অধ্যায় 47

47.1

ব্রহ্মোবাচ
সংন্যাসং তপ ইত্যাহুর্বৃদ্ধা নিশ্চিতদর্শিনঃ
ব্রাহ্মণা ব্রহ্ময়োনিস্থা জ্ঞানং ব্রহ্ম পরং বিদুঃ

অবিদূরাত্পরং ব্রহ্ম বেদবিদ্যাব্যপাশ্রয়ম্
নির্দ্বংদ্বং নির্গুণং নিত্যমচিন্ত্যং গুহ্যমুত্তমম্

জ্ঞানেন তপসা চৈব ধীরাঃ পশ্যন্তি তত্পদম্
নির্ণিক্ততমসঃ পূতা ব্যুত্ক্রান্তরজসোঽমলাঃ

তপসা ক্ষেমমধ্বানং গচ্ছন্তি পরমৈষিণঃ
সংন্যাসনিরতা নিত্যং যে ব্রহ্মবিদুষো জনাঃ

তপঃ প্রদীপ ইত্যাহুরাচারো ধর্মসাধকঃ
জ্ঞানং ত্বেব পরং বিদ্ম সংন্যাসস্তপ উত্তমম্

যস্তু বেদ নিরাবাধং জ্ঞানং তত্ত্ববিনিশ্চয়াৎ
সর্বভূতস্থমাত্মানং স সর্বগতিরিষ্যতে

যো বিদ্বান্সহবাসং চ বিবাসং চৈব পশ্যতি
তথৈবৈকত্বনানাত্বে স দুঃখাত্পরিমুচ্যতে

যো ন কাময়তে কিংচিন্ন কিংচিদবমন্যতে
ইহলোকস্থ এবৈষ ব্রহ্মভূয়ায় কল্পতে

প্রধানগুণতত্ত্বজ্ঞঃ সর্বভূতবিধানবিৎ
নির্মমো নিরহংকারো মুচ্যতে নাত্র সংশয়ঃ

নির্দ্বংদ্বো নির্নমস্কারো নিঃস্বধাকার এব চ
নির্গুণং নিত্যমদ্বংদ্বং প্রশমেনৈব গচ্ছতি

হিত্বা গুণময়ং সর্বং কর্ম জন্তুঃ শুভাশুভম্
উভে সত্যানৃতে হিত্বা মুচ্যতে নাত্র সংশয়ঃ

অব্যক্তবীজপ্রভবো বুদ্ধিস্কন্ধময়ো মহান্
মহাহংকারবিটপ ইন্দ্রিয়ান্তরকোটরঃ

মহাভূতবিশাখশ্চ বিশেষপ্রতিশাখবান্
সদাপর্ণঃ সদাপুষ্পঃ শুভাশুভফলোদয়ঃ
আজীবঃ সর্বভূতানাং ব্রহ্মবৃক্ষঃ সনাতনঃ

এতচ্ছিত্ত্বা চ ভিত্ত্বা চ জ্ঞানেন পরমাসিনা
হিত্বা চামরতাং প্রাপ্য জহ্যাদ্বৈ মৃত্যুজন্মনী
নির্মমো নিরহংকারো মুচ্যতে নাত্র সংশয়ঃ

দ্বাবেতৌ পক্ষিণৌ নিত্যৌ সখায়ৌ চাপ্যচেতনৌ
এতাভ্যাং তু পরো যস্য চেতনাবানিতি স্মৃতঃ

অচেতনঃ সত্ত্বসংঘাতয়ুক্তঃ; সত্ত্বাত্পরং চেতয়তেঽন্তরাত্মা
স ক্ষেত্রজ্ঞঃ সত্ত্বসংঘাতবুদ্ধি;র্গুণাতিগো মুচ্যতে মৃত্যুপাশাৎ