UtshovChapter 336
336.1
जनमेजय उवाच
अहो ह्येकान्तिनः सर्वान्प्रीणाति भगवान्हरिः
विधिप्रयुक्तां पूजां च गृह्णाति भगवान्स्वयम्
Janamejaya uvacha
Aho hyekantinah sarvanprinati bhagavanharih
Vidhiprayuktam pujam cha grihnati bhagavansvayam
336.2
ये तु दग्धेन्धना लोके पुण्यपापविवर्जिताः
तेषां त्वयाभिनिर्दिष्टा पारंपर्यागता गतिः
Ye tu dagdhendhana loke punyapapavivarjitah
Tesham tvayabhinirdishta paramparyagata gatih
336.3
चतुर्थ्यां चैव ते गत्यां गच्छन्ति पुरुषोत्तमम्
एकान्तिनस्तु पुरुषा गच्छन्ति परमं पदम्
Chaturthyam chaiva te gatyam gachchhanti purushottamam
Ekantinastu purusha gachchhanti paramam padam
336.4
नूनमेकान्तधर्मोऽयं श्रेष्ठो नारायणप्रियः
अगत्वा गतयस्तिस्रो यद्गच्छन्त्यव्ययं हरिम्
Nunamekantadharmoyam shreshtho narayanapriyah
Agatva gatayastisro yadgachchhantyavyayam harim
336.5
सहोपनिषदान्वेदान्ये विप्राः सम्यगास्थिताः
पठन्ति विधिमास्थाय ये चापि यतिधर्मिणः
Sahopanishadanvedanye viprah samyagasthitah
Pathanti vidhimasthaya ye chapi yatidharminah
336.6
तेभ्यो विशिष्टां जानामि गतिमेकान्तिनां नृणाम्
केनैष धर्मः कथितो देवेन ऋषिणापि वा
Tebhyo vishishtam janami gatimekantinam nrinam
Kenaisha dharmah kathito devena rishinapi va
336.7
एकान्तिनां च का चर्या कदा चोत्पादिता विभो
एतन्मे संशयं छिन्धि परं कौतूहलं हि मे
Ekantinam cha ka charya kada chotpadita vibho
Etanme sanshayam chhindhi param kautuhalam hi me
336.8
वैशंपायन उवाच
समुपोढेष्वनीकेषु कुरुपाण्डवयोर्मृधे
अर्जुने विमनस्के च गीता भगवता स्वयम्
Vaishampayana uvacha
Samupodheshvanikeshu kurupandavayormridhe
Arjune vimanaske cha gita bhagavata svayam
336.9
आगतिश्च गतिश्चैव पूर्वं ते कथिता मया
गहनो ह्येष धर्मो वै दुर्विज्ञेयोऽकृतात्मभिः
Agatishcha gatishchaiva purvam te kathita maya
Gahano hyesha dharmo vai durvigyeyokritatmabhih
336.10
संमितः सामवेदेन पुरैवादियुगे कृतः
धार्यते स्वयमीशेन राजन्नारायणेन ह
Sammitah samavedena puraivadiyuge kritah
Dharyate svayamishena rajannarayanena ha
336.11
एतमर्थं महाराज पृष्टः पार्थेन नारदः
ऋषिमध्ये महाभागः शृण्वतोः कृष्णभीष्मयोः
Etamartham maharaja prishtah parthena naradah
Rishimadhye mahabhagah shrinvatoh krishnabhishmayoh
336.12
गुरुणा च ममाप्येष कथितो नृपसत्तम
यथा तु कथितस्तत्र नारदेन तथा शृणु
Guruna cha mamapyesha kathito nripasattama
Yatha tu kathitastatra naradena tatha shrinu
336.13
यदासीन्मानसं जन्म नारायणमुखोद्गतम्
ब्रह्मणः पृथिवीपाल तदा नारायणः स्वयम्
तेन धर्मेण कृतवान्दैवं पित्र्यं च भारत
Yadasinmanasam janma narayanamukhodgatam
Brahmanah prithivipala tada narayanah svayam
Tena dharmena kritavandaivam pitryam cha bharata
336.14
फेनपा ऋषयश्चैव तं धर्मं प्रतिपेदिरे
वैखानसाः फेनपेभ्यो धर्ममेतं प्रपेदिरे
वैखानसेभ्यः सोमस्तु ततः सोऽन्तर्दधे पुनः
Phenapa rishayashchaiva tam dharmam pratipedire
Vaikhanasah phenapebhyo dharmametam prapedire
Vaikhanasebhyah somastu tatah sontardadhe punah
336.15
यदासीच्चाक्षुषं जन्म द्वितीयं ब्रह्मणो नृप
तदा पितामहात्सोमादेतं धर्ममजानत
नारायणात्मकं राजन्रुद्राय प्रददौ च सः
Yadasichchakshusham janma dvitiyam brahmano nripa
Tada pitamahatsomadetam dharmamajanata
Narayanatmakam rajanrudraya pradadau cha sah
336.16
ततो योगस्थितो रुद्रः पुरा कृतयुगे नृप
वालखिल्यानृषीन्सर्वान्धर्ममेतमपाठयत्
अन्तर्दधे ततो भूयस्तस्य देवस्य मायया
Tato yogasthito rudrah pura kritayuge nripa
Valakhilyanrishinsarvandharmametamapathayat
Antardadhe tato bhuyastasya devasya mayaya
336.17
तृतीयं ब्रह्मणो जन्म यदासीद्वाचिकं महत्
तत्रैष धर्मः संभूतः स्वयं नारायणान्नृप
Tritiyam brahmano janma yadasidvachikam mahat
Tatraisha dharmah sambhutah svayam narayanannripa
336.18
सुपर्णो नाम तमृषिः प्राप्तवान्पुरुषोत्तमात्
तपसा वै सुतप्तेन दमेन नियमेन च
Suparno nama tamrishih praptavanpurushottamat
Tapasa vai sutaptena damena niyamena cha
336.19
त्रिः परिक्रान्तवानेतत्सुपर्णो धर्ममुत्तमम्
यस्मात्तस्माद्व्रतं ह्येतत्त्रिसौपर्णमिहोच्यते
Trih parikrantavanetatsuparno dharmamuttamam
Yasmattasmadvratam hyetattrisauparnamihochyate
336.20
ऋग्वेदपाठपठितं व्रतमेतद्धि दुश्चरम्
सुपर्णाच्चाप्यधिगतो धर्म एष सनातनः
Rigvedapathapathitam vratametaddhi dushcharam
Suparnachchapyadhigato dharma esha sanatanah
336.21
वायुना द्विपदां श्रेष्ठ प्रथितो जगदायुषा
वायोः सकाशात्प्राप्तश्च ऋषिभिर्विघसाशिभिः
Vayuna dvipadam shreshtha prathito jagadayusha
Vayoh sakashatpraptashcha rishibhirvighasashibhih
336.22
तेभ्यो महोदधिश्चैनं प्राप्तवान्धर्ममुत्तमम्
ततः सोऽन्तर्दधे भूयो नारायणसमाहितः
Tebhyo mahodadhishchainam praptavandharmamuttamam
Tatah sontardadhe bhuyo narayanasamahitah
336.23
यदा भूयः श्रवणजा सृष्टिरासीन्महात्मनः
ब्रह्मणः पुरुषव्याघ्र तत्र कीर्तयतः शृणु
Yada bhuyah shravanaja srishtirasinmahatmanah
Brahmanah purushavyaghra tatra kirtayatah shrinu
336.24
जगत्स्रष्टुमना देवो हरिर्नारायणः स्वयम्
चिन्तयामास पुरुषं जगत्सर्गकरं प्रभुः
Jagatsrashtumana devo harirnarayanah svayam
Chintayamasa purusham jagatsargakaram prabhuh
336.25
अथ चिन्तयतस्तस्य कर्णाभ्यां पुरुषः सृतः
प्रजासर्गकरो ब्रह्मा तमुवाच जगत्पतिः
Atha chintayatastasya karnabhyam purushah sritah
Prajasargakaro brahma tamuvacha jagatpatih
336.26
सृज प्रजाः पुत्र सर्वा मुखतः पादतस्तथा
श्रेयस्तव विधास्यामि बलं तेजश्च सुव्रत
Srija prajah putra sarva mukhatah padatastatha
Shreyastava vidhasyami balam tejashcha suvrata
336.27
धर्मं च मत्तो गृह्णीष्व सात्वतं नाम नामतः
तेन सर्वं कृतयुगं स्थापयस्व यथाविधि
Dharmam cha matto grihnishva satvatam nama namatah
Tena sarvam kritayugam sthapayasva yathavidhi
336.28
ततो ब्रह्मा नमश्चक्रे देवाय हरिमेधसे
धर्मं चाग्र्यं स जग्राह सरहस्यं ससंग्रहम्
आरण्यकेन सहितं नारायणमुखोद्गतम्
Tato brahma namashchakre devaya harimedhase
Dharmam chagryam sa jagraha sarahasyam sasangraham
Aranyakena sahitam narayanamukhodgatam
336.29
उपदिश्य ततो धर्मं ब्रह्मणेऽमिततेजसे
तं कार्तयुगधर्माणं निराशीःकर्मसंज्ञितम्
जगाम तमसः पारं यत्राव्यक्तं व्यवस्थितम्
Upadishya tato dharmam brahmanemitatejase
Tam kartayugadharmanam nirashihkarmasangyitam
Jagama tamasah param yatravyaktam vyavasthitam
336.30
ततोऽथ वरदो देवो ब्रह्मलोकपितामहः
असृजत्स तदा लोकान्कृत्स्नान्स्थावरजङ्गमान्
Tatotha varado devo brahmalokapitamahah
Asrijatsa tada lokankritsnansthavarajangaman
336.31
ततः प्रावर्तत तदा आदौ कृतयुगं शुभम्
ततो हि सात्वतो धर्मो व्याप्य लोकानवस्थितः
Tatah pravartata tada adau kritayugam shubham
Tato hi satvato dharmo vyapya lokanavasthitah
336.32
तेनैवाद्येन धर्मेण ब्रह्मा लोकविसर्गकृत्
पूजयामास देवेशं हरिं नारायणं प्रभुम्
Tenaivadyena dharmena brahma lokavisargakrit
Pujayamasa devesham harim narayanam prabhum
336.33
धर्मप्रतिष्ठाहेतोश्च मनुं स्वारोचिषं ततः
अध्यापयामास तदा लोकानां हितकाम्यया
Dharmapratishthahetoshcha manum svarochisham tatah
Adhyapayamasa tada lokanam hitakamyaya
336.34
ततः स्वारोचिषः पुत्रं स्वयं शङ्खपदं नृप
अध्यापयत्पुराव्यग्रः सर्वलोकपतिर्विभुः
Tatah svarochishah putram svayam shankhapadam nripa
Adhyapayatpuravyagrah sarvalokapatirvibhuh
336.35
ततः शङ्खपदश्चापि पुत्रमात्मजमौरसम्
दिशापालं सुधर्माणमध्यापयत भारत
ततः सोऽन्तर्दधे भूयः प्राप्ते त्रेतायुगे पुनः
Tatah shankhapadashchapi putramatmajamaurasam
Dishapalam sudharmanamadhyapayata bharata
Tatah sontardadhe bhuyah prapte tretayuge punah
336.36
नासिक्यजन्मनि पुरा ब्रह्मणः पार्थिवोत्तम
धर्ममेतं स्वयं देवो हरिर्नारायणः प्रभुः
उज्जगारारविन्दाक्षो ब्रह्मणः पश्यतस्तदा
Nasikyajanmani pura brahmanah parthivottama
Dharmametam svayam devo harirnarayanah prabhuh
Ujjagararavindaksho brahmanah pashyatastada
336.37
सनत्कुमारो भगवांस्ततः प्राधीतवान्नृप
सनत्कुमारादपि च वीरणो वै प्रजापतिः
कृतादौ कुरुशार्दूल धर्ममेतमधीतवान्
Sanatkumaro bhagavanstatah pradhitavannripa
Sanatkumaradapi cha virano vai prajapatih
Kritadau kurushardula dharmametamadhitavan
336.38
वीरणश्चाप्यधीत्यैनं रौच्याय मनवे ददौ
रौच्यः पुत्राय शुद्धाय सुव्रताय सुमेधसे
Viranashchapyadhityainam rauchyaya manave dadau
Rauchyah putraya shuddhaya suvrataya sumedhase
336.39
कुक्षिनाम्नेऽथ प्रददौ दिशां पालाय धर्मिणे
ततः सोऽन्तर्दधे भूयो नारायणमुखोद्गतः
Kukshinamnetha pradadau disham palaya dharmine
Tatah sontardadhe bhuyo narayanamukhodgatah
336.40
अण्डजे जन्मनि पुनर्ब्रह्मणे हरियोनये
एष धर्मः समुद्भूतो नारायणमुखात्पुनः
Andaje janmani punarbrahmane hariyonaye
Esha dharmah samudbhuto narayanamukhatpunah
336.41
गृहीतो ब्रह्मणा राजन्प्रयुक्तश्च यथाविधि
अध्यापिताश्च मुनयो नाम्ना बर्हिषदो नृप
Grihito brahmana rajanprayuktashcha yathavidhi
Adhyapitashcha munayo namna barhishado nripa
336.42
बर्हिषद्भ्यश्च संक्रान्तः सामवेदान्तगं द्विजम्
ज्येष्ठं नाम्नाभिविख्यातं ज्येष्ठसामव्रतो हरिः
Barhishadbhyashcha sankrantah samavedantagam dvijam
Jyeshtham namnabhivikhyatam jyeshthasamavrato harih
336.43
ज्येष्ठाच्चाप्यनुसंक्रान्तो राजानमविकम्पनम्
अन्तर्दधे ततो राजन्नेष धर्मः प्रभोर्हरेः
Jyeshthachchapyanusankranto rajanamavikampanam
Antardadhe tato rajannesha dharmah prabhorhareh
336.44
यदिदं सप्तमं जन्म पद्मजं ब्रह्मणो नृप
तत्रैष धर्मः कथितः स्वयं नारायणेन हि
Yadidam saptamam janma padmajam brahmano nripa
Tatraisha dharmah kathitah svayam narayanena hi
336.45
पितामहाय शुद्धाय युगादौ लोकधारिणे
पितामहश्च दक्षाय धर्ममेतं पुरा ददौ
Pitamahaya shuddhaya yugadau lokadharine
Pitamahashcha dakshaya dharmametam pura dadau
336.46
ततो ज्येष्ठे तु दौहित्रे प्रादाद्दक्षो नृपोत्तम
आदित्ये सवितुर्ज्येष्ठे विवस्वाञ्जगृहे ततः
Tato jyeshthe tu dauhitre pradaddaksho nripottama
Aditye saviturjyeshthe vivasvanjagrihe tatah
336.47
त्रेतायुगादौ च पुनर्विवस्वान्मनवे ददौ
मनुश्च लोकभूत्यर्थं सुतायेक्ष्वाकवे ददौ
Tretayugadau cha punarvivasvanmanave dadau
Manushcha lokabhutyartham sutayekshvakave dadau
336.48
इक्ष्वाकुणा च कथितो व्याप्य लोकानवस्थितः
गमिष्यति क्षयान्ते च पुनर्नारायणं नृप
Ikshvakuna cha kathito vyapya lokanavasthitah
Gamishyati kshayante cha punarnarayanam nripa
336.49
व्रतिनां चापि यो धर्मः स ते पूर्वं नृपोत्तम
कथितो हरिगीतासु समासविधिकल्पितः
Vratinam chapi yo dharmah sa te purvam nripottama
Kathito harigitasu samasavidhikalpitah
336.50
नारदेन तु संप्राप्तः सरहस्यः ससंग्रहः
एष धर्मो जगन्नाथात्साक्षान्नारायणान्नृप
Naradena tu sampraptah sarahasyah sasangrahah
Esha dharmo jagannathatsakshannarayanannripa
336.51
एवमेष महान्धर्म आद्यो राजन्सनातनः
दुर्विज्ञेयो दुष्करश्च सात्वतैर्धार्यते सदा
Evamesha mahandharma adyo rajansanatanah
Durvigyeyo dushkarashcha satvatairdharyate sada
336.52
धर्मज्ञानेन चैतेन सुप्रयुक्तेन कर्मणा
अहिंसाधर्मयुक्तेन प्रीयते हरिरीश्वरः
Dharmagyanena chaitena suprayuktena karmana
Ahinsadharmayuktena priyate haririshvarah
336.53
एकव्यूहविभागो वा क्वचिद्द्विव्यूहसंज्ञितः
त्रिव्यूहश्चापि संख्यातश्चतुर्व्यूहश्च दृश्यते
Ekavyuhavibhago va kvachiddvivyuhasangyitah
Trivyuhashchapi sankhyatashchaturvyuhashcha drishyate
336.54
हरिरेव हि क्षेत्रज्ञो निर्ममो निष्कलस्तथा
जीवश्च सर्वभूतेषु पञ्चभूतगुणातिगः
Harireva hi kshetragyo nirmamo nishkalastatha
Jivashcha sarvabhuteshu panchabhutagunatigah
336.55
मनश्च प्रथितं राजन्पञ्चेन्द्रियसमीरणम्
एष लोकनिधिर्धीमानेष लोकविसर्गकृत्
Manashcha prathitam rajanpanchendriyasamiranam
Esha lokanidhirdhimanesha lokavisargakrit
336.56
अकर्ता चैव कर्ता च कार्यं कारणमेव च
यथेच्छति तथा राजन्क्रीडते पुरुषोऽव्ययः
Akarta chaiva karta cha karyam karanameva cha
Yathechchhati tatha rajankridate purushovyayah
336.57
एष एकान्तिधर्मस्ते कीर्तितो नृपसत्तम
मया गुरुप्रसादेन दुर्विज्ञेयोऽकृतात्मभिः
एकान्तिनो हि पुरुषा दुर्लभा बहवो नृप
Esha ekantidharmaste kirtito nripasattama
Maya guruprasadena durvigyeyokritatmabhih
Ekantino hi purusha durlabha bahavo nripa
336.58
यद्येकान्तिभिराकीर्णं जगत्स्यात्कुरुनन्दन
अहिंसकैरात्मविद्भिः सर्वभूतहिते रतैः
भवेत्कृतयुगप्राप्तिराशीःकर्मविवर्जितैः
Yadyekantibhirakirnam jagatsyatkurunandana
Ahinsakairatmavidbhih sarvabhutahite rataih
Bhavetkritayugapraptirashihkarmavivarjitaih
336.59
एवं स भगवान्व्यासो गुरुर्मम विशां पते
कथयामास धर्मज्ञो धर्मराज्ञे द्विजोत्तमः
Evam sa bhagavanvyaso gururmama visham pate
Kathayamasa dharmagyo dharmaragye dvijottamah
336.60
ऋषीणां संनिधौ राजञ्शृण्वतोः कृष्णभीष्मयोः
तस्याप्यकथयत्पूर्वं नारदः सुमहातपाः
Rishinam sannidhau rajanshrinvatoh krishnabhishmayoh
Tasyapyakathayatpurvam naradah sumahatapah
336.61
देवं परमकं ब्रह्म श्वेतं चन्द्राभमच्युतम्
यत्र चैकान्तिनो यान्ति नारायणपरायणाः
Devam paramakam brahma shvetam chandrabhamachyutam
Yatra chaikantino yanti narayanaparayanah
336.62
जनमेजय उवाच
एवं बहुविधं धर्मं प्रतिबुद्धैर्निषेवितम्
न कुर्वन्ति कथं विप्रा अन्ये नानाव्रते स्थिताः
Janamejaya uvacha
Evam bahuvidham dharmam pratibuddhairnishevitam
Na kurvanti katham vipra anye nanavrate sthitah
336.63
वैशंपायन उवाच
तिस्रः प्रकृतयो राजन्देहबन्धेषु निर्मिताः
सात्त्विकी राजसी चैव तामसी चेति भारत
Vaishampayana uvacha
Tisrah prakritayo rajandehabandheshu nirmitah
Sattviki rajasi chaiva tamasi cheti bharata
336.64
देहबन्धेषु पुरुषः श्रेष्ठः कुरुकुलोद्वह
सात्त्विकः पुरुषव्याघ्र भवेन्मोक्षार्थनिश्चितः
Dehabandheshu purushah shreshthah kurukulodvaha
Sattvikah purushavyaghra bhavenmoksharthanishchitah
336.65
अत्रापि स विजानाति पुरुषं ब्रह्मवर्तिनम्
नारायणपरो मोक्षस्ततो वै सात्त्विकः स्मृतः
Atrapi sa vijanati purusham brahmavartinam
Narayanaparo mokshastato vai sattvikah smritah
336.66
मनीषितं च प्राप्नोति चिन्तयन्पुरुषोत्तमम्
एकान्तभक्तिः सततं नारायणपरायणः
Manishitam cha prapnoti chintayanpurushottamam
Ekantabhaktih satatam narayanaparayanah
336.67
मनीषिणो हि ये केचिद्यतयो मोक्षकाङ्क्षिणः
तेषां वै छिन्नतृष्णानां योगक्षेमवहो हरिः
Manishino hi ye kechidyatayo mokshakankshinah
Tesham vai chhinnatrishnanam yogakshemavaho harih
336.68
जायमानं हि पुरुषं यं पश्येन्मधुसूदनः
सात्त्विकस्तु स विज्ञेयो भवेन्मोक्षे च निश्चितः
Jayamanam hi purusham yam pashyenmadhusudanah
Sattvikastu sa vigyeyo bhavenmokshe cha nishchitah
336.69
सांख्ययोगेन तुल्यो हि धर्म एकान्तसेवितः
नारायणात्मके मोक्षे ततो यान्ति परां गतिम्
Sankhyayogena tulyo hi dharma ekantasevitah
Narayanatmake mokshe tato yanti param gatim
336.70
नारायणेन दृष्टश्च प्रतिबुद्धो भवेत्पुमान्
एवमात्मेच्छया राजन्प्रतिबुद्धो न जायते
Narayanena drishtashcha pratibuddho bhavetpuman
Evamatmechchhaya rajanpratibuddho na jayate
336.71
राजसी तामसी चैव व्यामिश्रे प्रकृती स्मृते
तदात्मकं हि पुरुषं जायमानं विशां पते
प्रवृत्तिलक्षणैर्युक्तं नावेक्षति हरिः स्वयम्
Rajasi tamasi chaiva vyamishre prakriti smrite
Tadatmakam hi purusham jayamanam visham pate
Pravrittilakshanairyuktam navekshati harih svayam
336.72
पश्यत्येनं जायमानं ब्रह्मा लोकपितामहः
रजसा तमसा चैव मानुषं समभिप्लुतम्
Pashyatyenam jayamanam brahma lokapitamahah
Rajasa tamasa chaiva manusham samabhiplutam
336.73
कामं देवाश्च ऋषयः सत्त्वस्था नृपसत्तम
हीनाः सत्त्वेन सूक्ष्मेण ततो वैकारिकाः स्मृताः
Kamam devashcha rishayah sattvastha nripasattama
Hinah sattvena sukshmena tato vaikarikah smritah
336.74
जनमेजय उवाच
कथं वैकारिको गच्छेत्पुरुषः पुरुषोत्तमम्
Janamejaya uvacha
Katham vaikariko gachchhetpurushah purushottamam
336.75
वैशंपायन उवाच
सुसूक्ष्मसत्त्वसंयुक्तं संयुक्तं त्रिभिरक्षरैः
पुरुषः पुरुषं गच्छेन्निष्क्रियः पञ्चविंशकम्
Vaishampayana uvacha
Susukshmasattvasanyuktam sanyuktam tribhiraksharaih
Purushah purusham gachchhennishkriyah panchavinshakam
336.76
एवमेकं सांख्ययोगं वेदारण्यकमेव च
परस्पराङ्गान्येतानि पञ्चरात्रं च कथ्यते
एष एकान्तिनां धर्मो नारायणपरात्मकः
Evamekam sankhyayogam vedaranyakameva cha
Parasparanganyetani pancharatram cha kathyate
Esha ekantinam dharmo narayanaparatmakah
336.77
यथा समुद्रात्प्रसृता जलौघा;स्तमेव राजन्पुनराविशन्ति
इमे तथा ज्ञानमहाजलौघा; नारायणं वै पुनराविशन्ति
Yatha samudratprasrita jalaugha;stameva rajanpunaravishanti
Ime tatha gyanamahajalaugha; narayanam vai punaravishanti
336.78
एष ते कथितो धर्मः सात्वतो यदुबान्धव
कुरुष्वैनं यथान्यायं यदि शक्नोषि भारत
Esha te kathito dharmah satvato yadubandhava
Kurushvainam yathanyayam yadi shaknoshi bharata
336.79
एवं हि सुमहाभागो नारदो गुरवे मम
श्वेतानां यतिनामाह एकान्तगतिमव्ययाम्
Evam hi sumahabhago narado gurave mama
Shvetanam yatinamaha ekantagatimavyayam
336.80
व्यासश्चाकथयत्प्रीत्या धर्मपुत्राय धीमते
स एवायं मया तुभ्यमाख्यातः प्रसृतो गुरोः
Vyasashchakathayatpritya dharmaputraya dhimate
Sa evayam maya tubhyamakhyatah prasrito guroh
336.81
इत्थं हि दुश्चरो धर्म एष पार्थिवसत्तम
यथैव त्वं तथैवान्ये न भजन्ति विमोहिताः
Ittham hi dushcharo dharma esha parthivasattama
Yathaiva tvam tathaivanye na bhajanti vimohitah
336.82
कृष्ण एव हि लोकानां भावनो मोहनस्तथा
संहारकारकश्चैव कारणं च विशां पते
Krishna eva hi lokanam bhavano mohanastatha
Sanharakarakashchaiva karanam cha visham pate