অধ্যায় 340

340.1

যুধিষ্ঠির উবাচ
ধর্মাঃ পিতামহেনোক্তা মোক্ষধর্মাশ্রিতাঃ শুভাঃ
ধর্মমাশ্রমিণাং শ্রেষ্ঠং বক্তুমর্হতি মে ভবান্

ভীষ্ম উবাচ
সর্বত্র বিহিতো ধর্মঃ স্বর্গ্যঃ সত্যফলোদয়ঃ
বহুদ্বারস্য ধর্মস্য নেহাস্তি বিফলা ক্রিয়া

যস্মিন্যস্মিংস্তু বিষয়ে যো যো যাতি বিনিশ্চয়ম্
স তমেবাভিজানাতি নান্যং ভরতসত্তম

অপি চ ত্বং নরব্যাঘ্র শ্রোতুমর্হসি মে কথাম্
পুরা শক্রস্য কথিতাং নারদেন সুরর্ষিণা

সুরর্ষির্নারদো রাজন্সিদ্ধস্ত্রৈলোক্যসংমতঃ
পর্যেতি ক্রমশো লোকান্বায়ুরব্যাহতো যথা

স কদাচিন্মহেষ্বাস দেবরাজালয়ং গতঃ
সত্কৃতশ্চ মহেন্দ্রেণ প্রত্যাসন্নগতোঽভবৎ

তং কৃতক্ষণমাসীনং পর্যপৃচ্ছচ্ছচীপতিঃ
ব্রহ্মর্ষে কিংচিদাশ্চর্যমস্তি দৃষ্টং ত্বয়ানঘ

যথা ত্বমপি বিপ্রর্ষে ত্রৈলোক্যং সচরাচরম্
জাতকৌতূহলো নিত্যং সিদ্ধশ্চরসি সাক্ষিবৎ

ন হ্যস্ত্যবিদিতং লোকে দেবর্ষে তব কিংচন
শ্রুতং বাপ্যনুভূতং বা দৃষ্টং বা কথয়স্ব মে

তস্মৈ রাজন্সুরেন্দ্রায় নারদো বদতাং বরঃ
আসীনায়োপপন্নায় প্রোক্তবান্বিপুলাং কথাম্

যথা যেন চ কল্পেন স তস্মৈ দ্বিজসত্তমঃ
কথাং কথিতবান্পৃষ্টস্তথা ত্বমপি মে শৃণু