অধ্যায় 45

45.1

ব্রহ্মোবাচ
বুদ্ধিসারং মনস্তম্ভমিন্দ্রিয়গ্রামবন্ধনম্
মহাভূতারবিষ্কম্ভং নিমেষপরিবেষ্টনম্

45.2

জরাশোকসমাবিষ্টং ব্যাধিব্যসনসংচরম্
দেশকালবিচারীদং শ্রমব্যায়ামনিস্বনম্

45.3

অহোরাত্রপরিক্ষেপং শীতোষ্ণপরিমণ্ডলম্
সুখদুঃখান্তসংক্লেশং ক্ষুত্পিপাসাবকীলনম্

45.4

ছায়াতপবিলেখং চ নিমেষোন্মেষবিহ্বলম্
ঘোরমোহজনাকীর্ণং বর্তমানমচেতনম্

45.5

মাসার্ধমাসগণিতং বিষমং লোকসংচরম্
তমোনিচয়পঙ্কং চ রজোবেগপ্রবর্তকম্

45.6

সত্ত্বালংকারদীপ্তং চ গুণসংঘাতমণ্ডলম্
স্বরবিগ্রহনাভীকং শোকসংঘাতবর্তনম্

45.7

ক্রিয়াকারণসংয়ুক্তং রাগবিস্তারমায়তম্
লোভেপ্সাপরিসংখ্যাতং বিবিক্তজ্ঞানসংভবম্

45.8

ভয়মোহপরীবারং ভূতসংমোহকারকম্
আনন্দপ্রীতিধারং চ কামক্রোধপরিগ্রহম্

45.9

মহদাদিবিশেষান্তমসক্তপ্রভবাব্যয়ম্
মনোজবনমশ্রান্তং কালচক্রং প্রবর্ততে

45.10

এতদ্দ্বংদ্বসমায়ুক্তং কালচক্রমচেতনম্
বিসৃজেত্সংক্ষিপেচ্চাপি বোধয়েত্সামরং জগৎ

45.11

কালচক্রপ্রবৃত্তিং চ নিবৃত্তিং চৈব তত্ত্বতঃ
যস্তু বেদ নরো নিত্যং ন স ভূতেষু মুহ্যতি

45.12

বিমুক্তঃ সর্বসংক্লেশৈঃ সর্বদ্বংদ্বাতিগো মুনিঃ
বিমুক্তঃ সর্বপাপেভ্যঃ প্রাপ্নোতি পরমাং গতিম্

45.13

গৃহস্থো ব্রহ্মচারী চ বানপ্রস্থোঽথ ভিক্ষুকঃ
চত্বার আশ্রমাঃ প্রোক্তাঃ সর্বে গার্হস্থ্যমূলকাঃ

45.14

যঃ কশ্চিদিহ লোকে চ হ্যাগমঃ সংপ্রকীর্তিতঃ
তস্যান্তগমনং শ্রেয়ঃ কীর্তিরেষা সনাতনী

45.15

সংস্কারৈঃ সংস্কৃতঃ পূর্বং যথাবচ্চরিতব্রতঃ
জাতৌ গুণবিশিষ্টায়াং সমাবর্তেত বেদবিৎ

45.16

স্বদারনিরতো দান্তঃ শিষ্টাচারো জিতেন্দ্রিয়ঃ
পঞ্চভিশ্চ মহায়জ্ঞৈঃ শ্রদ্দধানো যজেত হ

45.17

দেবতাতিথিশিষ্টাশী নিরতো বেদকর্মসু
ইজ্যাপ্রদানয়ুক্তশ্চ যথাশক্তি যথাবিধি

45.18

ন পাণিপাদচপলো ন নেত্রচপলো মুনিঃ
ন চ বাগঙ্গচপল ইতি শিষ্টস্য গোচরঃ

45.19

নিত্যয়জ্ঞোপবীতী স্যাচ্ছুক্লবাসাঃ শুচিব্রতঃ
নিয়তো দমদানাভ্যাং সদা শিষ্টৈশ্চ সংবিশেৎ

45.20

জিতশিশ্নোদরো মৈত্রঃ শিষ্টাচারসমাহিতঃ
বৈণবীং ধারয়েদ্যষ্টিং সোদকং চ কমণ্ডলুম্

45.21

অধীত্যাধ্যাপনং কুর্যাত্তথা যজনয়াজনে
দানং প্রতিগ্রহং চৈব ষড্গুণাং বৃত্তিমাচরেৎ

45.22

ত্রীণি কর্মাণি যানীহ ব্রাহ্মণানাং তু জীবিকা
যাজনাধ্যাপনে চোভে শুদ্ধাচ্চাপি প্রতিগ্রহঃ

45.23

অবশেষাণি চান্যানি ত্রীণি কর্মাণি যানি তু
দানমধ্যয়নং যজ্ঞো ধর্ময়ুক্তানি তানি তু

45.24

তেষ্বপ্রমাদং কুর্বীত ত্রিষু কর্মসু ধর্মবিৎ
দান্তো মৈত্রঃ ক্ষমায়ুক্তঃ সর্বভূতসমো মুনিঃ

45.25

সর্বমেতদ্যথাশক্তি বিপ্রো নির্বর্তয়ঞ্শুচিঃ
এবং যুক্তো জয়েত্স্বর্গং গৃহস্থঃ সংশিতব্রতঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.