অধ্যায় 344

344.1

ব্রাহ্মণ উবাচ
অতিভারোদ্যতস্যৈব ভারাপনয়নং মহৎ
পরাশ্বাসকরং বাক্যমিদং মে ভবতঃ শ্রুতম্

অধ্বক্লান্তস্য শয়নং স্থানক্লান্তস্য চাসনম্
তৃষিতস্য চ পানীয়ং ক্ষুধার্তস্য চ ভোজনম্

ঈপ্সিতস্যেব সংপ্রাপ্তিরন্নস্য সময়েঽতিথেঃ
এষিতস্যাত্মনঃ কালে বৃদ্ধস্যেব সুতো যথা

মনসা চিন্তিতস্যেব প্রীতিস্নিগ্ধস্য দর্শনম্
প্রহ্রাদয়তি মাং বাক্যং ভবতা যদুদীরিতম্

দত্তচক্ষুরিবাকাশে পশ্যামি বিমৃশামি চ
প্রজ্ঞানবচনাদ্যোঽয়মুপদেশো হি মে কৃতঃ
বাঢমেবং করিষ্যামি যথা মাং ভাষতে ভবান্

ইহেমাং রজনীং সাধো নিবসস্ব ময়া সহ
প্রভাতে যাস্যতি ভবান্পর্যাশ্বস্তঃ সুখোষিতঃ
অসৌ হি ভগবান্সূর্যো মন্দরশ্মিরবাঙ্মুখঃ

ভীষ্ম উবাচ
ততস্তেন কৃতাতিথ্যঃ সোঽতিথিঃ শত্রুসূদন
উবাস কিল তাং রাত্রিং সহ তেন দ্বিজেন বৈ

তত্তচ্চ ধর্মসংয়ুক্তং তয়োঃ কথয়তোস্তদা
ব্যতীতা সা নিশা কৃত্স্না সুখেন দিবসোপমা

ততঃ প্রভাতসময়ে সোঽতিথিস্তেন পূজিতঃ
ব্রাহ্মণেন যথাশক্ত্যা স্বকার্যমভিকাঙ্ক্ষতা

ততঃ স বিপ্রঃ কৃতধর্মনিশ্চয়ঃ; কৃতাভ্যনুজ্ঞঃ স্বজনেন ধর্মবিৎ
যথোপদিষ্টং ভুজগেন্দ্রসংশ্রয়ং; জগাম কালে সুকৃতৈকনিশ্চয়ঃ