অধ্যায় 343

343.1

অতিথিরুবাচ
উপদেশং তু তে বিপ্র করিষ্যেঽহং যথাগমম্
গুরুণা মে যথাখ্যাতমর্থতস্তচ্চ মে শৃণু

যত্র পূর্বাভিসর্গেণ ধর্মচক্রং প্রবর্তিতম্
নৈমিষে গোমতীতীরে তত্র নাগাহ্বয়ং পুরম্

সমগ্রৈস্ত্রিদশৈস্তত্র ইষ্টমাসীদ্দ্বিজর্ষভ
যত্রেন্দ্রাতিক্রমং চক্রে মান্ধাতা রাজসত্তমঃ

কৃতাধিবাসো ধর্মাত্মা তত্র চক্ষুঃশ্রবা মহান্
পদ্মনাভো মহাভাগঃ পদ্ম ইত্যেব বিশ্রুতঃ

স বাচা কর্মণা চৈব মনসা চ দ্বিজর্ষভ
প্রসাদয়তি ভূতানি ত্রিবিধে বর্ত্মনি স্থিতঃ

সাম্না দানেন ভেদেন দণ্ডেনেতি চতুর্বিধম্
বিষমস্থং জনং স্বং চ চক্ষুর্ধ্যানেন রক্ষতি

তমভিক্রম্য বিধিনা প্রষ্টুমর্হসি কাঙ্ক্ষিতম্
স তে পরমকং ধর্মং নমিথ্যা দর্শয়িষ্যতি

স হি সর্বাতিথির্নাগো বুদ্ধিশাস্ত্রবিশারদঃ
গুণৈরনবমৈর্যুক্তঃ সমস্তৈরাভিকামিকৈঃ

প্রকৃত্যা নিত্যসলিলো নিত্যমধ্যয়নে রতঃ
তপোদমাভ্যাং সংয়ুক্তো বৃত্তেনানবরেণ চ

যজ্বা দানরুচিঃ ক্ষান্তো বৃত্তে চ পরমে স্থিতঃ
সত্যবাগনসূয়ুশ্চ শীলবানভিসংশ্রিতঃ

শেষান্নভোক্তা বচনানুকূলো; হিতার্জবোত্কৃষ্টকৃতাকৃতজ্ঞঃ
অবৈরকৃদ্ভূতহিতে নিয়ুক্তো; গঙ্গাহ্রদাম্ভোঽভিজনোপপন্নঃ