অধ্যায় 348

348.1

নাগ উবাচ
অথ ব্রাহ্মণরূপেণ কং তং সমনুপশ্যসি
মানুষং কেবলং বিপ্রং দেবং বাথ শুচিস্মিতে

কো হি মাং মানুষঃ শক্তো দ্রষ্টুকামো যশস্বিনি
সংদর্শনরুচির্বাক্যমাজ্ঞাপূর্বং বদিষ্যতি

সুরাসুরগণানাং চ দেবর্ষীণাং চ ভামিনি
ননু নাগা মহাবীর্যাঃ সৌরসেয়াস্তরস্বিনঃ

বন্দনীয়াশ্চ বরদা বয়মপ্যনুয়ায়িনঃ
মনুষ্যাণাং বিশেষেণ ধনাধ্যক্ষা ইতি শ্রুতিঃ

নাগভার্যোবাচ
আর্জবেনাভিজানামি নাসৌ দেবোঽনিলাশন
একং ত্বস্য বিজানামি ভক্তিমানতিরোষণঃ

স হি কার্যান্তরাকাঙ্ক্ষী জলেপ্সুঃ স্তোককো যথা
বর্ষং বর্ষপ্রিয়ঃ পক্ষী দর্শনং তব কাঙ্ক্ষতি

ন হি ত্বা দৈবতং কিংচিদ্বিবিগ্নং প্রতিপালয়েৎ
তুল্যে হ্যভিজনে জাতো ন কশ্চিত্পর্যুপাসতে

তদ্রোষং সহজং ত্যক্ত্বা ত্বমেনং দ্রষ্টুমর্হসি
আশাছেদেন তস্যাদ্য নাত্মানং দগ্ধুমর্হসি

আশয়া ত্বভিপন্নানামকৃত্বাশ্রুপ্রমার্জনম্
রাজা বা রাজপুত্রো বা ভ্রূণহত্যৈব যুজ্যতে

মৌনাজ্জ্ঞানফলাবাপ্তির্দানেন চ যশো মহৎ
বাগ্মিত্বং সত্যবাক্যেন পরত্র চ মহীয়তে

ভূমিপ্রদানেন গতিং লভত্যাশ্রমসংমিতাম্
নষ্টস্যার্থস্য সংপ্রাপ্তিং কৃত্বা ফলমুপাশ্নুতে

অভিপ্রেতামসংক্লিষ্টাং কৃত্বাকামবতীং ক্রিয়াম্
ন যাতি নিরয়ং কশ্চিদিতি ধর্মবিদো বিদুঃ

নাগ উবাচ
অভিমানেন মানো মে জাতিদোষেণ বৈ মহান্
রোষঃ সংকল্পজঃ সাধ্বি দগ্ধো বাচাগ্নিনা ত্বয়া

ন চ রোষাদহং সাধ্বি পশ্যেয়মধিকং তমঃ
যস্য বক্তব্যতাং যান্তি বিশেষেণ ভুজংগমাঃ

দোষস্য হি বশং গত্বা দশগ্রীবঃ প্রতাপবান্
তথা শক্রপ্রতিস্পর্ধী হতো রামেণ সংয়ুগে

অন্তঃপুরগতং বত্সং শ্রুত্বা রামেণ নির্হৃতম্
ধর্ষণাদ্রোষসংবিগ্নাঃ কার্তবীর্যসুতা হতাঃ

জামদগ্ন্যেন রামেণ সহস্রনয়নোপমঃ
সংয়ুগে নিহতো রোষাত্কার্তবীর্যো মহাবলঃ

তদেষ তপসাং শত্রুঃ শ্রেয়সশ্চ নিপাতনঃ
নিগৃহীতো ময়া রোষঃ শ্রুত্বৈব বচনং তব

আত্মানং চ বিশেষেণ প্রশংসাম্যনপায়িনি
যস্য মে ত্বং বিশালাক্ষি ভার্যা সর্বগুণান্বিতা

এষ তত্রৈব গচ্ছামি যত্র তিষ্ঠত্যসৌ দ্বিজঃ
সর্বথা চোক্তবান্বাক্যং নাকৃতার্থঃ প্রয়াস্যতি