অধ্যায় 345

345.1

ভীষ্ম উবাচ
স বনানি বিচিত্রাণি তীর্থানি চ সরাংসি চ
অভিগচ্ছন্ক্রমেণ স্ম কংচিন্মুনিমুপস্থিতঃ

তং স তেন যথোদ্দিষ্টং নাগং বিপ্রেণ ব্রাহ্মণঃ
পর্যপৃচ্ছদ্যথান্যায়ং শ্রুত্বৈব চ জগাম সঃ

সোঽভিগম্য যথাখ্যাতং নাগায়তনমর্থবিৎ
প্রোক্তবানহমস্মীতি ভোঃশব্দালংকৃতং বচঃ

ততস্তস্য বচঃ শ্রুত্বা রূপিণী ধর্মবত্সলা
দর্শয়ামাস তং বিপ্রং নাগপত্নী পতিব্রতা

সা তস্মৈ বিধিবত্পূজাং চক্রে ধর্মপরায়ণা
স্বাগতেনাগতং কৃত্বা কিং করোমীতি চাব্রবীৎ

ব্রাহ্মণ উবাচ
বিশ্রান্তোঽভ্যর্চিতশ্চাস্মি ভবত্যা শ্লক্ষ্ণয়া গিরা
দ্রষ্টুমিচ্ছামি ভবতি তং দেবং নাগমুত্তমম্

এতদ্ধি পরমং কার্যমেতন্মে ফলমীপ্সিতম্
অনেনার্থেন চাস্ম্যদ্য সংপ্রাপ্তঃ পন্নগালয়ম্

নাগভার্যোবাচ
আর্য সূর্যরথং বোঢুং গতোঽসৌ মাসচারিকঃ
সপ্তাষ্টভির্দিনৈর্বিপ্র দর্শয়িষ্যত্যসংশয়ম্

এতদ্বিদিতমার্যস্য বিবাসকরণং মম
ভর্তুর্ভবতু কিং চান্যত্ক্রিয়তাং তদ্বদস্ব মে

ব্রাহ্মণ উবাচ
অনেন নিশ্চয়েনাহং সাধ্বি সংপ্রাপ্তবানিহ
প্রতীক্ষন্নাগমং দেবি বত্স্যাম্যস্মিন্মহাবনে

সংপ্রাপ্তস্যৈব চাব্যগ্রমাবেদ্যোঽহমিহাগতঃ
মমাভিগমনং প্রাপ্তো বাচ্যশ্চ বচনং ত্বয়া

অহমপ্যত্র বত্স্যামি গোমত্যাঃ পুলিনে শুভে
কালং পরিমিতাহারো যথোক্তং পরিপালয়ন্

ভীষ্ম উবাচ
ততঃ স বিপ্রস্তাং নাগীং সমাধায় পুনঃ পুনঃ
তদেব পুলিনং নদ্যাঃ প্রয়য়ৌ ব্রাহ্মণর্ষভঃ