অধ্যায় 350

350.1

ব্রাহ্মণ উবাচ
বিবস্বতো গচ্ছতি পর্যয়েণ; বোঢুং ভবাংস্তং রথমেকচক্রম্
আশ্চর্যভূতং যদি তত্র কিংচি;দ্দৃষ্টং ত্বয়া শংসিতুমর্হসি ত্বম্

নাগ উবাচ
যস্য রশ্মিসহস্রেষু শাখাস্বিব বিহংগমাঃ
বসন্ত্যাশ্রিত্য মুনয়ঃ সংসিদ্ধা দৈবতৈঃ সহ

যতো বায়ুর্বিনিঃসৃত্য সূর্যরশ্ম্যাশ্রিতো মহান্
বিজৃম্ভত্যম্বরে বিপ্র কিমাশ্চর্যতরং ততঃ

শুক্রো নামাসিতঃ পাদো যস্য বারিধরোঽম্বরে
তোয়ং সৃজতি বর্ষাসু কিমাশ্চর্যমতঃ পরম্

যোঽষ্টমাসাংস্তু শুচিনা কিরণেনোজ্ঝিতং পয়ঃ
পর্যাদত্তে পুনঃ কালে কিমাশ্চর্যমতঃ পরম্

যস্য তেজোবিশেষেষু নিত্যমাত্মা প্রতিষ্ঠিতঃ
যতো বীজং মহী চেয়ং ধার্যতে সচরাচরম্

যত্র দেবো মহাবাহুঃ শাশ্বতঃ পরমোঽক্ষরঃ
অনাদিনিধনো বিপ্র কিমাশ্চর্যমতঃ পরম্

আশ্চর্যাণামিবাশ্চর্যমিদমেকং তু মে শৃণু
বিমলে যন্ময়া দৃষ্টমম্বরে সূর্যসংশ্রয়াৎ

পুরা মধ্যাহ্নসময়ে লোকাংস্তপতি ভাস্করে
প্রত্যাদিত্যপ্রতীকাশঃ সর্বতঃ প্রত্যদৃশ্যত

স লোকাংস্তেজসা সর্বান্স্বভাসা নির্বিভাসয়ন্
আদিত্যাভিমুখোঽভ্যেতি গগনং পাটয়ন্নিব

হুতাহুতিরিব জ্যোতির্ব্যাপ্য তেজোমরীচিভিঃ
অনির্দেশ্যেন রূপেণ দ্বিতীয় ইব ভাস্করঃ

তস্যাভিগমনপ্রাপ্তৌ হস্তো দত্তো বিবস্বতা
তেনাপি দক্ষিণো হস্তো দত্তঃ প্রত্যর্চনার্থিনা

ততো ভিত্ত্বৈব গগনং প্রবিষ্টো রবিমণ্ডলম্
একীভূতং চ তত্তেজঃ ক্ষণেনাদিত্যতাং গতম্

তত্র নঃ সংশয়ো জাতস্তয়োস্তেজঃসমাগমে
অনয়োঃ কো ভবেত্সূর্যো রথস্থো যোঽয়মাগতঃ

তে বয়ং জাতসংদেহাঃ পর্যপৃচ্ছামহে রবিম্
ক এষ দিবমাক্রম্য গতঃ সূর্য ইবাপরঃ