Utshovঅধ্যায় 46
46.1
ব্রহ্মোবাচ
এবমেতেন মার্গেণ পূর্বোক্তেন যথাবিধি
অধীতবান্যথাশক্তি তথৈব ব্রহ্মচর্যবান্
46.2
স্বধর্মনিরতো বিদ্বান্সর্বেন্দ্রিয়য়তো মুনিঃ
গুরোঃ প্রিয়হিতে যুক্তঃ সত্যধর্মপরঃ শুচিঃ
46.3
গুরুণা সমনুজ্ঞাতো ভুঞ্জীতান্নমকুত্সয়ন্
হবিষ্যভৈক্ষ্যভুক্চাপি স্থানাসনবিহারবান্
46.4
দ্বিকালমগ্নিং জুহ্বানঃ শুচির্ভূত্বা সমাহিতঃ
ধারয়ীত সদা দণ্ডং বৈল্বং পালাশমেব বা
46.5
ক্ষৌমং কার্পাসিকং বাপি মৃগাজিনমথাপি বা
সর্বং কাষায়রক্তং স্যাদ্বাসো বাপি দ্বিজস্য হ
46.6
মেখলা চ ভবেন্মৌঞ্জী জটী নিত্যোদকস্তথা
যজ্ঞোপবীতী স্বাধ্যায়ী অলুপ্তনিয়তব্রতঃ
46.7
পূতাভিশ্চ তথৈবাদ্ভিঃ সদা দৈবততর্পণম্
ভাবেন নিয়তঃ কুর্বন্ব্রহ্মচারী প্রশস্যতে
46.8
এবং যুক্তো জয়েত্স্বর্গমূর্ধ্বরেতাঃ সমাহিতঃ
ন সংসরতি জাতীষু পরমং স্থানমাশ্রিতঃ
46.9
সংস্কৃতঃ সর্বসংস্কারৈস্তথৈব ব্রহ্মচর্যবান্
গ্রামান্নিষ্ক্রম্য চারণ্যং মুনিঃ প্রব্রজিতো বসেৎ
46.10
চর্মবল্কলসংবীতঃ স্বয়ং প্রাতরুপস্পৃশেৎ
অরণ্যগোচরো নিত্যং ন গ্রামং প্রবিশেত্পুনঃ
46.11
অর্চয়ন্নতিথীন্কালে দদ্যাচ্চাপি প্রতিশ্রয়ম্
ফলপত্রাবরৈর্মূলৈঃ শ্যামাকেন চ বর্তয়ন্
46.12
প্রবৃত্তমুদকং বায়ুং সর্বং বানেয়মা তৃণাৎ
প্রাশ্নীয়াদানুপূর্ব্যেণ যথাদীক্ষমতন্দ্রিতঃ
46.13
আমূলফলভিক্ষাভিরর্চেদতিথিমাগতম্
যদ্ভক্ষঃ স্যাত্ততো দদ্যাদ্ভিক্ষাং নিত্যমতন্দ্রিতঃ
46.14
দেবতাতিথিপূর্বং চ সদা ভুঞ্জীত বাগ্যতঃ
অস্কন্দিতমনাশ্চৈব লঘ্বাশী দেবতাশ্রয়ঃ
46.15
দান্তো মৈত্রঃ ক্ষমায়ুক্তঃ কেশশ্মশ্রু চ ধারয়ন্
জুহ্বন্স্বাধ্যায়শীলশ্চ সত্যধর্মপরায়ণঃ
46.16
ত্যক্তদেহঃ সদা দক্ষো বননিত্যঃ সমাহিতঃ
এবং যুক্তো জয়েত্স্বর্গং বানপ্রস্থো জিতেন্দ্রিয়ঃ
46.17
গৃহস্থো ব্রহ্মচারী চ বানপ্রস্থোঽথ বা পুনঃ
য ইচ্ছেন্মোক্ষমাস্থাতুমুত্তমাং বৃত্তিমাশ্রয়েৎ
46.18
অভয়ং সর্বভূতেভ্যো দত্ত্বা নৈষ্কর্ম্যমাচরেৎ
সর্বভূতহিতো মৈত্রঃ সর্বেন্দ্রিয়য়তো মুনিঃ
46.19
অয়াচিতমসংকৢপ্তমুপপন্নং যদৃচ্ছয়া
জোষয়েত সদা ভোজ্যং গ্রাসমাগতমস্পৃহঃ
46.20
যাত্রামাত্রং চ ভুঞ্জীত কেবলং প্রাণয়াত্রিকম্
ধর্মলব্ধং তথাশ্নীয়ান্ন কামমনুবর্তয়েৎ
46.21
গ্রাসাদাচ্ছাদনাচ্চান্যন্ন গৃহ্ণীয়াত্কথংচন
যাবদাহারয়েত্তাবত্প্রতিগৃহ্ণীত নান্যথা
46.22
পরেভ্যো ন প্রতিগ্রাহ্যং ন চ দেয়ং কদাচন
দৈন্যভাবাচ্চ ভূতানাং সংবিভজ্য সদা বুধঃ
46.23
নাদদীত পরস্বানি ন গৃহ্ণীয়াদয়াচিতম্
ন কিংচিদ্বিষয়ং ভুক্ত্বা স্পৃহয়েত্তস্য বৈ পুনঃ
46.24
মৃদমাপস্তথাশ্মানং পত্রপুষ্পফলানি চ
অসংবৃতানি গৃহ্ণীয়াত্প্রবৃত্তানীহ কার্যবান্
46.25
ন শিল্পজীবিকাং জীবেদ্দ্বিরন্নং নোত কাময়েৎ
ন দ্বেষ্টা নোপদেষ্টা চ ভবেত নিরুপস্কৃতঃ
শ্রদ্ধাপূতানি ভুঞ্জীত নিমিত্তানি বিবর্জয়েৎ
46.26
মুধাবৃত্তিরসক্তশ্চ সর্বভূতৈরসংবিদম্
কৃত্বা বহ্নিং চরেদ্ভৈক্ষ্যং বিধূমে ভুক্তবজ্জনে
46.27
বৃত্তে শরাবসংপাতে ভৈক্ষ্যং লিপ্সেত মোক্ষবিৎ
লাভে ন চ প্রহৃষ্যেত নালাভে বিমনা ভবেৎ
46.28
মাত্রাশী কালমাকাঙ্ক্ষংশ্চরেদ্ভৈক্ষ্যং সমাহিতঃ
লাভং সাধারণং নেচ্ছেন্ন ভুঞ্জীতাভিপূজিতঃ
অভিপূজিতলাভাদ্ধি বিজুগুপ্সেত ভিক্ষুকঃ
46.29
শুক্তান্যম্লানি তিক্তানি কষায়কটুকানি চ
নাস্বাদয়ীত ভুঞ্জানো রসাংশ্চ মধুরাংস্তথা
যাত্রামাত্রং চ ভুঞ্জীত কেবলং প্রাণয়াত্রিকম্
46.30
অসংরোধেন ভূতানাং বৃত্তিং লিপ্সেত মোক্ষবিৎ
ন চান্যমনুভিক্ষেত ভিক্ষমাণঃ কথংচন
46.31
ন সংনিকাশয়েদ্ধর্মং বিবিক্তে বিরজাশ্চরেৎ
শূন্যাগারমরণ্যং বা বৃক্ষমূলং নদীং তথা
প্রতিশ্রয়ার্থং সেবেত পার্বতীং বা পুনর্গুহাম্
46.32
গ্রামৈকরাত্রিকো গ্রীষ্মে বর্ষাস্বেকত্র বা বসেৎ
অধ্বা সূর্যেণ নির্দিষ্টঃ কীটবচ্চ চরেন্মহীম্
46.33
দয়ার্থং চৈব ভূতানাং সমীক্ষ্য পৃথিবীং চরেৎ
সংচয়াংশ্চ ন কুর্বীত স্নেহবাসং চ বর্জয়েৎ
46.34
পূতেন চাম্ভসা নিত্যং কার্যং কুর্বীত মোক্ষবিৎ
উপস্পৃশেদুদ্ধৃতাভিরদ্ভিশ্চ পুরুষঃ সদা
46.35
অহিংসা ব্রহ্মচর্যং চ সত্যমার্জবমেব চ
অক্রোধশ্চানসূয়া চ দমো নিত্যমপৈশুনম্
46.36
অষ্টাস্বেতেষু যুক্তঃ স্যাদ্ব্রতেষু নিয়তেন্দ্রিয়ঃ
অপাপমশঠং বৃত্তমজিহ্মং নিত্যমাচরেৎ
46.37
আশীর্যুক্তানি কর্মাণি হিংসায়ুক্তানি যানি চ
লোকসংগ্রহধর্মং চ নৈব কুর্যান্ন কারয়েৎ
46.38
সর্বভাবানতিক্রম্য লঘুমাত্রঃ পরিব্রজেৎ
সমঃ সর্বেষু ভূতেষু স্থাবরেষু চরেষু চ
46.39
পরং নোদ্বেজয়েত্কংচিন্ন চ কস্যচিদুদ্বিজেৎ
বিশ্বাস্যঃ সর্বভূতানামগ্র্যো মোক্ষবিদুচ্যতে
46.40
অনাগতং চ ন ধ্যায়েন্নাতীতমনুচিন্তয়েৎ
বর্তমানমুপেক্ষেত কালাকাঙ্ক্ষী সমাহিতঃ
46.41
ন চক্ষুষা ন মনসা ন বাচা দূষয়েত্ক্বচিৎ
ন প্রত্যক্ষং পরোক্ষং বা কিংচিদ্দুষ্টং সমাচরেৎ
46.42
ইন্দ্রিয়াণ্যুপসংহৃত্য কূর্মোঽঙ্গানীব সর্বশঃ
ক্ষীণেন্দ্রিয়মনোবুদ্ধির্নিরীক্ষেত নিরিন্দ্রিয়ঃ
46.43
নির্দ্বংদ্বো নির্নমস্কারো নিঃস্বাহাকার এব চ
নির্মমো নিরহংকারো নির্যোগক্ষেম এব চ
46.44
নিরাশীঃ সর্বভূতেষু নিরাসঙ্গো নিরাশ্রয়ঃ
সর্বজ্ঞঃ সর্বতো মুক্তো মুচ্যতে নাত্র সংশয়ঃ
46.45
অপাণিপাদপৃষ্ঠং তমশিরস্কমনূদরম্
প্রহীণগুণকর্মাণং কেবলং বিমলং স্থিরম্
46.46
অগন্ধরসমস্পর্শমরূপাশব্দমেব চ
অত্বগস্থ্যথ বামজ্জমমাংসমপি চৈব হ
46.47
নিশ্চিন্তমব্যয়ং নিত্যং হৃদিস্থমপি নিত্যদা
সর্বভূতস্থমাত্মানং যে পশ্যন্তি ন তে মৃতাঃ
46.48
ন তত্র ক্রমতে বুদ্ধির্নেন্দ্রিয়াণি ন দেবতাঃ
বেদা যজ্ঞাশ্চ লোকাশ্চ ন তপো ন পরাক্রমঃ
যত্র জ্ঞানবতাং প্রাপ্তিরলিঙ্গগ্রহণা স্মৃতা
46.49
তস্মাদলিঙ্গো ধর্মজ্ঞো ধর্মব্রতমনুব্রতঃ
গূঢধর্মাশ্রিতো বিদ্বানজ্ঞাতচরিতং চরেৎ
46.50
অমূঢো মূঢরূপেণ চরেদ্ধর্মমদূষয়ন্
যথৈনমবমন্যেরন্পরে সততমেব হি
46.51
তথাবৃত্তশ্চরেদ্ধর্মং সতাং বর্ত্মাবিদূষয়ন্
যো হ্যেবং বৃত্তসংপন্নঃ স মুনিঃ শ্রেষ্ঠ উচ্যতে
46.52
ইন্দ্রিয়াণীন্দ্রিয়ার্থাংশ্চ মহাভূতানি পঞ্চ চ
মনোবুদ্ধিরথাত্মানমব্যক্তং পুরুষং তথা
46.53
সর্বমেতত্প্রসংখ্যায় সম্যক্সংত্যজ্য নির্মলঃ
ততঃ স্বর্গমবাপ্নোতি বিমুক্তঃ সর্ববন্ধনৈঃ
46.54
এতদেবান্তবেলায়াং পরিসংখ্যায় তত্ত্ববিৎ
ধ্যায়েদেকান্তমাস্থায় মুচ্যতেঽথ নিরাশ্রয়ঃ
46.55
নির্মুক্তঃ সর্বসঙ্গেভ্যো বায়ুরাকাশগো যথা
ক্ষীণকোশো নিরাতঙ্কঃ প্রাপ্নোতি পরমং পদম্