্তা চ কার্যং কারণমেব চ
যথেচ্ছতি তথা রাজন্ক্রীডতে পুরুষোঽব্যয়ঃ
336.57
এষ একান্তিধর্মস্তে কীর্তিতো নৃপসত্তম
ময়া গুরুপ্রসাদেন দুর্বিজ্ঞেয়োঽকৃতাত্মভিঃ
একান্তিনো হি পুরুষা দুর্লভা বহবো নৃপ
336.58
যদ্যেকান্তিভিরাকীর্ণং জগত্স্যাত্কুরুনন্দন
অহিংসকৈরাত্মবিদ্ভিঃ সর্বভূতহিতে রতৈঃ
ভবেত্কৃতয়ুগপ্রাপ্তিরাশীঃকর্মবিবর্জিতৈঃ
336.59
এবং স ভগবান্ব্যাসো গুরুর্মম বিশাং পতে
কথয়ামাস ধর্মজ্ঞো ধর্মরাজ্ঞে দ্বিজোত্তমঃ
336.60
ঋষীণাং সংনিধৌ রাজঞ্শৃণ্বতোঃ কৃষ্ণভীষ্ময়োঃ
তস্যাপ্যকথয়ত্পূর্বং নারদঃ সুমহাতপাঃ
336.61
দেবং পরমকং ব্রহ্ম শ্বেতং চন্দ্রাভমচ্যুতম্
যত্র চৈকান্তিনো যান্তি নারায়ণপরায়ণাঃ
336.62
জনমেজয় উবাচ
এবং বহুবিধং ধর্মং প্রতিবুদ্ধৈর্নিষেবিতম্
ন কুর্বন্তি কথং বিপ্রা অন্যে নানাব্রতে স্থিতাঃ
336.63
বৈশংপায়ন উবাচ
তিস্রঃ প্রকৃতয়ো রাজন্দেহবন্ধেষু নির্মিতাঃ
সাত্ত্বিকী রাজসী চৈব তামসী চেতি ভারত
336.64
দেহবন্ধেষু পুরুষঃ শ্রেষ্ঠঃ কুরুকুলোদ্বহ
সাত্ত্বিকঃ পুরুষব্যাঘ্র ভবেন্মোক্ষার্থনিশ্চিতঃ
336.65
অত্রাপি স বিজানাতি পুরুষং ব্রহ্মবর্তিনম্
নারায়ণপরো মোক্ষস্ততো বৈ সাত্ত্বিকঃ স্মৃতঃ
336.66
মনীষিতং চ প্রাপ্নোতি চিন্তয়ন্পুরুষোত্তমম্
একান্তভক্তিঃ সততং নারায়ণপরায়ণঃ
336.67
মনীষিণো হি যে কেচিদ্যতয়ো মোক্ষকাঙ্ক্ষিণঃ
তেষাং বৈ ছিন্নতৃষ্ণানাং যোগক্ষেমবহো হরিঃ
336.68
জায়মানং হি পুরুষং যং পশ্যেন্মধুসূদনঃ
সাত্ত্বিকস্তু স বিজ্ঞেয়ো ভবেন্মোক্ষে চ নিশ্চিতঃ
336.69
সাংখ্যয়োগেন তুল্যো হি ধর্ম একান্তসেবিতঃ
নারায়ণাত্মকে মোক্ষে ততো যান্তি পরাং গতিম্
336.70
নারায়ণেন দৃষ্টশ্চ প্রতিবুদ্ধো ভবেত্পুমান্
এবমাত্মেচ্ছয়া রাজন্প্রতিবুদ্ধো ন জায়তে
336.71
রাজসী তামসী চৈব ব্যামিশ্রে প্রকৃতী স্মৃতে
তদাত্মকং হি পুরুষং জায়মানং বিশাং পতে
প্রবৃত্তিলক্ষণৈর্যুক্তং নাবেক্ষতি হরিঃ স্বয়ম্
336.72
পশ্যত্যেনং জায়মানং ব্রহ্মা লোকপিতামহঃ
রজসা তমসা চৈব মানুষং সমভিপ্লুতম্
336.73
কামং দেবাশ্চ ঋষয়ঃ সত্ত্বস্থা নৃপসত্তম
হীনাঃ সত্ত্বেন সূক্ষ্মেণ ততো বৈকারিকাঃ স্মৃতাঃ
336.74
জনমেজয় উবাচ
কথং বৈকারিকো গচ্ছেত্পুরুষঃ পুরুষোত্তমম্
336.75
বৈশংপায়ন উবাচ
সুসূক্ষ্মসত্ত্বসংয়ুক্তং সংয়ুক্তং ত্রিভিরক্ষরৈঃ
পুরুষঃ পুরুষং গচ্ছেন্নিষ্ক্রিয়ঃ পঞ্চবিংশকম্
336.76
এবমেকং সাংখ্যয়োগং বেদারণ্যকমেব চ
পরস্পরাঙ্গান্যেতানি পঞ্চরাত্রং চ কথ্যতে
এষ একান্তিনাং ধর্মো নারায়ণপরাত্মকঃ
336.77
যথা সমুদ্রাত্প্রসৃতা জলৌঘা;স্তমেব রাজন্পুনরাবিশন্তি
ইমে তথা জ্ঞানমহাজলৌঘা; নারায়ণং বৈ পুনরাবিশন্তি
336.78
এষ তে কথিতো ধর্মঃ সাত্বতো যদুবান্ধব
কুরুষ্বৈনং যথান্যায়ং যদি শক্নোষি ভারত
336.79
এবং হি সুমহাভাগো নারদো গুরবে মম
শ্বেতানাং যতিনামাহ একান্তগতিমব্যয়াম্
336.80
ব্যাসশ্চাকথয়ত্প্রীত্যা ধর্মপুত্রায় ধীমতে
স এবায়ং ময়া তুভ্যমাখ্যাতঃ প্রসৃতো গুরোঃ
336.81
ইত্থং হি দুশ্চরো ধর্ম এষ পার্থিবসত্তম
যথৈব ত্বং তথৈবান্যে ন ভজন্তি বিমোহিতাঃ
336.82
কৃষ্ণ এব হি লোকানাং ভাবনো মোহনস্তথা
সংহারকারকশ্চৈব কারণং চ বিশাং পতে