Utshovঅধ্যায় 339
339.1
ব্রহ্মোবাচ
শৃণু পুত্র যথা হ্যেষ পুরুষঃ শাশ্বতোঽব্যয়ঃ
অক্ষয়শ্চাপ্রমেয়শ্চ সর্বগশ্চ নিরুচ্যতে
339.2
ন স শক্যস্ত্বয়া দ্রষ্টুং ময়ান্যৈর্বাপি সত্তম
সগুণো নির্গুণো বিশ্বো জ্ঞানদৃশ্যো হ্যসৌ স্মৃতঃ
339.3
অশরীরঃ শরীরেষু সর্বেষু নিবসত্যসৌ
বসন্নপি শরীরেষু ন স লিপ্যতি কর্মভিঃ
339.4
মমান্তরাত্মা তব চ যে চান্যে দেহসংজ্ঞিতাঃ
সর্বেষাং সাক্ষিভূতোঽসৌ ন গ্রাহ্যঃ কেনচিত্ক্বচিৎ
339.5
বিশ্বমূর্ধা বিশ্বভুজো বিশ্বপাদাক্ষিনাসিকঃ
একশ্চরতি ক্ষেত্রেষু স্বৈরচারী যথাসুখম্
339.6
ক্ষেত্রাণি হি শরীরাণি বীজানি চ শুভাশুভে
তানি বেত্তি স যোগাত্মা ততঃ ক্ষেত্রজ্ঞ উচ্যতে
339.7
নাগতির্ন গতিস্তস্য জ্ঞেয়া ভূতেন কেনচিৎ
সাংখ্যেন বিধিনা চৈব যোগেন চ যথাক্রমম্
339.8
চিন্তয়ামি গতিং চাস্য ন গতিং বেদ্মি চোত্তমাম্
যথাজ্ঞানং তু বক্ষ্যামি পুরুষং তং সনাতনম্
339.9
তস্যৈকত্বং মহত্ত্বং হি স চৈকঃ পুরুষঃ স্মৃতঃ
মহাপুরুষশব্দং স বিভর্ত্যেকঃ সনাতনঃ
339.10
একো হুতাশো বহুধা সমিধ্যতে; একঃ সূর্যস্তপসাং যোনিরেকা
একো বায়ুর্বহুধা বাতি লোকে; মহোদধিশ্চাম্ভসাং যোনিরেকঃ
পুরুষশ্চৈকো নির্গুণো বিশ্বরূপ;স্তং নির্গুণং পুরুষং চাবিশন্তি
339.11
হিত্বা গুণময়ং সর্বং কর্ম হিত্বা শুভাশুভম্
উভে সত্যানৃতে ত্যক্ত্বা এবং ভবতি নির্গুণঃ
339.12
অচিন্ত্যং চাপি তং জ্ঞাত্বা ভাবসূক্ষ্মং চতুষ্টয়ম্
বিচরেদ্যো যতির্যত্তঃ স গচ্ছেত্পুরুষং প্রভুম্
339.13
এবং হি পরমাত্মানং কেচিদিচ্ছন্তি পণ্ডিতাঃ
একাত্মানং তথাত্মানমপরেঽধ্যাত্মচিন্তকাঃ
339.14
তত্র যঃ পরমাত্মা হি স নিত্যং নির্গুণঃ স্মৃতঃ
স হি নারায়ণো জ্ঞেয়ঃ সর্বাত্মা পুরুষো হি সঃ
ন লিপ্যতে ফলৈশ্চাপি পদ্মপত্রমিবাম্ভসা
339.15
কর্মাত্মা ত্বপরো যোঽসৌ মোক্ষবন্ধৈঃ স যুজ্যতে
সসপ্তদশকেনাপি রাশিনা যুজ্যতে হি সঃ
এবং বহুবিধঃ প্রোক্তঃ পুরুষস্তে যথাক্রমম্
339.16
যত্তত্কৃত্স্নং লোকতন্ত্রস্য ধাম; বেদ্যং পরং বোধনীয়ং সবোদ্ধৃ
মন্তা মন্তব্যং প্রাশিতা প্রাশিতব্যং; ঘ্রাতা ঘ্রেয়ং স্পর্শিতা স্পর্শনীয়ম্
339.17
দ্রষ্টা দ্রষ্টব্যং শ্রাবিতা শ্রাবণীয়ং; জ্ঞাতা জ্ঞেয়ং সগুণং নির্গুণং চ
যদ্বৈ প্রোক্তং গুণসাম্যং প্রধানং; নিত্যং চৈতচ্ছাশ্বতং চাব্যয়ং চ
339.18
যদ্বৈ সূতে ধাতুরাদ্যং নিধানং; তদ্বৈ বিপ্রাঃ প্রবদন্তেঽনিরুদ্ধম্
যদ্বৈ লোকে বৈদিকং কর্ম সাধু; আশীর্যুক্তং তদ্ধি তস্যোপভোজ্যম্
339.19
দেবাঃ সর্বে মুনয়ঃ সাধু দান্তা;স্তং প্রাগ্যজ্ঞৈর্যজ্ঞভাগং যজন্তে
অহং ব্রহ্মা আদ্য ঈশঃ প্রজানাং; তস্মাজ্জাতস্ত্বং চ মত্তঃ প্রসূতঃ
মত্তো জগজ্জঙ্গমং স্থাবরং চ; সর্বে বেদাঃ সরহস্যা হি পুত্র
339.20
চতুর্বিভক্তঃ পুরুষঃ স ক্রীডতি যথেচ্ছতি
এবং স এব ভগবাঞ্জ্ঞানেন প্রতিবোধিতঃ
339.21
এতত্তে কথিতং পুত্র যথাবদনুপৃচ্ছতঃ
সাংখ্যজ্ঞানে তথা যোগে যথাবদনুবর্ণিতম্