Utshovঅধ্যায় 43
43.1
ব্রহ্মোবাচ
মনুষ্যাণাং তু রাজন্যঃ ক্ষত্রিয়ো মধ্যমো গুণঃ
কুঞ্জরো বাহনানাং চ সিংহশ্চারণ্যবাসিনাম্
43.2
অবিঃ পশূনাং সর্বেষামাখুশ্চ বিলবাসিনাম্
গবাং গোবৃষভশ্চৈব স্ত্রীণাং পুরুষ এব চ
43.3
ন্যগ্রোধো জম্বুবৃক্ষশ্চ পিপ্পলঃ শাল্মলিস্তথা
শিংশপা মেষশৃঙ্গশ্চ তথা কীচকবেণবঃ
এতে দ্রুমাণাং রাজানো লোকেঽস্মিন্নাত্র সংশয়ঃ
43.4
হিমবান্পারিয়াত্রশ্চ সহ্যো বিন্ধ্যস্ত্রিকূটবান্
শ্বেতো নীলশ্চ ভাসশ্চ কাষ্ঠবাংশ্চৈব পর্বতঃ
43.5
শুভস্কন্ধো মহেন্দ্রশ্চ মাল্যবান্পর্বতস্তথা
এতে পর্বতরাজানো গণানাং মরুতস্তথা
43.6
সূর্যো গ্রহাণামধিপো নক্ষত্রাণাং চ চন্দ্রমাঃ
যমঃ পিতৄণামধিপঃ সরিতামথ সাগরঃ
43.7
অম্ভসাং বরুণো রাজা সত্ত্বানাং মিত্র উচ্যতে
অর্কোঽধিপতিরুষ্ণানাং জ্যোতিষামিন্দুরুচ্যতে
43.8
অগ্নির্ভূতপতির্নিত্যং ব্রাহ্মণানাং বৃহস্পতিঃ
ওষধীনাং পতিঃ সোমো বিষ্ণুর্বলবতাং বরঃ
43.9
ত্বষ্টাধিরাজো রূপাণাং পশূনামীশ্বরঃ শিবঃ
দক্ষিণানাং তথা যজ্ঞো বেদানামৃষয়স্তথা
43.10
দিশামুদীচী বিপ্রাণাং সোমো রাজা প্রতাপবান্
কুবেরঃ সর্বয়ক্ষাণাং দেবতানাং পুরংদরঃ
এষ ভূতাদিকঃ সর্গঃ প্রজানাং চ প্রজাপতিঃ
43.11
সর্বেষামেব ভূতানামহং ব্রহ্মময়ো মহান্
ভূতং পরতরং মত্তো বিষ্ণোর্বাপি ন বিদ্যতে
43.12
রাজাধিরাজঃ সর্বাসাং বিষ্ণুর্ব্রহ্মময়ো মহান্
ঈশ্বরং তং বিজানীমঃ স বিভুঃ স প্রজাপতিঃ
43.13
নরকিংনরয়ক্ষাণাং গন্ধর্বোরগরক্ষসাম্
দেবদানবনাগানাং সর্বেষামীশ্বরো হি সঃ
43.14
ভগদেবানুয়াতানাং সর্বাসাং বামলোচনা
মাহেশ্বরী মহাদেবী প্রোচ্যতে পার্বতীতি যা
43.15
উমাং দেবীং বিজানীত নারীণামুত্তমাং শুভাম্
রতীনাং বসুমত্যস্তু স্ত্রীণামপ্সরসস্তথা
43.16
ধর্মকামাশ্চ রাজানো ব্রাহ্মণা ধর্মলক্ষণাঃ
তস্মাদ্রাজা দ্বিজাতীনাং প্রয়তেতেহ রক্ষণে
43.17
রাজ্ঞাং হি বিষয়ে যেষামবসীদন্তি সাধবঃ
হীনাস্তে স্বগুণৈঃ সর্বৈঃ প্রেত্যাবাঙ্মার্গগামিনঃ
43.18
রাজ্ঞাং তু বিষয়ে যেষাং সাধবঃ পরিরক্ষিতাঃ
তেঽস্মিঁল্লোকে প্রমোদন্তে প্রেত্য চানন্ত্যমেব চ
প্রাপ্নুবন্তি মহাত্মান ইতি বিত্ত দ্বিজর্ষভাঃ
43.19
অত ঊর্ধ্বং প্রবক্ষ্যামি নিয়তং ধর্মলক্ষণম্
অহিংসালক্ষণো ধর্মো হিংসা চাধর্মলক্ষণা
43.20
প্রকাশলক্ষণা দেবা মনুষ্যাঃ কর্মলক্ষণাঃ
শব্দলক্ষণমাকাশং বায়ুস্তু স্পর্শলক্ষণঃ
43.21
জ্যোতিষাং লক্ষণং রূপমাপশ্চ রসলক্ষণাঃ
ধরণী সর্বভূতানাং পৃথিবী গন্ধলক্ষণা
43.22
স্বরব্যঞ্জনসংস্কারা ভারতী সত্যলক্ষণা
মনসো লক্ষণং চিন্তা তথোক্তা বুদ্ধিরন্বয়াৎ
43.23
মনসা চিন্তয়ানোঽর্থান্বুদ্ধ্যা চৈব ব্যবস্যতি
বুদ্ধির্হি ব্যবসায়েন লক্ষ্যতে নাত্র সংশয়ঃ
43.24
লক্ষণং মহতো ধ্যানমব্যক্তং সাধুলক্ষণম্
প্রবৃত্তিলক্ষণো যোগো জ্ঞানং সংন্যাসলক্ষণম্
43.25
তস্মাজ্জ্ঞানং পুরস্কৃত্য সংন্যসেদিহ বুদ্ধিমান্
সংন্যাসী জ্ঞানসংয়ুক্তঃ প্রাপ্নোতি পরমাং গতিম্
অতীতোঽদ্বংদ্বমভ্যেতি তমোমৃত্যুজরাতিগম্
43.26
ধর্মলক্ষণসংয়ুক্তমুক্তং বো বিধিবন্ময়া
গুণানাং গ্রহণং সম্যগ্বক্ষ্যাম্যহমতঃ পরম্
43.27
পার্থিবো যস্তু গন্ধো বৈ ঘ্রাণেনেহ স গৃহ্যতে
ঘ্রাণস্থশ্চ তথা বায়ুর্গন্ধজ্ঞানে বিধীয়তে
43.28
অপাং ধাতুরসো নিত্যং জিহ্বয়া স তু গৃহ্যতে
জিহ্বাস্থশ্চ তথা সোমো রসজ্ঞানে বিধীয়তে
43.29
জ্যোতিষশ্চ গুণো রূপং চক্ষুষা তচ্চ গৃহ্যতে
চক্ষুঃস্থশ্চ তথাদিত্যো রূপজ্ঞানে বিধীয়তে
43.30
বায়ব্যস্তু তথা স্পর্শস্ত্বচা প্রজ্ঞায়তে চ সঃ
ত্বক্স্থশ্চৈব তথা বায়ুঃ স্পর্শজ্ঞানে বিধীয়তে
43.31
আকাশস্য গুণো ঘোষঃ শ্রোত্রেণ স তু গৃহ্যতে
শ্রোত্রস্থাশ্চ দিশঃ সর্বাঃ শব্দজ্ঞানে প্রকীর্তিতাঃ
43.32
মনসস্তু গুণশ্চিন্তা প্রজ্ঞয়া স তু গৃহ্যতে
হৃদিস্থচেতনাধাতুর্মনোজ্ঞানে বিধীয়তে
43.33
বুদ্ধিরধ্যবসায়েন ধ্যানেন চ মহাংস্তথা
নিশ্চিত্য গ্রহণং নিত্যমব্যক্তং নাত্র সংশয়ঃ
43.34
অলিঙ্গগ্রহণো নিত্যঃ ক্ষেত্রজ্ঞো নির্গুণাত্মকঃ
তস্মাদলিঙ্গঃ ক্ষেত্রজ্ঞঃ কেবলং জ্ঞানলক্ষণঃ
43.35
অব্যক্তং ক্ষেত্রমুদ্দিষ্টং গুণানাং প্রভবাপ্যয়ম্
সদা পশ্যাম্যহং লীনং বিজানামি শৃণোমি চ
43.36
পুরুষস্তদ্বিজানীতে তস্মাত্ক্ষেত্রজ্ঞ উচ্যতে
গুণবৃত্তং তথা কৃত্স্নং ক্ষেত্রজ্ঞঃ পরিপশ্যতি
43.37
আদিমধ্যাবসানান্তং সৃজ্যমানমচেতনম্
ন গুণা বিদুরাত্মানং সৃজ্যমানং পুনঃ পুনঃ
43.38
ন সত্যং বেদ বৈ কশ্চিত্ক্ষেত্রজ্ঞস্ত্বেব বিন্দতি
গুণানাং গুণভূতানাং যত্পরং পরতো মহৎ
43.39
তস্মাদ্গুণাংশ্চ তত্ত্বং চ পরিত্যজ্যেহ তত্ত্ববিৎ
ক্ষীণদোষো গুণান্হিত্বা ক্ষেত্রজ্ঞং প্রবিশত্যথ
43.40
নির্দ্বংদ্বো নির্নমস্কারো নিঃস্বধাকার এব চ
অচলশ্চানিকেতশ্চ ক্ষেত্রজ্ঞঃ স পরো বিভুঃ