UtshovChapter 349
349.1
भीष्म उवाच
स पन्नगपतिस्तत्र प्रययौ ब्राह्मणं प्रति
तमेव मनसा ध्यायन्कार्यवत्तां विचारयन्
Bhishma uvacha
Sa pannagapatistatra prayayau brahmanam prati
Tameva manasa dhyayankaryavattam vicharayan
349.2
तमभिक्रम्य नागेन्द्रो मतिमान्स नरेश्वर
प्रोवाच मधुरं वाक्यं प्रकृत्या धर्मवत्सलः
Tamabhikramya nagendro matimansa nareshvara
Provacha madhuram vakyam prakritya dharmavatsalah
349.3
भो भो क्षाम्याभिभाषे त्वां न रोषं कर्तुमर्हसि
इह त्वमभिसंप्राप्तः कस्यार्थे किं प्रयोजनम्
Bho bho kshamyabhibhashe tvam na rosham kartumarhasi
Iha tvamabhisampraptah kasyarthe kim prayojanam
349.4
आभिमुख्यादभिक्रम्य स्नेहात्पृच्छामि ते द्विज
विविक्ते गोमतीतीरे किं वा त्वं पर्युपाससे
Abhimukhyadabhikramya snehatprichchhami te dvija
Vivikte gomatitire kim va tvam paryupasase
349.5
ब्राह्मण उवाच
धर्मारण्यं हि मां विद्धि नागं द्रष्टुमिहागतम्
पद्मनाभं द्विजश्रेष्ठं तत्र मे कार्यमाहितम्
Brahmana uvacha
Dharmaranyam hi mam viddhi nagam drashtumihagatam
Padmanabham dvijashreshtham tatra me karyamahitam
349.6
तस्य चाहमसांनिध्यं श्रुतवानस्मि तं गतम्
स्वजनं तं प्रतीक्षामि पर्जन्यमिव कर्षकः
Tasya chahamasannidhyam shrutavanasmi tam gatam
Svajanam tam pratikshami parjanyamiva karshakah
349.7
तस्य चाक्लेशकरणं स्वस्तिकारसमाहितम्
वर्तयाम्ययुतं ब्रह्म योगयुक्तो निरामयः
Tasya chakleshakaranam svastikarasamahitam
Vartayamyayutam brahma yogayukto niramayah
349.8
नाग उवाच
अहो कल्याणवृत्तस्त्वं साधु सज्जनवत्सलः
श्रवाढ्यस्त्वं महाभाग परं स्नेहेन पश्यसि
Naga uvacha
Aho kalyanavrittastvam sadhu sajjanavatsalah
Shravadhyastvam mahabhaga param snehena pashyasi
349.9
अहं स नागो विप्रर्षे यथा मां विन्दते भवान्
आज्ञापय यथा स्वैरं किं करोमि प्रियं तव
Aham sa nago viprarshe yatha mam vindate bhavan
Agyapaya yatha svairam kim karomi priyam tava
349.10
भवन्तं स्वजनादस्मि संप्राप्तं श्रुतवानिह
अतस्त्वां स्वयमेवाहं द्रष्टुमभ्यागतो द्विज
Bhavantam svajanadasmi sampraptam shrutavaniha
Atastvam svayamevaham drashtumabhyagato dvija
349.11
संप्राप्तश्च भवानद्य कृतार्थः प्रतियास्यति
विस्रब्धो मां द्विजश्रेष्ठ विषये योक्तुमर्हसि
Sampraptashcha bhavanadya kritarthah pratiyasyati
Visrabdho mam dvijashreshtha vishaye yoktumarhasi
349.12
वयं हि भवता सर्वे गुणक्रीता विशेषतः
यस्त्वमात्महितं त्यक्त्वा मामेवेहानुरुध्यसे
Vayam hi bhavata sarve gunakrita visheshatah
Yastvamatmahitam tyaktva mamevehanurudhyase
349.13
ब्राह्मण उवाच
आगतोऽहं महाभाग तव दर्शनलालसः
कंचिदर्थमनर्थज्ञः प्रष्टुकामो भुजंगम
Brahmana uvacha
Agatoham mahabhaga tava darshanalalasah
Kanchidarthamanarthagyah prashtukamo bhujangama
349.14
अहमात्मानमात्मस्थो मार्गमाणोऽऽत्मनो हितम्
वासार्थिनं महाप्राज्ञ बलवन्तमुपास्मि ह
Ahamatmanamatmastho margamanotmano hitam
Vasarthinam mahapragya balavantamupasmi ha
349.15
प्रकाशितस्त्वं स्वगुणैर्यशोगर्भगभस्तिभिः
शशाङ्ककरसंस्पर्शैर्हृद्यैरात्मप्रकाशितैः
Prakashitastvam svagunairyashogarbhagabhastibhih
Shashankakarasansparshairhridyairatmaprakashitaih
349.16
तस्य मे प्रश्नमुत्पन्नं छिन्धि त्वमनिलाशन
पश्चात्कार्यं वदिष्यामि श्रोतुमर्हति मे भवान्
Tasya me prashnamutpannam chhindhi tvamanilashana
Pashchatkaryam vadishyami shrotumarhati me bhavan