UtshovChapter 49
49.1
ब्रह्मोवाच
हन्त वः संप्रवक्ष्यामि यन्मां पृच्छथ सत्तमाः
समस्तमिह तच्छ्रुत्वा सम्यगेवावधार्यताम्
Brahmovacha
Hanta vah sampravakshyami yanmam prichchhatha sattamah
Samastamiha tachchhrutva samyagevavadharyatam
49.2
अहिंसा सर्वभूतानामेतत्कृत्यतमं मतम्
एतत्पदमनुद्विग्नं वरिष्ठं धर्मलक्षणम्
Ahinsa sarvabhutanametatkrityatamam matam
Etatpadamanudvignam varishtham dharmalakshanam
49.3
ज्ञानं निःश्रेय इत्याहुर्वृद्धा निश्चयदर्शिनः
तस्माज्ज्ञानेन शुद्धेन मुच्यते सर्वपातकैः
Gyanam nihshreya ityahurvriddha nishchayadarshinah
Tasmajgyanena shuddhena muchyate sarvapatakaih
49.4
हिंसापराश्च ये लोके ये च नास्तिकवृत्तयः
लोभमोहसमायुक्तास्ते वै निरयगामिनः
Hinsaparashcha ye loke ye cha nastikavrittayah
Lobhamohasamayuktaste vai nirayagaminah
49.5
आशीर्युक्तानि कर्माणि कुर्वते ये त्वतन्द्रिताः
तेऽस्मिँल्लोके प्रमोदन्ते जायमानाः पुनः पुनः
Ashiryuktani karmani kurvate ye tvatandritah
Tesminlloke pramodante jayamanah punah punah
49.6
कुर्वते ये तु कर्माणि श्रद्दधाना विपश्चितः
अनाशीर्योगसंयुक्तास्ते धीराः साधुदर्शिनः
Kurvate ye tu karmani shraddadhana vipashchitah
Anashiryogasanyuktaste dhirah sadhudarshinah
49.7
अतः परं प्रवक्ष्यामि सत्त्वक्षेत्रज्ञयोर्यथा
संयोगो विप्रयोगश्च तन्निबोधत सत्तमाः
Atah param pravakshyami sattvakshetragyayoryatha
Sanyogo viprayogashcha tannibodhata sattamah
49.8
विषयो विषयित्वं च संबन्धोऽयमिहोच्यते
विषयी पुरुषो नित्यं सत्त्वं च विषयः स्मृतः
Vishayo vishayitvam cha sambandhoyamihochyate
Vishayi purusho nityam sattvam cha vishayah smritah
49.9
व्याख्यातं पूर्वकल्पेन मशकोदुम्बरं यथा
भुज्यमानं न जानीते नित्यं सत्त्वमचेतनम्
यस्त्वेव तु विजानीते यो भुङ्क्ते यश्च भुज्यते
Vyakhyatam purvakalpena mashakodumbaram yatha
Bhujyamanam na janite nityam sattvamachetanam
Yastveva tu vijanite yo bhunkte yashcha bhujyate
49.10
अनित्यं द्वंद्वसंयुक्तं सत्त्वमाहुर्गुणात्मकम्
निर्द्वंद्वो निष्कलो नित्यः क्षेत्रज्ञो निर्गुणात्मकः
Anityam dvandvasanyuktam sattvamahurgunatmakam
Nirdvandvo nishkalo nityah kshetragyo nirgunatmakah
49.11
समः संज्ञागतस्त्वेवं यदा सर्वत्र दृश्यते
उपभुङ्क्ते सदा सत्त्वमापः पुष्करपर्णवत्
Samah sangyagatastvevam yada sarvatra drishyate
Upabhunkte sada sattvamapah pushkaraparnavat
49.12
सर्वैरपि गुणैर्विद्वान्व्यतिषक्तो न लिप्यते
जलबिन्दुर्यथा लोलः पद्मिनीपत्रसंस्थितः
एवमेवाप्यसंसक्तः पुरुषः स्यान्न संशयः
Sarvairapi gunairvidvanvyatishakto na lipyate
Jalabinduryatha lolah padminipatrasansthitah
Evamevapyasansaktah purushah syanna sanshayah
49.13
द्रव्यमात्रमभूत्सत्त्वं पुरुषस्येति निश्चयः
यथा द्रव्यं च कर्ता च संयोगोऽप्यनयोस्तथा
Dravyamatramabhutsattvam purushasyeti nishchayah
Yatha dravyam cha karta cha sanyogopyanayostatha
49.14
यथा प्रदीपमादाय कश्चित्तमसि गच्छति
तथा सत्त्वप्रदीपेन गच्छन्ति परमैषिणः
Yatha pradipamadaya kashchittamasi gachchhati
Tatha sattvapradipena gachchhanti paramaishinah
49.15
यावद्द्रव्यगुणस्तावत्प्रदीपः संप्रकाशते
क्षीणद्रव्यगुणं ज्योतिरन्तर्धानाय गच्छति
Yavaddravyagunastavatpradipah samprakashate
Kshinadravyagunam jyotirantardhanaya gachchhati
49.16
व्यक्तः सत्त्वगुणस्त्वेवं पुरुषोऽव्यक्त इष्यते
एतद्विप्रा विजानीत हन्त भूयो ब्रवीमि वः
Vyaktah sattvagunastvevam purushovyakta ishyate
Etadvipra vijanita hanta bhuyo bravimi vah
49.17
सहस्रेणापि दुर्मेधा न वृद्धिमधिगच्छति
चतुर्थेनाप्यथांशेन बुद्धिमान्सुखमेधते
Sahasrenapi durmedha na vriddhimadhigachchhati
Chaturthenapyathanshena buddhimansukhamedhate
49.18
एवं धर्मस्य विज्ञेयं संसाधनमुपायतः
उपायज्ञो हि मेधावी सुखमत्यन्तमश्नुते
Evam dharmasya vigyeyam sansadhanamupayatah
Upayagyo hi medhavi sukhamatyantamashnute
49.19
यथाध्वानमपाथेयः प्रपन्नो मानवः क्वचित्
क्लेशेन याति महता विनश्यत्यन्तरापि वा
Yathadhvanamapatheyah prapanno manavah kvachit
Kleshena yati mahata vinashyatyantarapi va
49.20
तथा कर्मसु विज्ञेयं फलं भवति वा न वा
पुरुषस्यात्मनिःश्रेयः शुभाशुभनिदर्शनम्
Tatha karmasu vigyeyam phalam bhavati va na va
Purushasyatmanihshreyah shubhashubhanidarshanam
49.21
यथा च दीर्घमध्वानं पद्भ्यामेव प्रपद्यते
अदृष्टपूर्वं सहसा तत्त्वदर्शनवर्जितः
Yatha cha dirghamadhvanam padbhyameva prapadyate
Adrishtapurvam sahasa tattvadarshanavarjitah
49.22
तमेव च यथाध्वानं रथेनेहाशुगामिना
यायादश्वप्रयुक्तेन तथा बुद्धिमतां गतिः
Tameva cha yathadhvanam rathenehashugamina
Yayadashvaprayuktena tatha buddhimatam gatih
49.23
उच्चं पर्वतमारुह्य नान्ववेक्षेत भूगतम्
रथेन रथिनं पश्येत्क्लिश्यमानमचेतनम्
Uchcham parvatamaruhya nanvaveksheta bhugatam
Rathena rathinam pashyetklishyamanamachetanam
49.24
यावद्रथपथस्तावद्रथेन स तु गच्छति
क्षीणे रथपथे प्राज्ञो रथमुत्सृज्य गच्छति
Yavadrathapathastavadrathena sa tu gachchhati
Kshine rathapathe pragyo rathamutsrijya gachchhati
49.25
एवं गच्छति मेधावी तत्त्वयोगविधानवित्
समाज्ञाय महाबुद्धिरुत्तरादुत्तरोत्तरम्
Evam gachchhati medhavi tattvayogavidhanavit
Samagyaya mahabuddhiruttaraduttarottaram
49.26
यथा महार्णवं घोरमप्लवः संप्रगाहते
बाहुभ्यामेव संमोहाद्वधं चर्च्छत्यसंशयम्
Yatha maharnavam ghoramaplavah sampragahate
Bahubhyameva sammohadvadham charchchhatyasanshayam
49.27
नावा चापि यथा प्राज्ञो विभागज्ञस्तरित्रया
अक्लान्तः सलिलं गाहेत्क्षिप्रं संतरति ध्रुवम्
Nava chapi yatha pragyo vibhagagyastaritraya
Aklantah salilam gahetkshipram santarati dhruvam
49.28
तीर्णो गच्छेत्परं पारं नावमुत्सृज्य निर्ममः
व्याख्यातं पूर्वकल्पेन यथा रथिपदातिनौ
Tirno gachchhetparam param navamutsrijya nirmamah
Vyakhyatam purvakalpena yatha rathipadatinau
49.29
स्नेहात्संमोहमापन्नो नावि दाशो यथा तथा
ममत्वेनाभिभूतः स तत्रैव परिवर्तते
Snehatsammohamapanno navi dasho yatha tatha
Mamatvenabhibhutah sa tatraiva parivartate
49.30
नावं न शक्यमारुह्य स्थले विपरिवर्तितुम्
तथैव रथमारुह्य नाप्सु चर्या विधीयते
Navam na shakyamaruhya sthale viparivartitum
Tathaiva rathamaruhya napsu charya vidhiyate
49.31
एवं कर्म कृतं चित्रं विषयस्थं पृथक्पृथक्
यथा कर्म कृतं लोके तथा तदुपपद्यते
Evam karma kritam chitram vishayastham prithakprithak
Yatha karma kritam loke tatha tadupapadyate
49.32
यन्नैव गन्धिनो रस्यं न रूपस्पर्शशब्दवत्
मन्यन्ते मुनयो बुद्ध्या तत्प्रधानं प्रचक्षते
Yannaiva gandhino rasyam na rupasparshashabdavat
Manyante munayo buddhya tatpradhanam prachakshate
49.33
तत्र प्रधानमव्यक्तमव्यक्तस्य गुणो महान्
महतः प्रधानभूतस्य गुणोऽहंकार एव च
Tatra pradhanamavyaktamavyaktasya guno mahan
Mahatah pradhanabhutasya gunohankara eva cha
49.34
अहंकारप्रधानस्य महाभूतकृतो गुणः
पृथक्त्वेन हि भूतानां विषया वै गुणाः स्मृताः
Ahankarapradhanasya mahabhutakrito gunah
Prithaktvena hi bhutanam vishaya vai gunah smritah
49.35
बीजधर्मं यथाव्यक्तं तथैव प्रसवात्मकम्
बीजधर्मा महानात्मा प्रसवश्चेति नः श्रुतम्
Bijadharmam yathavyaktam tathaiva prasavatmakam
Bijadharma mahanatma prasavashcheti nah shrutam
49.36
बीजधर्मा त्वहंकारः प्रसवश्च पुनः पुनः
बीजप्रसवधर्माणि महाभूतानि पञ्च वै
Bijadharma tvahankarah prasavashcha punah punah
Bijaprasavadharmani mahabhutani pancha vai
49.37
बीजधर्मिण इत्याहुः प्रसवं च न कुर्वते
विशेषाः पञ्चभूतानां तेषां वित्तं विशेषणम्
Bijadharmina ityahuh prasavam cha na kurvate
Visheshah panchabhutanam tesham vittam visheshanam
49.38
तत्रैकगुणमाकाशं द्विगुणो वायुरुच्यते
त्रिगुणं ज्योतिरित्याहुरापश्चापि चतुर्गुणाः
Tatraikagunamakasham dviguno vayuruchyate
Trigunam jyotirityahurapashchapi chaturgunah
49.39
पृथ्वी पञ्चगुणा ज्ञेया त्रसस्थावरसंकुला
सर्वभूतकरी देवी शुभाशुभनिदर्शना
Prithvi panchaguna gyeya trasasthavarasankula
Sarvabhutakari devi shubhashubhanidarshana
49.40
शब्दः स्पर्शस्तथा रूपं रसो गन्धश्च पञ्चमः
एते पञ्च गुणा भूमेर्विज्ञेया द्विजसत्तमाः
Shabdah sparshastatha rupam raso gandhashcha panchamah
Ete pancha guna bhumervigyeya dvijasattamah
49.41
पार्थिवश्च सदा गन्धो गन्धश्च बहुधा स्मृतः
तस्य गन्धस्य वक्ष्यामि विस्तरेण बहून्गुणान्
Parthivashcha sada gandho gandhashcha bahudha smritah
Tasya gandhasya vakshyami vistarena bahungunan
49.42
इष्टश्चानिष्टगन्धश्च मधुरोऽम्लः कटुस्तथा
निर्हारी संहतः स्निग्धो रूक्षो विशद एव च
एवं दशविधो ज्ञेयः पार्थिवो गन्ध इत्युत
Ishtashchanishtagandhashcha madhuromlah katustatha
Nirhari sanhatah snigdho ruksho vishada eva cha
Evam dashavidho gyeyah parthivo gandha ityuta
49.43
शब्दः स्पर्शस्तथा रूपं रसश्चापां गुणाः स्मृताः
रसज्ञानं तु वक्ष्यामि रसस्तु बहुधा स्मृतः
Shabdah sparshastatha rupam rasashchapam gunah smritah
Rasagyanam tu vakshyami rasastu bahudha smritah
49.44
मधुरोऽम्लः कटुस्तिक्तः कषायो लवणस्तथा
एवं षड्विधविस्तारो रसो वारिमयः स्मृतः
Madhuromlah katustiktah kashayo lavanastatha
Evam shadvidhavistaro raso varimayah smritah
49.45
शब्दः स्पर्शस्तथा रूपं त्रिगुणं ज्योतिरुच्यते
ज्योतिषश्च गुणो रूपं रूपं च बहुधा स्मृतम्
Shabdah sparshastatha rupam trigunam jyotiruchyate
Jyotishashcha guno rupam rupam cha bahudha smritam
49.46
शुक्लं कृष्णं तथा रक्तं नीलं पीतारुणं तथा
ह्रस्वं दीर्घं तथा स्थूलं चतुरस्राणु वृत्तकम्
Shuklam krishnam tatha raktam nilam pitarunam tatha
Hrasvam dirgham tatha sthulam chaturasranu vrittakam
49.47
एवं द्वादशविस्तारं तेजसो रूपमुच्यते
विज्ञेयं ब्राह्मणैर्नित्यं धर्मज्ञैः सत्यवादिभिः
Evam dvadashavistaram tejaso rupamuchyate
Vigyeyam brahmanairnityam dharmagyaih satyavadibhih
49.48
शब्दस्पर्शौ च विज्ञेयौ द्विगुणो वायुरुच्यते
वायोश्चापि गुणः स्पर्शः स्पर्शश्च बहुधा स्मृतः
Shabdasparshau cha vigyeyau dviguno vayuruchyate
Vayoshchapi gunah sparshah sparshashcha bahudha smritah
49.49
उष्णः शीतः सुखो दुःखः स्निग्धो विशद एव च
कठिनश्चिक्कणः श्लक्ष्णः पिच्छिलो दारुणो मृदुः
Ushnah shitah sukho duhkhah snigdho vishada eva cha
Kathinashchikkanah shlakshnah pichchhilo daruno mriduh
49.50
एवं द्वादशविस्तारो वायव्यो गुण उच्यते
विधिवद्ब्रह्मणैः सिद्धैर्धर्मज्ञैस्तत्त्वदर्शिभिः
Evam dvadashavistaro vayavyo guna uchyate
Vidhivadbrahmanaih siddhairdharmagyaistattvadarshibhih
49.51
तत्रैकगुणमाकाशं शब्द इत्येव च स्मृतः
तस्य शब्दस्य वक्ष्यामि विस्तरेण बहून्गुणान्
Tatraikagunamakasham shabda ityeva cha smritah
Tasya shabdasya vakshyami vistarena bahungunan
49.52
षड्जर्षभौ च गान्धारो मध्यमः पञ्चमस्तथा
अतः परं तु विज्ञेयो निषादो धैवतस्तथा
Shadjarshabhau cha gandharo madhyamah panchamastatha
Atah param tu vigyeyo nishado dhaivatastatha
49.53
इष्टोऽनिष्टश्च शब्दस्तु संहतः प्रविभागवान्
एवं बहुविधो ज्ञेयः शब्द आकाशसंभवः
Ishtonishtashcha shabdastu sanhatah pravibhagavan
Evam bahuvidho gyeyah shabda akashasambhavah
49.54
आकाशमुत्तमं भूतमहंकारस्ततः परम्
अहंकारात्परा बुद्धिर्बुद्धेरात्मा ततः परः
Akashamuttamam bhutamahankarastatah param
Ahankaratpara buddhirbuddheratma tatah parah
49.55
तस्मात्तु परमव्यक्तमव्यक्तात्पुरुषः परः
परावरज्ञो भूतानां यं प्राप्यानन्त्यमश्नुते
Tasmattu paramavyaktamavyaktatpurushah parah
Paravaragyo bhutanam yam prapyanantyamashnute