অধ্যায় 338

338.1

জনমেজয় উবাচ
বহবঃ পুরুষা ব্রহ্মন্নুতাহো এক এব তু
কো হ্যত্র পুরুষঃ শ্রেষ্ঠঃ কো বা যোনিরিহোচ্যতে

338.2

বৈশংপায়ন উবাচ
বহবঃ পুরুষা লোকে সাংখ্যয়োগবিচারিণাম্
নৈতদিচ্ছন্তি পুরুষমেকং কুরুকুলোদ্বহ

338.3

বহূনাং পুরুষাণাং চ যথৈকা যোনিরুচ্যতে
তথা তং পুরুষং বিশ্বং ব্যাখ্যাস্যামি গুণাধিকম্

338.4

নমস্কৃত্বা তু গুরবে ব্যাসায়ামিততেজসে
তপোয়ুক্তায় দান্তায় বন্দ্যায় পরমর্ষয়ে

338.5

ইদং পুরুষসূক্তং হি সর্ববেদেষু পার্থিব
ঋতং সত্যং চ বিখ্যাতমৃষিসিংহেন চিন্তিতম্

338.6

উত্সর্গেণাপবাদেন ঋষিভিঃ কপিলাদিভিঃ
অধ্যাত্মচিন্তামাশ্রিত্য শাস্ত্রাণ্যুক্তানি ভারত

338.7

সমাসতস্তু যদ্ব্যাসঃ পুরুষৈকত্বমুক্তবান্
তত্তেঽহং সংপ্রবক্ষ্যামি প্রসাদাদমিতৌজসঃ

338.8

অত্রাপ্যুদাহরন্তীমমিতিহাসং পুরাতনম্
ব্রহ্মণা সহ সংবাদং ত্র্যম্বকস্য বিশাং পতে

338.9

ক্ষীরোদস্য সমুদ্রস্য মধ্যে হাটকসপ্রভঃ
বৈজয়ন্ত ইতি খ্যাতঃ পর্বতপ্রবরো নৃপ

338.10

তত্রাধ্যাত্মগতিং দেব একাকী প্রবিচিন্তয়ন্
বৈরাজসদনে নিত্যং বৈজয়ন্তং নিষেবতে

338.11

অথ তত্রাসতস্তস্য চতুর্বক্ত্রস্য ধীমতঃ
ললাটপ্রভবঃ পুত্রঃ শিব আগাদ্যদৃচ্ছয়া
আকাশেনৈব যোগীশঃ পুরা ত্রিনয়নঃ প্রভুঃ

338.12

ততঃ খান্নিপপাতাশু ধরণীধরমূর্ধনি
অগ্রতশ্চাভবত্প্রীতো ববন্দে চাপি পাদয়োঃ

338.13

তং পাদয়োর্নিপতিতং দৃষ্ট্বা সব্যেন পাণিনা
উত্থাপয়ামাস তদা প্রভুরেকঃ প্রজাপতিঃ

338.14

উবাচ চৈনং ভগবাংশ্চিরস্যাগতমাত্মজম্
স্বাগতং তে মহাবাহো দিষ্ট্যা প্রাপ্তোঽসি মেঽন্তিকম্

338.15

কচ্চিত্তে কুশলং পুত্র স্বাধ্যায়তপসোঃ সদা
নিত্যমুগ্রতপাস্ত্বং হি ততঃ পৃচ্ছামি তে পুনঃ

338.16

রুদ্র উবাচ
ত্বত্প্রসাদেন ভগবন্স্বাধ্যায়তপসোর্মম
কুশলং চাব্যয়ং চৈব সর্বস্য জগতস্তথা

338.17

চিরদৃষ্টো হি ভগবান্বৈরাজসদনে ময়া
ততোঽহং পর্বতং প্রাপ্তস্ত্বিমং ত্বত্পাদসেবিতম্

338.18

কৌতূহলং চাপি হি মে একান্তগমনেন তে
নৈতত্কারণমল্পং হি ভবিষ্যতি পিতামহ

338.19

কিং নু তত্সদনং শ্রেষ্ঠং ক্ষুত্পিপাসাবিবর্জিতম্
সুরাসুরৈরধ্যুষিতমৃষিভিশ্চামিতপ্রভৈঃ

338.20

গন্ধর্বৈরপ্সরোভিশ্চ সততং সংনিষেবিতম্
উত্সৃজ্যেমং গিরিবরমেকাকী প্রাপ্তবানসি

338.21

ব্রহ্মোবাচ
বৈজয়ন্তো গিরিবরঃ সততং সেব্যতে ময়া
অত্রৈকাগ্রেণ মনসা পুরুষশ্চিন্ত্যতে বিরাট্

338.22

রুদ্র উবাচ
বহবঃ পুরুষা ব্রহ্মংস্ত্বয়া সৃষ্টাঃ স্বয়ংভুবা
সৃজ্যন্তে চাপরে ব্রহ্মন্স চৈকঃ পুরুষো বিরাট্

338.23

কো হ্যসৌ চিন্ত্যতে ব্রহ্মংস্ত্বয়া বৈ পুরুষোত্তমঃ
এতন্মে সংশয়ং ব্রূহি মহত্কৌতূহলং হি মে

338.24

ব্রহ্মোবাচ
বহবঃ পুরুষাঃ পুত্র যে ত্বয়া সমুদাহৃতাঃ
এবমেতদতিক্রান্তং দ্রষ্টব্যং নৈবমিত্যপি
আধারং তু প্রবক্ষ্যামি একস্য পুরুষস্য তে

338.25

বহূনাং পুরুষাণাং স যথৈকা যোনিরুচ্যতে
তথা তং পুরুষং বিশ্বং পরমং সুমহত্তমম্
নির্গুণং নির্গুণা ভূত্বা প্রবিশন্তি সনাতনম্

Contains text from DharmicData, made available under the Open Database License (ODbL). Simple meanings are written by AI and can contain mistakes.