Chapter 340

340.1

युधिष्ठिर उवाच
धर्माः पितामहेनोक्ता मोक्षधर्माश्रिताः शुभाः
धर्ममाश्रमिणां श्रेष्ठं वक्तुमर्हति मे भवान्

Yudhishthira uvacha
Dharmah pitamahenokta mokshadharmashritah shubhah
Dharmamashraminam shreshtham vaktumarhati me bhavan

भीष्म उवाच
सर्वत्र विहितो धर्मः स्वर्ग्यः सत्यफलोदयः
बहुद्वारस्य धर्मस्य नेहास्ति विफला क्रिया

Bhishma uvacha
Sarvatra vihito dharmah svargyah satyaphalodayah
Bahudvarasya dharmasya nehasti viphala kriya

यस्मिन्यस्मिंस्तु विषये यो यो याति विनिश्चयम्
स तमेवाभिजानाति नान्यं भरतसत्तम

Yasminyasminstu vishaye yo yo yati vinishchayam
Sa tamevabhijanati nanyam bharatasattama

अपि च त्वं नरव्याघ्र श्रोतुमर्हसि मे कथाम्
पुरा शक्रस्य कथितां नारदेन सुरर्षिणा

Api cha tvam naravyaghra shrotumarhasi me katham
Pura shakrasya kathitam naradena surarshina

सुरर्षिर्नारदो राजन्सिद्धस्त्रैलोक्यसंमतः
पर्येति क्रमशो लोकान्वायुरव्याहतो यथा

Surarshirnarado rajansiddhastrailokyasammatah
Paryeti kramasho lokanvayuravyahato yatha

स कदाचिन्महेष्वास देवराजालयं गतः
सत्कृतश्च महेन्द्रेण प्रत्यासन्नगतोऽभवत्

Sa kadachinmaheshvasa devarajalayam gatah
Satkritashcha mahendrena pratyasannagatobhavat

तं कृतक्षणमासीनं पर्यपृच्छच्छचीपतिः
ब्रह्मर्षे किंचिदाश्चर्यमस्ति दृष्टं त्वयानघ

Tam kritakshanamasinam paryaprichchhachchhachipatih
Brahmarshe kinchidashcharyamasti drishtam tvayanagha

यथा त्वमपि विप्रर्षे त्रैलोक्यं सचराचरम्
जातकौतूहलो नित्यं सिद्धश्चरसि साक्षिवत्

Yatha tvamapi viprarshe trailokyam sacharacharam
Jatakautuhalo nityam siddhashcharasi sakshivat

न ह्यस्त्यविदितं लोके देवर्षे तव किंचन
श्रुतं वाप्यनुभूतं वा दृष्टं वा कथयस्व मे

Na hyastyaviditam loke devarshe tava kinchana
Shrutam vapyanubhutam va drishtam va kathayasva me

तस्मै राजन्सुरेन्द्राय नारदो वदतां वरः
आसीनायोपपन्नाय प्रोक्तवान्विपुलां कथाम्

Tasmai rajansurendraya narado vadatam varah
Asinayopapannaya proktavanvipulam katham

यथा येन च कल्पेन स तस्मै द्विजसत्तमः
कथां कथितवान्पृष्टस्तथा त्वमपि मे शृणु

Yatha yena cha kalpena sa tasmai dvijasattamah
Katham kathitavanprishtastatha tvamapi me shrinu