অধ্যায় 44

44.1

ব্রহ্মোবাচ
যদাদিমধ্যপর্যন্তং গ্রহণোপায়মেব চ
নামলক্ষণসংয়ুক্তং সর্বং বক্ষ্যামি তত্ত্বতঃ

অহঃ পূর্বং ততো রাত্রির্মাসাঃ শুক্লাদয়ঃ স্মৃতাঃ
শ্রবিষ্ঠাদীনি ঋক্ষাণি ঋতবঃ শিশিরাদয়ঃ

ভূমিরাদিস্তু গন্ধানাং রসানামাপ এব চ
রূপাণাং জ্যোতিরাদিস্তু স্পর্শাদির্বায়ুরুচ্যতে
শব্দস্যাদিস্তথাকাশমেষ ভূতকৃতো গুণঃ

অতঃ পরং প্রবক্ষ্যামি ভূতানামাদিমুত্তমম্
আদিত্যো জ্যোতিষামাদিরগ্নির্ভূতাদিরিষ্যতে

সাবিত্রী সর্ববিদ্যানাং দেবতানাং প্রজাপতিঃ
ওংকারঃ সর্ববেদানাং বচসাং প্রাণ এব চ
যদ্যস্মিন্নিয়তং লোকে সর্বং সাবিত্রমুচ্যতে

গায়ত্রী ছন্দসামাদিঃ পশূনামজ উচ্যতে
গাবশ্চতুষ্পদামাদির্মনুষ্যাণাং দ্বিজাতয়ঃ

শ্যেনঃ পতত্রিণামাদির্যজ্ঞানাং হুতমুত্তমম্
পরিসর্পিণাং তু সর্বেষাং জ্যেষ্ঠঃ সর্পো দ্বিজোত্তমাঃ

কৃতমাদির্যুগানাং চ সর্বেষাং নাত্র সংশয়ঃ
হিরণ্যং সর্বরত্নানামোষধীনাং যবাস্তথা

সর্বেষাং ভক্ষ্যভোজ্যানামন্নং পরমমুচ্যতে
দ্রবাণাং চৈব সর্বেষাং পেয়ানামাপ উত্তমাঃ

স্থাবরাণাং চ ভূতানাং সর্বেষামবিশেষতঃ
ব্রহ্মক্ষেত্রং সদা পুণ্যং প্লক্ষঃ প্রথমজঃ স্মৃতঃ

অহং প্রজাপতীনাং চ সর্বেষাং নাত্র সংশয়ঃ
মম বিষ্ণুরচিন্ত্যাত্মা স্বয়ংভূরিতি স স্মৃতঃ

পর্বতানাং মহামেরুঃ সর্বেষামগ্রজঃ স্মৃতঃ
দিশাং চ প্রদিশাং চোর্ধ্বা দিগ্জাতা প্রথমং তথা

তথা ত্রিপথগা গঙ্গা নদীনামগ্রজা স্মৃতা
তথা সরোদপানানাং সর্বেষাং সাগরোঽগ্রজঃ

দেবদানবভূতানাং পিশাচোরগরক্ষসাম্
নরকিংনরয়ক্ষাণাং সর্বেষামীশ্বরঃ প্রভুঃ

আদির্বিশ্বস্য জগতো বিষ্ণুর্ব্রহ্মময়ো মহান্
ভূতং পরতরং তস্মাত্ত্রৈলোক্যে নেহ বিদ্যতে

আশ্রমাণাং চ গার্হস্থ্যং সর্বেষাং নাত্র সংশয়ঃ
লোকানামাদিরব্যক্তং সর্বস্যান্তস্তদেব চ

অহান্যস্তময়ান্তানি উদয়ান্তা চ শর্বরী
সুখস্যান্তঃ সদা দুঃখং দুঃখস্যান্তঃ সদা সুখম্

সর্বে ক্ষয়ান্তা নিচয়াঃ পতনান্তাঃ সমুচ্ছ্রয়াঃ
সংয়োগা বিপ্রয়োগান্তা মরণান্তং হি জীবিতম্

সর্বং কৃতং বিনাশান্তং জাতস্য মরণং ধ্রুবম্
অশাশ্বতং হি লোকেঽস্মিন্সর্বং স্থাবরজঙ্গমম্

ইষ্টং দত্তং তপোঽধীতং ব্রতানি নিয়মাশ্চ যে
সর্বমেতদ্বিনাশান্তং জ্ঞানস্যান্তো ন বিদ্যতে

তস্মাজ্জ্ঞানেন শুদ্ধেন প্রসন্নাত্মা সমাহিতঃ
নির্মমো নিরহংকারো মুচ্যতে সর্বপাপ্মভিঃ