Utshovঅধ্যায় 54
54.1
উত্তঙ্ক উবাচ
অভিজানামি জগতঃ কর্তারং ত্বাং জনার্দন
নূনং ভবত্প্রসাদোঽয়মিতি মে নাস্তি সংশয়ঃ
54.2
চিত্তং চ সুপ্রসন্নং মে ত্বদ্ভাবগতমচ্যুত
বিনিবৃত্তশ্চ মে কোপ ইতি বিদ্ধি পরংতপ
54.3
যদি ত্বনুগ্রহং কংচিত্ত্বত্তোঽর্হোঽহং জনার্দন
দ্রষ্টুমিচ্ছামি তে রূপমৈশ্বরং তন্নিদর্শয়
54.4
বৈশংপায়ন উবাচ
ততঃ স তস্মৈ প্রীতাত্মা দর্শয়ামাস তদ্বপুঃ
শাশ্বতং বৈষ্ণবং ধীমান্দদৃশে যদ্ধনংজয়ঃ
54.5
স দদর্শ মহাত্মানং বিশ্বরূপং মহাভুজম্
বিস্ময়ং চ যয়ৌ বিপ্রস্তদ্দৃষ্ট্বা রূপমৈশ্বরম্
54.6
উত্তঙ্ক উবাচ
বিশ্বকর্মন্নমস্তেঽস্তু যস্য তে রূপমীদৃশম্
পদ্ভ্যাং তে পৃথিবী ব্যাপ্তা শিরসা চাবৃতং নভঃ
54.7
দ্যাবাপৃথিব্যোর্যন্মধ্যং জঠরেণ তদাবৃতম্
ভুজাভ্যামাবৃতাশ্চাশাস্ত্বমিদং সর্বমচ্যুত
54.8
সংহরস্ব পুনর্দেব রূপমক্ষয্যমুত্তমম্
পুনস্ত্বাং স্বেন রূপেণ দ্রষ্টুমিচ্ছামি শাশ্বতম্
54.9
বৈশংপায়ন উবাচ
তমুবাচ প্রসন্নাত্মা গোবিন্দো জনমেজয়
বরং বৃণীষ্বেতি তদা তমুত্তঙ্কোঽব্রবীদিদম্
54.10
পর্যাপ্ত এষ এবাদ্য বরস্ত্বত্তো মহাদ্যুতে
যত্তে রূপমিদং কৃষ্ণ পশ্যামি প্রভবাপ্যয়ম্
54.11
তমব্রবীত্পুনঃ কৃষ্ণো মা ত্বমত্র বিচারয়
অবশ্যমেতত্কর্তব্যমমোঘং দর্শনং মম
54.12
উত্তঙ্ক উবাচ
অবশ্যকরণীয়ং বৈ যদ্যেতন্মন্যসে বিভো
তোয়মিচ্ছামি যত্রেষ্টং মরুষ্বেতদ্ধি দুর্লভম্
54.13
বৈশংপায়ন উবাচ
ততঃ সংহৃত্য তত্তেজঃ প্রোবাচোত্তঙ্কমীশ্বরঃ
এষ্টব্যে সতি চিন্ত্যোঽহমিত্যুক্ত্বা দ্বারকাং যয়ৌ
54.14
ততঃ কদাচিদ্ভগবানুত্তঙ্কস্তোয়কাঙ্ক্ষয়া
তৃষিতঃ পরিচক্রাম মরৌ সস্মার চাচ্যুতম্
54.15
ততো দিগ্বাসসং ধীমান্মাতঙ্গং মলপঙ্কিনম্
অপশ্যত মরৌ তস্মিঞ্শ্বয়ূথপরিবারিতম্
54.16
ভীষণং বদ্ধনিস্ত্রিংশং বাণকার্মুকধারিণম্
তস্যাধঃ স্রোতসোঽপশ্যদ্বারি ভূরি দ্বিজোত্তমঃ
54.17
স্মরন্নেব চ তং প্রাহ মাতঙ্গঃ প্রহসন্নিব
এহ্যুত্তঙ্ক প্রতীচ্ছস্ব মত্তো বারি ভৃগূদ্বহ
কৃপা হি মে সুমহতী ত্বাং দৃষ্ট্বা তৃট্সমাহতম্
54.18
ইত্যুক্তস্তেন স মুনিস্তত্তোয়ং নাভ্যনন্দত
চিক্ষেপ চ স তং ধীমান্বাগ্ভিরুগ্রাভিরচ্যুতম্
54.19
পুনঃ পুনশ্চ মাতঙ্গঃ পিবস্বেতি তমব্রবীৎ
ন চাপিবত্স সক্রোধঃ ক্ষুভিতেনান্তরাত্মনা
54.20
স তথা নিশ্চয়াত্তেন প্রত্যাখ্যাতো মহাত্মনা
শ্বভিঃ সহ মহারাজ তত্রৈবান্তরধীয়ত
54.21
উত্তঙ্কস্তং তথা দৃষ্ট্বা ততো ব্রীডিতমানসঃ
মেনে প্রলব্ধমাত্মানং কৃষ্ণেনামিত্রঘাতিনা
54.22
অথ তেনৈব মার্গেণ শঙ্খচক্রগদাধরঃ
আজগাম মহাবাহুরুত্তঙ্কশ্চৈনমব্রবীৎ
54.23
ন যুক্তং তাদৃশং দাতুং ত্বয়া পুরুষসত্তম
সলিলং বিপ্রমুখ্যেভ্যো মাতঙ্গস্রোতসা বিভো
54.24
ইত্যুক্তবচনং ধীমান্মহাবুদ্ধির্জনার্দনঃ
উত্তঙ্কং শ্লক্ষ্ণয়া বাচা সান্ত্বয়ন্নিদমব্রবীৎ
54.25
যাদৃশেনেহ রূপেণ যোগ্যং দাতুং বৃতেন বৈ
তাদৃশং খলু মে দত্তং ত্বং তু তন্নাববুধ্যসে
54.26
ময়া ত্বদর্থমুক্তো হি বজ্রপাণিঃ পুরংদরঃ
উত্তঙ্কায়ামৃতং দেহি তোয়রূপমিতি প্রভুঃ
54.27
স মামুবাচ দেবেন্দ্রো ন মর্ত্যোঽমর্ত্যতাং ব্রজেৎ
অন্যমস্মৈ বরং দেহীত্যসকৃদ্ভৃগুনন্দন
54.28
অমৃতং দেয়মিত্যেব ময়োক্তঃ স শচীপতিঃ
স মাং প্রসাদ্য দেবেন্দ্রঃ পুনরেবেদমব্রবীৎ
54.29
যদি দেয়মবশ্যং বৈ মাতঙ্গোঽহং মহাদ্যুতে
ভূত্বামৃতং প্রদাস্যামি ভার্গবায় মহাত্মনে
54.30
যদ্যেবং প্রতিগৃহ্ণাতি ভার্গবোঽমৃতমদ্য বৈ
প্রদাতুমেষ গচ্ছামি ভার্গবায়ামৃতং প্রভো
প্রত্যাখ্যাতস্ত্বহং তেন ন দদ্যামিতি ভার্গব
54.31
স তথা সময়ং কৃত্বা তেন রূপেণ বাসবঃ
উপস্থিতস্ত্বয়া চাপি প্রত্যাখ্যাতোঽমৃতং দদৎ
চণ্ডালরূপী ভগবান্সুমহাংস্তে ব্যতিক্রমঃ
54.32
যত্তু শক্যং ময়া কর্তুং ভূয় এব তবেপ্সিতম্
তোয়েপ্সাং তব দুর্ধর্ষ করিষ্যে সফলামহম্
54.33
যেষ্বহঃসু তব ব্রহ্মন্সলিলেচ্ছা ভবিষ্যতি
তদা মরৌ ভবিষ্যন্তি জলপূর্ণাঃ পয়োধরাঃ
54.34
রসবচ্চ প্রদাস্যন্তি তে তোয়ং ভৃগুনন্দন
উত্তঙ্কমেঘা ইত্যুক্তাঃ খ্যাতিং যাস্যন্তি চাপি তে
54.35
ইত্যুক্তঃ প্রীতিমান্বিপ্রঃ কৃষ্ণেন স বভূব হ
অদ্যাপ্যুত্তঙ্কমেঘাশ্চ মরৌ বর্ষন্তি ভারত