Utshovঅধ্যায় 56
56.1
বৈশংপায়ন উবাচ
স তং দৃষ্ট্বা তথাভূতং রাজানং ঘোরদর্শনম্
দীর্ঘশ্মশ্রুধরং নৄণাং শোণিতেন সমুক্ষিতম্
56.2
চকার ন ব্যথাং বিপ্রো রাজা ত্বেনমথাব্রবীৎ
প্রত্যুত্থায় মহাতেজা ভয়কর্তা যমোপমঃ
56.3
দিষ্ট্যা ত্বমসি কল্যাণ ষষ্ঠে কালে মমান্তিকম্
ভক্ষং মৃগয়মাণস্য সংপ্রাপ্তো দ্বিজসত্তম
56.4
উত্তঙ্ক উবাচ
রাজন্গুর্বর্থিনং বিদ্ধি চরন্তং মামিহাগতম্
ন চ গুর্বর্থমুদ্যুক্তং হিংস্যমাহুর্মনীষিণঃ
56.5
রাজোবাচ
ষষ্ঠে কালে মমাহারো বিহিতো দ্বিজসত্তম
ন চ শক্যঃ সমুত্স্রষ্টুং ক্ষুধিতেন ময়াদ্য বৈ
56.6
উত্তঙ্ক উবাচ
এবমস্তু মহারাজ সময়ঃ ক্রিয়তাং তু মে
গুর্বর্থমভিনির্বর্ত্য পুনরেষ্যামি তে বশম্
56.7
সংশ্রুতশ্চ ময়া যোঽর্থো গুরবে রাজসত্তম
ত্বদধীনঃ স রাজেন্দ্র তং ত্বা ভিক্ষে নরেশ্বর
56.8
দদাসি বিপ্রমুখ্যেভ্যস্ত্বং হি রত্নানি সর্বশঃ
দাতা ত্বং চ নরব্যাঘ্র পাত্রভূতঃ ক্ষিতাবিহ
পাত্রং প্রতিগ্রহে চাপি বিদ্ধি মাং নৃপসত্তম
56.9
উপাকৃত্য গুরোরর্থং ত্বদায়ত্তমরিংদম
সময়েনেহ রাজেন্দ্র পুনরেষ্যামি তে বশম্
56.10
সত্যং তে প্রতিজানামি নাত্র মিথ্যাস্তি কিংচন
অনৃতং নোক্তপূর্বং মে স্বৈরেষ্বপি কুতোঽন্যথা
56.11
সৌদাস উবাচ
যদি মত্তস্ত্বদায়ত্তো গুর্বর্থঃ কৃত এব সঃ
যদি চাস্মি প্রতিগ্রাহ্যঃ সাংপ্রতং তদ্ব্রবীহি মে
56.12
উত্তঙ্ক উবাচ
প্রতিগ্রাহ্যো মতো মে ত্বং সদৈব পুরুষর্ষভ
সোঽহং ত্বামনুসংপ্রাপ্তো ভিক্ষিতুং মণিকুণ্ডলে
56.13
সৌদাস উবাচ
পত্ন্যাস্তে মম বিপ্রর্ষে রুচিরে মণিকুণ্ডলে
বরয়ার্থং ত্বমন্যং বৈ তং তে দাস্যামি সুব্রত
56.14
উত্তঙ্ক উবাচ
অলং তে ব্যপদেশেন প্রমাণং যদি তে বয়ম্
প্রয়চ্ছ কুণ্ডলে মে ত্বং সত্যবাগ্ভব পার্থিব
56.15
বৈশংপায়ন উবাচ
ইত্যুক্তস্ত্বব্রবীদ্রাজা তমুত্তঙ্কং পুনর্বচঃ
গচ্ছ মদ্বচনাদ্দেবীং ব্রূহি দেহীতি সত্তম
56.16
সৈবমুক্তা ত্বয়া নূনং মদ্বাক্যেন শুচিস্মিতা
প্রদাস্যতি দ্বিজশ্রেষ্ঠ কুণ্ডলে তে ন সংশয়ঃ
56.17
উত্তঙ্ক উবাচ
ক্ব পত্নী ভবতঃ শক্যা ময়া দ্রষ্টুং নরেশ্বর
স্বয়ং বাপি ভবান্পত্নীং কিমর্থং নোপসর্পতি
56.18
সৌদাস উবাচ
দ্রক্ষ্যতে তাং ভবানদ্য কস্মিংশ্চিদ্বননির্ঝরে
ষষ্ঠে কালে ন হি ময়া সা শক্যা দ্রষ্টুমদ্য বৈ
56.19
উত্তঙ্কস্তু তথোক্তঃ স জগাম ভরতর্ষভ
মদয়ন্তীং চ দৃষ্ট্বা সোঽজ্ঞাপয়ত্স্বং প্রয়োজনম্
56.20
সৌদাসবচনং শ্রুত্বা ততঃ সা পৃথুলোচনা
প্রত্যুবাচ মহাবুদ্ধিমুত্তঙ্কং জনমেজয়
56.21
এবমেতন্মহাব্রহ্মন্নানৃতং বদসেঽনঘ
অভিজ্ঞানং তু কিংচিত্ত্বং সমানেতুমিহার্হসি
56.22
ইমে হি দিব্যে মণিকুণ্ডলে মে; দেবাশ্চ যক্ষাশ্চ মহোরগাশ্চ
তৈস্তৈরুপায়ৈঃ পরিহর্তুকামা;শ্ছিদ্রেষু নিত্যং পরিতর্কয়ন্তি
56.23
নিক্ষিপ্তমেতদ্ভুবি পন্নগাস্তু; রত্নং সমাসাদ্য পরামৃষেয়ুঃ
যক্ষাস্তথোচ্ছিষ্টধৃতং সুরাশ্চ; নিদ্রাবশং ত্বা পরিধর্ষয়েয়ুঃ
56.24
ছিদ্রেষ্বেতেষু হি সদা হ্যধৃষ্যেষু দ্বিজর্ষভ
দেবরাক্ষসনাগানামপ্রমত্তেন ধার্যতে
56.25
স্যন্দেতে হি দিবা রুক্মং রাত্রৌ চ দ্বিজসত্তম
নক্তং নক্ষত্রতারাণাং প্রভামাক্ষিপ্য বর্ততে
56.26
এতে হ্যামুচ্য ভগবন্ক্ষুত্পিপাসাভয়ং কুতঃ
বিষাগ্নিশ্বাপদেভ্যশ্চ ভয়ং জাতু ন বিদ্যতে
56.27
হ্রস্বেন চৈতে আমুক্তে ভবতো হ্রস্বকে তদা
অনুরূপেণ চামুক্তে তত্প্রমাণে হি জায়তঃ
56.28
এবংবিধে মমৈতে বৈ কুণ্ডলে পরমার্চিতে
ত্রিষু লোকেষু বিখ্যাতে তদভিজ্ঞানমানয়