Utshovঅধ্যায় 52
52.1
বৈশংপায়ন উবাচ
তথা প্রয়ান্তং বার্ষ্ণেয়ং দ্বারকাং ভরতর্ষভাঃ
পরিষ্বজ্য ন্যবর্তন্ত সানুয়াত্রাঃ পরংতপাঃ
52.2
পুনঃ পুনশ্চ বার্ষ্ণেয়ং পর্যষ্বজত ফল্গুনঃ
আ চক্ষুর্বিষয়াচ্চৈনং দদর্শ চ পুনঃ পুনঃ
52.3
কৃচ্ছ্রেণৈব চ তাং পার্থো গোবিন্দে বিনিবেশিতাম্
সংজহার তদা দৃষ্টিং কৃষ্ণশ্চাপ্যপরাজিতঃ
52.4
তস্য প্রয়াণে যান্যাসন্নিমিত্তানি মহাত্মনঃ
বহূন্যদ্ভুতরূপাণি তানি মে গদতঃ শৃণু
52.5
বায়ুর্বেগেন মহতা রথস্য পুরতো ববৌ
কুর্বন্নিঃশর্করং মার্গং বিরজস্কমকণ্টকম্
52.6
ববর্ষ বাসবশ্চাপি তোয়ং শুচি সুগন্ধি চ
দিব্যানি চৈব পুষ্পাণি পুরতঃ শার্ঙ্গধন্বনঃ
52.7
স প্রয়াতো মহাবাহুঃ সমেষু মরুধন্বসু
দদর্শাথ মুনিশ্রেষ্ঠমুত্তঙ্কমমিতৌজসম্
52.8
স তং সংপূজ্য তেজস্বী মুনিং পৃথুললোচনঃ
পূজিতস্তেন চ তদা পর্যপৃচ্ছদনাময়ম্
52.9
স পৃষ্টঃ কুশলং তেন সংপূজ্য মধুসূদনম্
উত্তঙ্কো ব্রাহ্মণশ্রেষ্ঠস্ততঃ পপ্রচ্ছ মাধবম্
52.10
কচ্চিচ্ছৌরে ত্বয়া গত্বা কুরুপাণ্ডবসদ্ম তৎ
কৃতং সৌভ্রাত্রমচলং তন্মে ব্যাখ্যাতুমর্হসি
52.11
অভিসংধায় তান্বীরানুপাবৃত্তোঽসি কেশব
সংবন্ধিনঃ সুদয়িতান্সততং বৃষ্ণিপুংগব
52.12
কচ্চিত্পাণ্ডুসুতাঃ পঞ্চ ধৃতরাষ্ট্রস্য চাত্মজাঃ
লোকেষু বিহরিষ্যন্তি ত্বয়া সহ পরংতপ
52.13
স্বরাষ্ট্রেষু চ রাজানঃ কচ্চিত্প্রাপ্স্যন্তি বৈ সুখম্
কৌরবেষু প্রশান্তেষু ত্বয়া নাথেন মাধব
52.14
যা মে সংভাবনা তাত ত্বয়ি নিত্যমবর্তত
অপি সা সফলা কৃষ্ণ কৃতা তে ভরতান্প্রতি
52.15
বাসুদেব উবাচ
কৃতো যত্নো ময়া ব্রহ্মন্সৌভ্রাত্রে কৌরবান্প্রতি
ন চাশক্যন্ত সংধাতুং তেঽধর্মরুচয়ো ময়া
52.16
ততস্তে নিধনং প্রাপ্তাঃ সর্বে সসুতবান্ধবাঃ
ন দিষ্টমভ্যতিক্রান্তুং শক্যং বুদ্ধ্যা বলেন বা
মহর্ষে বিদিতং নূনং সর্বমেতত্তবানঘ
52.17
তেঽত্যক্রামন্মতিং মহ্যং ভীষ্মস্য বিদুরস্য চ
ততো যমক্ষয়ং জগ্মুঃ সমাসাদ্যেতরেতরম্
52.18
পঞ্চ বৈ পাণ্ডবাঃ শিষ্টা হতমিত্রা হতাত্মজাঃ
ধার্তরাষ্ট্রাশ্চ নিহতাঃ সর্বে সসুতবান্ধবাঃ
52.19
ইত্যুক্তবচনে কৃষ্ণে ভৃশং ক্রোধসমন্বিতঃ
উত্তঙ্কঃ প্রত্যুবাচৈনং রোষাদুত্ফাল্য লোচনে
52.20
যস্মাচ্ছক্তেন তে কৃষ্ণ ন ত্রাতাঃ কুরুপাণ্ডবাঃ
সংবন্ধিনঃ প্রিয়াস্তস্মাচ্ছপ্স্যেঽহং ত্বামসংশয়ম্
52.21
ন চ তে প্রসভং যস্মাত্তে নিগৃহ্য নিবর্তিতাঃ
তস্মান্মন্যুপরীতস্ত্বাং শপ্স্যামি মধুসূদন
52.22
ত্বয়া হি শক্তেন সতা মিথ্যাচারেণ মাধব
উপচীর্ণাঃ কুরুশ্রেষ্ঠা যস্ত্বেতান্সমুপেক্ষথাঃ
52.23
বাসুদেব উবাচ
শৃণু মে বিস্তরেণেদং যদ্বক্ষ্যে ভৃগুনন্দন
গৃহাণানুনয়ং চাপি তপস্বী হ্যসি ভার্গব
52.24
শ্রুত্বা ত্বমেতদধ্যাত্মং মুঞ্চেথাঃ শাপমদ্য বৈ
ন চ মাং তপসাল্পেন শক্তোঽভিভবিতুং পুমান্
52.25
ন চ তে তপসো নাশমিচ্ছামি জপতাং বর
তপস্তে সুমহদ্দীপ্তং গুরবশ্চাপি তোষিতাঃ
52.26
কৌমারং ব্রহ্মচর্যং তে জানামি দ্বিজসত্তম
দুঃখার্জিতস্য তপসস্তস্মান্নেচ্ছামি তে ব্যয়ম্