UtshovChapter 341
341.1
भीष्म उवाच
आसीत्किल कुरुश्रेष्ठ महापद्मे पुरोत्तमे
गङ्गाया दक्षिणे तीरे कश्चिद्विप्रः समाहितः
Bhishma uvacha
Asitkila kurushreshtha mahapadme purottame
Gangaya dakshine tire kashchidviprah samahitah
341.2
सौम्यः सोमान्वये वेदे गताध्वा छिन्नसंशयः
धर्मनित्यो जितक्रोधो नित्यतृप्तो जितेन्द्रियः
Saumyah somanvaye vede gatadhva chhinnasanshayah
Dharmanityo jitakrodho nityatripto jitendriyah
341.3
अहिंसानिरतो नित्यं सत्यः सज्जनसंमतः
न्यायप्राप्तेन वित्तेन स्वेन शीलेन चान्वितः
Ahinsanirato nityam satyah sajjanasammatah
Nyayapraptena vittena svena shilena chanvitah
341.4
ज्ञातिसंबन्धिविपुले मित्रापाश्रयसंमते
कुले महति विख्याते विशिष्टां वृत्तिमास्थितः
Gyatisambandhivipule mitrapashrayasammate
Kule mahati vikhyate vishishtam vrittimasthitah
341.5
स पुत्रान्बहुलान्दृष्ट्वा विपुले कर्मणि स्थितः
कुलधर्माश्रितो राजन्धर्मचर्यापरोऽभवत्
Sa putranbahulandrishtva vipule karmani sthitah
Kuladharmashrito rajandharmacharyaparobhavat
341.6
ततः स धर्मं वेदोक्तं यथाशास्त्रोक्तमेव च
शिष्टाचीर्णं च धर्मं च त्रिविधं चिन्त्य चेतसा
Tatah sa dharmam vedoktam yathashastroktameva cha
Shishtachirnam cha dharmam cha trividham chintya chetasa
341.7
किं नु मे स्याच्छुभं कृत्वा किं क्षमं किं परायणम्
इत्येवं खिद्यते नित्यं न च याति विनिश्चयम्
Kim nu me syachchhubham kritva kim kshamam kim parayanam
Ityevam khidyate nityam na cha yati vinishchayam
341.8
तस्यैवं खिद्यमानस्य धर्मं परममास्थितः
कदाचिदतिथिः प्राप्तो ब्राह्मणः सुसमाहितः
Tasyaivam khidyamanasya dharmam paramamasthitah
Kadachidatithih prapto brahmanah susamahitah
341.9
स तस्मै सत्क्रियां चक्रे क्रियायुक्तेन हेतुना
विश्रान्तं चैनमासीनमिदं वचनमब्रवीत्
Sa tasmai satkriyam chakre kriyayuktena hetuna
Vishrantam chainamasinamidam vachanamabravit