অধ্যায় 342

342.1

ব্রাহ্মণ উবাচ
সমুত্পন্নাভিধানোঽস্মি বাঙ্মাধুর্যেণ তেঽনঘ
মিত্রতামভিপন্নস্ত্বাং কিংচিদ্বক্ষ্যামি তচ্ছৃণু

গৃহস্থধর্মং বিপ্রেন্দ্র কৃত্বা পুত্রগতং ত্বহম্
ধর্মং পরমকং কুর্যাং কো হি মার্গো ভবেদ্দ্বিজ

অহমাত্মানমাত্মস্থমেক এবাত্মনি স্থিতঃ
কর্তুং কাঙ্ক্ষামি নেচ্ছামি বদ্ধঃ সাধারণৈর্গুণৈঃ

যাবদেবানতীতং মে বয়ঃ পুত্রফলাশ্রিতম্
তাবদিচ্ছামি পাথেয়মাদাতুং পারলৌকিকম্

অস্মিন্হি লোকসংতানে পরং পারমভীপ্সতঃ
উত্পন্না মে মতিরিয়ং কুতো ধর্মময়ঃ প্লবঃ

সমুহ্যমানানি নিশম্য লোকে; নির্যাত্যমানানি চ সাত্ত্বিকানি
দৃষ্ট্বা চ ধর্মধ্বজকেতুমালাং; প্রকীর্যমাণামুপরি প্রজানাম্

ন মে মনো রজ্যতি ভোগকালে; দৃষ্ট্বা যতীন্প্রার্থয়তঃ পরত্র
তেনাতিথে বুদ্ধিবলাশ্রয়েণ; ধর্মার্থতত্ত্বে বিনিয়ুঙ্ক্ষ্ব মাং ত্বম্

ভীষ্ম উবাচ
সোঽতিথির্বচনং তস্য শ্রুত্বা ধর্মাভিলাষিণঃ
প্রোবাচ বচনং শ্লক্ষ্ণং প্রাজ্ঞো মধুরয়া গিরা

অহমপ্যত্র মুহ্যামি মমাপ্যেষ মনোরথঃ
ন চ সংনিশ্চয়ং যামি বহুদ্বারে ত্রিবিষ্টপে

কেচিন্মোক্ষং প্রশংসন্তি কেচিদ্যজ্ঞফলং দ্বিজাঃ
বানপ্রস্থাশ্রমং কেচিদ্গার্হস্থ্যং কেচিদাশ্রিতাঃ

রাজধর্মাশ্রয়ং কেচিত্কেচিদাত্মফলাশ্রয়ম্
গুরুচর্যাশ্রয়ং কেচিত্কেচিদ্বাক্যং যমাশ্রয়ম্

মাতরং পিতরং কেচিচ্ছুশ্রূষন্তো দিবং গতাঃ
অহিংসয়া পরে স্বর্গং সত্যেন চ তথা পরে

আহবেঽভিমুখাঃ কেচিন্নিহতাঃ স্বিদ্দিবং গতাঃ
কেচিদুঞ্ছব্রতৈঃ সিদ্ধাঃ স্বর্গমার্গসমাশ্রিতাঃ

কেচিদধ্যয়নে যুক্তা বেদব্রতপরাঃ শুভাঃ
বুদ্ধিমন্তো গতাঃ স্বর্গং তুষ্টাত্মানো জিতেন্দ্রিয়াঃ

আর্জবেনাপরে যুক্তা নিহতানার্জবৈর্জনৈঃ
ঋজবো নাকপৃষ্ঠে বৈ শুদ্ধাত্মানঃ প্রতিষ্ঠিতাঃ

এবং বহুবিধৈর্লোকে ধর্মদ্বারৈরনাবৃতৈঃ
মমাপি মতিরাবিগ্না মেঘলেখেব বায়ুনা