Utshovঅধ্যায় 51
51.1
বৈশংপায়ন উবাচ
ততোঽভ্যচোদয়ত্কৃষ্ণো যুজ্যতামিতি দারুকম্
মুহূর্তাদিব চাচষ্ট যুক্তমিত্যেব দারুকঃ
51.2
তথৈব চানুয়াত্রাণি চোদয়ামাস পাণ্ডবঃ
সজ্জয়ধ্বং প্রয়াস্যামো নগরং গজসাহ্বয়ম্
51.3
ইত্যুক্তাঃ সৈনিকাস্তে তু সজ্জীভূতা বিশাং পতে
আচখ্যুঃ সজ্জমিত্যেব পার্থায়ামিততেজসে
51.4
ততস্তৌ রথমাস্থায় প্রয়াতৌ কৃষ্ণপাণ্ডবৌ
বিকুর্বাণৌ কথাশ্চিত্রাঃ প্রীয়মাণৌ বিশাং পতে
51.5
রথস্থং তু মহাতেজা বাসুদেবং ধনংজয়ঃ
পুনরেবাব্রবীদ্বাক্যমিদং ভরতসত্তম
51.6
ত্বত্প্রসাদাজ্জয়ঃ প্রাপ্তো রাজ্ঞা বৃষ্ণিকুলোদ্বহ
নিহতাঃ শত্রবশ্চাপি প্রাপ্তং রাজ্যমকণ্টকম্
51.7
নাথবন্তশ্চ ভবতা পাণ্ডবা মধুসূদন
ভবন্তং প্লবমাসাদ্য তীর্ণাঃ স্ম কুরুসাগরম্
51.8
বিশ্বকর্মন্নমস্তেঽস্তু বিশ্বাত্মন্বিশ্বসংভব
যথাহং ত্বা বিজানামি যথা চাহং ভবন্মনাঃ
51.9
ত্বত্তেজঃসংভবো নিত্যং হুতাশো মধুসূদন
রতিঃ ক্রীডাময়ী তুভ্যং মায়া তে রোদসী বিভো
51.10
ত্বয়ি সর্বমিদং বিশ্বং যদিদং স্থাণুজঙ্গমম্
ত্বং হি সর্বং বিকুরুষে ভূতগ্রামং সনাতনম্
51.11
পৃথিবীং চান্তরিক্ষং চ তথা স্থাবরজঙ্গমম্
হসিতং তেঽমলা জ্যোত্স্না ঋতবশ্চেন্দ্রিয়ান্বয়াঃ
51.12
প্রাণো বায়ুঃ সততগঃ ক্রোধো মৃত্যুঃ সনাতনঃ
প্রসাদে চাপি পদ্মা শ্রীর্নিত্যং ত্বয়ি মহামতে
51.13
রতিস্তুষ্টির্ধৃতিঃ ক্ষান্তিস্ত্বয়ি চেদং চরাচরম্
ত্বমেবেহ যুগান্তেষু নিধনং প্রোচ্যসেঽনঘ
51.14
সুদীর্ঘেণাপি কালেন ন তে শক্যা গুণা ময়া
আত্মা চ পরমো বক্তুং নমস্তে নলিনেক্ষণ
51.15
বিদিতো মেঽসি দুর্ধর্ষ নারদাদ্দেবলাত্তথা
কৃষ্ণদ্বৈপায়নাচ্চৈব তথা কুরুপিতামহাৎ
51.16
ত্বয়ি সর্বং সমাসক্তং ত্বমেবৈকো জনেশ্বরঃ
যচ্চানুগ্রহসংয়ুক্তমেতদুক্তং ত্বয়ানঘ
51.17
এতত্সর্বমহং সম্যগাচরিষ্যে জনার্দন
ইদং চাদ্ভুতমত্যর্থং কৃতমস্মত্প্রিয়েপ্সয়া
51.18
যত্পাপো নিহতঃ সংখ্যে কৌরব্যো ধৃতরাষ্ট্রজঃ
ত্বয়া দগ্ধং হি তত্সৈন্যং ময়া বিজিতমাহবে
51.19
ভবতা তত্কৃতং কর্ম যেনাবাপ্তো জয়ো ময়া
দুর্যোধনস্য সংগ্রামে তব বুদ্ধিপরাক্রমৈঃ
51.20
কর্ণস্য চ বধোপায়ো যথাবত্সংপ্রদর্শিতঃ
সৈন্ধবস্য চ পাপস্য ভূরিশ্রবস এব চ
51.21
অহং চ প্রীয়মাণেন ত্বয়া দেবকিনন্দন
যদুক্তস্তত্করিষ্যামি ন হি মেঽত্র বিচারণা
51.22
রাজানং চ সমাসাদ্য ধর্মাত্মানং যুধিষ্ঠিরম্
চোদয়িষ্যামি ধর্মজ্ঞ গমনার্থং তবানঘ
51.23
রুচিতং হি মমৈতত্তে দ্বারকাগমনং প্রভো
অচিরাচ্চৈব দৃষ্টা ত্বং মাতুলং মধুসূদন
বলদেবং চ দুর্ধর্ষং তথান্যান্বৃষ্ণিপুংগবান্
51.24
এবং সংভাষমাণৌ তৌ প্রাপ্তৌ বারণসাহ্বয়ম্
তথা বিবিশতুশ্চোভৌ সংপ্রহৃষ্টনরাকুলম্
51.25
তৌ গত্বা ধৃতরাষ্ট্রস্য গৃহং শক্রগৃহোপমম্
দদৃশাতে মহারাজ ধৃতরাষ্ট্রং জনেশ্বরম্
51.26
বিদুরং চ মহাবুদ্ধিং রাজানং চ যুধিষ্ঠিরম্
ভীমসেনং চ দুর্ধর্ষং মাদ্রীপুত্রৌ চ পাণ্ডবৌ
ধৃতরাষ্ট্রমুপাসীনং যুয়ুত্সুং চাপরাজিতম্
51.27
গান্ধারীং চ মহাপ্রাজ্ঞাং পৃথাং কৃষ্ণাং চ ভামিনীম্
সুভদ্রাদ্যাশ্চ তাঃ সর্বা ভরতানাং স্ত্রিয়স্তথা
দদৃশাতে স্থিতাঃ সর্বা গান্ধারীং পরিবার্য বৈ
51.28
ততঃ সমেত্য রাজানং ধৃতরাষ্ট্রমরিংদমৌ
নিবেদ্য নামধেয়ে স্বে তস্য পাদাবগৃহ্ণতাম্
51.29
গান্ধার্যাশ্চ পৃথায়াশ্চ ধর্মরাজ্ঞস্তথৈব চ
ভীমস্য চ মহাত্মানৌ তথা পাদাবগৃহ্ণতাম্
51.30
ক্ষত্তারং চাপি সংপূজ্য পৃষ্ট্বা কুশলমব্যয়ম্
তৈঃ সার্ধং নৃপতিং বৃদ্ধং ততস্তং পর্যুপাসতাম্
51.31
ততো নিশি মহারাজ ধৃতরাষ্ট্রঃ কুরূদ্বহান্
জনার্দনং চ মেধাবী ব্যসর্জয়ত বৈ গৃহান্
51.32
তেঽনুজ্ঞাতা নৃপতিনা যয়ুঃ স্বং স্বং নিবেশনম্
ধনংজয়গৃহানেব যয়ৌ কৃষ্ণস্তু বীর্যবান্
51.33
তত্রার্চিতো যথান্যায়ং সর্বকামৈরুপস্থিতঃ
কৃষ্ণঃ সুষ্বাপ মেধাবী ধনংজয়সহায়বান্
51.34
প্রভাতায়াং তু শর্বর্যাং কৃতপূর্বাহ্ণিকক্রিয়ৌ
ধর্মরাজস্য ভবনং জগ্মতুঃ পরমার্চিতৌ
যত্রাস্তে স সহামাত্যো ধর্মরাজো মহামনাঃ
51.35
ততস্তৌ তত্প্রবিশ্যাথ দদৃশাতে মহাবলৌ
ধর্মরাজানমাসীনং দেবরাজমিবাশ্বিনৌ
51.36
তৌ সমাসাদ্য রাজানং বার্ষ্ণেয়কুরুপুংগবৌ
নিষীদতুরনুজ্ঞাতৌ প্রীয়মাণেন তেন বৈ
51.37
ততঃ স রাজা মেধাবী বিবক্ষূ প্রেক্ষ্য তাবুভৌ
প্রোবাচ বদতাং শ্রেষ্ঠো বচনং রাজসত্তমঃ
51.38
বিবক্ষূ হি যুবাং মন্যে বীরৌ যদুকুরূদ্বহৌ
ব্রূত কর্তাস্মি সর্বং বাং ন চিরান্মা বিচার্যতাম্
51.39
ইত্যুক্তে ফল্গুনস্তত্র ধর্মরাজানমব্রবীৎ
বিনীতবদুপাগম্য বাক্যং বাক্যবিশারদঃ
51.40
অয়ং চিরোষিতো রাজন্বাসুদেবঃ প্রতাপবান্
ভবন্তং সমনুজ্ঞাপ্য পিতরং দ্রষ্টুমিচ্ছতি
51.41
স গচ্ছেদভ্যনুজ্ঞাতো ভবতা যদি মন্যসে
আনর্তনগরীং বীরস্তদনুজ্ঞাতুমর্হসি
51.42
যুধিষ্ঠির উবাচ
পুণ্ডরীকাক্ষ ভদ্রং তে গচ্ছ ত্বং মধুসূদন
পুরীং দ্বারবতীমদ্য দ্রষ্টুং শূরসুতং প্রভুম্
51.43
রোচতে মে মহাবাহো গমনং তব কেশব
মাতুলশ্চিরদৃষ্টো মে ত্বয়া দেবী চ দেবকী
51.44
মাতুলং বসুদেবং ত্বং বলদেবং চ মাধব
পূজয়েথা মহাপ্রাজ্ঞ মদ্বাক্যেন যথার্হতঃ
51.45
স্মরেথাশ্চাপি মাং নিত্যং ভীমং চ বলিনাং বরম্
ফল্গুনং নকুলং চৈব সহদেবং চ মাধব
51.46
আনর্তানবলোক্য ত্বং পিতরং চ মহাভুজ
বৃষ্ণীংশ্চ পুনরাগচ্ছের্হয়মেধে মমানঘ
51.47
স গচ্ছ রত্নান্যাদায় বিবিধানি বসূনি চ
যচ্চাপ্যন্যন্মনোজ্ঞং তে তদপ্যাদত্স্ব সাত্বত
51.48
ইয়ং হি বসুধা সর্বা প্রসাদাত্তব মাধব
অস্মানুপগতা বীর নিহতাশ্চাপি শত্রবঃ
51.49
এবং ব্রুবতি কৌরব্যে ধর্মরাজে যুধিষ্ঠিরে
বাসুদেবো বরঃ পুংসামিদং বচনমব্রবীৎ
51.50
তবৈব রত্নানি ধনং চ কেবল;ম্ধরা চ কৃত্স্না তু মহাভুজাদ্য বৈ
যদস্তি চান্যদ্দ্রবিণং গৃহেষু মে; ত্বমেব তস্যেশ্বর নিত্যমীশ্বরঃ
51.51
তথেত্যথোক্তঃ প্রতিপূজিতস্তদা; গদাগ্রজো ধর্মসুতেন বীর্যবান্
পিতৃষ্বসামভ্যবদদ্যথাবিধি; সংপূজিতশ্চাপ্যগমত্প্রদক্ষিণম্
51.52
তয়া স সম্যক্প্রতিনন্দিতস্তদা; তথৈব সর্বৈর্বিদুরাদিভিস্ততঃ
বিনির্যয়ৌ নাগপুরাদ্গদাগ্রজো; রথেন দিব্যেন চতুর্যুজা হরিঃ
51.53
রথং সুভদ্রামধিরোপ্য ভামিনীং; যুধিষ্ঠিরস্যানুমতে জনার্দনঃ
পিতৃষ্বসায়াশ্চ তথা মহাভুজো; বিনির্যয়ৌ পৌরজনাভিসংবৃতঃ
51.54
তমন্বগাদ্বানরবর্যকেতনঃ; সসাত্যকির্মাদ্রবতীসুতাবপি
অগাধবুদ্ধির্বিদুরশ্চ মাধবং; স্বয়ং চ ভীমো গজরাজবিক্রমঃ
51.55
নিবর্তয়িত্বা কুরুরাষ্ট্রবর্ধনাং;স্ততঃ স সর্বান্বিদুরং চ বীর্যবান্
জনার্দনো দারুকমাহ সত্বরঃ; প্রচোদয়াশ্বানিতি সাত্যকিস্তদা
51.56
ততো যয়ৌ শত্রুগণপ্রমর্দনঃ; শিনিপ্রবীরানুগতো জনার্দনঃ
যথা নিহত্যারিগণাঞ্শতক্রতু;র্দিবং তথানর্তপুরীং প্রতাপবান্