Utshovঅধ্যায় 337
337.1
জনমেজয় উবাচ
সাংখ্যং যোগং পঞ্চরাত্রং বেদারণ্যকমেব চ
জ্ঞানান্যেতানি ব্রহ্মর্ষে লোকেষু প্রচরন্তি হ
337.2
কিমেতান্যেকনিষ্ঠানি পৃথঙ্নিষ্ঠানি বা মুনে
প্রব্রূহি বৈ ময়া পৃষ্টঃ প্রবৃত্তিং চ যথাক্রমম্
337.3
বৈশংপায়ন উবাচ
জজ্ঞে বহুজ্ঞং পরমত্যুদারং; যং দ্বীপমধ্যে সুতমাত্মবন্তম্
পরাশরাদ্গন্ধবতী মহর্ষিং; তস্মৈ নমোঽজ্ঞানতমোনুদায়
337.4
পিতামহাদ্যং প্রবদন্তি ষষ্ঠং; মহর্ষিমার্ষেয়বিভূতিয়ুক্তম্
নারায়ণস্যাংশজমেকপুত্রং; দ্বৈপায়নং বেদমহানিধানম্
337.5
তমাদিকালেষু মহাবিভূতি;র্নারায়ণো ব্রহ্মমহানিধানম্
সসর্জ পুত্রার্থমুদারতেজা; ব্যাসং মহাত্মানমজঃ পুরাণঃ
337.6
জনমেজয় উবাচ
ত্বয়ৈব কথিতঃ পূর্বং সংভবো দ্বিজসত্তম
বসিষ্ঠস্য সুতঃ শক্তিঃ শক্তেঃ পুত্রঃ পরাশরঃ
337.7
পরাশরস্য দায়াদঃ কৃষ্ণদ্বৈপায়নো মুনিঃ
ভূয়ো নারায়ণসুতং ত্বমেবৈনং প্রভাষসে
337.8
কিমতঃ পূর্বজং জন্ম ব্যাসস্যামিততেজসঃ
কথয়স্বোত্তমমতে জন্ম নারায়ণোদ্ভবম্
337.9
বৈশংপায়ন উবাচ
বেদার্থান্বেত্তুকামস্য ধর্মিষ্ঠস্য তপোনিধেঃ
গুরোর্মে জ্ঞাননিষ্ঠস্য হিমবত্পাদ আসতঃ
337.10
কৃত্বা ভারতমাখ্যানং তপঃশ্রান্তস্য ধীমতঃ
শুশ্রূষাং তত্পরা রাজন্কৃতবন্তো বয়ং তদা
337.11
সুমন্তুর্জৈমিনিশ্চৈব পৈলশ্চ সুদৃঢব্রতঃ
অহং চতুর্থঃ শিষ্যো বৈ শুকো ব্যাসাত্মজস্তথা
337.12
এভিঃ পরিবৃতো ব্যাসঃ শিষ্যৈঃ পঞ্চভিরুত্তমৈঃ
শুশুভে হিমবত্পাদে ভূতৈর্ভূতপতির্যথা
337.13
বেদানাবর্তয়ন্সাঙ্গান্ভারতার্থাংশ্চ সর্বশঃ
তমেকমনসং দান্তং যুক্তা বয়মুপাস্মহে
337.14
কথান্তরেঽথ কস্মিংশ্চিত্পৃষ্টোঽস্মাভির্দ্বিজোত্তমঃ
বেদার্থান্ভারতার্থাংশ্চ জন্ম নারায়ণাত্তথা
337.15
স পূর্বমুক্ত্বা বেদার্থান্ভারতার্থাংশ্চ তত্ত্ববিৎ
নারায়ণাদিদং জন্ম ব্যাহর্তুমুপচক্রমে
337.16
শৃণুধ্বমাখ্যানবরমেতদার্ষেয়মুত্তমম্
আদিকালোদ্ভবং বিপ্রাস্তপসাধিগতং ময়া
337.17
প্রাপ্তে প্রজাবিসর্গে বৈ সপ্তমে পদ্মসংভবে
নারায়ণো মহায়োগী শুভাশুভবিবর্জিতঃ
337.18
সসৃজে নাভিতঃ পুত্রং ব্রহ্মাণমমিতপ্রভম্
ততঃ স প্রাদুরভবদথৈনং বাক্যমব্রবীৎ
337.19
মম ত্বং নাভিতো জাতঃ প্রজাসর্গকরঃ প্রভুঃ
সৃজ প্রজাস্ত্বং বিবিধা ব্রহ্মন্সজডপণ্ডিতাঃ
337.20
স এবমুক্তো বিমুখশ্চিন্তাব্যাকুলমানসঃ
প্রণম্য বরদং দেবমুবাচ হরিমীশ্বরম্
337.21
কা শক্তির্মম দেবেশ প্রজাঃ স্রষ্টুং নমোঽস্তু তে
অপ্রজ্ঞাবানহং দেব বিধত্স্ব যদনন্তরম্
337.22
স এবমুক্তো ভগবান্ভূত্বাথান্তর্হিতস্ততঃ
চিন্তয়ামাস দেবেশো বুদ্ধিং বুদ্ধিমতাং বরঃ
337.23
স্বরূপিণী ততো বুদ্ধিরুপতস্থে হরিং প্রভুম্
যোগেন চৈনাং নির্যোগঃ স্বয়ং নিয়ুয়ুজে তদা
337.24
স তামৈশ্বর্যয়োগস্থাং বুদ্ধিং শক্তিমতীং সতীম্
উবাচ বচনং দেবো বুদ্ধিং বৈ প্রভুরব্যয়ঃ
337.25
ব্রহ্মাণং প্রবিশস্বেতি লোকসৃষ্ট্যর্থসিদ্ধয়ে
ততস্তমীশ্বরাদিষ্টা বুদ্ধিঃ ক্ষিপ্রং বিবেশ সা
337.26
অথৈনং বুদ্ধিসংয়ুক্তং পুনঃ স দদৃশে হরিঃ
ভূয়শ্চৈনং বচঃ প্রাহ সৃজেমা বিবিধাঃ প্রজাঃ
337.27
এবমুক্ত্বা স ভগবাংস্তত্রৈবান্তরধীয়ত
প্রাপ চৈব মুহূর্তেন স্বস্থানং দেবসংজ্ঞিতম্
337.28
তাং চৈব প্রকৃতিং প্রাপ্য একীভাবগতোঽভবৎ
অথাস্য বুদ্ধিরভবত্পুনরন্যা তদা কিল
337.29
সৃষ্টা ইমাঃ প্রজাঃ সর্বা ব্রহ্মণা পরমেষ্ঠিনা
দৈত্যদানবগন্ধর্বরক্ষোগণসমাকুলাঃ
জাতা হীয়ং বসুমতী ভারাক্রান্তা তপস্বিনী
337.30
বহবো বলিনঃ পৃথ্ব্যাং দৈত্যদানবরাক্ষসাঃ
ভবিষ্যন্তি তপোয়ুক্তা বরান্প্রাপ্স্যন্তি চোত্তমান্
337.31
অবশ্যমেব তৈঃ সর্বৈর্বরদানেন দর্পিতৈঃ
বাধিতব্যাঃ সুরগণা ঋষয়শ্চ তপোধনাঃ
তত্র ন্যায্যমিদং কর্তুং ভারাবতরণং ময়া
337.32
অথ নানাসমুদ্ভূতৈর্বসুধায়াং যথাক্রমম্
নিগ্রহেণ চ পাপানাং সাধূনাং প্রগ্রহেণ চ
337.33
ইমাং তপস্বিনীং সত্যাং ধারয়িষ্যামি মেদিনীম্
ময়া হ্যেষা হি ধ্রিয়তে পাতালস্থেন ভোগিনা
337.34
ময়া ধৃতা ধারয়তি জগদ্ধি সচরাচরম্
তস্মাত্পৃথ্ব্যাঃ পরিত্রাণং করিষ্যে সংভবং গতঃ
337.35
এবং স চিন্তয়িত্বা তু ভগবান্মধুসূদনঃ
রূপাণ্যনেকান্যসৃজত্প্রাদুর্ভাবভবায় সঃ
337.36
বারাহং নারসিংহং চ বামনং মানুষং তথা
এভির্ময়া নিহন্তব্যা দুর্বিনীতাঃ সুরারয়ঃ
337.37
অথ ভূয়ো জগত্স্রষ্টা ভোঃশব্দেনানুনাদয়ন্
সরস্বতীমুচ্চচার তত্র সারস্বতোঽভবৎ
337.38
অপান্তরতমা নাম সুতো বাক্সংভবো বিভোঃ
ভূতভব্যভবিষ্যজ্ঞঃ সত্যবাদী দৃঢব্রতঃ
337.39
তমুবাচ নতং মূর্ধ্না দেবানামাদিরব্যয়ঃ
বেদাখ্যানে শ্রুতিঃ কার্যা ত্বয়া মতিমতাং বর
তস্মাত্কুরু যথাজ্ঞপ্তং ময়ৈতদ্বচনং মুনে
337.40
তেন ভিন্নাস্তদা বেদা মনোঃ স্বায়ংভুবেঽন্তরে
ততস্তুতোষ ভগবান্হরিস্তেনাস্য কর্মণা
তপসা চ সুতপ্তেন যমেন নিয়মেন চ
337.41
শ্রীভগবানুবাচ
মন্বন্তরেষু পুত্র ত্বমেবং লোকপ্রবর্তকঃ
ভবিষ্যস্যচলো ব্রহ্মন্নপ্রধৃষ্যশ্চ নিত্যশঃ
337.42
পুনস্তিষ্যে চ সংপ্রাপ্তে কুরবো নাম ভারতাঃ
ভবিষ্যন্তি মহাত্মানো রাজানঃ প্রথিতা ভুবি
337.43
তেষাং ত্বত্তঃ প্রসূতানাং কুলভেদো ভবিষ্যতি
পরস্পরবিনাশার্থং ত্বামৃতে দ্বিজসত্তম
337.44
তত্রাপ্যনেকধা বেদান্ভেত্স্যসে তপসান্বিতঃ
কৃষ্ণে যুগে চ সংপ্রাপ্তে কৃষ্ণবর্ণো ভবিষ্যসি
337.45
ধর্মাণাং বিবিধানাং চ কর্তা জ্ঞানকরস্তথা
ভবিষ্যসি তপোয়ুক্তো ন চ রাগাদ্বিমোক্ষ্যসে
337.46
বীতরাগশ্চ পুত্রস্তে পরমাত্মা ভবিষ্যতি
মহেশ্বরপ্রসাদেন নৈতদ্বচনমন্যথা
337.47
যং মানসং বৈ প্রবদন্তি পুত্রং; পিতামহস্যোত্তমবুদ্ধিয়ুক্তম্
বসিষ্ঠমগ্র্যং তপসো নিধানং; যশ্চাপি সূর্যং ব্যতিরিচ্য ভাতি
337.48
তস্যান্বয়ে চাপি ততো মহর্ষিঃ; পরাশরো নাম মহাপ্রভাবঃ
পিতা স তে বেদনিধির্বরিষ্ঠো; মহাতপা বৈ তপসো নিবাসঃ
কানীনগর্ভঃ পিতৃকন্যকায়াং; তস্মাদৃষেস্ত্বং ভবিতা চ পুত্রঃ
337.49
ভূতভব্যভবিষ্যাণাং ছিন্নসর্বার্থসংশয়ঃ
যে হ্যতিক্রান্তকাঃ পূর্বং সহস্রয়ুগপর্যয়াঃ
337.50
তাংশ্চ সর্বান্ময়োদ্দিষ্টান্দ্রক্ষ্যসে তপসান্বিতঃ
পুনর্দ্রক্ষ্যসি চানেকসহস্রয়ুগপর্যয়ান্
337.51
অনাদিনিধনং লোকে চক্রহস্তং চ মাং মুনে
অনুধ্যানান্মম মুনে নৈতদ্বচনমন্যথা
337.52
শনৈশ্চরঃ সূর্যপুত্রো ভবিষ্যতি মনুর্মহান্
তস্মিন্মন্বন্তরে চৈব সপ্তর্ষিগণপূর্বকঃ
ত্বমেব ভবিতা বত্স মত্প্রসাদান্ন সংশয়ঃ
337.53
ব্যাস উবাচ
এবং সারস্বতমৃষিমপান্তরতমং তদা
উক্ত্বা বচনমীশানঃ সাধয়স্বেত্যথাব্রবীৎ
337.54
সোঽহং তস্য প্রসাদেন দেবস্য হরিমেধসঃ
অপান্তরতমা নাম ততো জাতোঽঽজ্ঞয়া হরেঃ
পুনশ্চ জাতো বিখ্যাতো বসিষ্ঠকুলনন্দনঃ
337.55
তদেতত্কথিতং জন্ম ময়া পূর্বকমাত্মনঃ
নারায়ণপ্রসাদেন তথা নারায়ণাংশজম্
337.56
ময়া হি সুমহত্তপ্তং তপঃ পরমদারুণম্
পুরা মতিমতাং শ্রেষ্ঠাঃ পরমেণ সমাধিনা
337.57
এতদ্বঃ কথিতং সর্বং যন্মাং পৃচ্ছথ পুত্রকাঃ
পূর্বজন্ম ভবিষ্যং চ ভক্তানাং স্নেহতো ময়া
337.58
বৈশংপায়ন উবাচ
এষ তে কথিতঃ পূর্বং সংভবোঽস্মদ্গুরোর্নৃপ
ব্যাসস্যাক্লিষ্টমনসো যথা পৃষ্টঃ পুনঃ শৃণু
337.59
সাংখ্যং যোগং পঞ্চরাত্রং বেদাঃ পাশুপতং তথা
জ্ঞানান্যেতানি রাজর্ষে বিদ্ধি নানামতানি বৈ
337.60
সাংখ্যস্য বক্তা কপিলঃ পরমর্ষিঃ স উচ্যতে
হিরণ্যগর্ভো যোগস্য বেত্তা নান্যঃ পুরাতনঃ
337.61
অপান্তরতমাশ্চৈব বেদাচার্যঃ স উচ্যতে
প্রাচীনগর্ভং তমৃষিং প্রবদন্তীহ কেচন
337.62
উমাপতির্ভূতপতিঃ শ্রীকণ্ঠো ব্রহ্মণঃ সুতঃ
উক্তবানিদমব্যগ্রো জ্ঞানং পাশুপতং শিবঃ
337.63
পঞ্চরাত্রস্য কৃত্স্নস্য বেত্তা তু ভগবান্স্বয়ম্
সর্বেষু চ নৃপশ্রেষ্ঠ জ্ঞানেষ্বেতেষু দৃশ্যতে
337.64
যথাগমং যথাজ্ঞানং নিষ্ঠা নারায়ণঃ প্রভুঃ
ন চৈনমেবং জানন্তি তমোভূতা বিশাং পতে
337.65
তমেব শাস্ত্রকর্তারং প্রবদন্তি মনীষিণঃ
নিষ্ঠাং নারায়ণমৃষিং নান্যোঽস্তীতি চ বাদিনঃ
337.66
নিঃসংশয়েষু সর্বেষু নিত্যং বসতি বৈ হরিঃ
সসংশয়ান্হেতুবলান্নাধ্যাবসতি মাধবঃ
337.67
পঞ্চরাত্রবিদো যে তু যথাক্রমপরা নৃপ
একান্তভাবোপগতাস্তে হরিং প্রবিশন্তি বৈ
337.68
সাংখ্যং চ যোগং চ সনাতনে দ্বে; বেদাশ্চ সর্বে নিখিলেন রাজন্
সর্বৈঃ সমস্তৈরৃষিভির্নিরুক্তো; নারায়ণো বিশ্বমিদং পুরাণম্
337.69
শুভাশুভং কর্ম সমীরিতং য;ত্প্রবর্ততে সর্বলোকেষু কিংচিৎ
তস্মাদৃষেস্তদ্ভবতীতি বিদ্যা;দ্দিব্যন্তরিক্ষে ভুবি চাপ্সু চাপি