Utshovঅধ্যায় 48
48.1
ব্রহ্মোবাচ
কেচিদ্ব্রহ্মময়ং বৃক্ষং কেচিদ্ব্রহ্মময়ং মহৎ
কেচিত্পুরুষমব্যক্তং কেচিত্পরমনাময়ম্
মন্যন্তে সর্বমপ্যেতদব্যক্তপ্রভবাব্যয়ম্
48.2
উচ্ছ্বাসমাত্রমপি চেদ্যোঽন্তকালে সমো ভবেৎ
আত্মানমুপসংগম্য সোঽমৃতত্বায় কল্পতে
48.3
নিমেষমাত্রমপি চেত্সংয়ম্যাত্মানমাত্মনি
গচ্ছত্যাত্মপ্রসাদেন বিদুষাং প্রাপ্তিমব্যয়াম্
48.4
প্রাণায়ামৈরথ প্রাণান্সংয়ম্য স পুনঃ পুনঃ
দশদ্বাদশভির্বাপি চতুর্বিংশাত্পরং ততঃ
48.5
এবং পূর্বং প্রসন্নাত্মা লভতে যদ্যদিচ্ছতি
অব্যক্তাত্সত্ত্বমুদ্রিক্তমমৃতত্বায় কল্পতে
48.6
সত্ত্বাত্পরতরং নান্যত্প্রশংসন্তীহ তদ্বিদঃ
অনুমানাদ্বিজানীমঃ পুরুষং সত্ত্বসংশ্রয়ম্
ন শক্যমন্যথা গন্তুং পুরুষং তমথো দ্বিজাঃ
48.7
ক্ষমা ধৃতিরহিংসা চ সমতা সত্যমার্জবম্
জ্ঞানং ত্যাগোঽথ সংন্যাসঃ সাত্ত্বিকং বৃত্তমিষ্যতে
48.8
এতেনৈবানুমানেন মন্যন্তেঽথ মনীষিণঃ
সত্ত্বং চ পুরুষশ্চৈকস্তত্র নাস্তি বিচারণা
48.9
আহুরেকে চ বিদ্বাংসো যে জ্ঞানে সুপ্রতিষ্ঠিতাঃ
ক্ষেত্রজ্ঞসত্ত্বয়োরৈক্যমিত্যেতন্নোপপদ্যতে
48.10
পৃথগ্ভূতস্ততো নিত্যমিত্যেতদবিচারিতম্
পৃথগ্ভাবশ্চ বিজ্ঞেয়ঃ সহজশ্চাপি তত্ত্বতঃ
48.11
তথৈবৈকত্বনানাত্বমিষ্যতে বিদুষাং নয়ঃ
মশকোদুম্বরে ত্বৈক্যং পৃথক্ত্বমপি দৃশ্যতে
48.12
মত্স্যো যথান্যঃ স্যাদপ্সু সংপ্রয়োগস্তথানয়োঃ
সংবন্ধস্তোয়বিন্দূনাং পর্ণে কোকনদস্য চ
48.13
গুরুরুবাচ
ইত্যুক্তবন্তং তে বিপ্রাস্তদা লোকপিতামহম্
পুনঃ সংশয়মাপন্নাঃ পপ্রচ্ছুর্দ্বিজসত্তমাঃ
48.14
ঋষয় ঊচুঃ
কিং স্বিদেবেহ ধর্মাণামনুষ্ঠেয়তমং স্মৃতম্
ব্যাহতামিব পশ্যামো ধর্মস্য বিবিধাং গতিম্
48.15
ঊর্ধ্বং দেহাদ্বদন্ত্যেকে নৈতদস্তীতি চাপরে
কেচিত্সংশয়িতং সর্বং নিঃসংশয়মথাপরে
48.16
অনিত্যং নিত্যমিত্যেকে নাস্ত্যস্তীত্যপি চাপরে
একরূপং দ্বিধেত্যেকে ব্যামিশ্রমিতি চাপরে
একমেকে পৃথক্চান্যে বহুত্বমিতি চাপরে
48.17
মন্যন্তে ব্রাহ্মণা এবং প্রাজ্ঞাস্তত্ত্বার্থদর্শিনঃ
জটাজিনধরাশ্চান্যে মুণ্ডাঃ কেচিদসংবৃতাঃ
48.18
অস্নানং কেচিদিচ্ছন্তি স্নানমিত্যপি চাপরে
আহারং কেচিদিচ্ছন্তি কেচিচ্চানশনে রতাঃ
48.19
কর্ম কেচিত্প্রশংসন্তি প্রশান্তিমপি চাপরে
দেশকালাবুভৌ কেচিন্নৈতদস্তীতি চাপরে
কেচিন্মোক্ষং প্রশংসন্তি কেচিদ্ভোগান্পৃথগ্বিধান্
48.20
ধনানি কেচিদিচ্ছন্তি নির্ধনত্বং তথাপরে
উপাস্যসাধনং ত্বেকে নৈতদস্তীতি চাপরে
48.21
অহিংসানিরতাশ্চান্যে কেচিদ্ধিংসাপরায়ণাঃ
পুণ্যেন যশসেত্যেকে নৈতদস্তীতি চাপরে
48.22
সদ্ভাবনিরতাশ্চান্যে কেচিত্সংশয়িতে স্থিতাঃ
দুঃখাদন্যে সুখাদন্যে ধ্যানমিত্যপরে স্থিতাঃ
48.23
যজ্ঞমিত্যপরে ধীরাঃ প্রদানমিতি চাপরে
সর্বমেকে প্রশংসন্তি ন সর্বমিতি চাপরে
48.24
তপস্ত্বন্যে প্রশংসন্তি স্বাধ্যায়মপরে জনাঃ
জ্ঞানং সংন্যাসমিত্যেকে স্বভাবং ভূতচিন্তকাঃ
48.25
এবং ব্যুত্থাপিতে ধর্মে বহুধা বিপ্রধাবতি
নিশ্চয়ং নাধিগচ্ছামঃ সংমূঢাঃ সুরসত্তম
48.26
ইদং শ্রেয় ইদং শ্রেয় ইত্যেবং প্রস্থিতো জনঃ
যো হি যস্মিন্রতো ধর্মে স তং পূজয়তে সদা
48.27
তত্র নো বিহতা প্রজ্ঞা মনশ্চ বহুলীকৃতম্
এতদাখ্যাতুমিচ্ছামঃ শ্রেয়ঃ কিমিতি সত্তম
48.28
অতঃ পরং চ যদ্গুহ্যং তদ্ভবান্বক্তুমর্হতি
সত্ত্বক্ষেত্রজ্ঞয়োশ্চৈব সংবন্ধঃ কেন হেতুনা
48.29
এবমুক্তঃ স তৈর্বিপ্রৈর্ভগবাঁল্লোকভাবনঃ
তেভ্যঃ শশংস ধর্মাত্মা যাথাতথ্যেন বুদ্ধিমান্