Chapter 344

344.1

ब्राह्मण उवाच
अतिभारोद्यतस्यैव भारापनयनं महत्
पराश्वासकरं वाक्यमिदं मे भवतः श्रुतम्

Brahmana uvacha
Atibharodyatasyaiva bharapanayanam mahat
Parashvasakaram vakyamidam me bhavatah shrutam

अध्वक्लान्तस्य शयनं स्थानक्लान्तस्य चासनम्
तृषितस्य च पानीयं क्षुधार्तस्य च भोजनम्

Adhvaklantasya shayanam sthanaklantasya chasanam
Trishitasya cha paniyam kshudhartasya cha bhojanam

ईप्सितस्येव संप्राप्तिरन्नस्य समयेऽतिथेः
एषितस्यात्मनः काले वृद्धस्येव सुतो यथा

Ipsitasyeva sampraptirannasya samayetitheh
Eshitasyatmanah kale vriddhasyeva suto yatha

मनसा चिन्तितस्येव प्रीतिस्निग्धस्य दर्शनम्
प्रह्रादयति मां वाक्यं भवता यदुदीरितम्

Manasa chintitasyeva pritisnigdhasya darshanam
Prahradayati mam vakyam bhavata yadudiritam

दत्तचक्षुरिवाकाशे पश्यामि विमृशामि च
प्रज्ञानवचनाद्योऽयमुपदेशो हि मे कृतः
बाढमेवं करिष्यामि यथा मां भाषते भवान्

Dattachakshurivakashe pashyami vimrishami cha
Pragyanavachanadyoyamupadesho hi me kritah
Badhamevam karishyami yatha mam bhashate bhavan

इहेमां रजनीं साधो निवसस्व मया सह
प्रभाते यास्यति भवान्पर्याश्वस्तः सुखोषितः
असौ हि भगवान्सूर्यो मन्दरश्मिरवाङ्मुखः

Ihemam rajanim sadho nivasasva maya saha
Prabhate yasyati bhavanparyashvastah sukhoshitah
Asau hi bhagavansuryo mandarashmiravanmukhah

भीष्म उवाच
ततस्तेन कृतातिथ्यः सोऽतिथिः शत्रुसूदन
उवास किल तां रात्रिं सह तेन द्विजेन वै

Bhishma uvacha
Tatastena kritatithyah sotithih shatrusudana
Uvasa kila tam ratrim saha tena dvijena vai

तत्तच्च धर्मसंयुक्तं तयोः कथयतोस्तदा
व्यतीता सा निशा कृत्स्ना सुखेन दिवसोपमा

Tattachcha dharmasanyuktam tayoh kathayatostada
Vyatita sa nisha kritsna sukhena divasopama

ततः प्रभातसमये सोऽतिथिस्तेन पूजितः
ब्राह्मणेन यथाशक्त्या स्वकार्यमभिकाङ्क्षता

Tatah prabhatasamaye sotithistena pujitah
Brahmanena yathashaktya svakaryamabhikankshata

ततः स विप्रः कृतधर्मनिश्चयः; कृताभ्यनुज्ञः स्वजनेन धर्मवित्
यथोपदिष्टं भुजगेन्द्रसंश्रयं; जगाम काले सुकृतैकनिश्चयः

Tatah sa viprah kritadharmanishchayah; kritabhyanugyah svajanena dharmavit
Yathopadishtam bhujagendrasanshrayam; jagama kale sukritaikanishchayah