অধ্যায় 346

346.1

ভীষ্ম উবাচ
অথ তেন নরশ্রেষ্ঠ ব্রাহ্মণেন তপস্বিনা
নিরাহারেণ বসতা দুঃখিতাস্তে ভুজংগমাঃ

সর্বে সংভূয় সহিতাস্তস্য নাগস্য বান্ধবাঃ
ভ্রাতরস্তনয়া ভার্যা যয়ুস্তং ব্রাহ্মণং প্রতি

তেঽপশ্যন্পুলিনে তং বৈ বিবিক্তে নিয়তব্রতম্
সমাসীনং নিরাহারং দ্বিজং জপ্যপরায়ণম্

তে সর্বে সমভিক্রম্য বিপ্রমভ্যর্চ্য চাসকৃৎ
ঊচুর্বাক্যমসংদিগ্ধমাতিথেয়স্য বান্ধবাঃ

ষষ্ঠো হি দিবসস্তেঽদ্য প্রাপ্তস্যেহ তপোধন
ন চাভিলষসে কিংচিদাহারং ধর্মবত্সল

অস্মানভিগতশ্চাসি বয়ং চ ত্বামুপস্থিতাঃ
কার্যং চাতিথ্যমস্মাভির্বয়ং সর্বে কুটুম্বিনঃ

মূলং ফলং বা পর্ণং বা পয়ো বা দ্বিজসত্তম
আহারহেতোরন্নং বা ভোক্তুমর্হসি ব্রাহ্মণ

ত্যক্তাহারেণ ভবতা বনে নিবসতা সতা
বালবৃদ্ধমিদং সর্বং পীড্যতে ধর্মসংকটাৎ

ন হি নো ভ্রূণহা কশ্চিদ্রাজাপথ্যোঽনৃতোঽপি বা
পূর্বাশী বা কুলে হ্যস্মিন্দেবতাতিথিবন্ধুষু

ব্রাহ্মণ উবাচ
উপদেশেন যুষ্মাকমাহারোঽয়ং ময়া বৃতঃ
দ্বিরূনং দশরাত্রং বৈ নাগস্যাগমনং প্রতি

যদ্যষ্টরাত্রে নির্যাতে নাগমিষ্যতি পন্নগঃ
তদাহারং করিষ্যামি তন্নিমিত্তমিদং ব্রতম্

কর্তব্যো ন চ সংতাপো গম্যতাং চ যথাগতম্
তন্নিমিত্তং ব্রতং মহ্যং নৈতদ্ভেত্তুমিহার্হথ

ভীষ্ম উবাচ
তেন তে সমনুজ্ঞাতা ব্রাহ্মণেন ভুজংগমাঃ
স্বমেব ভবনং জগ্মুরকৃতার্থা নরর্ষভ