অধ্যায় 349

349.1

ভীষ্ম উবাচ
স পন্নগপতিস্তত্র প্রয়য়ৌ ব্রাহ্মণং প্রতি
তমেব মনসা ধ্যায়ন্কার্যবত্তাং বিচারয়ন্

তমভিক্রম্য নাগেন্দ্রো মতিমান্স নরেশ্বর
প্রোবাচ মধুরং বাক্যং প্রকৃত্যা ধর্মবত্সলঃ

ভো ভো ক্ষাম্যাভিভাষে ত্বাং ন রোষং কর্তুমর্হসি
ইহ ত্বমভিসংপ্রাপ্তঃ কস্যার্থে কিং প্রয়োজনম্

আভিমুখ্যাদভিক্রম্য স্নেহাত্পৃচ্ছামি তে দ্বিজ
বিবিক্তে গোমতীতীরে কিং বা ত্বং পর্যুপাসসে

ব্রাহ্মণ উবাচ
ধর্মারণ্যং হি মাং বিদ্ধি নাগং দ্রষ্টুমিহাগতম্
পদ্মনাভং দ্বিজশ্রেষ্ঠং তত্র মে কার্যমাহিতম্

তস্য চাহমসাংনিধ্যং শ্রুতবানস্মি তং গতম্
স্বজনং তং প্রতীক্ষামি পর্জন্যমিব কর্ষকঃ

তস্য চাক্লেশকরণং স্বস্তিকারসমাহিতম্
বর্তয়াম্যয়ুতং ব্রহ্ম যোগয়ুক্তো নিরাময়ঃ

নাগ উবাচ
অহো কল্যাণবৃত্তস্ত্বং সাধু সজ্জনবত্সলঃ
শ্রবাঢ্যস্ত্বং মহাভাগ পরং স্নেহেন পশ্যসি

অহং স নাগো বিপ্রর্ষে যথা মাং বিন্দতে ভবান্
আজ্ঞাপয় যথা স্বৈরং কিং করোমি প্রিয়ং তব

ভবন্তং স্বজনাদস্মি সংপ্রাপ্তং শ্রুতবানিহ
অতস্ত্বাং স্বয়মেবাহং দ্রষ্টুমভ্যাগতো দ্বিজ

সংপ্রাপ্তশ্চ ভবানদ্য কৃতার্থঃ প্রতিয়াস্যতি
বিস্রব্ধো মাং দ্বিজশ্রেষ্ঠ বিষয়ে যোক্তুমর্হসি

বয়ং হি ভবতা সর্বে গুণক্রীতা বিশেষতঃ
যস্ত্বমাত্মহিতং ত্যক্ত্বা মামেবেহানুরুধ্যসে

ব্রাহ্মণ উবাচ
আগতোঽহং মহাভাগ তব দর্শনলালসঃ
কংচিদর্থমনর্থজ্ঞঃ প্রষ্টুকামো ভুজংগম

অহমাত্মানমাত্মস্থো মার্গমাণোঽঽত্মনো হিতম্
বাসার্থিনং মহাপ্রাজ্ঞ বলবন্তমুপাস্মি হ

প্রকাশিতস্ত্বং স্বগুণৈর্যশোগর্ভগভস্তিভিঃ
শশাঙ্ককরসংস্পর্শৈর্হৃদ্যৈরাত্মপ্রকাশিতৈঃ

তস্য মে প্রশ্নমুত্পন্নং ছিন্ধি ত্বমনিলাশন
পশ্চাত্কার্যং বদিষ্যামি শ্রোতুমর্হতি মে ভবান্