অধ্যায় 53

53.1

উত্তঙ্ক উবাচ
ব্রূহি কেশব তত্ত্বেন ত্বমধ্যাত্মমনিন্দিতম্
শ্রুত্বা শ্রেয়োঽভিধাস্যামি শাপং বা তে জনার্দন

বাসুদেব উবাচ
তমো রজশ্চ সত্ত্বং চ বিদ্ধি ভাবান্মদাশ্রয়ান্
তথা রুদ্রান্বসূংশ্চাপি বিদ্ধি মত্প্রভবান্দ্বিজ

ময়ি সর্বাণি ভূতানি সর্বভূতেষু চাপ্যহম্
স্থিত ইত্যভিজানীহি মা তেঽভূদত্র সংশয়ঃ

তথা দৈত্যগণান্সর্বান্যক্ষরাক্ষসপন্নগান্
গন্ধর্বাপ্সরসশ্চৈব বিদ্ধি মত্প্রভবান্দ্বিজ

সদসচ্চৈব যত্প্রাহুরব্যক্তং ব্যক্তমেব চ
অক্ষরং চ ক্ষরং চৈব সর্বমেতন্মদাত্মকম্

যে চাশ্রমেষু বৈ ধর্মাশ্চতুর্ষু বিহিতা মুনে
দৈবানি চৈব কর্মাণি বিদ্ধি সর্বং মদাত্মকম্

অসচ্চ সদসচ্চৈব যদ্বিশ্বং সদসতঃ পরম্
ততঃ পরং নাস্তি চৈব দেবদেবাত্সনাতনাৎ

ওংকারপ্রভবান্বেদান্বিদ্ধি মাং ত্বং ভৃগূদ্বহ
যূপং সোমং তথৈবেহ ত্রিদশাপ্যায়নং মখে

হোতারমপি হব্যং চ বিদ্ধি মাং ভৃগুনন্দন
অধ্বর্যুঃ কল্পকশ্চাপি হবিঃ পরমসংস্কৃতম্

উদ্গাতা চাপি মাং স্তৌতি গীতঘোষৈর্মহাধ্বরে
প্রায়শ্চিত্তেষু মাং ব্রহ্মঞ্শান্তিমঙ্গলবাচকাঃ
স্তুবন্তি বিশ্বকর্মাণং সততং দ্বিজসত্তমাঃ

বিদ্ধি মহ্যং সুতং ধর্মমগ্রজং দ্বিজসত্তম
মানসং দয়িতং বিপ্র সর্বভূতদয়াত্মকম্

তত্রাহং বর্তমানৈশ্চ নিবৃত্তৈশ্চৈব মানবৈঃ
বহ্বীঃ সংসরমাণো বৈ যোনীর্হি দ্বিজসত্তম

ধর্মসংরক্ষণার্থায় ধর্মসংস্থাপনায় চ
তৈস্তৈর্বেষৈশ্চ রূপৈশ্চ ত্রিষু লোকেষু ভার্গব

অহং বিষ্ণুরহং ব্রহ্মা শক্রোঽথ প্রভবাপ্যয়ঃ
ভূতগ্রামস্য সর্বস্য স্রষ্টা সংহার এব চ

অধর্মে বর্তমানানাং সর্বেষামহমপ্যুত
ধর্মস্য সেতুং বধ্নামি চলিতে চলিতে যুগে
তাস্তা যোনীঃ প্রবিশ্যাহং প্রজানাং হিতকাম্যয়া

যদা ত্বহং দেবয়োনৌ বর্তামি ভৃগুনন্দন
তদাহং দেববত্সর্বমাচরামি ন সংশয়ঃ

যদা গন্ধর্বয়োনৌ তু বর্তামি ভৃগুনন্দন
তদা গন্ধর্ববচ্চেষ্টাঃ সর্বাশ্চেষ্টামি ভার্গব

নাগয়োনৌ যদা চৈব তদা বর্তামি নাগবৎ
যক্ষরাক্ষসয়োনীশ্চ যথাবদ্বিচরাম্যহম্

মানুষ্যে বর্তমানে তু কৃপণং যাচিতা ময়া
ন চ তে জাতসংমোহা বচো গৃহ্ণন্তি মে হিতম্

ভয়ং চ মহদুদ্দিশ্য ত্রাসিতাঃ কুরবো ময়া
ক্রুদ্ধেব ভূত্বা চ পুনর্যথাবদনুদর্শিতাঃ

তেঽধর্মেণেহ সংয়ুক্তাঃ পরীতাঃ কালধর্মণা
ধর্মেণ নিহতা যুদ্ধে গতাঃ স্বর্গং ন সংশয়ঃ

লোকেষু পাণ্ডবাশ্চৈব গতাঃ খ্যাতিং দ্বিজোত্তম
এতত্তে সর্বমাখ্যাতং যন্মাং ত্বং পরিপৃচ্ছসি