অধ্যায় 341

341.1

ভীষ্ম উবাচ
আসীত্কিল কুরুশ্রেষ্ঠ মহাপদ্মে পুরোত্তমে
গঙ্গায়া দক্ষিণে তীরে কশ্চিদ্বিপ্রঃ সমাহিতঃ

সৌম্যঃ সোমান্বয়ে বেদে গতাধ্বা ছিন্নসংশয়ঃ
ধর্মনিত্যো জিতক্রোধো নিত্যতৃপ্তো জিতেন্দ্রিয়ঃ

অহিংসানিরতো নিত্যং সত্যঃ সজ্জনসংমতঃ
ন্যায়প্রাপ্তেন বিত্তেন স্বেন শীলেন চান্বিতঃ

জ্ঞাতিসংবন্ধিবিপুলে মিত্রাপাশ্রয়সংমতে
কুলে মহতি বিখ্যাতে বিশিষ্টাং বৃত্তিমাস্থিতঃ

স পুত্রান্বহুলান্দৃষ্ট্বা বিপুলে কর্মণি স্থিতঃ
কুলধর্মাশ্রিতো রাজন্ধর্মচর্যাপরোঽভবৎ

ততঃ স ধর্মং বেদোক্তং যথাশাস্ত্রোক্তমেব চ
শিষ্টাচীর্ণং চ ধর্মং চ ত্রিবিধং চিন্ত্য চেতসা

কিং নু মে স্যাচ্ছুভং কৃত্বা কিং ক্ষমং কিং পরায়ণম্
ইত্যেবং খিদ্যতে নিত্যং ন চ যাতি বিনিশ্চয়ম্

তস্যৈবং খিদ্যমানস্য ধর্মং পরমমাস্থিতঃ
কদাচিদতিথিঃ প্রাপ্তো ব্রাহ্মণঃ সুসমাহিতঃ

স তস্মৈ সত্ক্রিয়াং চক্রে ক্রিয়ায়ুক্তেন হেতুনা
বিশ্রান্তং চৈনমাসীনমিদং বচনমব্রবীৎ