Utshovঅধ্যায় 55
55.1
জনমেজয় উবাচ
উত্তঙ্কঃ কেন তপসা সংয়ুক্তঃ সুমহাতপাঃ
যঃ শাপং দাতুকামোঽভূদ্বিষ্ণবে প্রভবিষ্ণবে
55.2
বৈশংপায়ন উবাচ
উত্তঙ্কো মহতা যুক্তস্তপসা জনমেজয়
গুরুভক্তঃ স তেজস্বী নান্যং কংচিদপূজয়ৎ
55.3
সর্বেষামৃষিপুত্রাণামেষ চাসীন্মনোরথঃ
ঔত্তঙ্কীং গুরুবৃত্তিং বৈ প্রাপ্নুয়ামিতি ভারত
55.4
গৌতমস্য তু শিষ্যাণাং বহূনাং জনমেজয়
উত্তঙ্কেঽভ্যধিকা প্রীতিঃ স্নেহশ্চৈবাভবত্তদা
55.5
স তস্য দমশৌচাভ্যাং বিক্রান্তেন চ কর্মণা
সম্যক্চৈবোপচারেণ গৌতমঃ প্রীতিমানভূৎ
55.6
অথ শিষ্যসহস্রাণি সমনুজ্ঞায় গৌতমঃ
উত্তঙ্কং পরয়া প্রীত্যা নাভ্যনুজ্ঞাতুমৈচ্ছত
55.7
তং ক্রমেণ জরা তাত প্রতিপেদে মহামুনিম্
ন চান্ববুধ্যত তদা স মুনির্গুরুবত্সলঃ
55.8
ততঃ কদাচিদ্রাজেন্দ্র কাষ্ঠান্যানয়িতুং যয়ৌ
উত্তঙ্কঃ কাষ্ঠভারং চ মহান্তং সমুপানয়ৎ
55.9
স তু ভারাভিভূতাত্মা কাষ্ঠভারমরিংদম
নিষ্পিপেষ ক্ষিতৌ রাজন্পরিশ্রান্তো বুভুক্ষিতঃ
55.10
তস্য কাষ্ঠে বিলগ্নাভূজ্জটা রূপ্যসমপ্রভা
ততঃ কাষ্ঠৈঃ সহ তদা পপাত ধরণীতলে
55.11
ততঃ স ভারনিষ্পিষ্টঃ ক্ষুধাবিষ্টশ্চ ভার্গবঃ
দৃষ্ট্বা তাং বয়সোঽবস্থাং রুরোদার্তস্বরং তদা
55.12
ততো গুরুসুতা তস্য পদ্মপত্রনিভেক্ষণা
জগ্রাহাশ্রূণি সুশ্রোণী করেণ পৃথুলোচনা
পিতুর্নিয়োগাদ্ধর্মজ্ঞা শিরসাবনতা তদা
55.13
তস্যা নিপেততুর্দগ্ধৌ করৌ তৈরশ্রুবিন্দুভিঃ
ন হি তানশ্রুপাতান্বৈ শক্তা ধারয়িতুং মহী
55.14
গৌতমস্ত্বব্রবীদ্বিপ্রমুত্তঙ্কং প্রীতমানসঃ
কস্মাত্তাত তবাদ্যেহ শোকোত্তরমিদং মনঃ
স স্বৈরং ব্রূহি বিপ্রর্ষে শ্রোতুমিচ্ছামি তে বচঃ
55.15
উত্তঙ্ক উবাচ
ভবদ্গতেন মনসা ভবত্প্রিয়চিকীর্ষয়া
ভবদ্ভক্তিগতেনেহ ভবদ্ভাবানুগেন চ
55.16
জরেয়ং নাববুদ্ধা মে নাভিজ্ঞাতং সুখং চ মে
শতবর্ষোষিতং হি ত্বং ন মামভ্যনুজানথাঃ
55.17
ভবতা হ্যভ্যনুজ্ঞাতাঃ শিষ্যাঃ প্রত্যবরা ময়া
উপপন্না দ্বিজশ্রেষ্ঠ শতশোঽথ সহস্রশঃ
55.18
গৌতম উবাচ
ত্বত্প্রীতিয়ুক্তেন ময়া গুরুশুশ্রূষয়া তব
ব্যতিক্রামন্মহান্কালো নাববুদ্ধো দ্বিজর্ষভ
55.19
কিং ত্বদ্য যদি তে শ্রদ্ধা গমনং প্রতি ভার্গব
অনুজ্ঞাং গৃহ্য মত্তস্ত্বং গৃহান্গচ্ছস্ব মা চিরম্
55.20
উত্তঙ্ক উবাচ
গুর্বর্থং কং প্রয়চ্ছামি ব্রূহি ত্বং দ্বিজসত্তম
তমুপাকৃত্য গচ্ছেয়মনুজ্ঞাতস্ত্বয়া বিভো
55.21
গৌতম উবাচ
দক্ষিণা পরিতোষো বৈ গুরূণাং সদ্ভিরুচ্যতে
তব হ্যাচরতো ব্রহ্মংস্তুষ্টোঽহং বৈ ন সংশয়ঃ
55.22
ইত্থং চ পরিতুষ্টং মাং বিজানীহি ভৃগূদ্বহ
যুবা ষোডশবর্ষো হি যদদ্য ভবিতা ভবান্
55.23
দদামি পত্নীং কন্যাং চ স্বাং তে দুহিতরং দ্বিজ
এতামৃতে হি নান্যা বৈ ত্বত্তেজোঽর্হতি সেবিতুম্
55.24
ততস্তাং প্রতিজগ্রাহ যুবা ভূত্বা যশস্বিনীম্
গুরুণা চাভ্যনুজ্ঞাতো গুরুপত্নীমথাব্রবীৎ
55.25
কিং ভবত্যৈ প্রয়চ্ছামি গুর্বর্থং বিনিয়ুঙ্ক্ষ্ব মাম্
প্রিয়ং হি তব কাঙ্ক্ষামি প্রাণৈরপি ধনৈরপি
55.26
যদ্দুর্লভং হি লোকেঽস্মিন্রত্নমত্যদ্ভুতং ভবেৎ
তদানয়েয়ং তপসা ন হি মেঽত্রাস্তি সংশয়ঃ
55.27
অহল্যোবাচ
পরিতুষ্টাস্মি তে পুত্র নিত্যং ভগবতা সহ
পর্যাপ্তয়ে তদ্ভদ্রং তে গচ্ছ তাত যথেচ্ছকম্
55.28
বৈশংপায়ন উবাচ
উত্তঙ্কস্তু মহারাজ পুনরেবাব্রবীদ্বচঃ
আজ্ঞাপয়স্ব মাং মাতঃ কর্তব্যং হি প্রিয়ং তব
55.29
অহল্যোবাচ
সৌদাসপত্ন্যা বিদিতে দিব্যে বৈ মণিকুণ্ডলে
তে সমানয় ভদ্রং তে গুর্বর্থঃ সুকৃতো ভবেৎ
55.30
স তথেতি প্রতিশ্রুত্য জগাম জনমেজয়
গুরুপত্নীপ্রিয়ার্থং বৈ তে সমানয়িতুং তদা
55.31
স জগাম ততঃ শীঘ্রমুত্তঙ্কো ব্রাহ্মণর্ষভঃ
সৌদাসং পুরুষাদং বৈ ভিক্ষিতুং মণিকুণ্ডলে
55.32
গৌতমস্ত্বব্রবীত্পত্নীমুত্তঙ্কো নাদ্য দৃশ্যতে
ইতি পৃষ্টা তমাচষ্ট কুণ্ডলার্থং গতং তু বৈ
55.33
ততঃ প্রোবাচ পত্নীং স ন তে সম্যগিদং কৃতম্
শপ্তঃ স পার্থিবো নূনং ব্রাহ্মণং তং বধিষ্যতি
55.34
অহল্যোবাচ
অজানন্ত্যা নিয়ুক্তঃ স ভগবন্ব্রাহ্মণোঽদ্য মে
ভবত্প্রসাদান্ন ভয়ং কিংচিত্তস্য ভবিষ্যতি
55.35
ইত্যুক্তঃ প্রাহ তাং পত্নীমেবমস্ত্বিতি গৌতমঃ
উত্তঙ্কোঽপি বনে শূন্যে রাজানং তং দদর্শ হ