UtshovChapter 350
350.1
ब्राह्मण उवाच
विवस्वतो गच्छति पर्ययेण; वोढुं भवांस्तं रथमेकचक्रम्
आश्चर्यभूतं यदि तत्र किंचि;द्दृष्टं त्वया शंसितुमर्हसि त्वम्
Brahmana uvacha
Vivasvato gachchhati paryayena; vodhum bhavanstam rathamekachakram
Ashcharyabhutam yadi tatra kinchi;ddrishtam tvaya shansitumarhasi tvam
350.2
नाग उवाच
यस्य रश्मिसहस्रेषु शाखास्विव विहंगमाः
वसन्त्याश्रित्य मुनयः संसिद्धा दैवतैः सह
Naga uvacha
Yasya rashmisahasreshu shakhasviva vihangamah
Vasantyashritya munayah sansiddha daivataih saha
350.3
यतो वायुर्विनिःसृत्य सूर्यरश्म्याश्रितो महान्
विजृम्भत्यम्बरे विप्र किमाश्चर्यतरं ततः
Yato vayurvinihsritya suryarashmyashrito mahan
Vijrimbhatyambare vipra kimashcharyataram tatah
350.4
शुक्रो नामासितः पादो यस्य वारिधरोऽम्बरे
तोयं सृजति वर्षासु किमाश्चर्यमतः परम्
Shukro namasitah pado yasya varidharombare
Toyam srijati varshasu kimashcharyamatah param
350.5
योऽष्टमासांस्तु शुचिना किरणेनोज्झितं पयः
पर्यादत्ते पुनः काले किमाश्चर्यमतः परम्
Yoshtamasanstu shuchina kiranenojjhitam payah
Paryadatte punah kale kimashcharyamatah param
350.6
यस्य तेजोविशेषेषु नित्यमात्मा प्रतिष्ठितः
यतो बीजं मही चेयं धार्यते सचराचरम्
Yasya tejovishesheshu nityamatma pratishthitah
Yato bijam mahi cheyam dharyate sacharacharam
350.7
यत्र देवो महाबाहुः शाश्वतः परमोऽक्षरः
अनादिनिधनो विप्र किमाश्चर्यमतः परम्
Yatra devo mahabahuh shashvatah paramoksharah
Anadinidhano vipra kimashcharyamatah param
350.8
आश्चर्याणामिवाश्चर्यमिदमेकं तु मे शृणु
विमले यन्मया दृष्टमम्बरे सूर्यसंश्रयात्
Ashcharyanamivashcharyamidamekam tu me shrinu
Vimale yanmaya drishtamambare suryasanshrayat
350.9
पुरा मध्याह्नसमये लोकांस्तपति भास्करे
प्रत्यादित्यप्रतीकाशः सर्वतः प्रत्यदृश्यत
Pura madhyahnasamaye lokanstapati bhaskare
Pratyadityapratikashah sarvatah pratyadrishyata
350.10
स लोकांस्तेजसा सर्वान्स्वभासा निर्विभासयन्
आदित्याभिमुखोऽभ्येति गगनं पाटयन्निव
Sa lokanstejasa sarvansvabhasa nirvibhasayan
Adityabhimukhobhyeti gaganam patayanniva
350.11
हुताहुतिरिव ज्योतिर्व्याप्य तेजोमरीचिभिः
अनिर्देश्येन रूपेण द्वितीय इव भास्करः
Hutahutiriva jyotirvyapya tejomarichibhih
Anirdeshyena rupena dvitiya iva bhaskarah
350.12
तस्याभिगमनप्राप्तौ हस्तो दत्तो विवस्वता
तेनापि दक्षिणो हस्तो दत्तः प्रत्यर्चनार्थिना
Tasyabhigamanapraptau hasto datto vivasvata
Tenapi dakshino hasto dattah pratyarchanarthina
350.13
ततो भित्त्वैव गगनं प्रविष्टो रविमण्डलम्
एकीभूतं च तत्तेजः क्षणेनादित्यतां गतम्
Tato bhittvaiva gaganam pravishto ravimandalam
Ekibhutam cha tattejah kshanenadityatam gatam
350.14
तत्र नः संशयो जातस्तयोस्तेजःसमागमे
अनयोः को भवेत्सूर्यो रथस्थो योऽयमागतः
Tatra nah sanshayo jatastayostejahsamagame
Anayoh ko bhavetsuryo rathastho yoyamagatah
350.15
ते वयं जातसंदेहाः पर्यपृच्छामहे रविम्
क एष दिवमाक्रम्य गतः सूर्य इवापरः
Te vayam jatasandehah paryaprichchhamahe ravim
Ka esha divamakramya gatah surya ivaparah