Utshovঅধ্যায় 50
50.1
ব্রহ্মোবাচ
ভূতানামথ পঞ্চানাং যথৈষামীশ্বরং মনঃ
নিয়মে চ বিসর্গে চ ভূতাত্মা মন এব চ
50.2
অধিষ্ঠাতা মনো নিত্যং ভূতানাং মহতাং তথা
বুদ্ধিরৈশ্বর্যমাচষ্টে ক্ষেত্রজ্ঞঃ সর্ব উচ্যতে
50.3
ইন্দ্রিয়াণি মনো যুঙ্ক্তে সদশ্বানিব সারথিঃ
ইন্দ্রিয়াণি মনো বুদ্ধিং ক্ষেত্রজ্ঞো যুঞ্জতে সদা
50.4
মহাভূতসমায়ুক্তং বুদ্ধিসংয়মনং রথম্
তমারুহ্য স ভূতাত্মা সমন্তাত্পরিধাবতি
50.5
ইন্দ্রিয়গ্রামসংয়ুক্তো মনঃসারথিরেব চ
বুদ্ধিসংয়মনো নিত্যং মহান্ব্রহ্মময়ো রথঃ
50.6
এবং যো বেত্তি বিদ্বান্বৈ সদা ব্রহ্মময়ং রথম্
স ধীরঃ সর্বলোকেষু ন মোহমধিগচ্ছতি
50.7
অব্যক্তাদি বিশেষান্তং ত্রসস্থাবরসংকুলম্
চন্দ্রসূর্যপ্রভালোকং গ্রহনক্ষত্রমণ্ডিতম্
50.8
নদীপর্বতজালৈশ্চ সর্বতঃ পরিভূষিতম্
বিবিধাভিস্তথাদ্ভিশ্চ সততং সমলংকৃতম্
50.9
আজীবঃ সর্বভূতানাং সর্বপ্রাণভৃতাং গতিঃ
এতদ্ব্রহ্মবনং নিত্যং যস্মিংশ্চরতি ক্ষেত্রবিৎ
50.10
লোকেঽস্মিন্যানি ভূতানি স্থাবরাণি চরাণি চ
তান্যেবাগ্রে প্রলীয়ন্তে পশ্চাদ্ভূতকৃতা গুণাঃ
গুণেভ্যঃ পঞ্চভূতানি এষ ভূতসমুচ্ছ্রয়ঃ
50.11
দেবা মনুষ্যা গন্ধর্বাঃ পিশাচাসুররাক্ষসাঃ
সর্বে স্বভাবতঃ সৃষ্টা ন ক্রিয়াভ্যো ন কারণাৎ
50.12
এতে বিশ্বকৃতো বিপ্রা জায়ন্তে হ পুনঃ পুনঃ
তেভ্যঃ প্রসূতাস্তেষ্বেব মহাভূতেষু পঞ্চসু
প্রলীয়ন্তে যথাকালমূর্ময়ঃ সাগরে যথা
50.13
বিশ্বসৃগ্ভ্যস্তু ভূতেভ্যো মহাভূতানি গচ্ছতি
ভূতেভ্যশ্চাপি পঞ্চভ্যো মুক্তো গচ্ছেত্প্রজাপতিম্
50.14
প্রজাপতিরিদং সর্বং তপসৈবাসৃজত্প্রভুঃ
তথৈব বেদানৃষয়স্তপসা প্রতিপেদিরে
50.15
তপসশ্চানুপূর্ব্যেণ ফলমূলাশিনস্তথা
ত্রৈলোক্যং তপসা সিদ্ধাঃ পশ্যন্তীহ সমাহিতাঃ
50.16
ওষধান্যগদাদীনী নানাবিদ্যাশ্চ সর্বশঃ
তপসৈব প্রসিধ্যন্তি তপোমূলং হি সাধনম্
50.17
যদ্দুরাপং দুরাম্নায়ং দুরাধর্ষং দুরন্বয়ম্
তত্সর্বং তপসা সাধ্যং তপো হি দুরতিক্রমম্
50.18
সুরাপো ব্রহ্মহা স্তেয়ী ভ্রূণহা গুরুতল্পগঃ
তপসৈব সুতপ্তেন মুচ্যন্তে কিল্বিষাত্ততঃ
50.19
মনুষ্যাঃ পিতরো দেবাঃ পশবো মৃগপক্ষিণঃ
যানি চান্যানি ভূতানি ত্রসানি স্থাবরাণি চ
50.20
তপঃপরায়ণা নিত্যং সিধ্যন্তে তপসা সদা
তথৈব তপসা দেবা মহাভাগা দিবং গতাঃ
50.21
আশীর্যুক্তানি কর্মাণি কুর্বতে যে ত্বতন্দ্রিতাঃ
অহংকারসমায়ুক্তাস্তে সকাশে প্রজাপতেঃ
50.22
ধ্যানয়োগেন শুদ্ধেন নির্মমা নিরহংকৃতাঃ
প্রাপ্নুবন্তি মহাত্মানো মহান্তং লোকমুত্তমম্
50.23
ধ্যানয়োগাদুপাগম্য প্রসন্নমতয়ঃ সদা
সুখোপচয়মব্যক্তং প্রবিশন্ত্যাত্মবত্তয়া
50.24
ধ্যানয়োগাদুপাগম্য নির্মমা নিরহংকৃতাঃ
অব্যক্তং প্রবিশন্তীহ মহান্তং লোকমুত্তমম্
50.25
অব্যক্তাদেব সংভূতঃ সময়জ্ঞো গতঃ পুনঃ
তমোরজোভ্যাং নির্মুক্তঃ সত্ত্বমাস্থায় কেবলম্
50.26
বিমুক্তঃ সর্বপাপেভ্যঃ সর্বং ত্যজতি নিষ্কলঃ
ক্ষেত্রজ্ঞ ইতি তং বিদ্যাদ্যস্তং বেদ স বেদবিৎ
50.27
চিত্তং চিত্তাদুপাগম্য মুনিরাসীত সংয়তঃ
যচ্চিত্তস্তন্মনা ভূত্বা গুহ্যমেতত্সনাতনম্
50.28
অব্যক্তাদি বিশেষান্তমবিদ্যালক্ষণং স্মৃতম্
নিবোধত যথা হীদং গুণৈর্লক্ষণমিত্যুত
50.29
দ্ব্যক্ষরস্তু ভবেন্মৃত্যুস্ত্র্যক্ষরং ব্রহ্ম শাশ্বতম্
মমেতি চ ভবেন্মৃত্যুর্ন মমেতি চ শাশ্বতম্
50.30
কর্ম কেচিত্প্রশংসন্তি মন্দবুদ্ধিতরা নরাঃ
যে তু বুদ্ধা মহাত্মানো ন প্রশংসন্তি কর্ম তে
50.31
কর্মণা জায়তে জন্তুর্মূর্তিমান্ষোডশাত্মকঃ
পুরুষং সৃজতেঽবিদ্যা অগ্রাহ্যমমৃতাশিনম্
50.32
তস্মাত্কর্মসু নিঃস্নেহা যে কেচিত্পারদর্শিনঃ
বিদ্যাময়োঽয়ং পুরুষো ন তু কর্মময়ঃ স্মৃতঃ
50.33
অপূর্বমমৃতং নিত্যং য এনমবিচারিণম্
য এনং বিন্দতেঽঽত্মানমগ্রাহ্যমমৃতাশিনম্
অগ্রাহ্যোঽমৃতো ভবতি য এভিঃ কারণৈর্ধ্রুবঃ
50.34
অপোহ্য সর্বসংকল্পান্সংয়ম্যাত্মানমাত্মনি
স তদ্ব্রহ্ম শুভং বেত্তি যস্মাদ্ভূয়ো ন বিদ্যতে
50.35
প্রসাদেনৈব সত্ত্বস্য প্রসাদং সমবাপ্নুয়াৎ
লক্ষণং হি প্রসাদস্য যথা স্যাত্স্বপ্নদর্শনম্
50.36
গতিরেষা তু মুক্তানাং যে জ্ঞানপরিনিষ্ঠিতাঃ
প্রবৃত্তয়শ্চ যাঃ সর্বাঃ পশ্যন্তি পরিণামজাঃ
50.37
এষা গতিরসক্তানামেষ ধর্মঃ সনাতনঃ
এষা জ্ঞানবতাং প্রাপ্তিরেতদ্বৃত্তমনিন্দিতম্
50.38
সমেন সর্বভূতেষু নিঃস্পৃহেণ নিরাশিষা
শক্যা গতিরিয়ং গন্তুং সর্বত্র সমদর্শিনা
50.39
এতদ্বঃ সর্বমাখ্যাতং ময়া বিপ্রর্ষিসত্তমাঃ
এবমাচরত ক্ষিপ্রং ততঃ সিদ্ধিমবাপ্স্যথ
50.40
গুরুরুবাচ
ইত্যুক্তাস্তে তু মুনয়ো ব্রহ্মণা গুরুণা তথা
কৃতবন্তো মহাত্মানস্ততো লোকানবাপ্নুবন্
50.41
ত্বমপ্যেতন্মহাভাগ যথোক্তং ব্রহ্মণো বচঃ
সম্যগাচর শুদ্ধাত্মংস্ততঃ সিদ্ধিমবাপ্স্যসি
50.42
বাসুদেব উবাচ
ইত্যুক্তঃ স তদা শিষ্যো গুরুণা ধর্মমুত্তমম্
চকার সর্বং কৌন্তেয় ততো মোক্ষমবাপ্তবান্
50.43
কৃতকৃত্যশ্চ স তদা শিষ্যঃ কুরুকুলোদ্বহ
তত্পদং সমনুপ্রাপ্তো যত্র গত্বা ন শোচতি
50.44
অর্জুন উবাচ
কো ন্বসৌ ব্রাহ্মণঃ কৃষ্ণ কশ্চ শিষ্যো জনার্দন
শ্রোতব্যং চেন্ময়ৈতদ্বৈ তত্ত্বমাচক্ষ্ব মে বিভো
50.45
বাসুদেব উবাচ
অহং গুরুর্মহাবাহো মনঃ শিষ্যং চ বিদ্ধি মে
ত্বত্প্রীত্যা গুহ্যমেতচ্চ কথিতং মে ধনংজয়
50.46
ময়ি চেদস্তি তে প্রীতির্নিত্যং কুরুকুলোদ্বহ
অধ্যাত্মমেতচ্ছ্রুত্বা ত্বং সম্যগাচর সুব্রত
50.47
ততস্ত্বং সম্যগাচীর্ণে ধর্মেঽস্মিন্কুরুনন্দন
সর্বপাপবিশুদ্ধাত্মা মোক্ষং প্রাপ্স্যসি কেবলম্
50.48
পূর্বমপ্যেতদেবোক্তং যুদ্ধকাল উপস্থিতে
ময়া তব মহাবাহো তস্মাদত্র মনঃ কুরু
50.49
ময়া তু ভরতশ্রেষ্ঠ চিরদৃষ্টঃ পিতা বিভো
তমহং দ্রষ্টুমিচ্ছামি সংমতে তব ফল্গুন
50.50
বৈশংপায়ন উবাচ
ইত্যুক্তবচনং কৃষ্ণং প্রত্যুবাচ ধনংজয়ঃ
গচ্ছাবো নগরং কৃষ্ণ গজসাহ্বয়মদ্য বৈ
50.51
সমেত্য তত্র রাজানং ধর্মাত্মানং যুধিষ্ঠিরম্
সমনুজ্ঞাপ্য দুর্ধর্ষং স্বাং পুরীং যাতুমর্হসি