অধ্যায় 347

347.1

ভীষ্ম উবাচ
অথ কালে বহুতিথে পূর্ণে প্রাপ্তো ভুজংগমঃ
দত্তাভ্যনুজ্ঞঃ স্বং বেশ্ম কৃতকর্মা বিবস্বতঃ

তং ভার্যা সমভিক্রামত্পাদশৌচাদিভির্গুণৈঃ
উপপন্নাং চ তাং সাধ্বীং পন্নগঃ পর্যপৃচ্ছত

অপি ত্বমসি কল্যাণি দেবতাতিথিপূজনে
পূর্বমুক্তেন বিধিনা যুক্তা যুক্তেন মত্সমম্

ন খল্বস্যকৃতার্থেন স্ত্রীবুদ্ধ্যা মার্দবীকৃতা
মদ্বিয়োগেন সুশ্রোণি বিয়ুক্তা ধর্মসেতুনা

নাগভার্যোবাচ
শিষ্যাণাং গুরুশুশ্রূষা বিপ্রাণাং বেদপারণম্
ভৃত্যানাং স্বামিবচনং রাজ্ঞাং লোকানুপালনম্

সর্বভূতপরিত্রাণং ক্ষত্রধর্ম ইহোচ্যতে
বৈশ্যানাং যজ্ঞসংবৃত্তিরাতিথেয়সমন্বিতা

বিপ্রক্ষত্রিয়বৈশ্যানাং শুশ্রূষা শূদ্রকর্ম তৎ
গৃহস্থধর্মো নাগেন্দ্র সর্বভূতহিতৈষিতা

নিয়তাহারতা নিত্যং ব্রতচর্যা যথাক্রমম্
ধর্মো হি ধর্মসংবন্ধাদিন্দ্রিয়াণাং বিশেষণম্

অহং কস্য কুতো বাহং কঃ কো মে হ ভবেদিতি
প্রয়োজনমতির্নিত্যমেবং মোক্ষাশ্রমী ভবেৎ

পতিব্রতাত্বং ভার্যায়াঃ পরমো ধর্ম উচ্যতে
তবোপদেশান্নাগেন্দ্র তচ্চ তত্ত্বেন বেদ্মি বৈ

সাহং ধর্মং বিজানন্তী ধর্মনিত্যে ত্বয়ি স্থিতে
সত্পথং কথমুত্সৃজ্য যাস্যামি বিষমে পথি

দেবতানাং মহাভাগ ধর্মচর্যা ন হীয়তে
অতিথীনাং চ সত্কারে নিত্যয়ুক্তাস্ম্যতন্দ্রিতা

সপ্তাষ্টদিবসাস্ত্বদ্য বিপ্রস্যেহাগতস্য বৈ
স চ কার্যং ন মে খ্যাতি দর্শনং তব কাঙ্ক্ষতি

গোমত্যাস্ত্বেষ পুলিনে ত্বদ্দর্শনসমুত্সুকঃ
আসীনোঽঽবর্তয়ন্ব্রহ্ম ব্রাহ্মণঃ সংশিতব্রতঃ

অহং ত্বনেন নাগেন্দ্র সামপূর্বং সমাহিতা
প্রস্থাপ্যো মত্সকাশং স সংপ্রাপ্তো ভুজগোত্তমঃ

এতচ্ছ্রুত্বা মহাপ্রাজ্ঞ তত্র গন্তুং ত্বমর্হসি
দাতুমর্হসি বা তস্য দর্শনং দর্শনশ্রবঃ