Utshovঅধ্যায় 57
57.1
বৈশংপায়ন উবাচ
স মিত্রসহমাসাদ্য ত্বভিজ্ঞানময়াচত
তস্মৈ দদাবভিজ্ঞানং স চেক্ষ্বাকুবরস্তদা
57.2
সৌদাস উবাচ
ন চৈবৈষা গতিঃ ক্ষেম্যা ন চান্যা বিদ্যতে গতিঃ
এতন্মে মতমাজ্ঞায় প্রয়চ্ছ মণিকুণ্ডলে
57.3
বৈশংপায়ন উবাচ
ইত্যুক্তস্তামুত্তঙ্কস্তু ভর্তুর্বাক্যমথাব্রবীৎ
শ্রুত্বা চ সা ততঃ প্রাদাত্তস্মৈ তে মণিকুণ্ডলে
57.4
অবাপ্য কুণ্ডলে তে তু রাজানং পুনরব্রবীৎ
কিমেতদ্গুহ্যবচনং শ্রোতুমিচ্ছামি পার্থিব
57.5
সৌদাস উবাচ
প্রজা নিসর্গাদ্বিপ্রান্বৈ ক্ষত্রিয়াঃ পূজয়ন্তি হ
বিপ্রেভ্যশ্চাপি বহবো দোষাঃ প্রাদুর্ভবন্তি নঃ
57.6
সোঽহং দ্বিজেভ্যঃ প্রণতো বিপ্রাদ্দোষমবাপ্তবান্
গতিমন্যাং ন পশ্যামি মদয়ন্তীসহায়বান্
স্বর্গদ্বারস্য গমনে স্থানে চেহ দ্বিজোত্তম
57.7
ন হি রাজ্ঞা বিশেষেণ বিরুদ্ধেন দ্বিজাতিভিঃ
শক্যং নৃলোকে সংস্থাতুং প্রেত্য বা সুখমেধিতুম্
57.8
তদিষ্টে তে ময়ৈবৈতে দত্তে স্বে মণিকুণ্ডলে
যঃ কৃতস্তেঽদ্য সময়ঃ সফলং তং কুরুষ্ব মে
57.9
উত্তঙ্ক উবাচ
রাজংস্তথেহ কর্তাস্মি পুনরেষ্যামি তে বশম্
প্রশ্নং তু কংচিত্প্রষ্টুং ত্বাং ব্যবসিষ্যে পরংতপ
57.10
সৌদাস উবাচ
ব্রূহি বিপ্র যথাকামং প্রতিবক্তাস্মি তে বচঃ
ছেত্তাস্মি সংশয়ং তেঽদ্য ন মেঽত্রাস্তি বিচারণা
57.11
উত্তঙ্ক উবাচ
প্রাহুর্বাক্সংগতং মিত্রং ধর্মনৈপুণ্যদর্শিনঃ
মিত্রেষু যশ্চ বিষমঃ স্তেন ইত্যেব তং বিদুঃ
57.12
স ভবান্মিত্রতামদ্য সংপ্রাপ্তো মম পার্থিব
স মে বুদ্ধিং প্রয়চ্ছস্ব সমাং বুদ্ধিমতাং বর
57.13
অবাপ্তার্থোঽহমদ্যেহ ভবাংশ্চ পুরুষাদকঃ
ভবত্সকাশমাগন্তুং ক্ষমং মম ন বেতি বা
57.14
সৌদাস উবাচ
ক্ষমং চেদিহ বক্তব্যং ময়া দ্বিজবরোত্তম
মত্সমীপং দ্বিজশ্রেষ্ঠ নাগন্তব্যং কথংচন
57.15
এবং তব প্রপশ্যামি শ্রেয়ো ভৃগুকুলোদ্বহ
আগচ্ছতো হি তে বিপ্র ভবেন্মৃত্যুরসংশয়ম্
57.16
বৈশংপায়ন উবাচ
ইত্যুক্তঃ স তদা রাজ্ঞা ক্ষমং বুদ্ধিমতা হিতম্
সমনুজ্ঞাপ্য রাজানমহল্যাং প্রতি জগ্মিবান্
57.17
গৃহীত্বা কুণ্ডলে দিব্যে গুরুপত্ন্যাঃ প্রিয়ংকরঃ
জবেন মহতা প্রায়াদ্গৌতমস্যাশ্রমং প্রতি
57.18
যথা তয়ো রক্ষণং চ মদয়ন্ত্যাভিভাষিতম্
তথা তে কুণ্ডলে বদ্ধ্বা তথা কৃষ্ণাজিনেঽনয়ৎ
57.19
স কস্মিংশ্চিত্ক্ষুধাবিষ্টঃ ফলভারসমন্বিতম্
বিল্বং দদর্শ কস্মিংশ্চিদারুরোহ ক্ষুধান্বিতঃ
57.20
শাখাস্বাসজ্য তস্যৈব কৃষ্ণাজিনমরিংদম
যস্মিংস্তে কুণ্ডলে বদ্ধে তদা দ্বিজবরেণ বৈ
57.21
বিশীর্ণবন্ধনে তস্মিন্গতে কৃষ্ণাজিনে মহীম্
অপশ্যদ্ভুজগঃ কশ্চিত্তে তত্র মণিকুণ্ডলে
57.22
ঐরাবতকুলোত্পন্নঃ শীঘ্রো ভূত্বা তদা স বৈ
বিদশ্যাস্যেন বল্মীকং বিবেশাথ স কুণ্ডলে
57.23
হ্রিয়মাণে তু দৃষ্ট্বা স কুণ্ডলে ভুজগেন হ
পপাত বৃক্ষাত্সোদ্বেগো দুঃখাত্পরমকোপনঃ
57.24
স দণ্ডকাষ্ঠমাদায় বল্মীকমখনত্তদা
ক্রোধামর্ষাভিতপ্তাঙ্গস্ততো বৈ দ্বিজপুংগবঃ
57.25
তস্য বেগমসহ্যং তমসহন্তী বসুংধরা
দণ্ডকাষ্ঠাভিনুন্নাঙ্গী চচাল ভৃশমাতুরা
57.26
ততঃ খনত এবাথ বিপ্রর্ষের্ধরণীতলম্
নাগলোকস্য পন্থানং কর্তুকামস্য নিশ্চয়াৎ
57.27
রথেন হরিয়ুক্তেন তং দেশমুপজগ্মিবান্
বজ্রপাণির্মহাতেজা দদর্শ চ দ্বিজোত্তমম্
57.28
স তু তং ব্রাহ্মণো ভূত্বা তস্য দুঃখেন দুঃখিতঃ
উত্তঙ্কমব্রবীত্তাত নৈতচ্ছক্যং ত্বয়েতি বৈ
57.29
ইতো হি নাগলোকো বৈ যোজনানি সহস্রশঃ
ন দণ্ডকাষ্ঠসাধ্যং চ মন্যে কার্যমিদং তব
57.30
উত্তঙ্ক উবাচ
নাগলোকে যদি ব্রহ্মন্ন শক্যে কুণ্ডলে ময়া
প্রাপ্তুং প্রাণান্বিমোক্ষ্যামি পশ্যতস্তে দ্বিজোত্তম
57.31
যদা স নাশকত্তস্য নিশ্চয়ং কর্তুমন্যথা
বজ্রপাণিস্তদা দণ্ডং বজ্রাস্ত্রেণ যুয়োজ হ
57.32
ততো বজ্রপ্রহারৈস্তৈর্দার্যমাণা বসুংধরা
নাগলোকস্য পন্থানমকরোজ্জনমেজয়
57.33
স তেন মার্গেণ তদা নাগলোকং বিবেশ হ
দদর্শ নাগলোকং চ যোজনানি সহস্রশঃ
57.34
প্রাকারনিচয়ৈর্দিব্যৈর্মণিমুক্তাভ্যলংকৃতৈঃ
উপপন্নং মহাভাগ শাতকুম্ভময়ৈস্তথা
57.35
বাপীঃ স্ফটিকসোপানা নদীশ্চ বিমলোদকাঃ
দদর্শ বৃক্ষাংশ্চ বহূন্নানাদ্বিজগণায়ুতান্
57.36
তস্য লোকস্য চ দ্বারং দদর্শ স ভৃগূদ্বহঃ
পঞ্চয়োজনবিস্তারমায়তং শতয়োজনম্
57.37
নাগলোকমুত্তঙ্কস্তু প্রেক্ষ্য দীনোঽভবত্তদা
নিরাশশ্চাভবত্তাত কুণ্ডলাহরণে পুনঃ
57.38
তত্র প্রোবাচ তুরগস্তং কৃষ্ণশ্বেতবালধিঃ
তাম্রাস্যনেত্রঃ কৌরব্য প্রজ্বলন্নিব তেজসা
57.39
ধমস্বাপানমেতন্মে ততস্ত্বং বিপ্র লপ্স্যসে
ঐরাবতসুতেনেহ তবানীতে হি কুণ্ডলে
57.40
মা জুগুপ্সাং কৃথাঃ পুত্র ত্বমত্রার্থে কথংচন
ত্বয়ৈতদ্ধি সমাচীর্ণং গৌতমস্যাশ্রমে তদা
57.41
উত্তঙ্ক উবাচ
কথং ভবন্তং জানীয়ামুপাধ্যায়াশ্রমং প্রতি
যন্ময়া চীর্ণপূর্বং চ শ্রোতুমিচ্ছামি তদ্ধ্যহম্
57.42
অশ্ব উবাচ
গুরোর্গুরুং মাং জানীহি জ্বলিতং জাতবেদসম্
ত্বয়া হ্যহং সদা বত্স গুরোরর্থেঽভিপূজিতঃ
57.43
সততং পূজিতো বিপ্র শুচিনা ভৃগুনন্দন
তস্মাচ্ছ্রেয়ো বিধাস্যামি তবৈবং কুরু মা চিরম্
57.44
ইত্যুক্তঃ স তথাকার্ষীদুত্তঙ্কশ্চিত্রভানুনা
ঘৃতার্চিঃ প্রীতিমাংশ্চাপি প্রজজ্বাল দিধক্ষয়া
57.45
ততোঽস্য রোমকূপেভ্যো ধ্মায়মানস্য ভারত
ঘনঃ প্রাদুরভূদ্ধূমো নাগলোকভয়াবহঃ
57.46
তেন ধূমেন সহসা বর্ধমানেন ভারত
নাগলোকে মহারাজ ন প্রজ্ঞায়ত কিংচন
57.47
হাহাকৃতমভূত্সর্বমৈরাবতনিবেশনম্
বাসুকিপ্রমুখানাং চ নাগানাং জনমেজয়
57.48
ন প্রকাশন্ত বেশ্মানি ধূমরুদ্ধানি ভারত
নীহারসংবৃতানীব বনানি গিরয়স্তথা
57.49
তে ধূমরক্তনয়না বহ্নিতেজোভিতাপিতাঃ
আজগ্মুর্নিশ্চয়ং জ্ঞাতুং ভার্গবস্যাতিতেজসঃ
57.50
শ্রুত্বা চ নিশ্চয়ং তস্য মহর্ষেস্তিগ্মতেজসঃ
সংভ্রান্তমনসঃ সর্বে পূজাং চক্রুর্যথাবিধি
57.51
সর্বে প্রাঞ্জলয়ো নাগা বৃদ্ধবালপুরোগমাঃ
শিরোভিঃ প্রণিপত্যোচুঃ প্রসীদ ভগবন্নিতি
57.52
প্রসাদ্য ব্রাহ্মণং তে তু পাদ্যমর্ঘ্যং নিবেদ্য চ
প্রায়চ্ছন্কুণ্ডলে দিব্যে পন্নগাঃ পরমার্চিতে
57.53
ততঃ সংপূজিতো নাগৈস্তত্রোত্তঙ্কঃ প্রতাপবান্
অগ্নিং প্রদক্ষিণং কৃত্বা জগাম গুরুসদ্ম তৎ
57.54
স গত্বা ত্বরিতো রাজন্গৌতমস্য নিবেশনম্
প্রায়চ্ছত্কুণ্ডলে দিব্যে গুরুপত্ন্যৈ তদানঘ
57.55
এবং মহাত্মনা তেন ত্রীঁল্লোকাঞ্জনমেজয়
পরিক্রম্যাহৃতে দিব্যে ততস্তে মণিকুণ্ডলে
57.56
এবংপ্রভাবঃ স মুনিরুত্তঙ্কো ভরতর্ষভ
পরেণ তপসা যুক্তো যন্মাং ত্বং পরিপৃচ্ছসি