UtshovChapter 345
345.1
भीष्म उवाच
स वनानि विचित्राणि तीर्थानि च सरांसि च
अभिगच्छन्क्रमेण स्म कंचिन्मुनिमुपस्थितः
Bhishma uvacha
Sa vanani vichitrani tirthani cha saransi cha
Abhigachchhankramena sma kanchinmunimupasthitah
345.2
तं स तेन यथोद्दिष्टं नागं विप्रेण ब्राह्मणः
पर्यपृच्छद्यथान्यायं श्रुत्वैव च जगाम सः
Tam sa tena yathoddishtam nagam viprena brahmanah
Paryaprichchhadyathanyayam shrutvaiva cha jagama sah
345.3
सोऽभिगम्य यथाख्यातं नागायतनमर्थवित्
प्रोक्तवानहमस्मीति भोःशब्दालंकृतं वचः
Sobhigamya yathakhyatam nagayatanamarthavit
Proktavanahamasmiti bhohshabdalankritam vachah
345.4
ततस्तस्य वचः श्रुत्वा रूपिणी धर्मवत्सला
दर्शयामास तं विप्रं नागपत्नी पतिव्रता
Tatastasya vachah shrutva rupini dharmavatsala
Darshayamasa tam vipram nagapatni pativrata
345.5
सा तस्मै विधिवत्पूजां चक्रे धर्मपरायणा
स्वागतेनागतं कृत्वा किं करोमीति चाब्रवीत्
Sa tasmai vidhivatpujam chakre dharmaparayana
Svagatenagatam kritva kim karomiti chabravit
345.6
ब्राह्मण उवाच
विश्रान्तोऽभ्यर्चितश्चास्मि भवत्या श्लक्ष्णया गिरा
द्रष्टुमिच्छामि भवति तं देवं नागमुत्तमम्
Brahmana uvacha
Vishrantobhyarchitashchasmi bhavatya shlakshnaya gira
Drashtumichchhami bhavati tam devam nagamuttamam
345.7
एतद्धि परमं कार्यमेतन्मे फलमीप्सितम्
अनेनार्थेन चास्म्यद्य संप्राप्तः पन्नगालयम्
Etaddhi paramam karyametanme phalamipsitam
Anenarthena chasmyadya sampraptah pannagalayam
345.8
नागभार्योवाच
आर्य सूर्यरथं वोढुं गतोऽसौ मासचारिकः
सप्ताष्टभिर्दिनैर्विप्र दर्शयिष्यत्यसंशयम्
Nagabharyovacha
Arya suryaratham vodhum gatosau masacharikah
Saptashtabhirdinairvipra darshayishyatyasanshayam
345.9
एतद्विदितमार्यस्य विवासकरणं मम
भर्तुर्भवतु किं चान्यत्क्रियतां तद्वदस्व मे
Etadviditamaryasya vivasakaranam mama
Bharturbhavatu kim chanyatkriyatam tadvadasva me
345.10
ब्राह्मण उवाच
अनेन निश्चयेनाहं साध्वि संप्राप्तवानिह
प्रतीक्षन्नागमं देवि वत्स्याम्यस्मिन्महावने
Brahmana uvacha
Anena nishchayenaham sadhvi sampraptavaniha
Pratikshannagamam devi vatsyamyasminmahavane
345.11
संप्राप्तस्यैव चाव्यग्रमावेद्योऽहमिहागतः
ममाभिगमनं प्राप्तो वाच्यश्च वचनं त्वया
Sampraptasyaiva chavyagramavedyohamihagatah
Mamabhigamanam prapto vachyashcha vachanam tvaya
345.12
अहमप्यत्र वत्स्यामि गोमत्याः पुलिने शुभे
कालं परिमिताहारो यथोक्तं परिपालयन्
Ahamapyatra vatsyami gomatyah puline shubhe
Kalam parimitaharo yathoktam paripalayan
345.13
भीष्म उवाच
ततः स विप्रस्तां नागीं समाधाय पुनः पुनः
तदेव पुलिनं नद्याः प्रययौ ब्राह्मणर्षभः
Bhishma uvacha
Tatah sa viprastam nagim samadhaya punah punah
Tadeva pulinam nadyah prayayau brahmanarshabhah