Utshovঅধ্যায় 49
49.1
ব্রহ্মোবাচ
হন্ত বঃ সংপ্রবক্ষ্যামি যন্মাং পৃচ্ছথ সত্তমাঃ
সমস্তমিহ তচ্ছ্রুত্বা সম্যগেবাবধার্যতাম্
49.2
অহিংসা সর্বভূতানামেতত্কৃত্যতমং মতম্
এতত্পদমনুদ্বিগ্নং বরিষ্ঠং ধর্মলক্ষণম্
49.3
জ্ঞানং নিঃশ্রেয় ইত্যাহুর্বৃদ্ধা নিশ্চয়দর্শিনঃ
তস্মাজ্জ্ঞানেন শুদ্ধেন মুচ্যতে সর্বপাতকৈঃ
49.4
হিংসাপরাশ্চ যে লোকে যে চ নাস্তিকবৃত্তয়ঃ
লোভমোহসমায়ুক্তাস্তে বৈ নিরয়গামিনঃ
49.5
আশীর্যুক্তানি কর্মাণি কুর্বতে যে ত্বতন্দ্রিতাঃ
তেঽস্মিঁল্লোকে প্রমোদন্তে জায়মানাঃ পুনঃ পুনঃ
49.6
কুর্বতে যে তু কর্মাণি শ্রদ্দধানা বিপশ্চিতঃ
অনাশীর্যোগসংয়ুক্তাস্তে ধীরাঃ সাধুদর্শিনঃ
49.7
অতঃ পরং প্রবক্ষ্যামি সত্ত্বক্ষেত্রজ্ঞয়োর্যথা
সংয়োগো বিপ্রয়োগশ্চ তন্নিবোধত সত্তমাঃ
49.8
বিষয়ো বিষয়িত্বং চ সংবন্ধোঽয়মিহোচ্যতে
বিষয়ী পুরুষো নিত্যং সত্ত্বং চ বিষয়ঃ স্মৃতঃ
49.9
ব্যাখ্যাতং পূর্বকল্পেন মশকোদুম্বরং যথা
ভুজ্যমানং ন জানীতে নিত্যং সত্ত্বমচেতনম্
যস্ত্বেব তু বিজানীতে যো ভুঙ্ক্তে যশ্চ ভুজ্যতে
49.10
অনিত্যং দ্বংদ্বসংয়ুক্তং সত্ত্বমাহুর্গুণাত্মকম্
নির্দ্বংদ্বো নিষ্কলো নিত্যঃ ক্ষেত্রজ্ঞো নির্গুণাত্মকঃ
49.11
সমঃ সংজ্ঞাগতস্ত্বেবং যদা সর্বত্র দৃশ্যতে
উপভুঙ্ক্তে সদা সত্ত্বমাপঃ পুষ্করপর্ণবৎ
49.12
সর্বৈরপি গুণৈর্বিদ্বান্ব্যতিষক্তো ন লিপ্যতে
জলবিন্দুর্যথা লোলঃ পদ্মিনীপত্রসংস্থিতঃ
এবমেবাপ্যসংসক্তঃ পুরুষঃ স্যান্ন সংশয়ঃ
49.13
দ্রব্যমাত্রমভূত্সত্ত্বং পুরুষস্যেতি নিশ্চয়ঃ
যথা দ্রব্যং চ কর্তা চ সংয়োগোঽপ্যনয়োস্তথা
49.14
যথা প্রদীপমাদায় কশ্চিত্তমসি গচ্ছতি
তথা সত্ত্বপ্রদীপেন গচ্ছন্তি পরমৈষিণঃ
49.15
যাবদ্দ্রব্যগুণস্তাবত্প্রদীপঃ সংপ্রকাশতে
ক্ষীণদ্রব্যগুণং জ্যোতিরন্তর্ধানায় গচ্ছতি
49.16
ব্যক্তঃ সত্ত্বগুণস্ত্বেবং পুরুষোঽব্যক্ত ইষ্যতে
এতদ্বিপ্রা বিজানীত হন্ত ভূয়ো ব্রবীমি বঃ
49.17
সহস্রেণাপি দুর্মেধা ন বৃদ্ধিমধিগচ্ছতি
চতুর্থেনাপ্যথাংশেন বুদ্ধিমান্সুখমেধতে
49.18
এবং ধর্মস্য বিজ্ঞেয়ং সংসাধনমুপায়তঃ
উপায়জ্ঞো হি মেধাবী সুখমত্যন্তমশ্নুতে
49.19
যথাধ্বানমপাথেয়ঃ প্রপন্নো মানবঃ ক্বচিৎ
ক্লেশেন যাতি মহতা বিনশ্যত্যন্তরাপি বা
49.20
তথা কর্মসু বিজ্ঞেয়ং ফলং ভবতি বা ন বা
পুরুষস্যাত্মনিঃশ্রেয়ঃ শুভাশুভনিদর্শনম্
49.21
যথা চ দীর্ঘমধ্বানং পদ্ভ্যামেব প্রপদ্যতে
অদৃষ্টপূর্বং সহসা তত্ত্বদর্শনবর্জিতঃ
49.22
তমেব চ যথাধ্বানং রথেনেহাশুগামিনা
যায়াদশ্বপ্রয়ুক্তেন তথা বুদ্ধিমতাং গতিঃ
49.23
উচ্চং পর্বতমারুহ্য নান্ববেক্ষেত ভূগতম্
রথেন রথিনং পশ্যেত্ক্লিশ্যমানমচেতনম্
49.24
যাবদ্রথপথস্তাবদ্রথেন স তু গচ্ছতি
ক্ষীণে রথপথে প্রাজ্ঞো রথমুত্সৃজ্য গচ্ছতি
49.25
এবং গচ্ছতি মেধাবী তত্ত্বয়োগবিধানবিৎ
সমাজ্ঞায় মহাবুদ্ধিরুত্তরাদুত্তরোত্তরম্
49.26
যথা মহার্ণবং ঘোরমপ্লবঃ সংপ্রগাহতে
বাহুভ্যামেব সংমোহাদ্বধং চর্চ্ছত্যসংশয়ম্
49.27
নাবা চাপি যথা প্রাজ্ঞো বিভাগজ্ঞস্তরিত্রয়া
অক্লান্তঃ সলিলং গাহেত্ক্ষিপ্রং সংতরতি ধ্রুবম্
49.28
তীর্ণো গচ্ছেত্পরং পারং নাবমুত্সৃজ্য নির্মমঃ
ব্যাখ্যাতং পূর্বকল্পেন যথা রথিপদাতিনৌ
49.29
স্নেহাত্সংমোহমাপন্নো নাবি দাশো যথা তথা
মমত্বেনাভিভূতঃ স তত্রৈব পরিবর্ততে
49.30
নাবং ন শক্যমারুহ্য স্থলে বিপরিবর্তিতুম্
তথৈব রথমারুহ্য নাপ্সু চর্যা বিধীয়তে
49.31
এবং কর্ম কৃতং চিত্রং বিষয়স্থং পৃথক্পৃথক্
যথা কর্ম কৃতং লোকে তথা তদুপপদ্যতে
49.32
যন্নৈব গন্ধিনো রস্যং ন রূপস্পর্শশব্দবৎ
মন্যন্তে মুনয়ো বুদ্ধ্যা তত্প্রধানং প্রচক্ষতে
49.33
তত্র প্রধানমব্যক্তমব্যক্তস্য গুণো মহান্
মহতঃ প্রধানভূতস্য গুণোঽহংকার এব চ
49.34
অহংকারপ্রধানস্য মহাভূতকৃতো গুণঃ
পৃথক্ত্বেন হি ভূতানাং বিষয়া বৈ গুণাঃ স্মৃতাঃ
49.35
বীজধর্মং যথাব্যক্তং তথৈব প্রসবাত্মকম্
বীজধর্মা মহানাত্মা প্রসবশ্চেতি নঃ শ্রুতম্
49.36
বীজধর্মা ত্বহংকারঃ প্রসবশ্চ পুনঃ পুনঃ
বীজপ্রসবধর্মাণি মহাভূতানি পঞ্চ বৈ
49.37
বীজধর্মিণ ইত্যাহুঃ প্রসবং চ ন কুর্বতে
বিশেষাঃ পঞ্চভূতানাং তেষাং বিত্তং বিশেষণম্
49.38
তত্রৈকগুণমাকাশং দ্বিগুণো বায়ুরুচ্যতে
ত্রিগুণং জ্যোতিরিত্যাহুরাপশ্চাপি চতুর্গুণাঃ
49.39
পৃথ্বী পঞ্চগুণা জ্ঞেয়া ত্রসস্থাবরসংকুলা
সর্বভূতকরী দেবী শুভাশুভনিদর্শনা
49.40
শব্দঃ স্পর্শস্তথা রূপং রসো গন্ধশ্চ পঞ্চমঃ
এতে পঞ্চ গুণা ভূমের্বিজ্ঞেয়া দ্বিজসত্তমাঃ
49.41
পার্থিবশ্চ সদা গন্ধো গন্ধশ্চ বহুধা স্মৃতঃ
তস্য গন্ধস্য বক্ষ্যামি বিস্তরেণ বহূন্গুণান্
49.42
ইষ্টশ্চানিষ্টগন্ধশ্চ মধুরোঽম্লঃ কটুস্তথা
নির্হারী সংহতঃ স্নিগ্ধো রূক্ষো বিশদ এব চ
এবং দশবিধো জ্ঞেয়ঃ পার্থিবো গন্ধ ইত্যুত
49.43
শব্দঃ স্পর্শস্তথা রূপং রসশ্চাপাং গুণাঃ স্মৃতাঃ
রসজ্ঞানং তু বক্ষ্যামি রসস্তু বহুধা স্মৃতঃ
49.44
মধুরোঽম্লঃ কটুস্তিক্তঃ কষায়ো লবণস্তথা
এবং ষড্বিধবিস্তারো রসো বারিময়ঃ স্মৃতঃ
49.45
শব্দঃ স্পর্শস্তথা রূপং ত্রিগুণং জ্যোতিরুচ্যতে
জ্যোতিষশ্চ গুণো রূপং রূপং চ বহুধা স্মৃতম্
49.46
শুক্লং কৃষ্ণং তথা রক্তং নীলং পীতারুণং তথা
হ্রস্বং দীর্ঘং তথা স্থূলং চতুরস্রাণু বৃত্তকম্
49.47
এবং দ্বাদশবিস্তারং তেজসো রূপমুচ্যতে
বিজ্ঞেয়ং ব্রাহ্মণৈর্নিত্যং ধর্মজ্ঞৈঃ সত্যবাদিভিঃ
49.48
শব্দস্পর্শৌ চ বিজ্ঞেয়ৌ দ্বিগুণো বায়ুরুচ্যতে
বায়োশ্চাপি গুণঃ স্পর্শঃ স্পর্শশ্চ বহুধা স্মৃতঃ
49.49
উষ্ণঃ শীতঃ সুখো দুঃখঃ স্নিগ্ধো বিশদ এব চ
কঠিনশ্চিক্কণঃ শ্লক্ষ্ণঃ পিচ্ছিলো দারুণো মৃদুঃ
49.50
এবং দ্বাদশবিস্তারো বায়ব্যো গুণ উচ্যতে
বিধিবদ্ব্রহ্মণৈঃ সিদ্ধৈর্ধর্মজ্ঞৈস্তত্ত্বদর্শিভিঃ
49.51
তত্রৈকগুণমাকাশং শব্দ ইত্যেব চ স্মৃতঃ
তস্য শব্দস্য বক্ষ্যামি বিস্তরেণ বহূন্গুণান্
49.52
ষড্জর্ষভৌ চ গান্ধারো মধ্যমঃ পঞ্চমস্তথা
অতঃ পরং তু বিজ্ঞেয়ো নিষাদো ধৈবতস্তথা
49.53
ইষ্টোঽনিষ্টশ্চ শব্দস্তু সংহতঃ প্রবিভাগবান্
এবং বহুবিধো জ্ঞেয়ঃ শব্দ আকাশসংভবঃ
49.54
আকাশমুত্তমং ভূতমহংকারস্ততঃ পরম্
অহংকারাত্পরা বুদ্ধির্বুদ্ধেরাত্মা ততঃ পরঃ
49.55
তস্মাত্তু পরমব্যক্তমব্যক্তাত্পুরুষঃ পরঃ
পরাবরজ্ঞো ভূতানাং যং প্রাপ্যানন্ত্যমশ্নুতে